ثنيان مظلوم يا سياف

البارت الحادي عشر؛

الساعه ٩:٣٠ صباحا.ً...
المستشفى....
سعود بحده؛ ماهو انت دكتور..؟
جسار؛ اي..
سعود؛أجل طلعني شوفني قدامك بخير..
سكت جسار متوجه ل الدكتور عشان يكتب خروج ل  سعود إلى من ساعه يحن فوق رأسه يبي يطلع.....
رجع جسار بعد ماكتب الدكتور له خروج والمسؤولية على جسار نطق؛ أمشى يلا...
ابتسم له ببراءة؛ كفو جساري...
ناظره جسار  بنص عين ونطق؛ اي وقت الخنق جساري...
توجهو كلهم طالعين من المستشفى للبيت......
.........
بيت العم جسار ....
نايمين في المجلس ودخلت عليهم ام صقر سعاد... هزاع الى كان نايم وسطه...
ام صقر؛ قم ياهزاع قم...
رد هزاع على امه وكله نوم؛ يمه ساعه بس...
عصبت أم صقر وسحبت الحاف عنه؛ قمم يا هزاع عمك محمد كسر الدنيا قم..
قام هزاع بكسل طالع من المجلس رايح غرفته...
ناظرت ام صقر ب سياف وثنيان وتوجهت لهم..
سحبت الحاف عن ثنيان ورمته فوق سياف؛قم يلا..
مافي جواب منه تنهدت بتعب من ثنيان تعرف نومه الثقيل وصرخت؛ ثنيانوووووو قوممممممم
فز ثنيان ونطق؛ قمت يبه قمت..
ضحكت على كلامه؛ انا خالتك سعاد ياثنيان... (سعاد ام صقر _لمياء ام ثنيان خوات).....
ضحك ثنيان مع خالته وتقدم يبوس رأسها؛ معليش خاله ابوي مروع الكل..
ام صقر؛ الله يهديه لكم...
طلعت ام صقر من المجلس تشوف تأخير هزاع..... لف نظره ل سياف النايم ونط عليه..
فز سياف بخوف وشاف وجه ثنيان ونطق؛ صباح الهدوء والاستقرار علامك انت...
ضحك ثنيان؛ قم قم شرار الوالد...
قام سياف وطلعو من بيت عمهم جسار رايحين بيت ابوهم إلى قريبه منهم اصلاً...
عند هزاع....
فتح باب غرفته ونط فوق فراشه ونام... دخلت عليه أمه سعاد وشهقت بصدمه من هزاع؛ قمم لابارك الله في عدوك قمم..
هزاع نايم وماهو حول أمه إلى تصارخ..... انهارت سعاد هنا وأخذت نعالها وضربت هزاع فيه؛ قمم عمك محمد مشتط برا قم ياهزاع...
قام هزاع وراسه مصدع من ضرب عمه أمس له وطيحات العيال فوقه وأمه إلى كملت الباقي عليه...
بيت الجد.... صراخ ابو ثنيان ينسمع لآخر بيت في الديره......
ابو ثنيان بصراخ: تكلم ياولد..
سلطان بورطه؛ وش اتكلم به..
ابو ثنيان بحده؛ سبب تأخيرك على الحلال..
دخل عليهم ثنيان ووراه سياف وابتسمو ل ابوهم  نطق ثنيان؛ صبحه الله بالخير..
ابو ثنيان؛ وين الخير انت ووجهك.. تعالو تعالو..
ثنيان اختفت ابتسامته وركض ورا جدته وبأَس رأسها؛ أنا في وجهك ياجده..... توسعت عيون سياف من ثنيان إلى تركه؛ ابك تركتني... ناظر ابو إلى يأشر له يصف جنب سلطان....
الجده أمنه؛ هو في وجهي يامحمد ايك تقارب له..
صد ابو ثنيان مقهور من أمه وناظر في العيال؛ وينه هويزع...
وصل جسار وسعود البيت وفتح سعود باب الشارع ودخل عليهم.... جالسين كلهم في الحوش...
شافهم الجد سياف ونطق؛ ارحب ياسعود ارحب...
مشى سعود وهو ساند نفسه على جسار؛ ابقيه يارب..
نطق ابو ثنيان بسخريه؛ انتم ماتنثبرون في المستشفيات من ثاني يوم تطلعون....
شهقت الجده امنه؛ اذكر ربك يامحمد...
ضحك جسار ونطق؛ علامك حاطهم بويه على الجدار...
انسدح سعود على رجلين أمه؛ اعتقهم منك يامحمد..
ابو ثنيان؛ لو منت منطعن كان صفيتك معهم...
سلطان؛ يبه تكفى خلاص...
هز سياف راسه؛ تكفى تهز رجال..... مسك جسار اخوه محمد ونطق؛ في وجهي ذي المره..
ناظره ابو ثنيان ثم ناظر عياله؛ امشو على اشغالكم..... ركض سلطان إلى ماصدق ابوه يقول له يروح له ساعه ونص صاف عند الجدار والشمس تأكله اكل.... ركض معه سياف وثنيان وصدم هزاع فيهم؛ هوب هوب ويننن... مسكه سياف وسحبه معهم؛ امش امش ابوي لا يشوفك..
