🌹هن القوارير🌹 (في طور التنزيل )

part131

👑👑 هن القوارير 👑👑
شمس الغريب

الجزء 131:

ماشي مجرم محترف هذا رغم أنه حاول قدر المستطاع يتخبى على كاميرات المراقبة بالحق بدون فائدة والبحث ديال الخبراء والعملاء ماشي هو بحث ديال شرطي فقسم الاختطاف هو كانو عنده وسائل حديثة ومبتكرة قدر يعرف فوقت وجيز السيارة لمن وتبع مسارها كان خدام على قضية غير بوحدو والخبر وصل للرئيس دياله لي طلب حضوره للمكتب ما خاصش خليفة يرتكب خطأ بحال هذا وهو مقبل على رئاسة المركز
الرئيس: خليفة هادشي لي كدير ماشي فصالحك
خليفة ما قدرش يسيطر على راسه: نبقا نتسنى فيها حتى تموت
الرئيس: اش واقع شكون هادي؟
خليفة: دوك الحيوانات لي تشدو ما تقبلوش تريكتهم وناضو خطفو البنت
هادشي لي خسر على رئيسه وخرج من تما خلاه يصيفط من موراه دورية قبل لا يدير فيهم شي جريمة غير بوحدو أما هو شد الطريق لي سلكاتها الطموبيل.. تسجيل التتبع عنده وحتى آخر بلاصة حبسات فيها الطموبيل عنده وقف الطموبيل بعيد ملي بانت ليه واحد الطموبيل مشبوهة جنب واحد الكوارا قدام ديال الدجاج

وصل بالتسلات جنب دوك الكوارا وما كانش غالط سمع صوت المجرم وهو كيبتز معاذ تبسم وطل غير بطرف عينه يشوف عددهم شحال لقاهم غير جوج الشخص ومعاه سيدة وبجوج بيهم فأواخر العشرينات وهي كانت مربوطة ومغميين ليها عينيها منظرها خلا الغضب يكتسح جسمه بالكامل ويتوعد ليهم بأشد العذاب.. دخل بغفلة منهم كيتسلت حتى ما بقا كيفصلو معاهم والو ومع حسو بريحة رجالية قوية وغريبة عليهم ما جاو فين يديرو شي ردة فعل حتى كان ضرب هداك لي كيتكلم حتى تلاح فواحد القنت قبل لا يتفرشخ التيلي مع الأرض تسمعات غوتة البنت لي معاه ولي جمعها معها خليفة بواحد مولاتي تصرفيقة خلاتها منشورة فالارض والدم خارج من شي قنت واش فمها ولا نيفها ما نقدروش نعرفو.. تما تقطع الاتصال مع عائلة زينة

قرب منها خليفة اول حاجة دار هي حيد الضماد على عينيها غير شافتو بدات كتبكي وباغيا تعاود ليه لي وقع حيد ليها السكوتش على فمها عاد وقف كيفك وثاقها ما قدراتش تحبس راسها غير كمل تلاحت عليه بتعنيقة هو خارت قواه ما قدرش حتى يضمها بالقوة باش ترمات تعنقه وهو قفازي تلاح منشور فالارض وهي فوق منه محاوطاه بكل ما أوتيت من قوة .. يالاه استجمع راسه تقعد وهي مزال محاوطاه وخاشية وجهها فصدره كتبكي وتشهق كان كيحاول يخرج لها راسها من صدره ووالو لصقات جمع فكفه شعرها وجرها منه بشوية للخلف وبقا كيتفحص ملامحها حتى بان ليه أثر التصرفيقة على وجهها هنا صافي تجنن وقفها ووقف بسرعة كيقلب فوجهها

خليفة مجنن: شكووون فييهم ضربك؟ هضري
زينة كتحرك راسها بالنفي: ماا عرفتش ماا شفتش انا كانو عينيا مغمضين
توجه ليهم ما كيقشعش هما اصلا مغيبين كل واحد فين مليوح دقة وحدة منه قضات الغرض يالاه كيقلب باش يفيقهم دخلات الدورية لي تصيفطات من وراه.. قرب منه واحد منهم عارف خليفة مزيان
الشخص: شاف حنا غا نتكلفو بالباقي كون هاني
عارف اش غادي يدير مشا جر زينة وملي بانت ليه كتعتر واش مضروبة أو الخوف لي دارها لها هو ما عرفش لي عرف هو هبط جمعها بين يديه هازها مامسوقش للبشري وغادي بيها ديك المسافة البعيدة بين الكوارا والطموبيل فين حطها
بعد قمة الرعب لي هما فيه معاذ بقا مكوانسي ما عرف اشمن قنت يعتق جاه تليفون بحال رحمة سيدي ربي علموه بلي لقاوها وهي بخير حدو نطق ليهم بالخبر السعيد لي كلهم ما بغا يدخل ليهم لراسهم إلا إلى شافوها قدامهم ولكن المسألة بقات فراحة لي حالتها حالة والكل عيونهم مشاو للدم لي بان ليهم نسرين غوتات لربي لي خلقها وهزها معاذ بين يديه كيقبل جبينها بخوف عليها هابط بيها فالدروج ونسرين تبعاته من بعدما عيطات على رضا يرجع للدار وبلي زينة لقاوها