ثنيان مظلوم يا سياف

البارت الثالث والعشرون؛

وصل ال مطلق كلهم المستشفى...
صرخ سعود وهو شايل ثنيان من كتوفه؛ تكفون ثنيان لا يروح مني.... صقر شايله من ضهره وأسر من رجلينه...... صرخ سعود مره ثانيه يوم شاف حسين؛ ياحسين تكفى ياحسين...
لف حسين جسمه على مكان الصوت وسع عيونه يوم شافه سعود وثنيان بيدينه.. ركض يجيب ناقله ووراه الممرضين...... حسين؛ حطه ياسعود هنا.... سدحو ثنيان الشباب على السرير وركض فيه حسين والممرضين لغرفه الطوارئ.....
لف سعود وعيونه شرار على ابوه وإخوانه ونطق؛ والله ثم والله ان جاه شي لا تلومون الا نفسكم..
جلس قدام الباب ماسك يدينه ويدعى ربه يلطف حالهم.... ويعدي الموضوع بسلام.....
....
مرت الساعات.. وخرج حسين من الغرفه ونطق؛ سعود...الحقني... مشي طالعين للمستشفى تاركين ال مطلق مع الممرضين الباقي يطمنوهم على ثنيان....
سعود؛ طمني تكفى..
حسين؛ هو بخير الحمدلله بس المخدر لازال عليه.... م ياخذ أدويته صح...
سعود؛ الا..
حسين؛ وبعدين معاك ياسعود.. كل مره تقول الا واخر شي الولد ما يطب فمه حبه..الولد مرهق جسدياً جسمه مايتحمل شيء... ب القوه ياسعود قدرنا ننعشه لو تأخرت دقيقة واحده كان الحينه ميت.. ياسعود خطر عليه من ثالث يوم طلع من المستشفى وهو صاحي من غيبوبة.. قلت لي اتحمل كل المسؤوليه.. بس ياسعود ماشفت انك مهتم...
نزل سعود راسه بضيق؛ مو بيدي ياحسين.. إلى يصير ماهو بيدي..
حسين؛ الله يعينكم على ظروفكم... صحته أهم من كل شي والله انها أهم.... بكتب له أدويه غير ياخذها بنظام تسمع ولالا يا سعود..
سعود؛تبشر والله تبشر...
حسين؛ تبشر بالخير.....
رجع حسين وسعود بعد كلام قليل دار بينهم ونطق حسين؛ السموحه منكم لكن ثنيان رح يقعد عندنا اسبوع تحت المراقبه...
جسار؛ برافقه انا...
حسين كلمه سعود برا يمنع كل شخص يرافق ثنيان وشرح له الأسباب وتفهمه طبعاً؛ معليش دكتور جسار... عمه سعود بيجلس معه..
التفت جسار ل سعود ونطق؛ وراك بلا انت...
سعود؛ما وراي الا الخير له...
الجد سياف بصداع؛ امشو يا رجال تطمنتم على ثنيان جزاكم الله خير....
بقق عيونه على ابوه وكيف نطق ب كلمتين وراح...
أسر خبط على كتف سعود ونطق؛ نجيكم بكره..... رمي منافي مفتاح سياره سعود ونطق؛ مفتاحك مساعدك..
هز سعود راسه ب ايه؛ اي والله..
ومشى كل ال مطلق بعد ما تطمنو على ثنيان......
درعم خالد على حسين بعد ما تأكد أن كل ال مطلق راحو... ونطق بغباء؛ دكتور كيف حالك..
انصدم حسين منه ونطق؛ الحمدلله... بغيت شي اخوي...
خالد؛ يعني تقدر تقول خدمه صغيره...
تكتف حسين ونطق؛ أمر...
خالد أشر على غرفه ثنيان ونطق؛ قلع سعود وخلني انا عنده.... وسع سعود عيونه بصدمه من خالد لأنه كان وراه وسمع كلامه... ضرب كتف خالد من اليسار ولف عليه خالد مخروع ونطق سعود؛ أيا السربوت ودك تقعد عنده أجل..
خالد؛ سعودي افا ياولد خلني عنده بونسه...... حسين بضحك؛ معليش يا....
خالد؛ خالد آل تركي... وكمل حسين؛ معليش ياخالد معرف وش صلتك فيه لكن سعود إلى بيقعد...
خالد برجاء؛ تكفى يا ذا الوجه خلني عنده... والله سعود ذا ما منه فود...
سعود؛ اقول خويلد امك ماوصيتك على أغراض... لف خالد له  ونطق؛ امي مين ياتيس.. ماهي موجوده... جيب غيرها...
مسك حسين راسه بصداع منهم ونطق؛ تصرف انت وهو... مشي حسين يخلص إشغالهه وسعود وخالد يتناقرون مين يجلس عنده......