نرجع عند الجد وعياله....
جسار؛ يكفي والله يكفي إلى تسويه فيهم....
ابو ثنيان؛ ابيهم رجال....
جسار؛ قدهم أطول وأعرض مننا وتهاوشهم اتقى الله يارجال...
تكلم الجد سياف وهي واصله معه؛  اجلس يامحمد لا اسمع لك حس....
جلس ابو ثنيان ونطق؛ سلطان رافع مرارتي ابيه يعقل...
ضحكت سوير؛ تتوقع يعقل دام ثنيان معه...
هزت الجدال رأسها ب موافقه؛ صح ابعد ثنيان عنه ويعقل...
ناظرهم جسار وابتسم؛ تذبحونه عشان ثنيان يوافق وانتم تبونه يبتعد...
سعود وش ذا الحب انا ماحبيت سوير مثله...
شمقت له سوير؛ لأنك مو اخو...
ضحك الجد سياف عليهم وحمد ربه على عياله وتنهد بضيق يوم تذكر ضارب وآيات...
الجده أمنه؛ اسمع ياسياف...
ناظر الكل في الجده....... ناظرتهم كلهم ثم نطقت؛ جاني أحمد طالب الريم وقلت له اسأل ابوها وارد لتس خبر...
ابتسم الجد سياف؛ ابد أحمد ونعم الرجال موافق عليه....
قطب سعود حواجبه ونطق؛ وحنا يمه مالنا رأي...
الجده أمنه ضربته على راسه بخفه؛ وانت من حاشر راسك....
سعود بزعل؛ ماهو احنا اخوانها...
ضحك الجد سياف؛ قول ياسعود وشرايك ....
ضحك سعود؛ موافق يبه........... ضحك الكل على سعود وكلامه واخذو يسولفون عن الأخبار إلى صارت في  ألديره والحلال وأشياء ثانيه........
.................................
سوق ألديره....
بعد تصفيق العيال لبعض كان ترتيبهم...
ثنيان وسلطان في محل السيوف والبشوت...
سياف وهزاع في العزبه.....
عند ثنيان وسلطان......
ثنيان يعدل السيوف وسلطان جالس قدام المحل.....
سلطان؛ ثنيان ..
لف له ثنيان ويده على خصره؛ اسلمم..
ناظره سلطان؛ خاطري ف اليل...(خيل سلطان)
ثنيان تنهد؛ اه يا الجامح...(خيل ثنيان)
عدل سلطان جلسته ؛ طالبك يابو محمد ماترد ف الخاطر شي..
ثنيان؛ افا والله انه تم...
بيتكلم سلطان بس قاطعه درعمت حمد عليهم وبيدينه شاي كرك يحبه قلب ثنيان...
حمد؛ سم ياسليط.... سم يابو محمد...
ابتسم ثنيان؛ ياحي ف الحامل والمحمول...
ضحك حمد؛ يحيك..... ناظر سلطان إلى يناظره بنظرات حقد؛ابك علامك انت...
ناظره ثنيان وضحك بقوه؛ عشانك قاطعت هرجه...
ضحك حمد وبأس رأس سلطان ؛ اهرج جعل محد يهرج غيركك....
فز سلطان من مكانه وباس خشم حمد ( سلام رجال)......
جلس حمد جنب سلطان وكمل سلطان كلامه؛ الخاطر يابو محمد وده....... ماكمل كلامه ومصعب مدرعم عليهم؛سلام يارجال......
عصب سلطان هنا.... حمد وثنيان ماسكين الضحكه بقوه....
سلطان؛ والله يا مصعب لا اصفقك بذاك السيف.... وأشار على احد السيوف الكبيره...... استغرب مصعب وناظر حمد إلى يأشر له يجلس جنبه....... جلس مصعب ولف سلطان نظره يتأكد محد بيجي لهم.....
سلطان؛ ياثنيان كلم جدي يوافق نطس عند الخيم.....
ابتسم ثنيان؛ ابد على الخشم....
سلطان؛ عليه الشحم...
حمد ومصعب بنفس الوقت؛ وحنااا....
توسعت عيون ثنيان؛ وانتم وشو..؟
حمد؛ جايين معكم....
سلطان؛ تم والله انه تم....
خالد إلى كان ورا سلطان وسمع كل شي وصرخ؛ افااا ياذا العلم مزرعه بدون خويلد لاااا....
مسك سلطان عقال حمد وضرب خالد فيه؛ خير ياتبن علامك....
حمد بحلطمه؛ راحت كشختي يعيال.. كله منك يرأس المثلث....
شهق ثنيان؛ تتكشخ عشان مين ياورع...
حمد؛ اخوي لاتنسى اني اكبر منك بسنتين احترم شوي...
...........................
عند العزبه
خلص سياف من ذبح الإبل لعمه سعود.... وراح يشوف هزاع الى محوس بين زرع الأرض....
سياف صرخ بحكم انه  شوي بعيد عن هزاع؛ ياولدد خلصتتت.....
