ثنيان مظلوم يا سياف

البارت الرابع والعشرون؛

الله على قلب كسرته.. وهو يغليك..
والله على خاطر جرحته.. وهو يداريك..
...
انشرح صدره وانهدت نفسه من بعد العمره إلى سووها.. شكر بداخله جده إلى قال لهم يروحون
أطهر الأماكن... مكه المكرمه..
...
طريق الرجعه.. وسعود يهوجس وهو يسوق.. كيف يعلم أهله.. وأمه وش بتقول.. أبوه وش بيقول.. إخوانه وعيالهم.. ياسعود انك شلت الهموم كلها وغيرك ماهو مهتم بهآ.. ثنيان نايم على كتف اخته الجدال وهي تمسح على شعره... صداع داهم سعود ونطق؛ الجدال..
الجدال؛ سم..
سعود؛ قوميه خليه يجي يسوق تعبت..
ناظرت وجه ثنيان وكيف انه مرهق ونطقت؛ اقول يا سعود..
سعود؛ وشو..
الجدال؛ خلني انا اسوق..
سعود بصدمه؛ هاه..
الجدال؛ إلى سمعته..
سعود؛ لا بالله ماني مجنون..
الجدال؛ أجل خلك مارح اقومه...
بعد دقائق.... سعود على أعصابه لا تصدم الجدال فيهم ويروحون وطى..
الجدال يا الجدال... ماسكه الدركسون أو الطاره... بيدينها الإثنتين.. وتضحك بورطه ونطقت؛ سعود.. سعود...
همهم سعود لها.... ونطقت؛ خلاص امزح تعال انت.... وسع سعود عيونه بصدمه منها ونطق؛ لتس ساعه تحني فوق رأسي والحينه...
الجدال؛ كنت اتمسخر وياج...
سعود؛لا أبد توصلي الأهل والسيارة بصحه وسلامه...
سكتت الجدال وهي خايفه تصدم فيهم.... الكل نايم ف السياره... الجد سياف والجده أمنه والأب محمد والأم لمياء والأخ ثنيان..
...
والحال ف سياره جسار مشابه لهم... هزاع يسوق.. وجسار وسعاد وسوير والريم وصقر نايمين..
...
الصباح..
بعد وصولهم للبيت بسلام.... بيت الجد سياف..
صحى ثنيان من نومته وكانت أول مره يصحى فيها بدري.. رفع يده يشوف الساعه وكانت الساعه..٧:٣٠..
استغفر ربه وقام يغسل وجهه ويقوم سعود معه... قام سعود.. وبدل ملابسه على كلام ثنيان إلى يقول له بنروح المحل ..
خلص سعود وتوجه هو وثنيان طالعين من الغرفه.. ناظرو سوير إلى تحط الفطور والجد سياف إلى خرج من غرفته نطق؛ صبحتم الله بالخير
ثنيان وسعود؛ صبحت بالنور..
مشي ثنيان بيفتح باب الحوش لكن وقفه صوت جده؛ الفطور يا ولدي...
تكلم وهو صاد عنه؛ العذر منك لكن ماودي به..
سعود بتدخل؛ بنفطر يبه هناك..
كان الجد سياف بيتكلم لكن ثنيان طلع وطلع وراه سعود بسرعه وسك الباب..
... سوق الديره..
يتمشى هو وسعود أصحاب المحلات إلى يفتحون محلاتهم...
وصل ثنيان وسعود المحل وميل سعود جسمه عشان يفتح القفل..
فتح القفل وفتح الباب... سحب ثنيان الكرسي وجلس فيه.. وسعود يشيك على الحسابات..
بعد مده.. حس ثنيان بثقل بصدره.. يحاول يتنفس لكنه مايقدر.. مسك جانب صدره الأيسر أو مكان القلب بوجع منه.. نطق بعد ما ازداد الثقل والوجع نطق بصوت شبه مبحوح؛ سعود..
لف سعود له ب استغراب من صوته وفز يوم شاف وضعيته...مسكه واسنده على كتفه ونطق؛ يوجعك مره..
