🌹هن القوارير🌹 (في طور التنزيل )

part41

👑👑 هن القوارير 👑👑
شمس الغريب

الجزء 41:

دخل معاذ والشخص الثاني لي ناضت طايرة عنده البنت عمو ما عمو تما كتغبن وتشكي عكس ضياء تماما لي وجهها غرساته فالارض
ضياء حشمانة من معاذ: سمح ليا اا خويا والله ما ظنيتها غا توصل هنا وماشي انا لي قلت ليه كنعرفك.....
قاطعها يابتسامة: الدنيا هانية اا ضياء اختي وراحة راه قلتها لها خفت لا تشوفك ما جيتيش وتصوني لصحاب الدار يتشوشو على والو
شاف فيها الشخص الثاني: سمحي لينا اا ختي
البنت بفشوش: عموووو.....
ضار فيها: عيقتي نتي بهاد عمو غير يهضر معك شي حد تعيطي على البوليس ياكما يصحاب لك خدامين عندنا بالحق أنا لي عارف اش غا ندير
ولات كتزاوب خرجات هي وياه كطلبو وضياء خدات لاكارط ديالها محرجة والسوارت ديال الطموبيل وتمشات هي ومعاذ فالكولوار بين اعتذار واعتذار كتقدم ليه اعتذار آخر حشمانة لدرجة كبيرة ما عرفش اش يقول لها باش ترتاح

غير وصلو لباب الكوميسارية فالباركينج ديالها تصدمات بيه واقف مقابل الباب بلهفة غير بانت ليه جا كيزرب فخطواته وهي تخبعات من ورا معاذ
ضياء بترجي: عفاااااك ما تخلينيش معاه
ما كرهش معاذ يلبي لها طلبها ولكن غير وصل جلال شاف فيه بنظرة حادة بمعنى ذوب هو مشا وبقات هي مقابلة ليه كتغزل غير بوحدها
جلال: اجي نوصلك
رجعات خطوة للوراء:لا شكرا بلاش كنعرف نوقف طاكسي
شدها من يديها وجرها بزز: زيدي اا ضياء زيدي نحطو النقط على الحروف ونشكلو حنا كاااع هادشي

هو يجر وهي تجر ولكن طبعا قوتها الرهيفة مع قوته الرهيبة راه مستحيل لا مجال حتى لشبه مقارنة وصلها للطموبيل كيحاول يحل الباب باش يطلعها حتى تبلقو عينيه على وسعهم بصدمة
غير وقفو حدا الطموبيل حس بشي يديدات صغيورين زعما كيضربوه تصدم وهبط عينيه لقاها هي لي كضرب فيه وجهها حمر وعروقتها بانو ودموعها نازلين طلق من دراعها وزاد قرب منها مضرقها متكيها على الطموبيل وواقف قدامها مخلي ليها صدره كضرب وتعاود على الله تبرد

ضياء كتنخصص: انت السبب انت.. اهءهءهءهء كون ما كنتيش انت لي درتي داكشي ما نبقاش نفكر ونضربها.....
كتضرب وكتعاود فنفس الجملة شي خمسة المرات عاد حاوطها بيديه متكيها على صدره وكيدوز يديه ببطء على ظهرها
جلال: ششششش صااافي.. انا السبب.. غير ارتاحي.. صافي غير سكتي
حل الباب بشوية جلسها بلاصتها وجبد قرعة ديال الماء جديدة صغيرة حطهم عند رجليها نيت شربها بيديه واليد الثانية على راسها فوق الزيف كيمررها ببطء حتى حسها تهدنات عاد سد عليها ومشا لجهته مد ليها يديه

جلال: اراي ليا سوارت الطموبيل
هزات فيه رموشها الفازgين بالدموع حناكها وفمها حووومر الزيف تخصر وخرج شوية من جناب مرولي هاد الصورة جديدة عليه ما زال ما هضمهاش جا يصرط ريقه لقا حلقه ناشف رما يديه خدالها القرعة من يديها كملها
جلال كيجاهد التنفس كيتجهد: صايبي زيييفك اا ضياء شعرك باين.. وعطيني سوارت الطموبيل ديال باباك باش نعطيها ل صاحبي منهنا للعشية توجد على ما تكملي حصصك
حشمات وبدات كتقادد فيه ومدات له السوارت مشا نيشان مد السوارت للسيد لي واقف جنب الطموبيل كيتسناه عاد كمل طريقه

ضياء عاد تفكرات:ما نقدرش نمشي للصونطر دبا
عقد حواجبه: علاش بالسلامة؟
ضياء: عندي غير حصة وحدة ديال الكوزينة من صباح حتى 12 ما غايبغيوش يدخلوني حيت غايكونو بداااااو
بانت ليه غاتبكي: وماااالك غادي تبكي اش فيها إلى ضاعت حصة اصلا داكشي لي غايوريوكم تلقاي راسك نتي اصلا كديريه.. واا صاافي بلا ما تقلقي.. مزيان نيت باش نهضرو على هاد اليدين لي عمر شي حد تجرأ يدير الشيء لي داروه

هي سقرات ما بقات هضرات وهو زاد فالسرعة وفواحد سطاسيون جا بعيد على الهراج فيه كافي بلدية وقف وحل لها الباب هي لي ما متاكداش من هادشي لي كدير اصلا ما عقلاتش على راسها غير وهي هنا حتى هو حاس بيها حل ليها الصمطة وشد يديها بشوية حتى هبطات مع الصباح كانت الدنيا شبه خاوية دخلو وهبطو لتحت فين كاينين جليسات على شكل خيمات ديال ناس الأطلس بفراشهم وكلشي
جلس من بعدما تسناها حتى جلسات رما عرام ديال السوارت فوق الطبلة والتيلي أما الطلب دارو الفوق فطور كومبلي ليهم بجوج

             💣💣💣💣💣 توقاعتكم وآرائكم 💣💣💣💣💣 

هاااااه وأخيرا هما بوحدهم