ثنيان مظلوم يا سياف

البارت الثاني والأربعون؛

ركض شهم يفتح لهم باب البيت وطلع سعود وهذال ب الجثه الهامده إلى معهم.. وركض شهم يفتح باب سيارته لهم.. ويشغلها.. دخل هذال وسعود نهيان السياره وركب هذال معه وكان سعود بيركب لكن وقفه صوت عبد الرحمن إلى ينطق؛ ولدك يا سعود..
قفل سعود باب سياره شهم وركض يشيل ولده ويلف ل سيارته ويركبها ويشغلها.. ويمشي بعدهم..
أما عبد الرحمن إلى لف ل بيته وناظر شهاب إلى يناظرهم بهدوء نطق؛ لو مات انت وراه يا شهاب..
شهاب بحده؛ مصدق كلامهم يبه..
عبد الرحمن؛ كلامه مقنع .. لو أنك مسكت نفسك وخليت الولد يكمل كلامه كان احسن لنا يا شهاب..تحمل إلى يجيك بعيد عني..
ومشي يدف شهاب عن الباب ويدخل البيت.. دخل شهاب ورا أبوه ونطق؛ يبه لو هو صادق عسكري ورتبه عقيد.. ليه ما جاء لي ومسكني..
لف له عبد الرحمن ونطق؛ جاء لك بثوبه يا شهاب.. جاء لك مدني وضيف عندك ما جاء موظف حكومي يدافع عن وطنه ويحمي المواطنين..وانت شفته كيف وقف بوجهك وانت تصوب سلاحك على المسكين.. قتلت أبوه والحين بتقتله.. والله لو صابه شيء ماني راضي عليك ل يوم الدين..
-تعريف ل آل خليفه
الأب؛ عبد الرحمن شايب مثل أي شايب زمانه لكنه متفهم شوي ولا يرضى الظلم.. وحادثه ضارب صح أنه قتل ولده حرام وظليمه.. لكن يشوف ان قتل ضارب كمان حرام وظلم..
شهيب؛ طيب وحنان ويحب الخير ل الناس ولا عمره أساء ل شخص كان موظف بشركه الجد عبدالله.. متوفي .. يبلغ من العمر؛ ٣٨..
شهم؛ إنسان متفهم وخلوق.. كان من اخوياء ضارب ولكن مقتله ل اخوه خلاه ينسى الاخوه إلى كانت بينهم وشارك بقتل ضارب.. متزوج بنت عمه وعنده اولاد.. يبلغ من العمر؛ ٤٧..
شهاب؛ متهور ومجنون والأهم أنه داشر من الدرجه الاولى.. كان متزوج بنت الجد عبدالله ميلان وطلقها من الأشهر الاوله ماعنده اولاد وهو إلى جاب فكره قتل ضارب .. يبلغ من العمر؛ ٣٩..
..
أحد مستشفيات حائل..
وصل شهم وسعود وهذال ونزلو من السيارات وهم شايلين نهيان بين يدينهم.. تقدم منهم الممرضين ومعهم سرير وحطوه الشباب فوق السرير ودفوه مع الممرضين حتى وقفوهم عند باب العمليات..
لف سعود راسه ل هذال ونطق و محاجره محمره؛ يا هذال يموت ورا أخوه.. تكفى يا هذال ثنيان موته يوجعني والحين نهيان..والله الفقد صعب صعب ..
هذال بضيق تقدم منه وضمه؛ لا تقول يا سعود كذا لا تقول.. بيقوم أن شاء الله ب السلامه ويكمل طريقه وحياته..
شد سعود عليه ونطق؛ هم أمانه برقبتي أمانه من عمتك يا هذال.. ولا صنت الأمانه أنا..
هذال؛ وطقاق يا سعود وطقاق.. لا تقول كذا خل الإيمان عندك قوي.. ربك فوق وهو القادر على كل شيء..