..........
عند ديره الضاهريه..... اسم مستعار..
رحب أهل الديره كلها ب سلطان لأنه ضيف ولد شيخهم عبدالعزيز آل نياب...
استحى سلطان وياريت الأرضية تنشق وتبلعه من الناس والرجال إلى يعزمونه كل شوي... نطق بعد كلامهم؛ اعتبروني يارجال شارب واكل من كرمكم.. لكن والله مقدر اجلس هنا أكثر..
تكلم برق؛ افا يا سلطان افا ياولد المطلق.. ترد عزايم ديرتي...
تورطت سلطان ونطق؛ مابه احد يردك يا برق.. لكن ياطويل العمر ساري على الطائف مستعجل.. اخوي هناك مشغل جوالي اتصالات...
كذاب سلطان يكذب على برق سياف نايم ولا هو عارف وين اخوه..
تكلم عبدالعزيز آل نياب؛ ياولدي يا سلطان خلك اليوم عندنا بس.. اليل جاء وسيارتك من يصلحها الان.. بكره الصباح تعين من الله خير..
وده سلطان يرن برق كف إلى ورطه مع أهله ويرن كفوف بوجه سياف إلى طنشه...نطق؛ تأمر يا عمي تأمر....
.....
بيت جسار..
تأكد أن الكل نايم.. راح فتح باب غرفه اخوه هزاع... ألانوار مسكره.. والشباك مفتوح..
نطق يوم شافه منسدح على السرير؛ هيه هويزع..
فز هزاع على مناده اخوه؛ صقر..
تقدم صقر له بعد ما سكر الباب؛ايه صقر من غيره...... جلس صقر جنب هزاع ونطق؛ بك شي..
هزاع؛ وش اقول ياخوك... اقول مابي وتقولون بك... إلا شصاير...
انسدح صقر على السرير ومسح على شنبه؛ قول إلا وش الى ماصار...
تربع هزاع وضرب بيده فخذ صقر المنسدح ونطق؛ وشو انطق...... تربع صقر معه ونطق؛ اسمع جدي قال لنا فيه ضيوف ومحد يدري منهم.. وثنيان كان ف العزبه هو وخويلد وسعود... الزبده رحنا كلنا والضيوف وصلو وتخيل منهم...
هزاع بتركيز؛ مين...
صقر؛ ال فيصل... أهل خويك نايف... اسمع اسمع المصيبه وشهي..
همهم هزاع المركز وكمل صقر؛ يا طويل العمر طلع ثنيان حفيدهم....... هزاع بصدمه؛ وش حفيدهم انت الثاني...
ضربه صقر على راسه ونطق؛ خل اكمل...... هز هزاع راسه وكمل تركيز مع اخوه..
صقر؛ وأمه هي بنت الجد عبدالله خوي جدي سياف.. وعنده اخ مادري منهو... وكلم ثنيان يجي يشوف أمه وأخوه.. بس التيس عيا يقول محد أمه وابوه غير عمي وخالتي... وطردهم سعود طرده محترمه... المهم الحين ثنيان ف المستشفى صارت سالفه لا بعدها ولا قبلها...
مع كل كلمه ينطق فيها اخوه ينصدم هو الثاني؛ ابك انت بخور السوق... الحين ثنيان كيفه..
رجع صقر ينسدح ونطق؛ ابد بخير..
هزاع؛ وسعود كيف طردهم..
صقر؛ قال لهم العشاء يا آل فيصل... تعرف كلمه سعود أن ماحب شخص....
هزاع؛ تكفى سعود ذا مصروع...
صقر؛ توك تدري يا تيس...
هزاع؛ ابوي لو عرف انك جيت وش بيسوي..
صقر؛ خله يولي.. مابك شي ليه يصارخ..
مر اليل بين سوالف هزاع وصقر.... وضيافه الضاهريه ل سلطان... ونومه سياف الناسي اخوه الصغير.... وخالد إلى تقلع بيته بعد هواش سعود له..... وسعود الى جلس عند ثنيان مرافق...
وسليمان إلى لقم هواش وصراخ من نايف يرجع له ثيابه لكن لا حياه لمن تنادي يانايف مع سليمان...
..................................
أذان الضهر.... المستشفى..
دخل خالد المستشفى بعد ماجاب ل سعود ملابس... دخل غرفه ثنيان ورمى الكيس بوجه سعود ونطق؛ خذ اغراضك....
ارتطم الكيس بوجه سعود ونطق؛ الاكل وينه...
خالد؛ شغال عند ابوك انا... تقلع من نفسك جبه.... وثم ناظر ثنيان؛ الأمير النائم للحين نايم...
