مكنون القلب

إزاي نتعامل؟

#إزاي_نتعامل
السلام عليكم ورحمة الله وبركاته
إزاي نتعامل مع وسوسات الشيطان:-
تعرف إن إبليس مش بيدخلك من باب الشر بس ده فيه 99 باب خير بيدخلك منهم وهو يريد بك السوء والفساد. طيب نعمل إيه؟
الشيطان بيخليك تشق على نفسك بيصورلك إن لو خدت بالرخص ربنا مش هيرضى عنك فتحرم الحلال وتلاقي نفسك بعد فترة تعبت ووقعت ما هو الدين مش إفراط ولا تفريط ده دين وسط عشان متتعبش ولا تمل فخليك بين بين. الشيطان بيزين لك الطاعات فتعجب بنفسك وقلبك يدخله الرياء ويحبط عملك وتبقى يا مسكين فعلت كما لم تفعل أو يخليك تخاف من الرياء فتبعد عن طاعات كتير فخلي بالك وعود قلبك التواضع ونسب الفضل دايما لله ودرب نفسك على التذلل والخضوع لله.
الشيطان هيخليك تيأس من حصول الخير وتقنط من رحمة الله فتشرك به أو تقت.ل نفسك إما فعليا أو نفسيا فعود نفسك الرضا بالقضاء والقدر وإستعن بالصبر والصلاة.
الشيطان هيخليك تعتاد العبادة لحد ما تبقى عادة وتضيع الخشوع وتبقى مجرد مؤدي بالبدن ولم تحضر روحك ولا قلبك ولا عقلك عشان كده لازم تخشع في كل عبادة تدبر فيها خليك بطئ وركز في كل حركة بتعملها وكل حرف بتقوله وخليك مخلص.
الشيطان هيخليك تفرح بالنعم فتنسى شكر المنعم وربما كمان يخليك تنسب الفضل لنفسك فما عليك إلا أن تنسب الفضل دوما لله، خليك دايما ذاكر شاكر لا تفتر عن ذكره أبدا.
الشيطان هيقولك ربنا غفور رحيم نام وإرتاح وصلي الصبح والصبح يقولك إنت مشغول ابقى إجمعهم او أنت تعبان إرتاح دلوقتي ولما تخف صليهم، هيقولك متتوبش دلوقتي إستمتع بالدنيا وانت شباب ولما تكبر شوية ابقى تفرغ للعبادة هو انت فاضي وراك رزقك لازم تدور عليه لكن توقف متنساش إن ربنا هو الرزاق هو بيده رزقك وموتك وحياتك هل تضمن أن تعيش للغد فلا تتكاسل يا فتى فالكسل مفتاح الفتور والفتور مفتاح الإنتكاسة والإنتكاسة قد تتوب منها وقد تُقبض عصيًا فإختر بنفسك ما تريد أن تكون هل تريد رضا ربك أم سخطه فإن أردت رضاه فلتتحصن ضد وساوس الشيطان بالصلاة والذكر والقرآن ولا تترك له مجالاً ليدخل لك منه وإشغل وقتك بكل ما هو مفيد فالفراغ يحث الشيطان على إغوائك فإحذر كل الحذر.
عفانا الله وإياكم من همزات الشياطين وأن يحضرون.
#هبةالله_عيسى