سعود؛ ثنيان مظلوم يا هذال راح مظلوم وعاش مظلوم.. ونهيان شيب راسي باقيه من حياته.. ونطق بوسط الغصه إلى به؛ يارب لا تضيع لهم صبرهم على الظالمين.. يارب إنك تأخذ بحقهم وحق أبوهم من كل واحد حتى لو أنهم اخواني..
خبط هذال على كتفه ونطق؛ الله يمهل يا سعود ولا يهمل..
وأبتعد سعود عنه وتلطم ب شماغه مقهور ومغبون ومحروق على ثنيان ونهيان.. شاهد طول حياته كيف ثنيان يعاني من محمد وأبو صويلح.. والحكي إلى قاله عنه نهيان من أهل أمه شيب رموش عيونه.. بسن صغير إلى سن المراهقة إلى سن البلوغ.. وحياتهم كل مالها تزيد تدهور.. وب الأخير توفي الكبير والصغير مصيره مجهول..
كل ذا كان تحت عيون شهم.. ما عمره شاف عم ب الحال هذا.. استغرب وكثير من حب سعود ل عيال أخوه وشده الفضول ب نفس الوقت على حياه نهيان وأخوه ثنيان..
..
كلام سعود ما يجي عبث كذا إلا وبه شيء قوي وراه.. وش إلى صاير معهم.. وليه الدعاء هذا وليه الأخص يدعي على أخوانه.. معقوله نكون ظالمين ضارب وعياله معه بدون لا ندري.. تقشعر جسمه من الأساله إلى جته..وخصوصاً السؤال الأخير.. لأن الله ما يضيع حق المظلومين ولو بعد حين.. ولو كان هو وأهله من الظالمين لهم..ف عذابهم عند الله أليم..
..
الديره..
بيت خالد.. خبأ خالد الشنطه ب بيته لأجل لو احد من ال خليفه دخل البيت ما يلقوها.. ومشى يتوجه ل غرفته وناظر  الشخص إلى نايم تحت الحاف.. وكان حمد إلى مفسخ ثوبه ورماه على الأرض ب إهمال تنحنح وصرخ بقوه؛ يا حمد..
فز حمد بخوف وناظر ل خالد ونطق ب تهديد؛ يومين مواصل وذا اليوم الثالث والله يا خالد أن جيت لا اخليك عبره بين السعوديه كلها..
تخصر خالد ونطق؛ أن قدرت على يا المحامي..
حمد؛ حلفت لك تراني..
مشى وتسدح بجانب حمد ونطق؛ لا تخيل معي اني مذيع وذا النص قدامي .. خالد بن سابر آل تركي قام بضربه أحد أقاربه وهو المحامي حمد بن تميم ال راشد.. بسبب أنه قام بفزعه وهو نائم.. هذا هو أخبار السعودية العاجله..
تعدل حمد ب سدحته ولحف راسه ونطق؛ لو انك مقدم على الإعلام أبرك لك..
خالد؛  اي والله صادق.. ابفهم ليه انا الوحيد بينكم عاطل..
حمد؛ سعود معك..
خالد؛ سعود عسكري سابق تحشره معي ليه..
حمد؛ والحين عاطل..
خالد؛ لو انه ماهو مصاب كان الحين فريق أول..
حمد؛ تكفى اترك عنك الهرج ودي أنام..
وعدل خالد سدحته ونطق؛ الشره ماهي عليك الشره على انا والله.. خلني انام احسن..
..
بيت الجد سياف.. كان أسر نايم ب المجلس بعد ما رجع .. وسلطان وسياف جالسين ب الحوش ومعهم ترمس الشاهي..هواجيس وأفكار وتأنيب ضمير عند كل واحد منهم..
تهاوش الاثنين على ثنيان وهذا حالهم كل مره يرجعون بها البيت ويناظرون البيت كيف صار.. سلطان إلى يحب ثنيان ك اي اخ يحب أخوه الكبير.. وسياف رغم أنه ندم وسامحه ثنيان الا أنه ينقهر ويحقد من ذكره وسيرته..
