ثنيان مظلوم يا سياف

البارت الثلاثون؛

202‪8/6/3 يونيو...
١٤٥٠/٢/١٠ صفر..
انقضت خمس سنوات بعد دخوله السجن.. انقضت خمس سنوات بحزنها وضيقها وفرحها وسعادتها.. انقضت خمس سنوات و صارت مواقف كثيره فيها.. ماكانت قليله ابدأ الخمس سنوات عليهم كلهم.. وخصوصاً ثنيان.. ماكان مهتم انه ب السجن.. وش شاف من حياته غير المصايب والمشاكل.. وش فرق ذي عنها.. تغيرت شخصيته كثير.. صار بارد.. صار شخص ما يحس ب مشاعره.. أو ما يسمى تبلد المشاعر.. من عمر السابعه والعشرين إلى عمر الثاني والثلاثين عاماً .. يخرج اليوم من السجن العام.. يخرج من تلك الزنزانه المعزوله عن العالم والناس.. ولكن هواجيسه وأفكاره إلى كانت تحتل عقله رافقته إلى الخارج.. ناظر الشباب الى حضرو اليوم يستقبلونه من خروجه حمد ونمر ومصعب وخالد ونهيان وسلطان.. لفت نظره سعود إلى ممسك بيده طفل صغير يبين عمره بين ثلاثه اربع اعوام.. ابتسم سعود وركض يضمه له وركض وراه الشباب كلهم يضموه مع بعض بشوق له.. ابتعدو عنه بعد ما خبط كتفهم ثنيان وده يتنفس.. نطق نهيان بفرح؛ مبروك ياخوي..
هز راسه له بدون اي كلام..  ما استغرب نهيان منه وهو ذا تعامله بعد دخوله السجن وبعد ما عرف انه اخوه .. وجهه نظره ل الطفل الصغير واشر عليه ناطق؛ بزر منهو ذا..
ابتسم سعود له ونطق؛ ذا ضارب.. ولدي.... دمعت عيونه يشوفه يمشي له بعد كلام سعود انه يجيه.. مسك ضارب الصغير ثوب ثنيان ونطق؛ عمو.. مد يده يشيله ويبوسه ونطق؛ حبيبه انت .. الله يحفظه لك .. بعد كلامه الأخير مشى الجميع ل سياراتهم..
...
ضارب الصغير بحضنه جالس.. يناظر فيه فرحان.. تكلم سعود إلى من اول لحظه؛ حبيته..
ناظره بدون اي تعبير ل وجهه ونطق؛ ينحب هو..وناظر ل ضارب الصغير وابتسم له يلعب معه.. تنهد سعود بضيق من تغير شخصيته.. تغير كثير بعد مادري سبب موت ابوه.. وأخوه نهيان.. وغدر هزاع وسياف.. والصدمات ماخلصت هنا بس..
...
كلهم بسياراتهم حمد وخالد بسياره واحده.. مصعب بسيارته ونمر معه.. نهيان وحده بسيارته.. وسلطان إلى ماخذ نص هدايا أخته الجدال ب سيارته..
سعود وثنيان الراكب جانبه وضارب الصغير بحضنه.. زوجته ليلى ورا كرسيه جالسه..
مسافرين ل الرياض.. يحضرون عرس الجدال.. إلى حددوه بيوم خروج ثنيان.. مايدري ان بنت عمه بتتزوج.. ايه هي بنت عمه.. طول عمره يكذبون عليه أنها اخته  من الرضاعه لكنها بنت عمه.. هو أكبر من سياف بسنتين.. متى يمدي زوجت عمه لمياء ترضعه..
كان غريب عنهم.. إحساسه تغير عليهم.. يكفي له الغدر والكذب والخذلان..
بعد نص ساعه..
وقف سعود عند واحده من المحطات.. والشباب واقفين على يمنيه ويساره ..مخلص عليهم البنزين..
نطق ثنيان وهو صاد عنه؛ أخذه معي..
فهم سعود مقصده ونطق؛ خذه..
