صراع عائلة الطوجي

التاسع عشر

بعد ان انتهى محمود من سرد الماضي الذي كان يسعى لنسيانه...نظر الي مروة لكي يرى رد فعلها على ما قاله وكما توقع رأى الصدمة تحتل ملامح وجهها بالكامل........

مروة بصدمة: يعني انت عايز تقولي ان عاصم ده هو السبب في موت صاحبك؟!
محمود بتنهيدة حزينة: ايوا يامروة وهو السبب كمان في بعدي عن صالح الله يرحمه لمدة خمس سنين.
مروة: ويوسف ده يبقا مين؟!
محمود: ده الراجل اللي جالي هنا من فترة يبلغني بموت صالح الله يرحمه واللي وصلي وصية صالح كمان.
مروة بتذكر: اه عشان كده كنت شايل الهم!!
محمود: ايوا..كنت مش عايز ارجع للعيلة دي تاني.
مروة بتعجب: ليه ما انت مالكش ذنب في اللي حصل لصاحبك ده..ثم عيلة الطوجي مالها وماله اصلا؟!
محمود بسخرية: اه ما انا نسيت اقولك ان شاكر اسمه بالكامل شاكر صالح الطوجي..وعياله فهد وعمر شاكر الطوجي.
مروة بصدمة كبيرة: ياخبر اسود!!..فهد يبقا ابن صاحبك شاكر ده؟!
محمود: اه يامروة.
مروة عادت لحيرتها مرة اخرى وقالت: طب بردو انت ايه ذنبك في اللي حصله؟!
محمود: ماهو هما شايفني ان انا السبب في موت شاكر عشان كنت في مكان الحادثة.
مروة باستغراب: ليه ان شاء الله..انت مش كان معاك الرسالة اللي بعتهالك الزفت ده؟!
محمود بابتسامة مريرة: صح..بس عقبال ماروحت عشان أبلغ عنه كان هو مسحها.
مروة: ازاي ده؟!..ماينفعش حد يمسح رسالة على تليفون حد تاني غير انه يدخل عليه!!
محمود: ماهو انا سالت في الموضوع ده وعرفت ان ممكن عن طريق خبير في التهكير..واظن انك تعرفي الموضوع ده.
مروة بغضب: يابن الصايعة!!..عشان كده كانت جت عليك فترة كده كنت متعصب فيها وعمال تقول مسحها ابن الكلب!!
محمود: كويس انك فاكرة.
مروة: طبعا ده خمس سنين مش 15 سنة طب وبعدين؟!
محمود: ولا قبلين..هما بلغوا عني وماعرفش مين بالظبط اللي بلغ منهم بس ماثبتش عليا حاجة وطلعت بعد اسبوع بالظبط..والحادثة اتايدت ضد مجهول.
مروة: يابن الابلسة..طلع منها زي الشعرة من العجين.
محمود بغضب: لغاية دلوقتي نفسي اطلع دليل عليه بس مش عارف وكل ما اعمل كده هو ياذيني..لغاية ماجت فيكي انتي عشان ينتقم من اللي عملته فيه.
عائشة هنا تدخلت بغضب: عشان كده لازم تطلعه من دماغك يامحمود المرة دي عدت على خير..الله اعلم المرة الجاية هيحصل ايه تاني.
محمود: صح ياعائشة وانا فعلا هبطل ادور وراه ع الله هو اللي يطلعني من دماغه بقا ويسيب عيلتي في حالها.
مروة بسخرية: ازاي يابابا وانت ساجن ابنه قبل كده ومات فيه كمان!!
محمود: ماهو هو اللي بدا بموت اخويا الاول وانا رديت عليه..ثم انا سجنته بس وكده كده كان مسيره هيتسجن بسبب اللي كان بيضربه ده بس الفكرة اني عجلت سجنه مش اكتر وهو مات من الجرعة الزايدة اللي اخدها.
مروة: طب وفهد؟!
محمود بتعجب: ماله؟!
مروة بتردد: هل يعرف اللي حصل؟!
محمود: ماحدش من أحفاد الطوجي كلهم يعرفوا حاجة اصلا ومنهم فهد وعمر اولاد شاكر..بس......
مروة بخوف: بس ايه؟!
محمود: غالبا اللي يعرف كل ده وساكت كبير العيلة حاليا.
مروة بتفكير: قصدك هشام عم فهد؟!
محمود: بالظبط كده..عشان هو اللي كان على تواصل بعاصم اغلب الوقت اكتر مننا وكمان كانت اغلب الأسرار معاه هو.
مروة: طب وساكت ليه لغاية دلوقتي طالما عارف انك مظلوم؟!
محمود: مش عارف بس المهم ان فيه حد يعرف الحقيقة.
مروة بتنهد: يالهوي على دي قصة.
عائشة بابتسامة حنونة: المهم انك مصدقانه يابنتي؟!
مروة بابتسامة عذبة: طبعا ياماما انا عمري ماشكيت فيكوا اصلا انا بس زعلت انكوا كنتوا مخبين عليا طول الفترة دي ولما عرفت يكون من واحد زي عاصم ده!!
محمود قبل مقدمة راسها وقال: ماتزعليش مننا ياحببتي انا والله ماكنت عايز اتكلم وكنت بحاول انسى اصلا اللي حصل..بس الحمد لله لما اتكلمت معاكي ارتحت اكتر لان كنت شايل هم انك تعرفي من حد تاني واكيد ماكنش هيقولك الحقيقة.
مروة: حتى لو ده حصل يابابا انا يستحيل اشك فيك ابدا انت عارفني..(ثم قالت بمزاح لوالدها)..ولا انت مش عارف بنتك كويس ياحج محمود؟!
محمود بسعادة: لا طبعا عارف وعشان كده كنت خايف.
مروة بغضب طفولي: بقا كده ياحج!!..طييب انا زعلانة منك.
عائشة بضحك: طب ماتزعليش وانا هعملك صنية الساردين اللي انتي بتحبيها.
مروة بسعادة وصراخ: ياسلااااام عليكي ياست الكل اهو هو ده الكلام..وانا هروح اصلي واجي اساعدك.
محمود بابتسامة: ماشي ياختي تقبل الله مقدما.
مروة قبلت خده وقالت: منا ومنكم ياحج.
ثم ذهبت لغرفتها.....