هز ثنيان راسه بألم.. ونطق سعود؛ اوديك المستشفى..
دخل خالد بعد ماشاف المحل مفتوح من محله وانخرع من شكل ثنيان ونطق؛ وش به..
سعود؛ يتألم ياخالد..
خالد؛ انقز بك المشفى... بعد صمت طويل تكلم ثنيان؛ خلاص..
سعود؛ راح الوجع..
ثنيان؛ أيه أيه..
خالد؛ متأكد ياخوي ..
جلس ثنيان على الكرسي وفتح اول أزرار ثوبه ونطق؛ بخير خلاص..
مسح خالد علي راسه من التوتر إلى جاه منه ونطق؛ افطرتم...
هز سعود راسه ب لا؛ لا..
خالد؛ اجل اسمعو.. ابروح أجيب لنا خبز يحبه قلبكم.. شاي وش..
سعود؛ حبق... ثنيان؛ كرك..
خالد؛ أجل تم.. ثواني وانا عندكم..
راح خالد يجيب لهم فطرو يفطرون...
...
موسكو.. روسيا..
فتح باب غرفه اخوه وناظره يكتب والسماعه على راسه... تنحنح ونطق؛ سليمان..
مارد سليمان عليه وأكمل نايف؛ انتبه لنفسك ياخوك.. انا برجع وبشوف جدي وش فيه..
مشي نايف وخاطره ضايق من صد سليمان سحب الشنطه وراه وسكر شقه اخوه.. تنهد سليمان بعد ما سمع صوت الباب.. يدري انه ضايق وشايل عليه بخاطره لكن ليه يغصبه يرجع وهو ماوده يشوف أهله.. أو يعتبرهم أهله ماعمره سمع منهم كلمه طيبه.. ماعمره شاف منهم الحنان.. دايم يشوف الصد والكره والاهانه من اهله.. جده.. ابوه.. اعمامه..عيال اعمامه.. وإخوانه إلى تغيرو الفتره الاخيره.. الوحيد الى كان معه نايف.. وصاير يغصبه مثلهم..
...
الطائف..
صرخ سياف على سلطان؛ ياتيس ماهو كذا..
صرخ سلطان معه؛ أجل كيف..
دف سياف سلطان بجانبه الأيسر وصرخ؛ ابعد خل اشوف وش تهبد..
تكتف سلطان ونطق؛ لا ياشيخ.. من الى يعطيني الطريقه..
سياف؛ اقول بلا هرج كثير.. شف كذا تسويه.... كسر سياف بيضه واحده على الصحن واخذ السكر وحط منه شوي فقط.. قاطعه صراخ سلطان؛ لااااا..
سياف؛ وصمخ يصمخك.. وشو لا..
سلطان؛ ذا ملح ملح..
انصدم سياف و نطق؛ تحسب ماعرف السكر من الملح..ذا سكر..
سلطان؛ ابك ذا ناعم السكر خشن..
سياف؛ ياخي وش دارك انت هاه.. في ناعم وفي خشن ياثور.... أخذ سلطان بيده شوي وحطه على فم سياف ونطق؛ أن كانه صدق سكر قول وان كانه ملح قول..
طبطب سياف على شفايفه...وسع عيونه بصدمه ونطق؛ ابك ذا ملح..
سلطان؛  ماغيرك ثور.. ابعد خلني انا اشوف..
وخر سياف من طريق سلطان وبدأ سلطان يحوس ف المقادير ويحذ ويضيف من راسه.. وسياف يناظر فيه.... بعد ما خلص الأخ سلطان من التفنن إلى سواه ف الحلا.. حطه ف الثلاجة ونطق؛ ثلاث اربع ساعات نطلعه..
هز سياف راسه ونطق؛ امشي ندق على ثنيان... وعلى كلامه ذا رن جوال سياف إلى كان في الصالة يشحن.. مشي يشوف من المتصل ونطق سلطان إلى مشي وراه؛ الطيب عند ذكره يجي..