نزل ثنيان من سياره سعود وهو متضايق منها بسبب وجود زوجته معه.. ناظر سياره الشباب الى علي اليمين واليسار موقفه ناظر سياره نهيان إلى جالس وحده موقفها على جنب بدون لا يدخل المحطة.. مشى وضارب الصغير معه له.. فتح الباب وركب جنبه بدون كلام..
عند سعود.. نزلت ليلى من مكانها وركبت مكان ثنيان ونطقت؛ ليه ماخذه..
سعود؛ مستحي منك واخذه معه..
ليلى؛ مايدري اني هنا..
سعود؛ ركب يحسب بنروح شقتهم..
ليلى؛ ليه مايدري للحين..
تنهد سعود ونطق؛ لا.. نقول له بعدين..
بعد ما خلص سعود تعبه سيارته حرك وحرك الباقي معه..
...
الديره الصباح..
بعد ما وصلو كل واحد راح بيته..بيت الجد سياف..
قام من نومته يصلي الفجر بعد ما راح عليه..ناظر ساعته وكان الوقت ٨:٣٦ دقيقه..
تنهد يناظر سلطان ونهيان نايمين جنبه.. انفتح الباب ودخل منه سعود مبتسم ونطق؛ حي الصباح بوجود ثنيان.. ودخل وراه ضارب الصغير معه الخبز بيدينه الصغيره..
ضحك عليه ثنيان ومد يدينه لأجل يحضنه.. ركض له ضارب الصغير بعد ما أخذ ابوه سعود منه الخبز له.. جلس بحضنه وباسه ثنيان..
تنهد سعود منه ونطق؛ ماقومتهم.. هز ثنيان راسه ب لا.. مشى سعود يقومهم بهدوء وقامو بسرعه معه..دخل نهيان الحمام وأخذ له دش على السريع وطلع.. راح يصلي صلاته إلى فاتته وسلطان زيه..
جلسو وناظرو كلهم ثنيان.. بدأ سعود يسمى بالله ويأكل.. رفع نظره ثنيان لهم بعد ما حس على نظرات له ونطق؛ به شيء بوجهي..
هز نهيان راسه ب لا  وبدأ يسمى ويأكل ونطق سلطان؛ لا لا.. وسمى بالله واكل..
اخذ ثنيان لقمه صغيره واعطها ضارب إلى بحضنه..بدأ ياكله لقمه وراها الثانيه ويشربه الشاهي.. نطق سعود بعد ما شاف ثنيان ماياكل معهم ونطق؛ ماودك فيه..
ثنيان؛ لا..
تنهد سعود وياكثر تنهيداته منه..
بعد ماخلص كل واحد منهم.. نطق سعود؛ الشباب نصهم راحو يبنون المخيم..
ناظره ثنيان ونطق؛ زواج من..
سلطان؛ زواج الجدال.. وسع عيونه بصدمه ونطق؛ مبروكك والله..
درعمت عليهم سوير بقوه..وصد نهيان اول ما لمح وجهها.. ناظرته ب استغراب ونطقت؛ هيه عمتك يا ورع..
نسي للحظه انها عمته اخت ابوه ماهو متعود عليها ولا عمره كلمها وشافها؛ اسف اول مره اشوفتس..
تربعت سوير جنبهم ونطقت وهي تناظر ثنيان؛ كبرت والله..
ثنيان؛ ليه بزر اول..
سوير بدموع ملت جفونها؛ تغيرت..
انصدم نهيان منها وكثير.. أما الباقي متعودين عليها.. مارد عليها ثنيان وصارت عاده عنده الصمت.. يرد عليك كلمه كلمتين ويسكت بعدها.. ناظرت سوير سلطان وونطقت وهي تخبط كتفه بقوه؛ ثوبك جاهز وشماغك وبشتك جاهزين.. وخبطت فخذ نهيان إلى جنبها ونطقت؛ وانت بعد ثوبك جاهز وشماغك مكوي.. وناظرت ثنيان ونطقت؛ وانت معهم بس مبخر ومعطر ومجهز بحب.. وناظرت الشباب واحد واحد وتاشر بيدها عليهم؛ لا تقول انت وياه مفرقه بينكم كلكم سواسيه عندي..