..
سياف؛ لو أنه رد له الفعايل كان ما ضيع سنوات من عمره يا سليط..
سلطان بنرفزه من الموضوع إلى يتكرر عليه؛ وش ودك أقول.. أقول أي والله لو أنه رجال صدق كان سكت مناور عند حده.. ولا أقول ياريت لطخك بكم كف من تراب لأجل يرد عقلك..
سياف؛ نقول الصدق يا سلطان الصدق ينقال ثنيان وده من زمان ..
قاطعه قومه سلطان من الجلسه ونطق بصراخ ؛ سياف لا تجنني.. وش باقي من صدق نقوله.. أنظلم وسامح.. النبي محمد عليه الصلاة والسلام يا كم تأذي من أهل قريش ومن أبو سفيان والأخير سامحهم وعفا عنهم يا سياف..
كان سياف بيتكلم لكن اكمل سلطان؛ أنا أقولك على رسول الله ونبي الله محمد.. أنت مستوعب أنه لو ما سامحهم كان ربي رح يعاقبهم.. نبي يا سياف نبي وسامح.. وش قولك على بني آدم مثل ثنيان لا هو نبي ولا هو رسول.. وسامح ناس مثل أبوك ومثل أبو صويلح.. وأنت اصلآ نفس الطينه..  ثنيان مظلوم يا سياف.. لا تخليني أعيد الكلمه أكثر من مره.. مره وحده تكفى تخليك تحس ب الذنب طول حياتك.. شف أسر والشباب كلهم.. ما لهم صله به إلا أنهم أقاربه وأصحابه وحسو ب الذنب بسبب إلى صار له.. وأنت عايش معه ومتربي معه ولا حسيت بشوي ذنب وندم.. كل ما تخيب وتطيح من عيوني والله يا سياف إني ماعاد احترمك ولا أغليك .. إلى مسويه انت وهزاع حرام شرعاً وقانوناً.. وش إلى مغيرك أنت وياه وشهو وش سببه ولأجل من يا سياف لأجل من.. ثنيان ما تنكر أفعاله لك لا أنت ولا عشر من امثالك ولا لك حق تذكر إسمه ولا تفكر به ولا لك صله تجمعك به الا انك ولد عمه.. تدري عاد وش الهرج.. لا انا أعترف أنك اخوي ولا سعود يعترف أنه عمك ولا نهيان يعترف انه ولد عمك ولا خالد والشباب يعترفون انك خويهم .. مقطوع من شجره يا سياف.. صرت مثل المجنون إلى محد يدري منهو أهله.. كنت شيخ ولد شيخ ومن شيوخ كنت من ال مطلق إلى الكل يشهد علي أفعالهم وأخلاقهم وكرمهم وشهامتهم.. والآن وينك.. خريج سجون لا وظيفه تنفعك ولا شهادتك تنفعك.. والأهم لا أهل لك ولا اخوان لك.. عزوتك وسندك تخلو عنك وهم عايشين.. والله ان شوفتك قدامي تسد نفسي يا سياف والله وهو الشاهد والعليم أنك صرت عندي مثل مناور وزود..
ما توقع الكلام ذا يكون من أخوه الأصغر.. ماتوقع سلطان يحمل كل الحقد ذا والكره له بقلبه توقع القليل بس.. كلامه جارح له وكثير.. ونطق بهدوء يأخذ مفتاح سيارته وجواله ويقوم من الجلسه؛ كثر الله خيرك يا الغريب ماقصرت معي أبد.. ومشى بعدها يطلع من بيته.. البيت إلى ولد به وعاش به وتربي به وسط جدارنه وحنانه.. مع أهله كلهم.. جده وجدته وابوه واعمامه وإخوانه وعيال اعمامه.. ركب سيارته ومشى ماسك خط ل الرياض.. ماعنده أحد ب الديره يروح له.. دام سلطان يقول محد يعترف به وين يودي وجهه منهم كلهم..