سياف؛ انشهد.. رد عليه ونطقو الثلاثه مع بعض ثنيان وسياف وسلطان...
؛ياهلا بالعضيد الغايب..... ضحك الشباب على نفس النطق وكأنهم توأم ثم نطق سياف؛ ياهلا والله باخوي وعضيدي..
انقهر سلطان ونطق؛ أرحب ياسندي وذخري..
ثنيان؛ مسابقه هي انت وياه... ياهلا فيك.. ويامرحبا بك..
سياف؛ شنسوي ياخوك التيس ذا نشبه..
سلطان؛ ماعليك منه علومك..
ثنيان؛ ابد على ماتحبون.. إلا انتم كيف حالكم..
سياف؛ الحمدلله.. ماشيه أمورنا..
سلطان؛ هي صح الحمدالله لكن ياخوك ماهي زينه بدونكم..
ثنيان؛ تكبر وتأكل غيرها ياسليط..
سلطان؛ خير ياطيب هي أكله هي..
سياف؛ الا اسمع ذا الحمار وش مهبب..
ثنيان؛ ارطن..
بدأ سياف يقول له ويحكي له سلطان كيف اشغله ب الحلا والمقادير..
انصدم ثنيان من سلطان؛ افا عليك يا سلطان كل ذا باخوك الكبير..
سياف؛  ياشيخ ف البقاله ناشب بحلقي..
ثنيان؛ وينك ياسعود تمسكها عليه.. عز الله ودعت..
سلطان؛ لقاء الجبابرة بيصير...
سياف؛ والله محد جبار غيره ولا انت جاري..
وسع سلطان عيونه وخبط كتف اخوه بقوه... انصدم ثنيان من صوت الضربه ونطق؛ ولد كتفك موجود..
سياف بألم؛ لا والله انه مخلوع ابك ذا ماينفع نخليه مدرب ذا نحطه مصارع..
ضحك ثنيان ونطق؛  ومرزوق معه..
سلطان بضحك؛ يصير انا معضل وهو معضل لا كدا ماينفعش..
ضحك الإخوان على كلامهم وبدأت تاخذهم السوالف...
.....
جالسين كلهم ف الحوش يتقهون ويسولفون.. دخل عليهم ثنيان مستعجل.. شافه جده ونطق؛ ثنيان ياولدي تعال..
راح ثنيان بسرعه عند جده؛ سم ياجدي..
تنهد الجد سياف؛ اقعد هنا بحاكيك..
ثنيان ب استعجال؛ والله ياجدي مستعجل هو شي ضروري...
ابو ثنيان بحده؛ ولد جدك يقول اجلس تجلس..
هز راسه الجد سياف ونطق؛ لالا.. ان كانك مستعجل مره روح ياثنيان...
هز ثنيان راسه وراح غرفه سعود.. يغير ثوبه الأبيض ويلبس ثوب أسود بدون شماغ...
طلع من غرفته وهو ياخذ مفتاح السياره بيدينه... سكر باب الحوش وركب سيارته..
تنهد الجد سياف ونطقت الجدال؛ ياجدي بك شي...
التفت لها الجد سياف ونطق؛ والله حاله يابنتي مايسرني..
ابو ثنيان؛ رجال يبه وش تحاتي..
الجد سياف؛ خايف عليه  من عبدالله.. تعرف طباعه كيف وطباع ثنيان يامحمد..
الجده أمنه؛ متى ناوي تقوله يا سياف...
الجد سياف؛ مير اقوله الحين لكنه مستعجل.. لا جاء  يا مره اقول له..
...
أذان المغرب..
بعد ماخلص الجميع الصلاه.. وكل واحد راح بيته أو عزبته..
كان يطقطق على خالد واستاذن منه يرجع البيت.. وعلى طريقه وقفه صراخ بنت صفقت بجسده.. وسع عيونه بصدمه منها ومن شكلها.... جلس يطالع فيها بصدمه ماقدر يصد..
ليلى بنت ابو صويلح.. إلى كانت جالسه على الأرض وملابسها معدومه أو بمعنى ثاني مثل.. الأغت..صاب..
