زهو عُمرك سجَّان وِجداني !

٢٤

الصباح ..

نزلوا من السيارة باتساع وتقدموا لصاحب المكان اللي يبي يبيعه ، دخلوا ونظرات معاذ تراقب وتركهم صاحب المكان يشوفونه براحتهم ، تنهد راكان بتعب : هذا رابع مكان اذا ماعجبك رجعتك لمنصور
ابتسم معاذ وهو يشوف الشباك الوسيع واللي نال اعجبه مردف : بتدخل الشمس من هنا انعكاسها يعطي حياة
جلس راكان على الكنبة الوحيدة بالغرفه : الناس جاية تحل قضايا ما تتأمل اشعة الشمس
تكتف معاذ ومازال يتأمل حتى نطق : جاز لي
ابتسم راكان براحة ينادي صاحب المكان مردف : جيب الاوراق نوقع قبل يغير رأيه
ضحك معاذ و اتفقوا على السعر و بنفس اليوم احضر عمال تغير طلاء و رخام و ديكور واختار الباركية وكل الامور مردف لهم : باسرع وقت ممكن تجهز
اشاروا رأسهم بالايجاب وطلعوا يشترون كنب و مكتب و رفوف وغيرها من احتياجات المكان ..

نطق معاذ وهو يسوق : نكمل تحقيق في القضية
التفت له راكان باستغراب : كيف بتكمل ومعادك محاميها ؟ وكيف اصلًا بترجع تكسبها ؟
ليردف معاذ ونظراته على الطريق : اذا عرفنا اساس القصة و لقينا الفديو انا اعرف كيف اكسب القضية مرة ثاني
والتفت لراكان بتساؤل : ردوا لك اهل البنت خبر ؟
تنهد واشار راسه بالرفض : لا مسهريني اهوجس بردهم خلها على الله بس
ابتسم مُعاذ يمازحه : هم رافضين بس مايبون يكسرون خاطرك افهمها انت
ضحك راكان مردف : لو انام عند باب بيتهم ماخذها ماخذها
اتسع مبسم مُعاذ من اصراره اللي عاجبه لانه صادق حتى بمشاعره ما جاءها من الشباك لكنه مستعد يوقف عند الباب حتى تتكسر رجوله وهمس : رجال ..

الليل ..

في بيت جوري كانت تشوف وجد اللي داخله حسابه وتقلب فيه وتردف : ولد نعمه و ذويق و مملوح وعلى كلامك اخلاقه زينه
لتكمل رُواء بعدها : اذا تمت الامور خليه يعطيك الجي كلاس ناخذ لفه فيها
ضحكت جوري واكملت وجد : عن نفسي اشوف الاخلاق اهم شيء وانه يحبك و يبيك
نطقت جوري بعدهم بمزاح : الحب مايوكل عيش اهم شي الفلوس

رفعت وجد الجوال قدامها على حسابه : تبين فلوس زود هالفلوس اتقي الله
ابتسمت رُواء بعدها بتفكير: ارتحت له
وغمزت لها مردفه : وبعدين صاحب التايقر حبيبتي
لتكمل وجد بعدها : وانا عاجبني عاد يليق فيك
سكتت جوري وهي تناظر لاظافرها همست : من وقت ما جاء وانا افكر بالمعجب السري مدري ليه
ناظروا لها بصدمه ونطقت وجد : ليكون بتوقفين نصيبك علشان واحد محد يدري مين هو ؟؟ يمكن واحد طفشان يرسل هدايا
اتفقت معها رُواء بقولها : لو يبيك كان خطبك وعلمك من هو مو تخبى ورى الستائر ينتظرك تلاقينه اللي قدامك مايتفوت حياتي واستخيري واختاري
اشارت راسها بالايجاب وتنهدت واتسع مبسمها وقت نطقت رُواء : انا بلبس ازرق من الان حجزت الون
ضحكت وجد ونطقت : اجل انا اصفر
ابتسمت جوري مردفه : اذا وافقت بخلي ملكة وباخذ وقت حتى احدد الزواج
اتفقوا معها ونطقت وجد : كويس علشان تنسجمين معه اكثر
التفتت جوري لرُواء ونطقت : جهزي نصائح المتزوجات بليز
ضحكت رُواء بشدة تردف : تبين تطلقين خذي نصائح مني ..