سعود يغير ثوبه المحوس؛ أمير ديرته..
ضحك خالد على شكل ثنيان؛ متى يقوم..
جلس سعود على الكنبه ونطق؛ العلم علمك...
تنهد خالد بضيق ونطق؛ الله يعين..
سعود ؛ ورع أمس تقول امك ماهي موجوده...
تذكر خالد إلى كان ناسي أمه وطواريها؛ ايه صح.. سيرت قبل اسبوع على تبوك..
سعود؛ عند عماتك..
خالد؛ وفي غيرهم ياسعود...المهم بروح افتح المحل توصي على شيء..
سعود؛ فمان الله..
مشي خالد طالع من المستشفى متوجه ل ديرته.. سوق الديره يفتح محله....
....
موسكو... روسيا...
نايف طلب منه جده عبدالله يرجع السعوديه ويرجع سليمان معه... لكن سليمان رافض انه يرجع ويعيش معهم مره ثانية وهم إلى ذلوه واهانوه... صرخ سليمان بوجهه اخوه بقهر؛ لا يانايف لا.. مارح ارجع لو تنطبق السمآء والأرض..
نايف؛ يا سليمان تكفى ياخوك اسمعني..
كسر سليمان المزهريه إلى كانت فوق الطاوله وبصراخ؛ والله يا نايف والله لو يكون يوم موته ما اروح.. ابك انت ماشفت وش سوا فيني هو ولده..
نايف بصراخ معه؛ الإنسان يغلط يا سليمان ويندم.... قاطعه سليمان؛ وجاي يعتذر.... وش يفيد الندم يا نايف هاه وش يفيد.. لا جرحك شخص وقلل مقامك بين العربان وش تقول عنه.. غلطه.. وش من غلطه يانايف.. انت ماتعرف ايش الى مريته.. ماتعرف وش الى سمعته... ماتعرف.. كانت سنينك كلها سم وابشر.. وانا لا مرفوض.. انت كنت تعيش وتنبسط وجنبك ذاك يضحك والثاني يسولف لك... وانا وانا... محد حولي.. كلهم يقهروني... كلهم ينقصون مني....
لقيت الدنيا هنا يا نايف عند الغريب يا نايف... القريب هجرني والغريب احتواني.. لا تجي وتسولف فوق راسي عن شي انت جاهل عنه.... تبي ترجع ارجع ماني ماسكك...
عجز نايف يرد عن اخوه عجز وكثير.. ماتوقع ولا واحد ب الميه أن اخوه عاف أهله وهو دايم يشوفه يحاول يراضيهم رغم أنه مايعرف وش سوا...
...
عند الضاهريه..
استأذن سلطان منهم واستسمح واعتذر انه مايقدر يقعد اكثر عندهم.... جت ل سيارته سطحه واخدتها وعدلها.... حرك سيارته متوجهه ل الطائف يشوف مشكلة اخوه الكبير سياف إلى نسيه كله... استغرب من ثنيان وأنه مادق عليه مثل كل مره.. مايدري ان اخوه مترقد ف المستشفى..
...
بيت الجد سياف..
عرفت الجده أمنه ب السالفه إلى صارت أمس.. وقومت وقعدت الدنيا كلها فوق راس زوجها وعيالها..
الجد سياف؛ خلاص يا أمنه اقعدي..
الجده أمنه؛ وين اقعد وين يا سياف.. دمك بارد ليه.. اقعد وحفيدي ب المستشفى.. ليكون شايف عقلي مطير..
ابو ثنيان؛ يمه  الله يهديك وشوله تقولين كذا...
الجده أمنه؛ اسكت انت يامحمد ماودي اسمع لك صوت.. كله من راسك... ولفت على جسار وصارخت عليه؛ وانت يا ذا العله.. من يوم قلت له ابوك قاتل وهو ينوح فوق راسي أعلمه وش سالفته.. انت منجدك يا جسار يا ذا العقل.... تدور سعود بعيونها لكن مالقيته ونطقت؛ وينه سعود خلوني اكمل عليه الثاني...
الجد سياف؛ اقعديي يا أمنه اقعديي....
الجده أمنه؛ سياف.. والله والله ان يجيه شي بيتي انت وعيالك يعتذركم..
وسع الكل عيونه من كلام الجده أمنه وخصوصاً الجد سياف وعياله ونطق؛ تتطرديني من بيتي..
الجده أمنه؛ اطردك مثل ما طردت ولدك ضارب.. لا تحسب اني نسيت وش سويت فيه يومنه يجي ويقول يبه عاوني...
ابو ثنيان؛ يمه عشان مين تسوين كذا... عشان ثنيان..
الجد أمنه بقهر؛ الغالي ولد الغالي يا محمد...