مشى سلطان يدخل المجلس وناظر ل أسر إلى جالس ونطق ب استغراب؛ ماهو قلت بتنام..
أسر إلى كان نايم ولكن صحي على صراخ سلطان ونطق؛ إلى قلته ل سياف تدري أنه غلط..
تنرفز سلطان منه وفسخ ثوبه لأجل ينام ونطق أسر مره ثانيه؛ تدري ولا لا..
لف عليه سلطان ونطق؛ وش عقبه يا أسر وش عقبه..
أسر؛ عقب تلحقه وتعتذر منه.. هو غلط وأنت غلطت .. حكيك له أنه مقطوع من شجره تراه غلط وكثير.. سعود لا سمعك وش بيقول لك.. بيقول والله انك كفو ورجال.. لا أنت مخطي.. بيقول لك يا سلطان هذا هو أخوك إلى بقى لك من أهلك.. ثنيان والله يرحمه.. بيقول لا تكون مثل حال نهيان.. مابقى له من أهله الا نفسه هو.. وشف كيف صار.. لا يومه يوم ولا صباحه صباح ولا ليله ليل.. سارح ويهوجس ومسطول على مدار الساعه.. ولا جيت تسولف معه منفس ولا يرد عليك ب كلافه.. وشف حال خالد وهو وحيد أهله يتمنى يكون له إخوان.. شفني انا يا سلطان مابه عندي اخ ولا أخت.. وحيد اهلي مثل خالد.. على الأقل خالد أمه عايشه الله يحفظها له.. لكن انا لا أم ولا آب ولا أخ.. حياتي كلها مع هذال ومنافي.. لكن أوقات احس ب الوحشه..  شعور أن عندك اخوان وسند من بعد الله حلو يا سلطان رغم اني مانيب مجربه.. وسكت شوي ونطق بعدها؛ فكر ب كلامي يا سليط وقرر..
وقام أسر يتوجه للمطبخ لأجل يسوي له شاهي يعدل أبو مزاجه.. مسك جواله يرسل ل القروب؛ وش الجديد.. قفل جواله وانتظر الشاهي حتى جهز.. واخذه ومشى يطلع من المطبخ ويصعد الدرج يطلع السطح..ناظر الجلسه إلى مسوينا ثنيان وسعود وسلطان وسياف وهزاع لهم.. وتنهد ومشى يجلس بها.. ترك الترمس والكاسه وصب له الشاهي.. وناظر بيت الجد سياف من فوق.. ونص الديره من مكانه..
رد عليه منافي بعد عشرين دقيقة وهو مصور مصعب ونمر إلى جالسين قدامه ينتظرون الأكل؛ أبد ب المطعم..
وسياف إلى شاف الرساله ولا رد..
وخالد وحمد وهذال وسعود ونهيان ما ردو.. استغرب ان الشباب كلهم ماردو عليه ب العاده اول الناس سعود ونهيان.. ونطق؛ الشباب وين غديتم ..
رد عليه نمر؛ حمد نايم عند خالد..
منافي؛ ظني هذال وسعود للحين عند ال خليفه..
أسر؛ ثلاث ساعات وش يحكون به..
مصعب؛ تلاقي غزوة أحد عندهم..
ضحك الشباب على كلام مصعب.. مايدرون أن نهيان منصاب.. مايدرون أن شهاب اعتداء عليه..
..
بعد ساعات..
طلع اثنين من الممرضين بسرعه من العمليه ووجهم ما يبشر ب الخير.. ونطق الأول ؛ هله أنتم..
تقدم سعود له ونطق بربكه؛ عمه أنا عمه..
الممرض الأول ؛ نحتاج متبرع كبد له الأن..
صاعقه عليهم كلهم.. وش كبده ذا.. وش يقول ذا.. سعود إلى الأرض كلها ضاقت به..شهم إلى انصدم ولا درى وين يودي وجهه بسبب اخوه إلى تهجم عليه ظلم وباطل.. هذال إلى مسك راسه من قوه الصدمه.. وضارب الصغير الى يناظر لهم وهو ماهو فاهم شيء..