وسع سعود عيونه ونطق؛ وانا..
رفعت يدها لوجهه وسفته بمعنى مالى دخل فيك؛ انت زوجتك تهجز لك.. وذا المقرود معك.. أشرت على ضارب  الصغير بعدها.. كشرت ملامح ضارب الصغير من كلام عمته سوير ونطقت سوير بشهق؛ وعو سعود نسخه مصغره..
ضربها سلطان على رأسها ونطق؛ ولده يا تيسه...
ناظرته بطرف عين وهي تقوم ونطقت؛ نسامحك يابو رأس مربع اليوم بس...
ومشت سوير وقام الشباب وراها.. راح سعود يشوف لهم طريق ورجع لهم ومشو كلهم مع بعض.. المخيم ماكان بعيد مره.. ١٣ دقيقه بس.. وذا كلام سعود لهم..
وصل الشباب المخيم شافو حمد المتعلق فوق الحبل المربوط على الحديده وشوي بيطح لكنه يصارخ على نمر؛ حسيبككك الله جبههه جبهه..
ضحك نمر عليه ونطق؛ خلك خلك محد ينقذك..
تقدم مصعب منهم ونطق وهو يناظر له؛ أجل هو سبيكه مايعرف يزبطه... خلك عندك..
تقدم سعود منهم ونطق؛ يا اربعيني انت وياه حركات البزران للحين معكم...
ضحك نمر واشر عليهم ونطق؛ كلنا شياب بس عقل المراهقين موجود ياسعود..
حمد بصراخ؛ لا بارككك الله فيككك انقذنيييي.. مشى ثنيان له وأخذ السلم وعدله لأجل ينزل ونزل منه حمد وركض  ورا نمر يضربه ب نعاله.. تقدم خالد منهم ونطق؛ حي بو ضارب حي ذا الوجه السمح.. ياجلعها بذمتي انه صباح خير وبركه..
رد عليه ثنيان؛ جعلها دايمه..
مشى سعود وهو يربط ثوبه بخصره ونطق؛ على القوه يا شباب..
صارخ كل واحد منهم؛ عليها..
ومشى الشباب وبعض شباب الديره يجهزون المخيم إلى بيستغرق بنائه ساعتين ثلاث ساعات..
...
أذان العصر ..
طلع لهم ب كشخته.. الثوب الرمادي والغتره الترابيه . ملامحه إلى صارت حاده.. تغير وكثير.. إلى يشوفه يا بالله يعرفه.. تغيرت ملامحه شوي.. وتغير هو.. طباعه تصرفاته كلامه.. إلى مر فيه ماهو هين.. ماهو كل شخص يكون مسجون يطلع منه على شخصيته.. السجن شيء آخر.. عالم آخر.. هو صح ماكان جالس بين أكبر القتله واكبر المجرمين.. كان جالس بين المساجين البسيطين.. لكنه عاش ايام لا تذكر.. ايام صعب نسيانها.. كانت عباره عن .. عدم وجود أمان.. كله خوف تنام اليوم وبكره يلقوك مقتول..
ناظر نهيان إلى زيه لابس ثوبه الرمادي والغتره الترابيه.. ابتسم له بخفه.. وابتسم ثنيان من بسمته ومشى طالع معه.. ناظرو سلطان إلى شايل بيدينه ثلاث كراتين تمر وهو يتحلطم على كشخته إلى تخربت ثوب ابيض والشماغ الأبيض .. طلع سعود لابس ثوب ابيض وشماغه الأحمر وبشته معه.. وضارب الصغير لابس  ثوب ابيض وشماغ معصوب على راسه وبشت على قده ومكتوب عليه من الخلف؛ ضارب ولد سعود..
ضحك ثنيان عليه وعلى شكله إلى قد نص طول يده..أنحنى بجمسه يبتسم له ونطق؛ ضارب ولد منهو..