مشت الجده أمنه تروح غرفتها ترتاح بعد القهر والغبن إلى جاها...
عند ام ثنيان كانت اختها سعاد تهديها..
الجدال وسوير والريم منصدمين من الى يصير..
...
المستشفى..
صحى ثنيان من نومته... ونقز سعود يجيب له اكل.. ويهاوشه على إهماله ل صحته وادويته إلى ما ياخذها اصلآ واعترف له أنه رماها اول ما طلع من المستش.. تجنن سعود هنا وبدأ يصارخ عليه؛ انت مهبول.. احد صاحي يطلع من المستشفى يرمي ادويته هاه...
ثنيان بصد؛ صحتي ولا صحتك..
سعود يقهر؛ صحتي اكيد..
لف ثنيان له بصدمه ونطق؛ لا ياشيخ..
شمق سعود له ونطق؛ اشرب يلا...
صد ثنيان وجهه مره ثانيه ونطق؛ ماودي..
نط سعود على السرير وبيدينه صينيه الشوربة ونطق؛ ماهو بكيفك....... دخل حسين بيشوف حاله ثنيان وانصدم من سعود إلى جالس فوق ثنيان ويغصبه يأكل وثنيان مغطى فمه بيد واليد الثانيه يدف فيها صدر سعود.. كان أم تاكل طفلها.. وضحك عليهم ونطق؛ ب الهون ياسعود ب الهون...
لف سعود عليه؛ اتعبني ياحسين ماهو راضي ياكل... تعال تعال.. الأخ مرمى ادويته..
بقق عيونه بصدمه من ثنيان ونطق؛ محد مهبل فيني هنا غيره اي والله.. ابك انت كيف ترميهم...
ثنيان ب احراج منه؛ ماطقتهم....
حسين؛ وشف لك اقرب زباله وارمي... مسك حسين راسه بوجع منه ونطق؛ يراسي منك يراسي.. طلعت لي الشيب يا ثنيان....
مد سعود راسه ل حسين ونطق؛ وانا وش تقول عني..شايب بجسد شباب...
تكلم حسين؛ سعود شوي من وقتك لو سمحت..
هز سعود راسه ومشى طالع مع حسين بعد ما تأكد أن ثنيان شرب شربته...
سعود؛ سم..
حسين بتوتر؛ ا.. شسمه...
سعود؛ يرحم والديك انطق...
حسين بضيق؛ ثنيان مريض قلب..
وسع سعود عيونه بصدمه ماهو قادر يستوعب الكلام الى قاله حسين ونطق؛ ك.. كيف مريض قلب..
حسين؛ إلى سمعته ياسعود... الصدمات إلى جته ضعفت قلبه... وصار النبض جدآ سيء.. أمس قلت لك بقوه قدرنا ننعشه.. لو ما رحمه ربي.. كان ميت...
مسك سعود راسه بصدمه من الكلام الى  سمعه ومن آخر كلمات نطق بها حسين...  بنحدد يوم نسوي له قسطره... لا تتعبونه أكثر.. خلوه يرتاح.. ولا بيصير له شي لا سمح الله...
عجز سعود يفسر إلى يجي لي ثنيان... ابوه.. إخوانه.. ابو صويلح إلى الحين يجهز له مصيبه جديده.. ولا مرضه.. يا كبرها عند ربكم ياكبرها... مشي يدخل الغرفه والضيق محتوى نفسه..
ناظر ثنيان بعجز... وده يدخله داخل ضلوعه ويقول يكفي إلى يجيه... مايقوي أكثر..
استفهام كبير على رأس ثنيان من نظرات سعود له لكن ما اهتم وتلحف ب لحاف السرير ونطق؛ بنام.. وده يقول ل سعود طلعني ماخلصت كلامي لهم.. لكن يدري ومتاكد سعود بيحطه حنيذ لو نطق بشيء..
...
مرت الساعات ووصل سلطان ل الطائف... مع الأجواء الجميلة والبارده.. ارتعش جسمه بسبب الهواء البارد إلى دخل من فتحت الزجاج بسبب سرعته.. عجبه الوضع وتركه على حاله..
يعرف شقتهم وينها ووين موقعها.. مر الكوفي القريب منها وأخذ له مشروبه المفضل..
نطق بينه وبين نفسه؛ هين يا سياف ما أكون سلطان بن محمد أن ماوريتك نجوم العصريه..
...
شقه سياف وسلطان..
