من بعد قصة بيان النصر وياقوت رجعت ليكم بقصة جديدة وحصرية على مجموعة مختلف اللهجات، قصتي الجديدة تحت عنوان 👑 هن القوارير 👑 من العنوان نقدرو نشوفو عدة قصص متنوعة كلهم مرتبطين بشيء واحد وهو المرأة. قصتنا غادي تتناول وتعالج قضايا وحالات مختلفة كيوقعو...
Part2 أم عبد الخالق وقفات كتعنق فولدها واخته لي باقي بلا زواج ناضت كدخل التقضية لي جاب وتبقشش والحاجة الزوينة البنينة كتخبيها لأنهم كاينين عيالات خوتها معاهم لا يهزو شي حاجة والهضرة كثرات فقاع الدار والدراري الصغار كيتناقزو من قنت لقنت وعبد الخالق مصرف 100 درهم غير على قبلهم يعطي لهذا ولهذه وضياء تضحك معهم وتلعب بحال شي بنية صغيرة فرحانة بيهم قلبها صافي أم عبد الخالق بقات كتشوف فيهم بحنان: ايوة اش غادي نقول ليكم الله يرزقكم يا ربي ونفرح بوليداتكم بحال الشوكة تغرسات فقلب ضياء أما عبد الخالق مسح على لحيته وتنهد ونطقو بجوج بيهم ب آمين وقلوبهم الله لي عالم بيهم وزادت غصة ضياء ملي زوجة خو راجلها الكبير جرات ولدها كتبوس وتعنق فيه حيداته من يد ضياء خلات يديها فالهواء وزادت كملات زوجة الاخ: ايييوة مرات خويا خالد جات غير من وراكم وراه كرشها الثانية هادي تبارك الله وكانت تكون الثالثة كون ما عين بنادم طرطقات عينيها كيف البوة ولوخرى حداها حتى هي بدات تجبد فالعريسات لي تزوجو مؤخرا وحاملات ولا ولدو كيتناوبو عليها باش يسمموها عبد الخالق هو وخوته خرجو وباهم دخل للصالون خلاها بيناتهم بحال هداك لي كيتعلمو فيه التير قرطاسة من ورا الثانية باااق بااق باق وهي محكمة فراسها بصعوبة باش ما تنهارش من بعدما كملو الطلقات ناضت أم عبد الخالق دخلات للبيت وجابت واحد الصاشية لونها غامق عيطات عليها لواحد البيت أم عبد الخالق: ااجي يا ضياا اجي (جلسات حداها) والله اا بنتي إلى راك عزيزة عليا وما بغيتش نجيب لعبد الخالق شي وحدة اخرى لي تجيب ليه الولاد بغات تهضر ضياء دافع على راسها وسط هاد الظلم لي كتعرض ليه المرأة فالمجتمع ديالنا مع الأسف ولكن ما خلاتهاش لالة تاجة (أم عبد الخالق) تاجة: شوفي اا بنيتي مشيت عند العطار لي فبلاد ختي فاش مشيت نزورها وجمع ليا هاد العشوب قاليك ما كاينش لي ما شرباتهمش وما جابش الله التيسير بعياء واضح عليها من هاد الموضوع والنقاش فيه حركات غير راسها وما كرهاتش يدخل عبد الخالق دبا ويمشيو باغيا غير تمشي لدارها لي كترتاح فيها وتهنى وفعلا دخلو الرجال من بعد صلاة المغرب حرك ليها راسه باش يمشيو وحتى هي على القرص رغم محاولاتهم باش يشدوهم يتعشاو ولكن قدرو يقنعوهم بلي خاص عبد الخالق يفيق بكري على قبل الخدمة وضياء مزال ليها شغال فالدار وخرجو من تما الطريق طوالت من الحومة للمشروع وهي راسها على الزاج وهو دراعه واحد على الشرجم والثاني على الفولون وعينيه على الطريق ودماغه فين وفين
