လရောင်ဖြာမှ...အေးသောကြောင့်(လေရာင္ျဖာမွ...ေအးေသာေၾကာင့္)

အပိုင်း(၉)

Unicode

'' အဟင်း နည်းနည်းများ ရှက်စရာကောင်းသွားသလား။ အရမ်းများ သိသာသွားသလား မသိဘူး ''

သစ်ဦး ထွန်းတောက်အား ပြောမိပြောရာပြောလိုက်ပြီး အိပ်ပေါ်တက်လာကာ တစ်ယောက်တည်းတီးတိုးဆိုနေလေသည်။ သူစိတ်ပူလွန်သွားပြီး စိတ်မြန်သွားသည်မဟုတ်ပါလား ။

''ဒေါက် ဒေါက် ဒေါက် ''

သစ်ဦး တစ်ယောက်တည်း အရှက်သည်းကာအတွေးများနေတုန်း အခန်းတံခါးခေါက်သံကြောင့် အတွေးတို့ခါထုတ်ကာ တံခါးဖွင့်လိုက်လေသည်။

'' ဟို လရောင်ခဏဝင်လာလို့ရမလားဟင် ''

တံခါးဖွင့်ဖွင့်ချင်းမြင်လိုက်ရသည့် မျက်နှာလေးကြောင့် သစ်ဦးခဏမျှ ကြောင်သွားလေသည်။

'' မနက်စာ မစားရသေးဘူးဆိုလို့ လရောင် လာပို့တာပါ ''

'' သြော် ​သြော် အဲ့ဒီနားမှာသာ ထားခဲ့ပါ ''

လရောင် မျက်နှာအား သစ်ဦး တစ်ချက်လေးမျှ မကြည့်တော့ဘဲ ကျောခိုင်းကာ ဂျာနယ်အားကောက်ကိုင်ပြီး ဆိုလိုက်လေသည်။

'' ဘာအကြောင်းများရှိသေးလို့လဲ ''

အသံမကြားတော့၍ သစ်ဦးနောက်လှည့်ကြည့်ရာမှ အခန်းထဲမှ မထွက်သေးဘဲ တစ်ခုခု ပြောချင်သလို ဖြစ်နေသည့် အနှီးကောင်မလေးကြောင့် သစ်ဦး ဆိုလိုက်လေသည်။

'' ဟို လရောင်...အင်း ဘာမှမဟုတ်တော့ပါဘူး''

'' အဟင်း ကိစ္စရှိကောလား ''

တစ်ခုခုကို ပြောချင်ပေမဲ့ မပြောတော့ဘဲ အခန်းထဲက ထွက်ရန်ပြင်နေသည့် လရောင်ကြောင့်
သစ်ဦးချောင်းလေးဟန့်ကာ မေးလိုက်လေသည်။

'' ဟို ... အားမနာတမ်းပြောရရင် ..လရောင်
ရန်ကုန်ကို တယ်လီဖုန်း ဆက်ချင်လို့ပါ။ အ​ရေးကြီးကိစ္စမရှိရင် တယ်လီဖုန်းလေးများ ခေါ်ပေးနိုင်မလားလို့ပါ ''

'' ရန်ကုန်ကို လွမ်းနေပြီထင်ရဲ့ ''

'' အဲ့ဒီလိုတော့မဟုတ်တန်ပေမဲ့ အကျိုးအကြောင်းလေးများဖုန်းဆက်ထားရင် မိဘများကလည်း စိတ်ပူစရာမလိုတော့ဘူးထင်လို့ပါ ။ ဒီကနေ့မနက်က ကြေးနန်းရုံးသွားခဲ့ပေမဲ့ နှစ်ရက်လောက်စောင့်ရဦးမယ်ဆိုလို့..။ အပန်းမကြီးရင် တယ်လီဖုန်းလေးများခေါ်ပေးနိုင်မလားလို့ပါ။''