سمعه هزاع وصرخ معه؛ باقييييي.....
جلس سياف ينتظر هزاع يخلص من شغله وشاف شخص قدام باب العزبه... ونطق بهمس؛ غريبه محد يقلط الحين....
(العزبه فيها مقلط لرجال احيانا يسمرون فيه المغرب وابل وغنم ومزرعه شوي كبيره..... وتبعد عن ألديره نصف كيلو)
قام سياف وتوجه ل الشخص الى يناظر ف اسم العزبه (عزبه ال مطلق).......
حول نظره ل سياف ونطق؛ ياولد...
سياف بستغراب؛ سم ياعم......( طبعا هو رجال كبير في السن....)
ابتسم له العم وسيم؛ ذي ملك ل سياف بن نايف..؟
هز سياف راسه ب ايه؛ وصلت خير....
العم وسيم؛ خير  على حياتك ياولدي..... انت وش صلتك به..؟
سياف؛ انا حفيده منهو انت ياعم....
ابتسم بفرح؛ وسيم بن ياسر ال جواد
يحاول يتذكر بس ماهو قادر ابدا؛ ونعم فيك بس ماعرفتك....
ضحك عليه العم وسيم؛ انت ماتعرفني جدك يعرفني الا وش اسمك...
سياف؛ سياف بن محمد....
العم وسيم؛ انت ولد محمد ونعم الرجال والله دامك ولده....
ابتسم سياف له؛ ماعليك زود.....
جاء لهم هزاع بعد ما خلص من الزراعه وثوبه معدوم من التراب ومعصب شماغه؛ وش العلم.....
ناظره وسيم؛ وذا منهو يا سياف...
سياف؛ ذا  ولد عمي جسار...
العم وسيم؛ جسار عنده صقر منهو ذا....
ناظره هزاع بستغراب ونطق؛ وانت منهو....
العم وسيم؛ ماتعرفني ماتعرفني.... سياف ياولدي جيت أزور جدك ومعي الاهل وضيعت طريق ديرتكم ..... ناظر سياف السياره الجيب إلى مركونه على جنب وما انتبه لها من اول؛ ارحب ياعم الحين اوصلك له..... نادا على هلال حارس العزبه عشان يجيب الذبايح ينتبه لها ويكمل باقي الأشغال... مشى هزاع ل شاص سياف وشغله عشان يمشون كلهم مع بعض..... توجه العم وسيم ل سيارته بعد ما قال له سياف يروح لها ويمشي وراه......
عند هزاع.... يسوق وجنبه سياف؛ ولد ما ارتحت له....
سياف يناظر بهدوء الطريق ونطق؛ جدي يعرفه لا تدخل انت...
سكت هزاع مقهور من سياف....... بنفس الوقت عند العم وسيم .....
(تعريف عن عائله العم وسيم..
العم وسيم؛ شايب حنون وطيب وكل شي عنده تم للغريب قبل القريب تاجر عنده مزارع تمر في القصيم والخبر....  عنده من الذريه سبع اولاد اربع عيال وثلاث بنات... عمره ٦٩..
زوجته هديل؛ ماخذه طباع زوجها كلها  تحب عيالها مره عمرها ٦٥....
البكر؛ ملهم عمره ٣٦ ملازم أول  متزوج وعنده بنت وولد....
؛ عهود عمرها ٣٤ متزوجه وعندها بنت...
ذياب؛ عمره ٣٠ ممرض.. .
توأمه ذيب؛ عمره ٣٠ ممرض نفس اخوه...
عهد؛ عمرها  ٢٧ محاميه...
ايهم؛ عمره ٢٥ طيار...
؛ وعد عمرها ٢١ رسامه.....)
هديل؛ ها بشر....
ابتسم العم وسيم؛ اي ياحرمه هي....
تنهدت ب ارتياح؛ الحمدالله....
نطت وعد قدام المرتبه؛ ذي ديرت الضباب إلى تسولف عنها يبه....... هز راسه ب ايه؛ اي ياوعودي ايه.........
وعد؛ وذول الرجال الى واحد عرضه أكبر من عرض السياره .
هديل؛ ياكثر اسالتك.....
ضحك العم وسيم؛ اذكري ربك ذولا احفاده.
شهقت وعد؛ ماشاءالله....
هديل عيال منهم....
العم وسيم؛ إلى جاء اول واحد ذا ولد محمد... وإلى جاء آخر واحد ومعصب شماغه ولد جسار....
هديل ماشاءالله اذكر معهم غيرهم....
هز رأسه ب موافقه؛ ايه محمد عنده ثلاث اولاد وجسار اثنين....
سألت بستغراب؛ وضارب..؟
العم وسيم؛ مادري عنه شي...
هديل؛ وبناته....
ضحك أيهم ونطق؛ يمه تقولين لوعد اسالتك كثيره وانتي مابقيتي شي...
تكتفت وعد بزعل؛ شايف كيف..........
.................
اتمنى تعجبكم.....
انستا 5illz511 انزل فيه شعر....
ودعتكم الله وامانه❣️❣️