كان سياف يرتب أغراضه وانسدح  بتعب من كثرها.. فتح جواله يشوف متى موعد روحتهم ل الاسطبل.. جاء بخاطره شاهي كرك.. وقام يسوي له.. انفتح باب الشقه بقوه وانخرع سياف من الباب إلى انضرب ب الجدار بقوه... ترك إلى بيده وراح يشوف مين الئ دخل...؛اف سلطان يسحب شنطه واحده واحده ويرميها داخل الشقه... انتهى من الشنط وقفل الباب ولف بجسمه على اخوه وتكتف؛ قول انك ناسي اخوك الصغير المسكين إلى كل من شافه رحمه.. قول اني ماطريت على بالك ولو للحظه... ودك بها  من الله انت... ودك تفتك مني هاه.. قول ترا عادي.. غيرك وده يكون اخوي.. وده يسمع هروجي... وده يتكلم معي اصلآ... نزل يدينه وحطهم بجيبه وكمل؛ على العموم..ياخوي العزيز سياف.. ياخي استحي اناديك اخوي.. لأنه في شخص بالغ.. عاقل.. كبير..طوله طول عامود وعرضه عرض باب .. والشيب مالي راسه..يسفه اخوه.. ولا يكلف نفسه يدق عليه.. يتطمن.. يمكن لا سمح الله جاه واحد وقتله ومشى.. أخذ الفلوس الى  عنده ومشى..
حك سياف حاجبه الأيسر بورطه من لسان سلطان إلى مارح يسكت الحين وبيذكره طول عمره انه ماتطمن عنه.. نطق؛ ودك بكرك....
هز سلطان راسه يمين ويسار ونطق؛ لا تحاول تنسيني ترا مارح أنسى..
نزل سلطان العقال والشماغ من راسه وبدأ يضرب فيهم سياف إلى يحاول يهديه..
...
بعد الهواش إلى صار بينه وبين اخوه دخل غرفته وقفل على نفسه ماوده يشوف ولا يكلم نايف..
يجهل السبب إلى يخلي جده يطلبه يرجع السعوديه.. وماوده يروح ولا وده يعرف وش السبب..
زعل نايف من اخوه سليمان ومن الكلام الى قاله له.. وكيف يشوف تعامل أهله بينهم والتفضيل.. ماعمره حب تعامل أهله مع سليمان حتى لو انه ماهو اخوه من آلام.. مايحب صراخ وهواش اعمامه وابوه على سليمان إلى بنظره شي تافه وجداً... تنهد بحيره احتار وكثير..
وش يسوي.. وكيف يتصرف.. يخليه براحته.. ولا ياخذه ب القوه.. مايقدر يعصي جده.. ولا يقدر يكسر سليمان.... إلى جاه يكفيه ماوده يزيد عليه..
...
المستشفى..
نطق سعود بعد دوامه من الهواجيس؛ ثنيان..
ناظره ثنيان وتنهد؛ ادري وش بتقول...
سعود؛ الجواب يا ثنيان..
ثنيان؛ بقعد مابروح.. بقعد الين ادري بسالفه كلها.. وبعدين نشوف ياسعود..
سعود؛ مايحتاج تعرف..
ثنيان؛ وشو إلى محتاجه ياسعود... يجي لي من العدم ويقول امك من ال فيصل وابوك حي واخوك ضايع.. سعود تراني بشر ياسعود ماني آله..
ماركز سعود بكلمه ابوك حي ونطق؛ خلاص لا تتعب نفسك أكثر..
تنهد ثنيان ونطق بعد ماكان ناسي إخوانه؛ وينه جوالي...
طلعه سعود من جيبه ومده له؛ خذ..
أخذه ثنيان وفتحه لكن مافيه شاحن كشر بوجهه ونطق؛ سعود مافيه شحن..
سعود؛ وش تبي به..
ثنيان؛ ابدق على العيال...
سعود؛ دق لهم من جوالي وعطني حقك اشحنه.. مد سعود يده لجيبه العلوي وأخذ جواله وفتحه ل ثنيان.. أخذ جوال ثنيان وقام يشحنه.... أخذ ثنيان جوال سعود ودق على سياف.. لكن مارد سياف عليه... دق على سلطان... وآخر رنه رد عليه...
سلطان بحلطمه؛ لا ماشاءالله واضح توك تذكرني.. ايه سعود وينك يوم كامل ما تدري عني وشتبي الحينه داق..
ضحك ثنيان عليه ونطق؛ ياخي انت لسانك متبري منك..
نطق سلطان بفرحهه؛ ارحبب يا عضيدي...
ثنيان؛ تبقى يارب.. ايه ياعضيد علومك...
سلطان بضيق؛ مسكره بوجهي..
ثنيان؛ افا ياذا العلم.. وشفيك..
سلطان ناظر سياف إلى جالس جنبه محوسس بعد الهوشه ومكشر ونطق؛ ابد سيافووه  خربت سيارتي والتيس ذا مخليني ب الصحاري وحيد.. كلمته حتى ماقال جايك  الا يقول خل الضاهريه تساعدك..