مايسترها شي غير ملابسها إلى حتى ماهي ساتره.. تصرخ بأعلى صوت؛ الله لا يسامحك يا متحرش.. الله ينتقم منك.. سود الله وجهك يامتحرش.. الله***
ياكبرها عند ربك يابنت ياكبرها تبتلين واحد توه طالع من المسجد ياكبرها عند ربك..
كل ذا الكلام يدور بخاطر ثنيان المصدوم..
كان بيمشي لكن وقفه صراخ ابو صويلح وهو يلم بنته من الأرض؛ حسبي الله عليك ياولد محمد... هاذي فعولكم يا آل مطلق.. سود الله وجهك يا ثنيان.. تعتدي على بنتي.. أيا *****
وينك ياسياف حفيدك ماتربيه....
تجمع الرجال عليهم ومن ضمنهم الجد سياف وعياله وانصدمو من شكل ليلى وثنيان وابو صويلح إلى يصرخ...
ثنيان بصدمه ونطق؛ صل على نبينا يابو صويلح.. بنتك يشهد الله ماقربتها ولا جيت صوبها هي الى.. ماخلص كلامه من كف ابو ثنيان له..
ناظره بصدمه ونطق؛ والل.... سكته كف ثاني من ابوه..
ابو صويلح؛ هذا ولدك إلى تتفاخر فيه يامحمد شف شف وش سوا فبنتي.. والله ماتمر مرور الكرام يامحمد..
مشي ابو صويلح بابتسامة على الشي الى  سواه..
وين تدس وجهك يا محمد.. وين تروح بنفسك يا سياف.. وش تقول يا جسار.. ياخيبتهم ويا خزيهم... الجد سياف بعصبيه؛ امشي البيت يا ثنيان..
بدأ الناس يتنقلون الكلام بينهم البين... والخبر انتشر بكل الديره...
بيت الجد سياف..
كفوف جته من كل جهة محد صدقه.. وكيف يصدقونه وهم كذبوه المره الاوله محد صدقه غير جده وعمه اما ابوه سفهه وضربه... لكن الحين مين يصدقه ومين يطلع الصدق.. صار الشيء أمام عيون الناس كلها شافتهم...كان بيتكلم لكن صرخ بوجهه ابوه..
ابو ثنيان بتعب من ثنيان؛ وش سويت معك وش قصرت فيه معك.. كل شي اعطيك هو.. كل شي أقدمه لك.. كل شي ياثنيان.. ليه تسود وجهي قدام الرجاجيل.. قول يبه زوجني هي... والله ازوجك.. ليه تسوي كذا ف البنت يا ثنيان..
الجد سياف بخيبه منه؛ هذي فعولك يا ولد ضارب.. كذا يا ثنيان تسوي.. ليه..ليه..
جسار بصدمه للحين... ماهو قادر يتكلم..
أمه وجدته وعمته واخته.. كلهم ساكتين.. وش يقولون.. ووش يبررون..
دق باب بيت الجد سياف.. ونطق الجد سياف والدموع بعيونه من فعل ثنيان والكلام الي رح يجي من الناس ؛ وين أودي وجهي.. حتى الباب يا ثنيان ماقدرت افتحه..
هزاع وصقر إلى كانو على جنب يشوفون كل شي... تقدم هزاع يفتح البابطين وشاف الورع حمدان ونطق؛ يقول لكم الشيخ تعالو المجلس..
سكر هزاع الباب بوجه حمدان ونطق؛ ياجدي الشيخ يبيكم..
ابو ثنيان بقهر مسك كتف ثنيان ويصرخ فيه؛ وش نقول له وش نقول.. نقول ولدنا سواها.. وين نروح من وجههم وكلامهم يا ثنيان..
تنهد الجد سياف ومسح دموعه ونطق وهو يوقف بعجز؛ اسرو ياعيال اسرو..
مشي الجد سياف وابو ثنيان وجسار وصقر وهزاع كلهم عند الشيخ.... بقى ثنيان ف البيت..
