တတိယလူအဖြစ်ကူးပြောင်းခြင်း

Arc 2.20

unicode

ကော်ဖီဆိုင်မှာ ယူယွီ ပေါ်လာသည်အထိ ကျွင်းကျယ်သည် ဆယ့်ငါးကြိမ်ဆက်တိုက် ယူယွီကို ဖုန်းခေါ်နေခဲ့သည်။ ပုံမှန်အတိုင်းဆိုလျှင် တတိယအကြိမ် သို့မဟုတ် လေးကြိမ်မြောက်ဖုန်းခေါ်ဆိုမှုတွင် ယူယွီပြန်ဖြေလေ့ရှိသောကြောင့် ကျွင်းကျယ်သည် တုန်လှုပ်ချောက်ချားပြီး ယူယွီကို ရှာဖွေရန် သွမ့်မိသားစု၏လူများကို ခေါ်တော့မည်ဖြစ်သည်။

ယူယွီရောက်လာသောအခါ ကျွင်းကျယ်သည် လူများစွာရှေ့မှာ ချက်ချင်း သူ့ကို ပွေ့ဖက်လိုက်သည်။ သူတို့သည် ကော်ဖီဆိုင်တွင် အာရုံစူးစိုက်စရာ ဖြစ်လာပြီး ရုပ်ရည်ချောမောသော ယောက်ျားလေးနှစ်ယောက်သည် သူတို့၏ချစ်ခင်မှုကို လူသိရှင်ကြားပြသခဲ့ကြသည်။

သူတို့ကြားက မြင်ကွင်းကို ဖုန်းများက ဖမ်းယူနေသောကြောင့် ယူယွီအနည်းငယ် အရှက်ရသွားသည်။ သူက ကျွင်းကျယ်ကို ညင်သာစွာ တွန်းလိုက်ပြီး "လူတွေ ကြည့်နေကြတယ်"

"ဂရုမစိုက်ဘူး၊ မင်းငါဖုန်းခေါ်တာကို ဆယ့်ငါးကြိမ်တောင် ပြန်မဖြေဘူး။ ငါစိုးရိမ်လို့ သေတော့မယ်" ကျွင်းကျယ်သည် အသံတိုးတိုးလေးနှင့် ပြောပေမယ့် သူ့အသံမှာ စိုးရိမ်မှုက သိသာထင်ရှားနေသည်။

"ငါ__ငါ အပြင်မှာ လမ်းလျှောက်ထွက်နေရုံပါ မင်းက အစိုးရိမ်လွန်နေတာ..."

"ယူယွီ ငါ စိတ်ပူလို့ သေတော့မယ် ..." ကျွင်းကျယ်သည် သည်စကားကိုပဲ ထပ်ပြောခဲ့သည် ။ ယူယွီသည် ကျွင်းကျယ်ဆီက ရိုးသားမှုကို ခံစားရသည်။ ယူယွီသည် သူ့ခန္ဓာကိုယ် ပူလာသည်ကို ခံစားလိုက်ရသည်။

[ System ... ]

[ ပျူပါ : အင်း?]

[ လမ်းမှာပြောခဲ့တဲ့ အစီအစဉ်ကို ဖျက်လိုက်တော့မယ်။ ငါ ကျွင်းကျယ်ရဲ့ ခံစားချက်ကို ဒီလိုမျိုး မဖျက်စီးပစ်ချင်ဘူး။ သူက တကယ့်ကို စိတ်ကောင်းရှိတဲ့သူပါ။ ]

[ ပျူပါ : မင်း အခု စေ့စပ်ပွဲကို ဖျက်ချင်ရင် ကျွင်းကျယ်က သေချာပေါက် ပျက်စီးသွားပြီး မင်းဘဝလည်း ဒီကမ္ဘာမှာ ပိုခက်ခဲလာလိမ့်မယ်။ ငါ့ကိုယုံပါ၊ ငါက ငါ့သခင် ဖန်တီးထားတဲ့ နှလုံးသားမရှိတဲ့ အရာဆိုပေမဲ့ အနည်းဆုံးတော့ မင်းထက် ငါ့မှာ အသိတရားပိုရှိပါသေးတယ်။]