نطق ضارب الصغير ؛ ثعود..
ضحك على طريقه كلامه وضمه له يبوس راسه.. ونطق سلطان بعصبيه؛ الا ولد ثور..
نهيان؛ وراك عليه..
سلطان؛ الأخ متزوج خلاص ولت أيامه جب يا سليط خذ يا سليط..
نهيان؛ ضارب وش نقول له..
رفع ضارب الصغير راسه له ونطق؛ سلطه تسلب..
وسع ثنيان عيونه منه ونطق سلطان؛ ايه ماعليك شرهه مكثر قعده معه..
ابتسم لهم ضارب الصغير ببراءة.. وانشلع قلب ثنيان معه.. اليوم يشوفه بس.. وتعلق فيه كثير.. لو عاش معه باقي عمره وش بيصير له.. بيموت من حبه له..
رفع نفسه ونطق؛ نمشي يا ضارب..
هز ضارب راسه له ومد يده لأجل يمسكه.. ابتسم ثنيان منه ومد يده الكبيره مقارنه بيده الصغير ومسكها ضارب الصغير.. أو الأخص مسك الإصبع الأصغر له.. وقرب منه نهيان من الجانب الأيمن ومسك يده الصغير.. صار هو وسطهم.. سمي ابوهم إلى حبوه وتعلقو فيه.. وهو يحبهم أكثر من ابوه سعود.. دايم يكون مع نهيان وين ما يروح.. وإلى يشوفه يقول ولده ماهو ولد سعود.. كان ياخذ ملامح المرحوم ضارب.. بس الى يعرف سعود يقول يشبهه..
مشي الشباب للمخيم..أذان العصر ومرسمين من الحينه.. طردتهم سوير من البيت لأجل الضيوف بيجون.. ومالهم الا يتجهزون ويروحون..
...
المخيم..  الساعه ٦:٠٠
وصل الشباب المخيم بعد كم لفه على الديره وأخذ أغراضهم الناقصه .. وعلى وصولهم وصل العم وسيم..
رحب الشباب فيه ترحيب حار الا ثنيان إلى اكتفى بكلمه واحده.. ناظر العم وسيم ل ضارب الصغير.. ونطق وهو ياخذه؛ وجه سميه والله.. وباس رأسه.. تكلم سعود؛ ها ياعم كيف الدار..
العم وسيم؛ حلوه حلوه ياسعود.. إلا شصار على محمد..تنهد سعود يهز راسه؛ مادري وين سماه من أرضه.. مشى ل داخل الخيمه يجلس.. ضاق صدره منهم.. زادت حالته الصحية والنفسيه سوء.. التنفس عنده يثقل بسرعه..
صدره يضيق ب ثواني.. الإغماء شبه يومي عنده.. ونفسيته.. وش نقول عنها.. هواجيسه إلى تقتله مكانه.. كان كثير الهواجس والحين أكثر.. يفكر ب ماضيه وذا يتعبه.. أشياء كثيرة درى عنها.. وتعبته.. وأشياء للحين مايدري عنها.. تقدم له نهيان وجلس جنبه..
ناظر له بهدوء وناظر له ب المثل.. كل واحد منهم ساكت..لكن داخلهم كلام.. وده نهيان يدري وش شعوره لكنه رافض .. ووده ثنيان يفصح عن شعوره لكنه مقيد.. يحسه بيغدر فيه ب اي وقت.. ماعاد يثق ب احد.. وماوده يزعلهم ب كلامه إلى يخاف يزله.. نزل نظره ل جواله وبدأ يطقطق فيه.. ماهو مهتم ب إلى حوله..
تنهد سعود  يناظره ونطق؛ ذا حاله.. من أربع سنين
وسع عيونه بصدمه؛ وشو..
سعود؛ إلى سمعته ياعمي.. اربع سنوات ماعاد اعرفه.. متغير وكثير.. وش إلى مره به ب سنه وغيره كذا ما ادري..
العم وسيم؛ حاولت انت معه..