ضحك ثنيان عليهم ونطق؛ لا لا سياف مايسويها يا سليط..
سلطان؛ الا والله انه مسويها... اسمععع
ثنيان؛ وشووو..
سلطان؛ في واحد اسمه مبراق.. مدري برق ال نياب.. خويك هوو...
ثنيان؛ ايه الله يحفظه لأهله.. خوي المبزره...
سلطان؛ ايه اسمع.. هو الى ساعدني..يقول انه يسلم عليك..
ثنيان؛ الله يسلمه... إلا وينه التيس حقك..
سلطان؛ هنا جنبي تقول جبال الحجاز كلها فوق رأسه..
ضحك ثنيان من قلبه يوم تذكر ملامح سياف كيف تكون إذا زعل من شيء؛ هاته هاته..
مد سلطان الجوال ل سياف ونطق؛ كلم ثنيان..... أخذ الجوال من اخوه ونطق؛ أرحب..
ثنيان؛ البقى.. وش مهبب..
سياف؛ قول كيف حالك.. كيف وصلت.. كيف الاسطبل.. كيف الجامح.. وشوله وش مهبب..
ثنيان بضحك؛ لا ضروري ناخذ حق سلطان..
سياف؛ ايه ناخذه ليه لا.. والله محد مدلعه غيرك.. تاركه رخمه...
ثنيان؛ ربيه أجل...... وسع سلطان عيونه منهم...... ضحك سعود ونطق؛ شد حيلك يا سياف..
سياف؛ ابشر يا سعود أبشر...
سلطان؛ جابك الله ياسعود.. تعال ماهوشتك...
سعود مسوي نفسه مايسمع؛ ثنيان ودك تاكل....
سلطان؛ يعني مسوي ما تسمع..
ضحك ثنيان وسياف عليهم.. ونطق سياف؛ ايه وينكم الحينه..
تنهد ثنيان بضيق ونطق سعود؛ قاعدين نمشي..
استغرب سياف وسلطان ونطق سياف؛ تمشون الحينه غريبه مانتم ف المحل..
سعود؛ لا انكتمنا شوي..
شك سلطان ونطق؛ سعود به شي صاير..
ثنيان بتدخل؛ لا وين وش يصير ياخوك.. كل شي تمام..
سلطان؛ اي يصير خير..
سياف؛ يلا توصون على شي...
ثنيان وسعود؛ ابد سلامتكم..
سياف؛ فمان الله...
سكر سياف ومد ل سلطان جواله ونطق سلطان؛ حاسس بهم شي...
سياف؛ كأنك ماتعرف سعود أن ماوده بشي يقوله مايقول..
سلطان؛ الله يعين بس.. ايه متى نروح الاسطبل..
رفع سياف يده اليسار يشوف ساعته وونطق؛ نروح على.. خمس.. خمس  ونص كذا..
سلطان بغباء؛ العصر ولا الفجر..
سياف؛ ياثور العصر... الفجر وشو.. رايح تنام هناك انت...
سلطان بضحكه؛ نعطيهم تدريب النوم مع الخيول..
سياف؛ الله يخلف عليك بس..
سلطان؛ نفسيه من قال لي اجي معك...
سياف؛ لا تحسسني انك فله ومافي احسن منك.. تراك ثقيل دم والله..
سلطان؛ ومحطم الذات والخواطر تدري..
سياف؛ شهاده اعتز بها...
سلطان؛ سياف تقلع من وجهي..
رفسه برجله ونطق؛ اخوك الكبير ياتيس انا الى اقولها لك ماهو انت...
سلطان؛ صح نسيت.. اجل انا اتقلع من وجهك..... وقام سلطان ينام ف غرفته... لكنه رجع ونطق؛ سياف.. تدري وش..
سياف بطفش؛ انطق وروح نام..
سلطان؛ ندمان انك اخوي الكبير..
سياف؛ تصدق حتى انا ندمان.. خلصت يلا نام..
سلطان؛ اي يلا سلام... ودخل غرفته مره ثانيه ونام.... رتب سياف لهم جدول الأسبوع.. وثم دخل غرفته ينام...
...
بنفس الوقت عند سعود.. وثنيان..
سعود؛ تهقى يدرون..
ثنيان؛ مردهم يدرون الحينه ولا بعد..
سعود؛ وش يسكت سلطان بعدين ياخي..
ثنيان ؛ اقول ودي بشاي..
سعود بضحكه؛ حتى وانت هنا شاي.. كرك ولا..
ثنيان؛وش نسوي يا سعود... لا حبق...
