🌹هن القوارير🌹 (في طور التنزيل )

part47

👑👑 هن القوارير 👑👑
شمس الغريب

الجزء 47:

حكم ضحك: هاي هاي على ضياء نعاودو النسبة مع الادريسي
خرجات عينيها راحة: اااح اا قلبي على ختي.. لا لا خاص تقبلي
نجاة: لا اا ختي علاه مالها رخيصة عندنا حتى نوافقو بالزربة
ضياء غير ما كتزيد تغرس عينيها فالارض حشمانة أكثر وأكثر وهما شي كيهضر بعفوية بحال راحة وحكم وحتى شرف وشي حاس بشي حاجة انورمال وحاضي العيون بحال رحيمة ونعمة وحتى الحاجة والحاج وشي فراسه الافلام من جميع الجهات نجاة وضياء

رحيمة: نوض نحط العشا
وقفات معها نعمة: أنا نعاونك اا رحيمة
مشاو بجوجات كيتغامزو باغيين يحللو بجوج اش واقع ناضت حتى راحة زربانة لاحقة عليهم شوية تبعوهم ضياء ونجاة باش يفكو ليهم المنامة غير تجمعو فالكوزينة
رحيمة غمضات عين وحلات وحدة وهزات المغرف على ضياء فقنت ونعمة شادة صفاية شادة نجاة فالقنت وراحة بحال لاربيط بيناتهم

راحة ما عرفات شكون تشد: اويلي والله حتى نغوت ونجمعهم عليكم
رحيمة جارة ضياء: اجي نتي يا تقولي يا نضربك بهاد المغرف ما يبقا لا جلال ولا شي حد آخر يالاه قولي
ضياء جاتها الضحكة: واكوااااك اا رحيمة وا نطلعو للبيت
نجاة مبتاسمة لنعمة: واا تي صافي اا بنتي طلقي الله يهديك راه قالت لك نطلعو للبيت ونقولو كلشي
راحة ببلادة: واش كاينة شي حاجة انا ما عارفاهاش
شافت فيها نجاة وضياء بشر من بعدما شافو فبعضياتهم ودازو ليها قرصوها ملي طلقوهم البنات
ضياء: نتي بالذات غير بلاتي عليك وليتي تخبي عليا
راحة ولات تعتارف بلا سوالات: وااا معاذ لي قال ليا إلى سمعها جلال برا نبقا أرملة

حطو عشاهم لي كان معمول للضياف وتجمعو عليه والبنات باغيين غير ايمتا ينوضو للبيت الفوق
شرف: يالاه اا نجاة جمعي ولادك نمشيو
نجاة: كون غير بتنا اليوم هنا ااا شرف الدراري نعسو
فاطمة: اييه لاش تمشي اا ولدي ها نتوما جالسين فداركم

ناضو بسرعة جمعو الطبلة والكوزينة كل وحدة واش كدير وشرف وحكم كيلعبو البلايستيشن لي كاين فاحد البيوت لي تما كملو جميع الروينة جمعو الدار كاملة لتحتانية وعاد طلعو كيتسابقو للبيت حلاته راحة هي الأولى وهي تصدم حتى خرجو فيها البنات من اللور ما ظنوهاش تفراني فالباب
ملي طلو حتى هما تصدمو ب لالة فاطمة شادة هارون منعساه فحجرها وجالسة طالقة ليهم ابتسامة ديال حصلتو

فاطمة: اليوم اا لالياااتي باغيا نسمع لهاد القصة من جميع الأطراف ومعاكم ماشي حتى تحصدو ودرسو وطحنو وتغربلو عاد تجيو تقولو ليا لي بغيتو
شافو فبعضياتهم كيصرطو ريقهم عاد زادو دخلو لعندها جالسين بخمسة مقابلين ليها هي لي كتشوفيهم ناضت نعمة ورحيمة جلسو حداها كل وحدة من قنت
نعمة: حنا اليوم اا ماما بحالك يالاه غادي نعرفو منهم
رحيمة: يالاه اعتارفو اا الخائنات