🌹هن القوارير🌹 (في طور التنزيل )

part48

👑👑 هن القوارير 👑👑
شمس الغريب

الجزء 48:

دخلات للدار باقي كلها حمرة لقات أمها منورة فرحانة وحتى الاب ديالها شاد التسبيح وأخيرا ارتاح ملي خبراته أمها بلي بغات وعطاته خلاصة القول بنتها اول مرة تشوفها فرحانة فزواجها الأول ما كانتش فرحانة قد دبا عطاته الضوء الأخضر باش يوافق من بعدما يدير تحريات أعمق هاد المرة على جلال فقط اما سي محمد راه عارفو حق المعرفة ويسولو هو نيت راه يقول الخايبة فراسه

فاطمة ناضت شدات ضياء مدخلاها لواحد البيت: لوكان اا بنتي غير جلستي هاد السيمانة ما تمشيش
ضياء مستغربة: علاش اا ماما؟!!؟
فاطمة: ويالاه تقابلي راسك وترتاحي باش فاش يجيو الناس تكوني هي هاديك
ضياء: راه اا ماما السيمانة لي من ورا هادي غادي نبداو الامتحانات ما يمكنش نغيب فهاد السيمانة بالضبط
فاطمة: واااش غادي نقولك نتي تعرفي اا بنتي.. علم الله واش راجلك يبغي يخليك تقراي ولا لا
تبسمات فرحانة: راك سمعتي نجاة اا ماما راه هو لي قالها لشرف على هاد الصونطر وشرف كلف حكم يقيدني حيت هو لي عارف هادشي
فاطمة على نيتها: واا غير اكدي عليه اا بنتي الله يرضي عليك

خرجو من البيت لقات نجاة ونعمة وحتى رحيمة هابطين وباينة عليهم حالة ديال الشقا بقات مستغربة من حالتهم
رحيمة: وااا ها نتي اا ختي لا تقولي راك ما عزيزاش
نجاة: الحلوى راه كتقاد واخا ما غاتجيش بحال ديالك بالحق راحنا قايمين بالواجب
نعمة: كوني هانية نتي غير سيري شدي داك الدبلوم وحلي شي مطعم 5 النجوم وفقصي لينا العديان هداك هو الفضل
ضياء: دبا علاش كتعذبو راسكم
نجاة: ما كاين عذاب الدار لي غادي نتعذبو فيها راه غادي يجيو العيالات يدورو بيها
ضياء عنقاتهم: ربي يخليكم ليا اا الحبيباااات ديالي

تفرقو ثاني كل واحد كيدير شغلو فقنت وهي كتسنى توصل الوقت باش تمشي للصونطر كتشوف فيهم كيوجدو على قدم وساق
جاية أمها كتمايل هازة فيديها شي حاجة والثانية فيها تسبيح والابتسامة على وجهها قربات جنب ضياء ومدات ليها اشنو جايبة

ضياء: ماما اش هادشي
فاطمة كتحل معها: ها نتي شوفي بعينيك
لقاتو تفصيلة بالبلونكاسي مخيطة بالصم الحر كانت لبساتها شي مرة ضياء من ورا ما تزوجات وكلشي شكرها فيها جات كتفتن بالزين وقالت لها أمها نهار تولدي اا بنتي نجبدو ليك تبرزي بيه خرجات عينيها ضياء بفرحة بغات تقيصو ومنعاتها
فاطمة: خلي سرك وزينك مخبي لنهارك اا حبيبتي.. راه المجدول معه وكلشي حتى من الفولار والبلغة شريتهم لي يجيو معاه
باست لها ضياء على يديها: يخليك ليا اا ماما.. ربي يطول ليا فعمرك

الأم هي الأساس هي مرآة بنتها هي لي كتزرع الفضائل فولادها هي أساس الأسرة وعماد المجتمع كتكون البنت بنت مجرد شخص عادي وكتولي زوجة فور ما كتزوج براجل كتحمل مسؤولية كبيرة على عاتقها ولكن نهار كتولد كتجرب إحساس الأمومة كتحول من شخص عادي ومسؤول لشخص يمكن نقولو عليه معجزة كتولي اكثر نضج أكثر فهم للأمور وأكثر إحساس كتعرف خوالج الكل وخباياه تقدر تعرف واش الطريق لي غايسلكو ولادها ناجح أو لا فقط باحساسها