قام سعود طالع من الغرفه ونطق؛ أبشر... طلع من المستشفى.. يدور بسطه شاي قريبه.. مالقى له قريب المستشفى.. واطر ياخذ سيارته ويروح يدور... بعد دقائق.. لقى له بسطه شاي..
نزل من سيارته وطلب اثنين أكواب شاي حبق..... أخذهم معه بعد ما جهز الشاي.. ورجع للمستشفى... وصل المستشفى ودخل غرفه ثنيان ونطق؛ تأخرت عليك..
ثنيان؛ لا أبد..
مد سعود له الشاي ونطق؛ سم..
ثنيان؛ سم الله عدوك..... رن جوال سعود وكان المتصل أحمد... نطق؛ أحمد يدق...
ثنيان؛ لا واضح ان الريم درت..
ضحك سعود ورد عليه؛ أرحب يا حماد..
أحمد؛ المرحب يبقى.. كيف الحال..
سعود؛ الحمدالله.. وانت..
أحمد بضحكه ؛ فوق السماء ياسعود..
سعود بسخريه؛ اي عريس وش وراك...
احمد؛ وش العلم يا رجال..
سعود؛ علم ثنيان..
أحمد؛ اي.
سعود؛ ابد بخير وصحة..
أحمد؛ الحمدلله على السلامه.. وينه بكلمه..
مد سعود الجوال ل ثنيان ونطق؛ أحمد بيكلمك....... أخذ الجوال منه ونطق؛ حي الله أحمدي..
أحمد؛ يحيك ربي.... الحمدالله على سلامتك وخطاك الشر..
ثنيان بابتسامة؛ الله يسلمك...الشر مايجيك...
أحمد؛ ايه الحينه كيف صحتك..
ثنيان؛ ابد يارجال بخير..
أحمد؛ الحمدلله... سكت أحمد يطالع الريم إلى كانت جنبه تأشر له يجيب الجوال ونطق؛ الريم ودها تكلمك..
ثنيان؛ هاتها حبيبه قلبي..
أحمد بضحك؛ اوه ذاك زمان.. مد الجوال للريم واخذته منه ونطقت؛ ثنيان..
ثنيان بضحك؛ ارحبي ياروحي ارحبي ياريمي..
الريم ببكي ؛ ثنيان كيف حالتك..
ثنيان؛ افا ياعميمه تبكين..
الريم؛ ماهو انت كل شوي مستشفى ارفق على ياثنيان..
ثنيان؛ والله اني بخير ياريمي بخير ابك لا تبكين بعدين يقول عنك أحمد رهيفه قلب...... تنهد سعود بضيق ونطق بينه وبين نفسه؛ لو درو انه مريض قلب وش يصير..
مسحت الريم عيونها بضحك ونطقت؛ خلاص دامك تحارش بخير.. انتبه لنفسك ياروحي انت ..
وسع أحمد عيونه ونطق ثنيان؛ انتبهي ترا المفترس جنبك.. يلا فمان الله..
ضحكت الريم عليهم الاثنين إلى موسع عيونه وإلى جابها صدق؛ استودعتك الله..سكرت المكالمه ونطقت؛ وش فيك..
أحمد؛ الأول يقول ياحبيبه قلبي وروحي وريمي.. والثانيه ياروحي انت...
الريم؛ اي وش فيك تغار من عيال اخواني...
أحمد؛ ابك الواحد أطول وأعرض مني..
الريم بتكشيره؛ اذكر ربك لا تعطيهم عين..
أحمد؛ ماشاءالله عليهم ماعليك مايجي لهم شي.. ثنيان ذا سبعينيات روح وحده..
زعلت الريم من كلام أحمد علي ثنيان ونطقت؛ أحمد...
أشر أحمد علي فمه انه بيسكت؛ خلاص بسكت بسكت..
...
مرت الأيام... طلع ثنيان من المستشفى تحت تحذيرات حسين له واهتمام سعود الغريب عليه...
...
روسيا..
زعل سليمان شين..... شخص مع الوقت يتغير عليك.. يصير شخص بارد.. وتعامله معك جاف وتسليك لا أبعد حدود..
يأكل بهدوء مع نايف على الطاوله.. نطق نايف بعد تردد؛ سليمان..
ترك المعلقه من يده ونطق؛ سم..
نايف؛ سليمان نرجع.. جد.. قاطعه سليمان إلى نطق بهدوء؛ ودك ترجع ارجع محد منعك ولا أحد غصبك.. ثم أشر على نفسه ونطق؛ انا عن نفسي ماني راجع.. لو رجعت تكون نهايتي أو نهايتهم.... قام سليمان من فوق الطاولة... لبس جاكيته ومشى طالع من الشقه...
تنهد نايف كيف يقنعه يرجع السعوديه... ماوده يرجعه لكن إصرار جده عليه يخليه يرجعه..