سمع صوت الباب يتسكر.. وجلس بتعب... حاط يد على راسه ويد على قلبه إلى يوجعه..
وش بيقول.. محد بيصدقه.. هو بريء.. ماسوا شي.. كله من ابو صويلح.. ليه يبيه يتدمر.. كل حياته معه تمام.. ماعمره اذاه.. ليه ابو صويلح ياذيه بذي الطريقة.. وش سببه..
ام ثنيان ببكي تقدمت له؛ ثنيان يمه..
رفع يده لها وهو تعبان من هواجيسه إلى جته وقلبه إلى ينغزه؛ يمه والله يمه والله ماهو انا يمه والله.. يمه لا تقولين انك تصدقينهم يمه اشهد لك بروحي وبروح كل الى ف البيت يمه ماهو انا..
ام ثنيان؛ وش اقول لك يمه اصدقك ولا لا..
الجده أمنه؛ وين كنت يا ثنيان وقتها..
ثنيان بقهر وعيون محمره؛ والله ياجديده اني طالع من المسجد ومع خالد.. قلت له برجع البيت اريح الا تجيني ذي ياجده معرف من هي حتى.. ياجده والله والله ماسويت لها شي ولا حتى شفتها ولمستها.. ياجده لا تصدقين شي ياجده..
...
مجلس الشيخ جميل..
جالس بهدوء يسمع صراخ سعود إلى يعارض ابو صويلح..وصراخ أهل الديره ضد سعود..
قاطع صراخهم دخول الجد سياف ونطق سعود بسرعه؛ يبه مناور السبب كله من تحت راسه يبه تدري ثنيان مايسويها..
قاطعه ابو صويلح؛ استحي على وجهك ياسعود انصدمت من فعلت ولد اخوك وتحطها ف بنتي..
صرخ سعود بوجهه وهو يرفع يده له؛ ماهي اول مره تسويها ياخسيس..
الشيخ جميل؛ استني يا مناور واركد ياسعود..
الجد سياف ب احراج؛ والله يا شيخ مادري وين أودي وجهي من فعلته..
الشيخ جميل وهو ماهو مصدق ان ثنيان يسويها؛ اجلس يا سياف..
قاطعه احد رجال الديره؛ ياشيخ المقام مقامك والمجلس مجلسك لكن يا شيخ ال مطلق كلهم يا شيخ نجسين..
لف سعود راسه وصرخ؛ اسكت يابو كرش مقدم.. الشيخ جميل يقول ماهو انت..
نفس الرجال؛ ياسعود الحق ينقال إلى سواه اخوك ضارب سواه ولد اخوك محمد.. كلكم ياسعود نفس الطين..
ابو صويلح إلى راحت من راسه سالفه ضارب وتوه يتذكر نطق؛ ماهي غريبه عنكم يا سعود لا تدافع عنه وعمه سواها من قبله.. والحينه وينهو اخوك.. ووينهي الحرمه يا سعود.
واحد من رجال الديره؛ ياشيخ ثنيان لا يجلس ف الديره.. شوه سمعتنا ياشيخ..
يا سياف يا سياف والضغط والسكر إلى جاك.. لكن يقاوم لا يجلس.. مسك كتف جسار واليد الثانيه على عكازه..
الشيخ جميل؛ اذكرو الله يارجال.. اسمعو شورى.. العادات والتقاليد أن ثنيان يتزوجها..
انصدم هزاع ونطق؛ وشو لا ياشيخ وش تقول.. تكفى ياشيخ..
رجال من الديره بسخريه؛ شكلك يا هزاع تحبها..
انجن هزاع ونطق؛ احترم نفسك لا ابيها ولا ابي اناسب أشكال مناور.. وثم لف لشيخ كان بيتكلم لكن قاطعه الجد سياف؛ يتزوجها ياشيخ ليش لا دامه فعل فيها ياخذها طرق عن خشمه..
صرخ صقر بوجههم؛ والله إلى رفع السماء ونزل الأرض مايخذها ثنيان وهو مغصوب.. لا انت ياجدي ولا ستين رجال غيرك..