سعود؛ حاولت الين طق كبدي.. ماهو راضي ينطق بشيء.. أكلمه واهرج له يسلك لي بكم كلمه..
العم وسيم؛ تشره عليه..
سكت سعود ثواني ونطق بعدها؛ اشره عليه.. وليه الشره ياعمي..
العم وسيم؛ سعود.. ان كان القلب والصدر شايلين ملام وعتاب لا تقوله خله بخاطرك.. إلى تشوفه يقهر لكن الخافي أعظم.. ماتدري وش مر به بس مانلومه إلى ندري به ماهو هين..
سعود؛ يعين الله ياعمي..
العم وسيم؛ خله على انا ادري كيف اجيبه..
ضحك سعود؛ وكيف تجيبه.. حاول غيرك كثير..
ناظره العم وسيم بطرف عين ونطق؛ طريقتي غير عنكم.. حتى ابوه تكلم من بعدها..
سعود ب استغرب؛ ضارب.. وشوله..
العم وسيم؛ كان زيه.. جته حاله سكوت الله لا يوريك كيفها.. إلى يشوفه وقتها يقول ذا كان أبكم..
سعود؛ أجل بالله انها وراثه منه..
العم وسيم؛ ونهيان.. زيهم لا اشهد بالله بالع راديو الديره كلها..
ضحك سعود عليه وبدأ يجون الضيوف ..
قام الشباب ب واجبهم وأكثر.. محد منهم جلس ولا ضاقت رجولهم الراحه ويدينهم..
ثنيان إلى صدم أهل ديرته ب رجوعه.. محد درى انه خريج سجون.. واليوم كان خروجه.. خمس سنوات غايب عنهم من بعد طردتهم.. محد تجرى يتكلم عنه ولا يقول له كلمه.. السبب نهيان إلى سكتهم عن الكذب والنفاق عنه.. سكتهم فعله ل ابو صويلح..
ناظر ثنيان ابو صويلح إلى يمشي ويعرج برجله.. ابتسم للحظه عليه وكيف صار.. وبسرعه اخفاها.. لحظه سلطان إلى مره بجانب الرجال على يساره يصب له قهوه.. ومشى يصب ل ثنيان.. انصدم منه يوم رفضه.. ونطق؛ ليه..
نطق ثنيان؛ ما اشربها.. تضرني..
انصدم أكثر كيف تضره ومشى تحت صدمته يكمل صب لهم..
بدأت الفرقه الغنائية تجلس على فراشها المفروشة على خارج أراضي الخيمه.. وبدأ ألحن النجدي.. مهمآ مرت السنين والأشهر والأيام.. يبقى التراث السعودي حاضر بكل مناسبه..
صف الشباب وبعض الشيبان يعرضون.. تحت كلمات..
..
يا فلذات كبدي.. يا حشايش ضلوع الجوف..
مودعكن الله.. والله ألطف بكن مني..
لو الود ودي.. صرت فالبيت تحت الشوف..
ارد الندا.. وتدورني وتلقني..
ردد ثنيان مع الكلمات وهي توصفه وكثير.. توصف شعوره وأفكار ونفسه..
لكن الزمان.. مداوله والحيا ظروف..
وانا من عرفت.. العلم والوقت مشغلني..
تعرضت أمور.. صعاب ماني بها مكلوف..
بعضها ظلمني.. وكبرها مع صغر سني..
كبرت ونضج.. عقلي وصار الشقا منصوف..
وعادن وزادن.. واتعبني وبذني..
لو أن الخطأ.. من جانبي ماشكيت حسوف..
يديمي على.. سمني وناري تحت بني..
ولكن بلشت.. مع المعاوين والصادوف..
..
كان يسمع ترديد اخوه مع الكلمات.. حس فيه ضايق وحزين.. وده يهفه كف ويصارخ فيه.. وده يقوله انا اخوك قول لي وش صابك.. لا تخفى عني شي يا ثنيان.. إلى مريت به نص الى تمر به.. بس مرينا بنفس الظروف يا خوك.. لا تسكرها بوجهك.. قدر ربك تكون كذا..