...
بيت الجد سياف..
قرر الجد سياف يروحون مكه المكرمه.. لأجل هزاع وثنيان...
هزاع عشان جنونه وطبيعته إلى صارت عصبيه نوعاً ما..
ثنيان لأجل تهدأ نفسه ويصير رأكد ويقدر الجد يصارحه ب سالفه ابوه بعد روحتهم..
كان ترتيبهم ف السيارات..
بسياره الجد سياف.. الجمس..
الجد سياف..و الجده أمنه.. ابو ثنيان..و أم ثنيان.. ثنيان.. و الجدال..سعود السائق
سياره جسار.. الجمس..
جسار.. وزوجته سعاد.. الريم.. سوير..هزاع.. والسائق صقر..
.. سياره الجد سياف.. هواش من سعود والجدال..بسبب البقاله..
سعود بنرفزه؛ اول موقف ليه مانزلتي..
الجدال؛ محد قايل لي..
لف سعود لها وكانت آخر جالسه ف الشنطه؛ محد قالتس أجل..
الجدال؛ يبه شفه..
الجد سياف ؛ خلاص يا سعود وقف لها..
تنهد سعود ونطق؛ ابشر يبه ابشر..... وقف سعود عند أحد المحطات ونزلت الجدال تقش كل شي ف البقاله..وثنيان عند المحاسب عشان يحاسب طلبها...
ناظر سعود سوير اخته إلى ركضت بسرعه للبقاله ونطق؛ يمه متأكده ان سوير بنتس..
الجده أمنه وهي شافت سوير؛ مادري يمه مادري... الله يخلف على بس..
.. قبل لحظات.. سياره جسار..ضربت سوير كتف صقر ونطقت؛ صقور وقف معهم...
انخرع صقر منها ونطق؛ ابشري الحين أوقف...... وقف صقر بمسافه شوي بعيده عن سعود ونزلت سوير ركض ل البقاله.. نطق جسار بصدمه منهآ؛ ابك.. ذي العقل منها مسحوب..
الريم؛ تأكد يبه تأكد....
لف جسار نظره ل بنته ونطق؛ ابك انتي أصغر منها وهاديه...
ضحك كل الي ف السياره على سوير وكلام جسار..
...عند ثنيان إلى كان ينتظر اخته تخلص ويحاسب..
جت له الجدال وهي قاشه نص البقاله ونطق؛ عز الله ودعت.. خلصتي..
الجدال؛ اي...
مد الأغراض للمحاسب يحاسبهم... لكن وقفه صوت سوير إلى نطقت؛ اصبر ثنيان...
لف جسمه ل مكان الصوت وانصدم من سوير إلى قاشه البقاله كلها مع الجدال وتركض؛ ابك انتي وهي وش بقيتو....... حطت سوير الأغراض ونطقت؛ عمتك ياتيس..
ثنيان بتنهيد؛ اي وقت البقاله عمتي...... حاسب ثنيان أغراض اخته الجدال وسوير وطلع حسابهم؛ ٣٠٠ ريال..
ثنيان بسخريه؛ لا اشوا قليل مره... كان كثرتي انتي وياها...
نطقت سوير بجديه؛ عادي ارجع اقش الباقي...
وسع عيونه بصدمه ونطق؛ لا وشو تقشين امزح معك ياختي... امشي انتي وياها يلا..
....
الطائف..
نزل من فوق خيله بعد انتهى التدريب اليوم ونطق؛ كذا خلصنا يا شباب...
شكره المتدربين إلى يتدربون عنده ومشى كل واحد منهم بيته..... جاء له سلطان وبيدينه شاي ونطق؛ سم..
اخذ سياف الشاي منه ونطق؛ تسلم..
جلس هو وأخوه يشربون الشاي..... ونطق سلطان؛ ياه ياخي تعبوني إلى عندي...
ضحك سياف عليه؛ تحمل ياخوك ماهو انت الى تبغى تصير فارس هيا خذلك..
ناظر اخوه ونطق؛ المسابقه بعد ثلاث اسابيع...
هز سياف راسه ب ايه ونطق؛ بشارك انا وانت وبعض المتدربين إلى شفت اداءهم كويس..
سلطان؛ كم واحد..
سياف؛ خمس اشخاص ومعنا سبع..
سلطان؛ تمام..
سياف؛ دقيت على ابوي يقول رايحين مكه..
سلطان؛ حلو عشان ثنيان يهدأ..
صد سياف يطالع السماء ونطق؛ ما أظن ياخوك...
ضحك سلطان ونطق؛ افا ماهو اسمه الهدوء والله أغيره له أن ماهدي...
ضحك سياف على كلامه وكمل يشرب شاهيه....
....................................