جسار بصدمه من عياله وكيف وقفو مع ولد عمهم وهو غلط وانصدم أكثر من صقر وقله الأدب..
الشيخ جميل؛ أجل ياصقر من ياخذها دامه إلى سواها ماهو راضي..
سعود باستعجال؛ انا.. انا ياشيخ أخذها..
انصدم الكل منه وخصوصًا ابو صويلح إلى كان يبي بنته ل ثنيان؛لا ياشيخ ياخذها ثنيان..
هز الشيخ راسه ونطق؛ ياخذها اي واحد من أهل الفاعل... بيتزوجها سعود وينطرد ثنيان من الديره..
تنهد سعود برضى دامه على كذا يفداه ثنيان.... بعض رفض والبعض الآخر رضي..
بعد دوامه من الصدمات والمشاكل رجع كل واحد بيته.. وسعود إلى اخذ المملك.. يملك عل بنت ابو صويلح ويتزوجها بدون حفل ولا عرس.. ياخذها من بيت ابوها ل بيته وتعيش عنده..
ليلى إلى كانت تبكي بحرقه عل ابوها إلى هددها ب قتل امها إذا ماسوت الشي الى يقوله الذنب يأكلها اكل... على ثنيان وعلى حياتها وعلى كل شيء..
دخل الجد سياف البيت بكسر ضهر..وعياله وراه.. رفعت الجده أمنه رأسها وشهقت من شافت ليلى ورا سعود تمشي وتسحب شنطه صغيره وراها...
الجد سياف بعصبيه صرخ؛ اطلع يا ثنيان من بيتي.. اطلع سود الله وجهك..
صرخت الجده أمنه معه؛ وش تسوي ياسياف.. لا ترجع غلطتك..
الجد سياف بصراخ؛ وشهي غلطتي يا أمنه.. نفس ابوه ونفس طباعه...بيتي والَديره تعتذرك ياولد ضارب..
ثنيان إلى يسمع كل شي وقلبه يوجعه فوق وجعه...
سعود بهدوء؛ البنت وهذي هي وراي.. وش باقي لك نقدمه..
الجده أمنه؛ لا تقولي ياسعود اخذتها.. ياويلي على ولدي ياويلي...
ابو ثنيان؛ اي يمه أخذها أخذها يستر عليها من فعل النجس ذا..
الجد سياف؛ انت ماتسمع اطلع من البيت يا ثنيان اطلع ولا تشوفك عيني فيها... صرخ سعود بكل صوته؛ ثنيانننن مريضضض  قلبببب ياااا يبهههه...
هم سمعو ولالا.. أي سمعو.. كان مويا بارده انكبت عليهم...نطق الجد سياف بصدمه؛ وشو.. كيف مريض قلب..
سعود يضرب صدره بحرقه؛ مايكفي مايكفي إلى جاه.. مايكفي يايبه.. يصحى وينام وياكل ويصلي على ضرب ومشاكل.. توه يقول بسم الله إلى يجي ولدك محمد ويجلده..أحمد ربك ماجته جلطه من بعد الغيبوبه.. تلوموني ليه أخذته الرياض تلوموني والله ما يحق لكم لوم هو هو الي يلومكم.. والحين يبه تصدق عنه شي من فعل مناور وانت تدري كيف مناور كان مع ضارب ويسويها الحينه مع ثنيان..
ليلى إلى كانت ورا سعود تبكي ومع كل كلمه يزيد بكيها.. ابوها مابي احد الا واذاه.. يا قوه قلبه..
توه ثنيان يعرف وش سبب وجع قلبه وصدره الثقيل.. توجه غرفه سعود واخذ شنطته ورمي كل أغراضه فيها ب إهمال.. لحقته الجدال وهي تبكي؛ تكفى ياعزوتي لا تروح...
لف لها ونطق بهدوء؛ ياوخيتي جدي يطردني والَديره كلها طردتني.. وين اجلس الله يهديك..
لم اغراضه بسرعه وطلع..
وقفه صراخ سعود؛ والله ماتطلع..