ابتسم بدون شعور منه بعد ما شاف ضحك ثنيان على سلطان إلى يستعرض بغباء مقصده يضحكه وماهو مهتم ل الناس الي تنتقده.. راح سعود يدق على المطعم يقول لهم يجهزون العشاء الموصى عليه.. انتهى من كلامه يناظر ب ثنيان وسط الجلوس يلعب سامري حائل.. وناظر سلطان ونهيان على يمينه ويساره والشباب حمد ونمر ومصعب قدامهم جالسين.. راح سعود بسرعه وجلس جنبهم..وضارب الصغير الى يحاول يفك نفسه من أيهم الممسك فيه لا ينقز ويخرب كل شيء..يخرب السامري الحائلي..
..
عزتي من مثلي يدادي..
وسط حائل ساكنن خله..٢
ليتني وياه في وادي ..
والغيوم من  فوقنا مضله..٢
قلب ابو سليمان وقادي..
من همومه ذاب أجا كله.. ٢
يابعد حيي والاجدادي..
ارحم إلى صابته عله.. ٢
وان ذبحني ياعوض عادي..
من يحاسب ياعوض خله.. ٢
..
أكملت الفرقه السامري الحائلي.. وانشرح صدره شوي.. لكن ما دام الشيء ذا كثير.. ضاق صدره بعدها.. رفع نظره ل سعود إلى قدامه وكأنه يقول له.. خذني على سعود الجساري وداويني.. حس سعود عليه يناظر له ورفع نظره مباشر له.. وتأكد منه.. ناظر عيونه إلى تستنجد فيه.. عاجز يفهم وش وده.. كل ما حاول يرفضه.. وبعدها يجي ويطلبه.. تنهد وصد عنه.. ناظر بصدمه ضارب الصغير إلى نط عليهم يضحك ب إنتصار من أيهم إلى قدر يهرب منه ويسوي إلى وده فيه.. اخرج لسانه من فمه وبدأ يحرك راسه يمين يسار.. انقهر أيهم منه ومن هروبه وضحك من ضربه سعود له على راسه ونطق سعود؛ ورع علامك..
ضارب الصغير؛ هو حمان..
سعود بحده؛ عيب احترمه كبر ابوك تفهم..
مد ثنيان يده يشيله من وسطهم ونطق؛ لا تصارخ عليه.. وابتسم له يكمل؛ هو حمار وستين حمار بعد.. وسعود معه..
ناظر ضارب الصغير ابوه ونطق بعد ما ناظر ثنيان؛ ثعود معه..
ضحك نهيان عليه ونطق؛ وسلطه..
ضحك ضارب الصغير بعفويه لهم.. وناظر ل عمه سلطان ونطق؛ جدو حمان..
لف جسمه ل اخوه ونطق؛ الحينه يقول له جدو ليه..
رد عليه نهيان؛ ذيك اليوم رفع ضغطي وعلمته يناديه كذا.. هز راسه ب ايه وسكت يناظر له..
بدأت الفرقه تدق وتلحن العرضات والسامري والعب ب أنواعه.. والشباب المتقنين فيهم..
..
وقت العشاء..
صفقه سعود ب الصحن الفاضي ونطق بحده؛ ألبخ وقم وده لهم..
سلطان بألم من الصفقه ونطق؛ اقول ياسعود هدى شوي من شطحتك.. وانا صادق ذا نطرده ما ناكله..
تقدم أسر منهم ونطق؛ إكرام الضيف واجبه.. وتقدم هذال ياخذ الصحن الثاني ونطق؛ وإلى يشوف مناور يشوفه ضيف..
هز منافي راسه ب لا ونطق؛ ذا أقل شيء قرد.. حتى القرد شوي غالي عنه..
ضحك خالد بعد ما قدم كل الصحون إلى عليه؛ لو سمعك حشك حش..
أسر وهو ماشي؛ ياشيخ خله ماعنده ماعندي عمتي..
