🌹هن القوارير🌹 (في طور التنزيل )

part91

👑👑 هن القوارير 👑👑
شمس الغريب

الجزء 91:

الغدا كيطيب وزهور كتوجد سلطة وضياء كتنقي الزرارع ملاهية يديها وكتقلب على الطريقة باش تبدى الموضوع
ضياء: خالتي زهووووور
زهور: ممممممم.. (تداركت راسها بخوف) ماالكي ياكما شدك شي وجع ثاني؟
ضياء حركات راسها بالنفي: لا لا ماشي داكشي.. بغيت نسولك كيف جاك سي عتيق؟
زهور: علاش اا اختي غادي يجيني انا.. راه مراته تقولك كي كيجيها
ضياء مترقبة ردة فعلها: واا حتى يكون هو مزوج بعدا
ضارت زهور بسرعة جرات كرسي وجلسات كلها تساؤلات ملي حسات على راسها جرات حبة حلاوة كتنقي فيها واصطنعت اللامبالاة
زهور غير كتخربق فالهضرة: ايوة يضبر لراسه اا ختي حنا مالنا.. ونتي راه مراة الراجل اش بغيتي فالسيد

ضياء باغيا تلعب ليها على الاعصاب: واا انا قلت ملي السيد قال لجلال قول لضياء تشوف ليا شي عروسة.. قلت خالتي زهور تعاوني نقلب على شي بنت من الدوار
فالبلاصة خدود زهور توردو وحسات بالنفس تقطعات فيها: ايوة عطالله بنات الناس.. بحال بنت المؤذن لي حدانا مربية ومصوابة.. وحتى كلثوم بنت خالتي ضريفة و...
قاطعاتها ضياء: والى يا ختي هو حط عينيه على مولاة الحريرة اش نديرو
ما فهماتش فالاول: ايوة اا ختي خليوه منه لمولاة الح ر ي ر ة
تقلات آخر كلمة ملي فهمات اش كتقصد ضياء وهزات عينيها فيها نيشان بمعنى هادشي ما فيه ضحك بالحق ضياء كانت مهبطة راسها حابسة الضحكة وكتنقي مخلية زهور يدخلها الشك واش حماقت واش تخيلت الحوار ولا كتهضر بوحدها
أما ضياء فالأول اختبرت قلب زهور حتى عرفات بلي عينيها عامرة بيه ودخلاتها مجانبة

غير سمعات الساروت دار فالباب جا منقذها ووقفات شافت فزهور بابتسامة حب لخالتها وفرحة
ضياء: ايوة نخليوه منه لمولاة الحريرة
يالاه جات تبعها وضياء غادية بحال البطة هاربة خرجات فصدره نيشان كملها ليها هو بتعنيقة خاشيها فصدره خرجات زهور فيهم نيشان وحشمات أما جلال تكلم عادي
جلال: ااش دارت لك اا ختي زهور؟ نتي غير قولي وانا نتفاهم معها
زهور كتشوف فضياء كطل عليها من صدر جلال بنص عين: ماا بقاتش تحشم اا جلال هادي وتقول
جلال حرك ليها راسه بالايجاب: واييه راني حسبت ليها بزاف ديال الزبايل ملي جيت نعاقبها حملات.. اش ندير ؟
زهور هزات حاجبها: ايااام الله كتجري وست شهور لي بقات ولا سبعة دروك تكمل ونتعاودو الخبار
ضياء ضحكات: نتي غير عزلي العيالات على الرجال وتشوفي الخبار كيف دايرة

فهم جلال سبب المخاصمة وزهور ما لقات فين دير وجهها حشمات من جلال ورجعات للكوزينة وهي ليعها جلال من تحت البيجاما لي طلعات مع الكريشة وهي حرام واش حشمات
ضياء: بالحق ما عرفتش شكون يطيب لينا الحريرة ديال الصباح؟
عند الباب واقف ديال المشفى كيمشي ويجي بعصبية حتى بانت ليه هي ونفس المحققة والمحقق الآخر وسيارة ديال البوليس طارو بجوج عند بعض تخشات فحضنه ما بقات بغات تخرج أما هو كيزيد يخشيها ما كرههاش تسرى مع عروقه بقاو كيشوفو فيهم المحققين باعجاب وتقدير لحبهم النقي.. هو بغاها رغم الماضي الملطخ وهي سمحات فيه باش ما يتحرمش من عائلته حب كله تضحيات من الاول