صرخ ثنيان معه؛ وين اجلس يا سعود.. اجلس عند ناس ماتصدق.. إذا هم صدقوني ياسعود الغريب وش بيقول عني.. اذيتكم كلكم ياسعود هذاك انت تزوجت وانت ماتطيق الزواج.. تكفى ياسعود اتركني.. مشي طالع من البيت بسرعه.. فتح خانه سيارته ورمي الشنطه فيها... سكر الباب بقوه وفتح باب الراكب.. شغل سيارته وأسرع فيها... ترك صوت الكفرات على الأرض..
الجده أمنه بقهر؛ اطلع من البيت يا سياف...
الجد سياف بصدمه؛ وشو.. تطرديني من بيتي...
الجده أمنه؛ ماهو بيتك هذا بيت ولدي ضارب يا سياف.. طردت ولده اطردك وراه..
جسار بصدمه؛ يمه استهدي بالله وشو تطردينه
الجد سياف؛ تخسين يا أمنه والله ماطلع خطوه منه..
الجده أمنه مسكت عكازها وهي ماشيه غرفتها؛ أجل اقعد فيه انا بطلع منه.. امشي ياسوير لمى اغراضي..
ركضت سوير تهدي امها لكن مافي فايده لمت أغراض امها ومشت وراها... الجد سياف؛ يحرم حرام الطلاق يا مره أن طلعتي من البيت لا اطلقتس..
الجده أمنه؛ طلق ياجعل مطرقه تطرقك.. يا انت تطلع يا انا.. لفت على صقر وهزاع ونطقت بصراخ؛ وانتم ياجعلكم إلى ماني بقايله.. واحد منكم يجي يوصلني بيت احمد..
مشت الجده أمنه ل برا البيت وصرخ الجد سياف؛ انتي طالق يا أمنه..
شهق الكل بصدمه منه.. ماهتمت الجده أمنه له وسفهته... ركبت سياره صقر وفحط صقر يوصلها بيت احمد..
جسار؛ يبه يبه..
ابو ثنيان؛ طلقت امي..
الجد سياف؛ إلى مايبي يقعد عندي طقاق وراه... لف ل سعود ونطق؛ خذ مرتك وتقلع غرفتك..
ضحك سعود بسخريه ونطق؛ ايه ابشر وش نقول لك اكثر.. امشي يا بنت..
مشت ليلى مع سعود الغرفه وهي خايفه منه وكثير...
قفل سعود الباب ب المفتاح ولف بجسمه على ليلى وهو كارها وكاره ابوها ونطق؛ قولي لي كل شي من طقطق ل السلام عليكم.. ولا تخافين مابنام عندتس ولا بقربتس..
ليلى بخوف؛ احلف..
سعود بصبر؛ اقول لها مارح اقربتس تقول احلف... ابك تحسبيني نفس ابوتس خسيس.. اسلمي يابنت..
ليلى؛ بقول لك.. بدأت ليلى تقول له كل شي صار في اليوم..
...
كانت تصفط ملابس أخوها صويلح.. دخل عليها ابو صويلح ونطق؛ اسمعي ياليل..
ليلى؛ وشو يبه..
ابو صويلح؛ ابيك تسوين لي شغله..
ليلى؛ وشهو..
ابو صويلح؛ تعرفين ال مطلق.. ولدهم ثنيان ابيك تبتليه .. يعني تمثلين انه اغتص.. بك..
شهقت ليلى ونطقت؛ يبه ظلم والله ظلم.. كيف تبيني اسوي كذا..
ابو صويلح بصراخ؛ انا ما اطلبك انا اعطيك اوامر..
قلت لتس تمثلين تمثلين.. ولا والله لا اقتل امك وتعرفيني يا ليلو اسويها..
خافت ليلى ونطقت؛ يبه والله اسويها لكن امي لا تقربها يبه تكفى..
أبو صويلح؛ اجل خليك واقفه.. طلع من جيبه سكين وبدأ يقص ملابس بنته.. بطريقة مقززه وتبين معالم جسمها..
مع كل قصه كانت دموعها تنزل..
