🌹هن القوارير🌹 (في طور التنزيل )

part72

👑👑 هن القوارير 👑👑
شمس الغريب

الجزء 72:

هضمات عايدة كلامها وشافت فالكاتبة بنظرة حادة وأكدت ليها شنو كاين وبلي السيدة ما كتكدبش ما بغاتش تناقش هادشي قدامها خاصها دبا تخليها هي ترتاح

عايدة ابتسمت ليها: واخا اا انسة.. ما غاديش نقول ليك بلي راه ما كناش هنا كرؤساء أو شي عذر غير مقبول.. لي نقول ليك هو بلي الغلط ديالنا وحنا كنعتاذرو
قاطعاتها بحدة: كيفاش كنعتاذرو اشنو غادي ندير انا بهاد الاعتذار ونتوما بهاد الغلط غادي تخليوني ما نسلمش الديور للناس فالوقت لي واعدتهم
عايدة محافظة على هدوءها وكأنه هاد خيتي جات باش تكون أول اختبار ليها ديال الصبر وحل المشاكل بالعقل وتحمل مسؤولية معقولة وتفك المشاكل بطرق عقلانية

عايدة: ما خليتينيش نكمل اا انسة (قرأت اسمها فالاتفاق) نيكول فيرنانديز.. انا غادي نوقف على المشروع بيدي غادي نضاعف عدد العمال.. وغادي نكملو قبل الوقت المحدد (عاود طلات على الاتفاق وشافت الوقت المحدد) قبل نهاية هاد الشهر غادي نكونو كملنا انشاء الله
نيكول خرجات عينيها مصدومة هادي واش حمقة واش شافت فين واصلين ولا لا أما الكاتبة ما كانتش قل من نيكول عكس عايدة تماما لي كتبان واثقة من نفسها وقد كلامها وناوية تنفد هضرتها

شافت عايدة فالكاتبة: عيطي ليا على ****** (كان هو المسؤول على جل العمال الخاصين بالبناء فالشركة لي كانت ديال الإنشاءات)
ديك الساعة الكاتبة انسحبت رغم أنها ممكن تتاصل غير من تما ولكن بغات تنفس وترتاح من الصدمة لي سمعات جا السيد وحتى هو وجهه صفر لأنه هو المسؤول طبعا على المشكل لي وقع دخلات هي وياه وجلسو تحت أنظار عايدة لي ولات هي محط الأنظار حتى من نيكول كتشوف هاد السيدة فين لقات هاد الثقة فالنفس

عايدة: حسب الملفات الأخيرة لي شفت.. الشركة حاليا عندها ثلاثة ديال المشاريع كبرى.. الأول قرب يسالي، الثاني باقي وما غادي يتسلم حتى لمن هنا ثلاثة الأشهر على ما أظن والثالث هو هذا.. إذن اا سي ****** غادي تضاعف ليا العمال فالمشروع ديال انسة نيكول.. بغيت تاخد المشروع ديالها بدون أخطاء فنهاية هاد الشهر.. وملي كنقول بدون خطأ راه كنقصدها.. مفهوم

السيد بقا مشوكي فكلامها واش كتسمع اش كتقول هادي ولا لا: ولكن اا انسة عايدة راه المشرو.....
قاطعاته وهي كتشوف فيه بحدة فهم نظرتها مزيان: مفهووووم
صرط ريقه وهو كيوزع نظراته بيناتهم: مفهوم
حركات راسها ورجعات جلسات بكل ثقة فكرسيها: مزيان.. وانا لي غادي نوقف على هاد المشروع بيدي وحتى ديال الثلاث أشهر انا لي غادي نسيرو

هي كتكمل الشرح ديالها وهو واقف مكروازي رجليه عند الباب كأنه كان تما من شحال وما ردوش ليه البال حتى هزات نيكول عينيها صدفة ووقفات بابتسامة واسعة وعيون كيخرجو القلوبة وتمشات فاتجاهه هزو عينيهم كاملين واخا الكاتبة ورئيس قسم العمال عارفين شكون حيت شافوه فاش جا معها اول مرة أما عايدة جاتها الساكتة المسكوتة وجهها هرب منه اللون بكل ما تحمل الكلمة من معنى وهي كتذكر آخر حوار
فاقت كلها نشاط وحيوية ونيشان هبطات وجدات الفطور من بعد روتينها الصباحي المعتاد ولي داخل فيه حتى تعنكش جلال فنعاسه وتستاغل نومه وتشبع شهوتها منه وجدات الفطور فوق الطبلة وطلعات كدردك عنده ما تهنات حتى فيقاته وهبطات ثاني فرحانة أنها تمشي للطبيب وكتمنى أنها تسمع لي باغيا هي تسمع