سعود؛ أنا أنا خذ مني..
وتقدم هذال يبعد سعود عن الممرض؛ أنا ماهو هو خذ مني أنا..
هز الممرض الثاني راسه ونطق؛ لازم نشوف أي واحد منكم مطابق له.. تفضلو معي..
لف سعود راسه ونطق؛ امانتك يا شهم امانتك بروح شهيب.. ضارب ولدي خله عندك ولا تسوي له شيء ناخيتك..
شهم ب احراج؛ أبشر والله إنك تبشر..
ومشى سعود بعد هذال والممرضين لأجل يفحصونهم..
..
شهم وضارب الصغير ..
شهم؛ ضارب..
لف له ضارب الصغير بعد ما كان يشوف ضهر أبوه إلى يمشي بعيد عنه.. وأشر له شهم انه يتقدم له.. وفعلاً تقدم ضارب الصغير ونطق بهدوء؛ سم..
أنحني شهم له ونطق بحنيه؛ خايف مني..
هز ضارب الصغير راسه ب لا ؛ أنت مو مسوي شيء لي.. ليه اخاف منك..
شهم؛يعني عادي تجلس عندي..
ضارب الصغير؛ أي..
مشى شهم يجلس على كراسي الانتظار ونطق؛ تعال جنبي.. مشى ضارب الصغير وجلس جنبه ونطق شهم؛ تحب أبوك..
ضارب الصغير؛ أي..
شهم؛ وتحب عيال اعمامك..
ضارب الصغير؛ تقصد سلطان ونهيان..
شهم؛ تحبهم مره صح..
ضارب الصغير؛ أحب ثنيان أكثر.. لكن مات..
استغرب شهم ونطق؛ منهو ثنيان..
ضارب الصغير؛ ولد عمي ضارب..
واستغرب شهم أكثر ونطق؛ عمك كم عنده عيال..
سوا ضارب الصغير بيده رقم إثنين ونطق؛ إثنين..
شهم؛ ثنيان ونهيان صح..
هز راسه ضارب الصغير ب إيه ونطق شهم؛ أجل سلطان ولد مين..
ضارب الصغير؛ سلطان بن محمد آل مطلق..
شهم؛ ولد عمك محمد..
ضارب الصغير؛ أي..
سكت شهم شوي وبعدها نطق ؛ كيف مات ثنيان..
لف له ضارب الصغير بعد ما كان يناظر الأرض؛ سياره..
شهم؛ حادث..
ضارب الصغير؛ أبوي يقول إن ثنيان مات ب سياره.. ونهيان يقول إنه مقتول..
شهم؛ كيف مقتول..
ضارب الصغير؛ مادري..
رن جوال شهم وكان المتصل أبوه.. ورد عليه ينطق عبد الرحمن؛ ها يا شهم وش صاير..
شهم بتوتر ؛ يبه..
عبد الرحمن بخوف؛ وشو.. وش صار قول يا ولد انطق إلى عندك..
شهم؛ يحتاجون له كبد..
عبد الرحمن؛ وشو.. وش تقول يا شهم.. أنت صادق..
شهم؛ والله يبه.. توه سعود وإلى معه  يسون فحص..
عبد الرحمن؛ أخوك يا شهم أخوك..
شهم؛ ينتظر إلى بيجيه.. معتدي على شخص وهو ضيفه.. وش السوات معه..
.. بعد مده..
انتهى الاثنين من الفحص وينتظرون النتائج الحين.. سعود إلى جالس ويهز رجله ب توتر.. يلوم نفسه أنه ماهو قد الأمانه إلى أمه حطتها عنده.. وهذال إلى بدأ يهوجس بقلق بالغ .. يلوم نفسه أنه ماقدر يحميه.. وهو عسكري ويقدر يدخله السجون..
تقدم لهم الممرض الثاني ونطق؛ للأسف النتائج سلبيه جدآ.. لازم متبرع ثاني..