جاء أذان المغرب و س بنته على وحده من البيوت وقال لها أن شافته ترتمي بحضنه...
وسوت نفس كلام ابوها شافته جاي يضحك على كلام خالد وراحت له تبكي وتصارخ الين صار الي صار...
ياوجع قلبك ياسعود.. وياقهر قلبك ياسعود.. كل ذا مت تخطيط مناور وهو يدري فيه.. لكن يبي يتأكد. وبعد ما تأكد.. كيف يقول لهم.. كيف يبرر لهم.. كيف يسمعهم... سياف وسلطان إلى للحين مايدرون أن ثنيان دخل المستشفى.. وبمرضه.. والحين ابتلاء ابو صويلح له وطرد أهل الديره له.. وش بيسوون..
...
عند ثنيان...
بعد ما  شافه خالد يسرع بسيارته.. ولحقه بسيارته.. بعد ماعرف سالفه الديره وان الشيخ والرجال طردوه..انقهر على خوي ورفيق دربه.. وماصدق وش الي قالو عنه.. يدري انه مايسويها... وعشان كذا هو لحقه..
بعد مده طويله... وقف ثنيان على جنب من تكبيس خالد له..
نزل ثنيان بعصبيه من سيارته وضرب زجاج سياره خالد.. فتح خالد الباب ونزل من سيارته وصرخ بوجهه ثنيان؛ وش تبي مني.. لا تقول  مصدق إلى قالوه.. روح عني ياخالد قبل احط حرتي فيك....
ضمه خالد ل صدره وشد عليه بقوه؛ مصدقك انت ماني مصدقهم... تحمل ياخوك تحمل ربك بيطلع الحقيقه..
انفجر ثنيان بكي علي كتفه وضمه ومع كل كلمه صوته ينهز ؛ يا خالد والله ياخالد ماهو انا ياخالد وش سويت لهم.. ياخالد كله فيني..ياخالد ياخالد وش ذنبي.. تكفى صارحني وش سويت لهم.. كل يوم شيء جديد ابي ارتاح يوم واحد يا خالد تكفى ياخوي خذني على ضيقتي وداويني.. جرح قلبي مين يداريه.. ضلوعي مين يسندها.. ضيقتي مين يخففها.... وصرخ؛ يالله يارب..
شده خالد بقوه ونطق بقهر عليه؛ انا اداريك لا كلهم اذوك.. انا ضلعك لا طاحت ضلوعك.. انا انسيك ضيقتك وحزنك .. وربك فوقك ينتقم منهم لك..
...
يارب العالمين.. الضيق محتويني..والهموم تمليني..
اجيك واشكي لك وابكيك .. اسمع مني يارب واستجيب..
الظلم حياتي يعيش..الفرج منها يارب ادعيك..
...
بعد دقائق..
جالس يناظر السماء وهواجيسه توديه وتجيبه..
نطق خالد؛ تروح الطائف..
ثنيان؛ ووين اروح يا خالد..
خالد؛ اقعد عندي الين... قاطعه ثنيان بضحكه؛ الديره ماعد تبي وجهي ياخالد وين اجيك..
خالد بقهر؛ انت تدري وش سويت.. اجل إلى يقول افقع عيونه..
ثنيان؛ ماهو مكاني يا خالد.. اروح عند اخواني واجلس...
خالد؛ وسعود..
ثنيان؛ ذا الي يقهرني سعود وش ذنبه يتزوجها..
انصفق خالد منه وضربه على كتفه؛ ورع انت منجدك.. مقهور عليه..
لف ثنيان وجهه له؛ وهو عشان مين مقهور.. علي.. ياشيخ كل يوم اكل زيها ماعادها تفرق معي.. سعود إلى قهرني والله...
خالد؛ لا بالله انك بخير مابك شي...
ثنيان؛ لا نشره عليهم ياخالد.. دامهم يصدقون كل مره فيني.. اتعب واجهد نفسي.. وهم ماهم مصدقين.. ليه..
خالد؛ لا هنا انت صادق..
.....