Uni
လှိုင် နေ့လည်စာစားပြီးသည့်နောက် ခြံထဲတွင် ခဏထိုင်နေသည် ။ ထိုအချိန်တွင် တစ်စုံတစ်ယောက်က လှိုင့်ဆီသို့ ဖုန်းဆက်လာသည် ။
" ဟလို... ထွေးငယ် "
" ထွေး ဒီနေ့ နည်းနည်းအားတယ် မမလှိုင် ။ ဆေးခန်းမသွားဖြစ်ဘူး "
" အဲ့ဒီတော့ တို့က ဘာလုပ်ပေးရမလဲပြော "
" တော်ပြီ ...တော်ပြီ ။ ဘာမှလုပ်မပေးနဲ့ " ခင်ထွေးမွန် ခပ်စွာစွာပင်ပြန်ပြောလိုက်သည် ။
" ဟောတော်... အသံက ဘယ်လိုဖြစ်ရတာတုန်း "
လှိုင့်ရယ်သံလွင်လွင်က ချစ်စရာအတိ ။
" အားမှတော့ မမလှိုင်နဲ့တွေ့ချင်တာပေါ့ ။ ထွေးက ထွေးချစ်သူလေးကိုလွမ်းနေတာလေ "
" တွေ့ချင်ရင်တွေ့ချင်တယ်ပြောပေါ့ ။ မင်းအမျိုးသမီးက အဲ့လိုပြောတာကို ကြားချင်တာလေကွယ် "
" ထွေးလာတွေ့ရမလား ။ လွမ်းလွန်းလို့ပါ မမလှိုင်ရယ် "
" အင်းပါ ကလေးရယ် ။ ခဏနေရင် တို့ မင်းကိုလာခေါ်မယ် "
" မေမေ သဘောကျပါ့မလား မမလှိုင် "
" စိတ်မပူပါနဲ့ ။ အပြင်သွားဖို့သာ ပြင်ဆင်ထား ။ ဟုတ်ပြီလား "
" ဟုတ် "
ထွေးနှင့်ဖုန်းပြောပြီးနောက် လှိုင် သူ့အခန်းထဲသို့ပြန်သွားလိုက်သည် ။ ထို့နောက် လိမ္မော်ရောင်ဝမ်းဆက်တစ်စုံကိုရွေးချယ်ကာ အဝတ်အစားလဲလိုက်သည် ။ မပြင်မဆင်ဘဲနှင်ပြင်လှသူမို့ လှိုင်မှန်တင်ခုံရှေ့တွင် ကြာကြာမထိုင်လိုက်ရ ။
ပြင်ဆင်စရာရှိသည်တို့ကို ပြင်ဆင်ပြီးနောက်တွင် လှိုင် ထွေးတို့အိမ်သို့ ကားမောင်းပြီးသွားလိုက်သည် ။
" ခင်ထွေးမွန် ... ခင်ထွေးမွန် "
မိမိနာမည်ကို ခြံရှေ့မှ အကျယ်ကြီးအော်ခေါ်နေသည့် လှိုင့်ကြောင့် ထွေးဇက်ကလေးပုသွားသည် ။ ဧည့်ခန်းထဲတွင် အမေဖြစ်သူနှင့်စကားပြောနေရာမှထကာ ထွေး လှိုင့်ကို ခြံတံခါးသွားဖွင့်ပေးလိုက်သည် ။
" အိမ်ထဲဝင်ဦးလေ မမလှိုင် "
" အင်း " လှိုင် ထွေးခေါင်းပေါ်ကို လက်ကလေးတင်ကာပြောလိုက်သည် ။
YOU ARE READING
ကံ့ကော်ဝေသော//ကံ့ေကာ္ေဝေသာ
Romanceကံ့ကော်တွေပွင့်တာမြင်တော့ ကံ့ကော်လှိုင်ဆိုတဲ့အမျိုးသမီးတစ်ယောက်ကို ဖန်တီးမိလိုက်တယ် 💛 ကံ့ေကာ္ေတြပြင့္တာျမင္ေတာ့ ကံ့ေကာ္လွိုင္ဆိုတဲ့အမ်ိဳးသမီးတစ္ေယာက္ကိုဖန္တီးလိုက္မိတယ္💛