فز سعود من مكانه ونطق بسرعه؛ تكفى انقذوه تكفى..
ومسك هذال جواله بسرعه يدق علي منافي ويرسل بنفس الوقت ل كل شخص عنده يطلب منهم إلى يقدر يسافر ل حائل الحين ويتبرع لهم ب كبد.. أو معارف لهم هنا..
مارد عليه منافي ودق عليه مره ثانيه.. وجاء لهم الدكتور طالع ب ملابس العمليه يصارخ؛ متبرع الان بسرعه.. وينكم يا ممرضين..
جاء الممرض الأول يركض وينطق؛ متبرع جديد يا دكتور ومطابق تماماً له..
لف له الدكتور واعصابه بدأت تثور؛ سريع على الغرفه يلا تحركو..
ركض الممرضين الاثنين يجهزون المتبرع المجهول ويدخلونه الغرفه بجانب نهيان.. وركض الدكتور معهم يدخل الغرفه لأجل يكمل العمليه..
سجد سعود سجده شكر ل ربه.. وسجد معه هذال بسرعه.. يحمدون ربهم أنه لطف بهم.. يحمدون ربهم على المتبرع المجهول.. وقام الاثنين بنفس الوقت وحضن هذال سعود بفرحه..وكأن احتمال أن العمليه تفشل عندهم صغير.. واثقين وكثير أنها بتنجح.. شد سعود عليه ودعي من قلبه إلى كان مكسور قبل لحظات؛ يارب العالمين يارب إنك تقومهم ب السلامه يارب وتمدهم الصحه والعافيه.. ونطق هذال وهو كله ثقه ب ربه؛ امين يارب أمين..
وكان كل ذا تحت نظرات شهم مره ثانيه.. عيونه تعجز تصدق.. عائله تحب أفرادها بكل صدق يحبون نفسهم ومتمسكين ببعض ل درجه الاثنين قالو بدون تردد أنهم بيتبرعو له.. الإثنين سجدو وفرحو.. مستحيل عائله مثل إلى قدامه الحين تكون سيئه.. ذي العائله كل إلى بها صالحين ..وشك ب قرار شهاب أخوه عند مقتل ضارب قبل سنوات..مايدري عن الخافي وش هو.. مايدري ان العائله إلى بفكره مسالمه وصالحه.. هي ب الأساس أكبر عائله بها خراب..نتكلم عن الجد سياف وولده محمد واحفاده هزاع وصقر وسياف.. هم الخراب والفساد ب ال مطلق كلهم.. جسار وضارب وسعود وثنيان وسلطان ونهيان والجده أمنه ولمياء وسعاد والجدال والريم وسوير والريم .. المسالمين إلى ب العائله ذي فقط..
تقدم سعود ل ضارب الصغير ونطق؛ نهيان بيكون حي..
هز ضارب الصغير راسه له.. ونطق هذال؛ هزات الرأس عنده فل..
سعود ب ابتسامه؛ هادي مثل أبوه..
وسع هذال عيونه بصدمه من كذبه ونطق؛ أبك يابو كذبك كذب.. أنت الهدايه بصوب وأنت بصوب.. نسيت يا سعود وش كنت تسويه ولا نذكرك...
ضحك سعود وضحك هذال مهه ومسك ضارب الصغير ونطق؛ أقول لك وش أبوك كان أيام هو ورع زيك..
ضارب الصغير؛ أي..
هذال؛ تخيل معي.. جدك سياف الله يرحمه كان معه سيارتين.. وحده مثل حق أبوك ووحده ددسن..
قاطعه سعود ونطق؛ كأنه يدري بها..
لف ضارب الصغير له ونطق؛ إلى هلال يأخذ الغنم بها صح..
هذال؛ اي هي.. المهم مالك ب الطويله يا ضارب.. أبوك كان ورع ورع مايدري حتى كيف يسوق.. وساق الددسن ذاك اليوم وانفقش راسه..
