🌹هن القوارير🌹 (في طور التنزيل )

part70

👑👑 هن القوارير 👑👑
شمس الغريب

الجزء 70:

عماد صافي وصل ل لافان: وحدة فيكم غادي تهضر

نهيلة: أنا غادي نهضر وبجوج غاتسمعوني شي حوايج عارفهم انت اا عماد بالحق جداد على عايدة.. وشي حوايج عارفاهم عايدة بالحق جداد عليك اا عماد.. نبدأ ليك بحياتي (عاودات ليها كلشي لي عاودات لمحمود ودخلات معها لاصغر التفاصيل فالعذاب لي عاشت هي تعمقات ليها أكثر من محمود حتى ولات عايدة كتشهق بالبكاء وعماد معصب لأقصى درجة ما حاملش يسمع هادشي مرة ثانية وصلات لها حتى لفين حبسات لمحمود كانت فالكوفر ديال الطموبيل).. فاش وقفات الطموبيل كنت خايفة بزاف.. خايفة لايكون مشا لدارو ويرجعوني ثاني.. خصوصا ملي سمع منهم أنني ما كايناش كانو عيطو عليه علموه.. عرفت بلي إلى لقاني غادي نتعذب شر عذاب.. هبط وكنسمع فيه كيهضر مع شي حد هزيت راسي بشوية لقيت بلي كيهضر مع شي حد وحنا فشي كاv كبيرة عرفت بلي حنا فالشركة.. تزعزعت فبلاصتي ملي الشخص لي كان واقف معاه شافني تما عرفت بلي نهايتي وصلات وغادي نرجع لنقطة الصفر

عايدة كتبكي وتحرك راسها بالنفي: لا اكيد ما فضحكش لا لا لا نتي ما رجعتيش لداك الجحيم لا لا لا

ما داتهاش فيها نهيلة ولا حتى عماد لي رجع بذاكرته كيتفكر معها: دقائق وتحل عليا الكوفر (عايدة دقاتها تسارعو وكتقول غير لا لا لا) لقيت قدامي 4 الرجلين يعني جوج ديال الناس.. ما قدرتش باقي نهز راسي صافي عرفت بلي غادي نرجع.. حاجة وحدة بقيت كنرددها هي سمحلي سمحلي.. حسيت بيد على كتفي ما كانتش قبضته القاصحة لي ما فيهاش الرحمة.. هزيت راسي تفاجأت بنفس الشخص لي كان معه وواحد ثاني قالي سربي ما عندناش الوقت كان مغربي.. ما بقيتش كنفكر هبطت من تما كلي مشكرفة ما قادراش حتى نمشي.. هبط هزني بين يديه والشخص لي معاه كيقوليه هادشي خطر علينا ما سوقش ليه حطني فالطموبيل دياله وعطاه السوارت قاليه شوف كيف دير دخلها للاوطيل

كتشوف فيها وفعماد وكتحاول تضبط من التواريخ فراسها: واااش عماد ونوح ياااك عماد خويا هو ونوح شريكه داك الوقت يااك ؟

نهيلة: ممم نوح كان خايف.. طبيعي.. هما فبلاد غريبة ما كاينش قانون يحمي الغرباء من أصحاب البلاد.. ما قدرش يدخلني للاوطيل مشينا لواحد البارك ووقف فيه هو كيخمم وانا كنخمم حتى صونا عليه عماد ولحق علينا.. كنت أنا اللور وعماد راكب هو وياه قدام.. نوح ملي جيت معاه وهو كيشوف قدامه ومعصب.. اما عماد غير طلع دار كيشوف فيا ويحقق فحالتي كان كله فضول...

عماد قاطعها: كنت كلي كنغلي.. غا نحماق بكثرة التفكير داك الساعة.. كيفاش وصلتي تما وعلاش كنتي مع داك الشخص.. وفكرتي كانت بحال الأغلبية لي كيحكمو على كلشي بلا ما يقولو راه كاين استثناءات.. كنت كنقول نتي لي بغيتي ومن بعد ما بقيتيش قادرة على ديك العيشة وديك الحياة.. اما من الاول كن عرفت كون قتلت أمه تما.. واخا صراااحة من ديك الشوفة ونتي فالكوفر عرفت بلي أطيب وانقى منك ما شافت ولا تشوف عيني
نهيلة: المهم سولني واش باغيا نرجع للمغرب وقلت اه.. وما عرفتش شكون عاونو تما فالقنصلية لي تما ورجعوني من بعد ما رفعت قضية ضدهم انا وعماد ونوح لي فسخو معاه العقد لي جاو على قبله.. وقدرو يرجعو حتى البنات لاخرينات.. أما مراته لي كانت من عائلة الأمراء تطلقات منه.. المهم حياتهم رجعات ظلام.. ملي وصلنا للمغرب طبعا انا ما عندي فين نمشي.. عائلة بابا فالأول ما قدرتش نواجههم.. وعماد ما بقيت بغيت نطلب منه والو.. تفارقت معه فالمطار....