🌹هن القوارير🌹 (في طور التنزيل )

part92

👑👑 هن القوارير 👑👑
شمس الغريب

الجزء 92:

كتنهك راسها بالعمل فالشركة وفالدار وحتى الطريق غير باش ما تفكر فحتى حاجة متعلقة بالأحداث الأخيرة لي نهكت صحتها وكل ساعة تخربق حتى سمعات رنة التيلي ديالها هزاته وبانت ليها النمرة ديال نيكول تكرهات وبغات تقطع عليها فالاخير قالت غادي نسمعهم ليها نيت باش تبعد مني دوزات الخط حتى كتفاجئ بصوت مخوصمة يالاه بغات تقطع ربما يكون الخط داز بلاما تحس ولكن سمعات اسمها

📞الخط دايز📞
نيكول: قووووول ليا شنو بيناتكم علاش تمشي تعتقها.. وزاك يبقا مشدود ليلة على قبلها هممم يالاه قول؟
نوح ببرود معتاد: زاااك واحد برهوش ونتي عارفة.. وكما قلت عايدة هي بمثابة الاخت ديالي دخلي هادشي لدماغك
غوتات: لا ما بانش ليا هي معتابراك " خوها " كتشوف فيك شي حاجة اخرى انا فاهمة
نوح: حياتها هاديك نتي مالك.. دبا غاتسدي الموضوع ولا تسمعي لي ما يرضيك
نيكول ما ناوياش تسالي هنا: خاص هي تفهم هادشي
نوح بعصبية: هي فاهماه.. فهمي غير نتي راسك وتذكري سبب هاد الزواج شنو هو عارفة بلي انا تزوجت بيك غير حيت......
📞 انقطع الخط 📞

هنا عرفات عايدة بلي الاتصال ما دازش عفويا ولا علاش غادي يتقطع فهاد الجزء حسات بخبث نيكول لي باغيا تمرضها فحياتها والسؤال المطروح بقا لاصق فدماغها هو علاش نوح غادي يكون تزوج بنيكول اذن شنو ممكن يكون السبب وخاصها تعرف.. حاسة بلي هاد نيكول ماشي ساهلة وبما انها ما بغاتش عايدة تعرف هاد المعلومة اذن خايفة من شي حاجة.. حلفاتها فيهم بجوج حلفة قطعية مغربية لا نوح ولا نيكول بالحق كل واحد ودرجة الخطورة لي عليه باقي كتفكر فنوح لي كيهزها باختي ويحطها بها صونا التيلي ديالها ثاني وهاد المرة نيفين

عايدة بعصبية: مزال عندك الوجه لي تتاصلي وباااز
نيفين كتبكي: سمحي ليا اا عايدة انا خاصني ندير هادشي على قبل ولدي باش ما ياديهش ليا باه.. انا والله ما كنتخلص بدوك الفلوس هو كيصيفط ليا الكليان وانا غير كنلقا البنات بالحق ما كناخدش الفلوس هو لي كياخدهم باش ما يعدبش ليا ولدي
عايدة صدقاته لأنه فعلا هادي ماشي نيفين لي كتعرف من نهار تعرفت على داك المصيبة وحياتها لور لور
عايدة: بلغي بيه وخلي السلطات الفرنسية تتواصل مع الاسبانية
نيفين: هو راه هنا بالحق خطواتي كلهم عارفهم ما نقدرش خايفة نخسر ولدي.. خايفة يدير ليه شي حاجة.. انا اتصلت غير باش تسمحي ليا
من بعد الغداء جالسين كل من زهور وضياء وحدة كتشرب اتاي والثانية عصير فواكه لي كيحضرو ليها جلال دائما بيديه عاد يمشي باش تشرب الفيتامينات ديالها
ضياء حطات الكاس: خالتي زهور.. دبا بالمعقول اش غادي ترجعي تديري تما.. ها ربي عطاك فرصة أخرى علاش ما تجربيش تعيشي حياتك مرة أخرى علاش ما باغياش تخلي لنفسك المجال باش تفرحي وانا شايفة شحال دخل ليك سي عتيق لخاطرك؟