..
قبل سنوات.. ماضي سعود..
عزبه آل مطلق..
جالس هو ثنيان وهذال ومصعب وخالد يحلون الواجبات إلى عليهم.. تنرفز سعود من كثره الواجبات ونطق؛ أبك ذا كثير يا عيال..
رمي عليه هذال القلم ونطق؛ سعود أكتب وأنت ساكت..
خالد؛ من أول وأنت تبربر بس..
مصعب؛ لو حليت الواجب كان خلصت..
ولف سعود ل ثنيان ونطق؛ وأنت..
رفع ثنيان راسه له ونطق؛ وانا وش..
سعود؛ شارك معهم..
ثنيان؛ كيف أهرج مع بقره بالله..
وسع سعود عيونه وأكمل ثنيان؛ الراديو طول اليوم مطفي ويوم نذاكر يشتغل سبحان الله..
سعود؛ هيه ولد أحترم تراني عمك..
ثنيان؛ ياذا العم إلى محد يعترف به غيرك.. أنت شايف طولك كيف عندي..
خالد؛ بابا سنفور..
هذال وهو يكتب؛ الا طالع من الأقزام السبع..
سكت سعود بحقد عليهم وكمل واجبه.. بعد مده.. رمي سعود واجبه والدفتر عليهم ونطق؛ والله ما اجلس كذا..
ثنيان؛ وش سواتك يا ورع..
مصعب؛ اركد تكفى..
سعود؛أسمع انت وياه.. خلص واجبكم بسرعه وبرجع لكم..
وركض سعود ل غرفه العامل هلال.. وهو يدري أنه ماهو موجود الحين.. أخذ مفتاح الددسن..
وطلع من الغرفه يدور الددسن.. لقاها جنب شبك الغنم وركبها وشغل.. بدأ قلبه يدق من فكره انه يصدم أي شيء ولكنه حركها.. كان صعب عليه يشوف ويدعس بنفس الوقت.. وصل عند العيال وهو منزل راسه لأجل يدعس على البنزين وقلط بنص الجلسه.. صارخ العيال عليه بخوف؛ سعوددد..
وقف سعود السياره ورفع راسه يناظر العيال إلى حاضنين الجدار من الخوف.. ونطق يطل برأسه من الزجاج؛ اركبو اركبو..
ثنيان؛ ماني مجنون لأجل اركب معك...
هذال؛ بغيت تموتنا هنا..
أما خالد إلى ركب جنب سعود بسرعه ونطق؛ قادح والله..
سعود؛ حبيب يا خالد..
ونطق خالد ل مصعب؛ أفا حسبتك رجال..
مصعب بتوتر؛ رجال ونص.. لكن سعود لا..
سعود؛ إلى ما يجيي أمه رقاصه..
عصب العيال وركضو يركبون معهم.. ضحك سعود وحرك الددسن يطلع من أراضي ال مطلق...
صفق خالد بحماس ونطق؛ تكفى زد السرعه..
ضرب سعود صدره ونطق؛ ابشر..
وسع ثنيان وهذال عيونهم ونطقو؛ سعود لا..
أما مصعب المسكين ماسك راسه ويدعى ربه لا يودع..  نزل سعود راسه ل تحت ودعس البنزين وزادت سرعه الددسن.. وصارخ هذال بخوف من سعود إلى ما يشوف ومسك عنه الدركسون؛ اقول لكم قزم تقولون لا..
ثنيان إلى نطق الشهاده؛ اشهد ان لا اله الا الله وان محمد رسول الله.. خلاص حبيبي انت ميت..
خالد إلى لف راسه لهم وبدأ يخاف وينطق؛ سعود وقف..
رفع رأسه سعود وصفق خشم هذال إلى كان ماسك عنه.. صارخ هذال بوجع من الصفقه وبدأ خشمه ينزف.. انخرع سعود والعيال معه وفك هذال الدركسون يمسك خشمه إلى ينزف ويتحسب على سعود وأفعاله..