بعد صمت طويل قررات تكسره هي: عبد الخالق واش فنظرك خاص نبقاو هاك ما عارفين راسنا من رجلينا عبد الخالق دور راسه جهتها: اشنو بغيتينا نديرو ندخلو فمشيئة الله ضياء: استغفر الله ما قلتش هاك ولكن دبا ولله الحمد الطب تقدم نمشيو عند الطبيب ربما يكون غير ... ما خلاهاش تكمل كلامها: ضيااااء انا ما عنديش فدماغي هاد القضية ديال نمشي لشي طبيب نضحك فيا عباد الله وزايدون ... غير كتبغيني نقول شي هضرة ما باغيش نقصحك بها اا ضياء والله خرجات عينيها المدمعين وكأنها عارفة اش كل مرة كيرجع لحلقه وعارفة أيضا بلي الناس كاملة متاهماها بالعقم لنفس السبب ضياء ما قدراتش تكتم شهقاتها: غير قول هءهءهءه اشنو كتخلي فحلقك ديما عبد الخالق حبس الطموبيل جنب ومد ليها كلينيكس: شوفي ا ضياء انا مخلي كلشي لله ديري بحالي والسلام نتي راك شايفة خوتي وخواتاتي كلشي مفرخ يعني باينة ما عندي حتى شي مشكل تأكدت من مقصد كلامه كل مرة: يعني غير حيت اختي نعمة ما رزقهاش الله ممكن حتى انا نكون ما كنولدش كانت بغات تكمل هضرتها ولكن امتنعت ورجعاتها لحلقها مبتاسمة بقلة حيلة ومكملة كلامها: واخا ياك انا لي غادي يقولو ليا فيك المشكل وا غير خلينا نمشيو ديمارا ثاني متاجه للدار من بعد ما خدا بيتزا فالطريق: راه هضرنا اا ضياء ونبينا عليه السلام الله يدير الخير باقين فالطموبيل من بعد ما وصلو ترددات وفالاخير هضرات: واش ممكن نوافق على طلب حفيظة دار عندها معصب: ضيااااء هضرنا فالموضوع بترجي: والله الى كنقنط فالدار بوحدي شد فمه حتى شده فالاخير خرج على السيطرة: كون ولدتي حتى نتي ولادك كون راك محيدة القنطة وكون راكي.. وكون راه معاهم معاش كتراجعي فعوض ولاد الناس حلات عينيها بصدمة ما متيقاش بلي عبد الخالق هو لي قال لها هاد الهضرة تصدمات بجهد حلات الباب ونزلات ونزلو دموعها عيات وملات من هاد الاتهامات أما هو بحال الى تضرب بفردي خاوي ما عمرو فكر ولا قدر يخرج شي هضرة لي تجرحها خصوصا وأنها ما مخلياه يتشكى من أي حاجة كزوج وحتى هو عمرو فكر ياديها واخا لفظيا ما قدراتش تهضر مع حفيظة لي كانت مجمعة مع العيالات ديال العمارة لي غير شافوهم قطعو الحس وبقاو متبعين هاد جوج حميمات كما مسميينهم لقات عليهم السلام وزربات قصدات الدروج مخلياه هو والندم دياله تابعينها ولحسن حظه التقى بزوج حفيظة فالدروج عبد الخالق: السلام عليكم سمح ليا اا سي الحسن بغيت غير نقوليك بلي راه المدام ديالي ما تقدرش تراجع مع الوليدات ديالك الحسن حنا راسه اصلا منع على مراته من الاول تقولها ليها لأنه عارف عبد الخالق مانع على مراته تجمع مع العيالات ولا الخروج بوحدها والى خلاها تراجع مع ولاده راه غادي يبداو ديك الساعة العيالات خيطي بيطي خصوصا انهم ما كيحشموش هكا قال ليه دماغه
💣💣💣💣💣 توقاعتكم وآرائكم 💣 💣 💣 💣 💣
اش بان ليكم فتصرف عبد الخالق ونظريته ؟ وبالنسبة ل ضياء اش غايوقع معها ؟
Ups! Ten obraz nie jest zgodny z naszymi wytycznymi. Aby kontynuować, spróbuj go usunąć lub użyć innego.
