Kissing In The Moonlight [Completed]

Chapter 9

ကားလေးက Café View အရှေ့မှာ ထိုးရပ်သွားသည်။ ကားပေါ်မှ ဆင်းတော့မည် ပြင်တော့ ဆရာက လှမ်းတားပါသည်။

"Café View က ဒီအချိန်ဆို Bar ဖွင့်ထားတာ ကလေးလေးရဲ့... အမူးသမားတွေနဲ့ အန္တရာယ်များလို့ ဆရာ လိုက်ပို့ပါ့မယ်"

Café View က မနက်ပိုင်းဆို တစ်မျိုး၊ ညဘက်ဆို တစ်မျိုး ပြောင်းဖွင့်တတ်သည်။ ညဘက်ဆို Bar အဖြစ် ဖွင့်တတ်သည်မို့ မူးမူးရူးရူးတွေလည်း ရှိပါသည်။

ဆရာကိုယ်တိုင် ကားပေါ်မှ ဆင်းလာပြီး ကျွန်တော့်ဘေးနား လာရပ်နေသည်ကြောင့် ပြုံးပြလိုက်မိသည်။

ဒီလိုနဲ့ပဲ ဆိုင်ထဲကို ဝင်သွားလိုက်ပါသည်။ ဆိုင်ထဲမှာက သူ့ဝိုင်းနဲ့သူ ဆူဆူညံညံတွေ ဖြစ်နေ၏။

အဖေ ရှိနေသည့် ဝိုင်းကို ရှာလိုက်ပြီး ပိုက်ဆံအိတ် လိုက်ပေးသည်အထိ ဆရာက အနောက်မှာ ပါလာပါသည်။ အဖေကတော့ ဆရာ့ကို အားနာလွန်းလို့ မျက်နှာပျက်ကုန်တော့သည်။

အဖေ့ကို ပိုက်ဆံအိတ်ပေးပြီး ဆိုင်ထဲမှ ထွက်တော့ အမူးသမားတစ်ယောက်နဲ့ တိုးပါသည်။ ထိုလူက ကျွန်တော့်ဘက်ကို ယိမ်းထိုးလာတော့ ဆရာက ကျွန်တော့် ပုခုံးကို ကျစ်ကျစ်ဆုပ်ကိုင်ထား၏။

ဆရာ့ အရပ်အရှည်ကြီးကို လည်ပင်းလေး မော့လို့ လှမ်းကြည့်လိုက်မိသည်။ ဆရာကတော့ အရှေ့တည့်တည့်မှ အမူးသမားက ကျွန်တော့်ကို မတိုက်မိစေရန် သူ့ဘက်ကို ဆွဲကပ်လို့ ထားပါသည်။

ဒီလိုမျိုး အနီးကပ်‌ နေရချိန်ဟာ ဒီအချိန်နဲ့ဆို သုံးကြိမ်မြောက် ဖြစ်ပါသည်။ ကိုရိန်းရဲ့ ထီးလေးအောက်မှာ အတူတူ ‌ရှိဖူးချိန်၊ ကားပေါ်မှာ ခါးပတ် ပတ်ပေးချိန်... ပြီးနောက် ဒီအချိန်လေးရယ် ဖြစ်၏။

"အို ဆရာက မင်းကို ဟိုလူ ဝင်တိုက်မိသွားမှာ စိုးလို့ပါ။ နာသွားလား ကလေးလေး..."

ဟိုလူ ထွက်သွားတော့မှ တင်းတင်းဆုပ်ကိုင်ထားသည့် ပုခုံးကို လွှတ်ပေးရင်း မျက်နှာကို လိုက်ကြည့်လို့နေပါသည်။

ဆရာက ဒီလိုပဲ တစ်ဖက်လူ၏ အရိပ်အကဲကို သိပ်ဂရုစိုက်တတ်သည်မို့ ပြုံးပျော်ချင်နေသည့် မျက်နှာအမူအရာကို ထိန်းလိုက်ရပါသည်။