ضحك نهيان عليهم وناظره هذال ونطق؛ ذا صدق الى بيحشه حش..
منافي؛ تأكد لا تشك ولا تصدق..
سعود ارتفع ضغطه منهم ونطق؛ ألبخ انت وياه خذ الصحون وقدموها.. دخل ثنيان على كلامهم ونطق؛ عيب الشنب إلى فيكم..الورع الصغير يقدم وانتم جالسين.. ناظروه الشباب ب استغرب واشر على ضارب الصغير الى يسحب الصحن الثقيل بكل قوه ويوقف عند كل رجال ويعطيه علبه لبن صغيره.. ويكمل سحب عليهم كلهم.. انفجر الشباب ضحك يوم طنش ابو صويلح وما أعطاه شيء وكأنه ماهو موجود.. ونطق خالد ؛ سعود مورثه له..
نهيان؛ والله كفو.. ابوس راسك ياشيخ على الإنتاج..
هذال؛ رجال والله..
...
البر..
جالس هو ونهيان فقط.. رفض يروح معهم للبيت وياخذون الجدال.. قال إنه بيروح البر وقال نهيان بيجي معه.. ضبط لهم الشاهي وصب له ول نهيان معه.. ابتسم بروقان على الطعم إلى اشتاق له.. وناظر السماء والغيوم بهدوء.. نطق نهيان بعد مده؛ تفصح..
ناظر له يفهمه ويفهم وش يقصد ووش وده هز راسه ب ايه ونطق؛ نفصح..
تنهد نهيان خايف من كلامه ونطق؛ وش مريت به..
ونطق ثنيان؛ مريت ب إلى ما ينسى..
نهيان؛ وتقوله لي.. لأجل اخذك من ضيق صدرك وبالك..
ناظر الغيوم من فوقه ونطق؛ وش يضمن انك غير عنهم..
نهيان؛ لأني اخوك.. ولأني مثلك مار به..ولأني حاس بشعورك..
ثنيان؛ وش يضمن يا نهيان..
نهيان؛ صدق قلبك لا تصدق عقلك.. وتدري اني غير عنهم..
ثنيان؛ هو عاد به قلب.. تهقى يكون به..
نهيان؛ يمكن به.. ويمكن يخاف يعيش مره ثانيه وينغدر..
ثنيان؛ وتتحمل لا عييك... هز راسه له يأكد كلامه؛ لا تهوجس يا ثنيان عن ماضيك يتعبك ويتعب إلى حولك.. انكشف وضهر كل شيء ودك تعرفه لاعاد تفكر به دامك تدري..
شرب شاهيه ونطق؛ ما اهوجس من سال بالي.. اهوجس من  ضيق صدري..
سنين أحاول اهرب من حقيقة تلاقي وجهي.. لا أقفيت عنها تلاحقني..
امسح دموع الضيق واقفى عن همي وحزني.. ولو سألت وش بك..
رديت عليك مابيني شيء.. وإني والله يا نهيان مخذول.. وخذلاني صعب النسي..
لا جيتك مبتسم سالي.. لا تحسب اني مرتاح البال عالي.. ابتسم لأجل يخف الثقل قلبي..
ويرحم حالي..
تأكد نهيان هنا أن شايل بقلبه كلام وكلام.. لكن مايدري وين يبوح به.. صعب يحكى ويهرج عنه.. سكت ينضم أفكاره وكلامه ورد عليه؛ مع الأيام تهوجس سالي..ينسأل عن حالك.. وترد راضى.. خذلانك ينسى مع الوقت والوقت بدري.. تجيني مبتسم ضاحك ومرتاح البال... سكت ثنيان ينسدح بعد ما انتهى من شاهيه ونطق؛ وش فعلت معه..
استغرب نهيان ونطق؛ منهو تقصد..
ثنيان؛ اقصد مناور..
ضحك نهيان بعد ما تذكر إلى سواه فيه ونطق؛ يا طويل العمر والسلامه.. سويت به إلى يعجبك..