အခန်း (၁၅)
သူ့ဖေဖေနှင့် ဦးကျော်ထွဋ်ခေါင် တို့ ထိုင်ကြသော နေရာက သူ အနောက်က ချောင်းမည်ဆိုလျှင် အနည်းငယ် လွယ်ကူသော နေရာမို့ လင်းမာန်ခ ဝမ်းသာသွားရသည် ။
အင်း... သူ့အဖြစ်က သူများအတွဲကို လိုက်ချောင်းနေတဲ့ လူလိုပါပဲလား ။
သူ့ဖေဖေကြောင့်သာ မဟုတ်လျှင် ဒီလို အတွဲချောင်းသည့် လုပ်ရပ်မျိုး လင်းမာန်ခ ဘယ်သောအခါမှ လုပ်လိမ့်မည် မဟုတ်ပေ ။
" ထွဋ်ခေါင်... ငါ့ကို စိတ်ဆိုးနေတာလားကွာ... "
ထွန်းမာန်ဆင့် က မေးလိုက်တော့ ကျော်ထွဋ်ခေါင် က ခေါင်းယမ်းကာ စိတ်မရှည်သည့် အသံဖြင့် ပြန်ဖြေသည် ။
" ငါက မင်းကို ဘာလို့ စိတ်ဆိုးရမှာလဲ... မင်းနဲ့ ငါနဲ့က ဘာဆိုင်တာ မို့လို့လဲ... "
ကျော်ထွဋ်ခေါင် အသံက စိတ်မဆိုးဘူး ဟုသာ ဆိုသော်လည်း စိတ်ဆိုးနေမှန်း သိသာလှသည် ။
" မသိဘူးလေကွာ... ဟိုကောင် ထွန်းမောင် ပြတဲ့ ပုံကို ကြည့်ပြီးထဲက မင်းမျက်နှာ အဲ့လို ဖြစ်နေတာလေ... အခု ပွဲလာဖို့ကိုတောင် ငါ မင်းအိမ်မှာ အတင်းလာခေါ်လို့ မင်း လိုက်လာတာ မဟုတ်လား... "
" ပုံ... ဘာပုံလဲ ... ငါက ဘာပုံကို ကြည့်ပြီး စိတ်ဆိုးရမှာလဲ... "
ကျော်ထွဋ်ခေါင် က အရွဲ့တိုက်သော လေသံဖြင့် မေးလာခြင်း ဖြစ်သည် ။
ထိုသို့ မေးလာကတည်းက ထို ပုံက အဓိက ပြဿနာ ဖြစ်မည် ဆိုသည် ကို လင်းမာန်ခ ရိပ်မိလိုက်သည် ။
" ငါနဲ့ နှင်းယမုံ နဲ့ နှစ်ယောက်တွဲပုံလေ... အဲ့ပုံကို မြင်ပြီးထဲက မင်းငါ့ကို စိတ်ဆိုးနေတယ်လို့ ငါခံစားနေရတယ်... "
ကျော်ထွဋ်ခေါင် က ဘာမှပြန်မပြောဘဲ နှုတ်ဆိတ်နေသည် ။
ထွန်းမာန်ဆင့် တစ်ယောက် မနေနိုင်ဘဲ ဆက်၍ ရှင်းပြရပြန်သည် ။
" အဲ့တာလေ... ရေတံခွန်မှာ နှင်းယမုံ ချော်လဲမလို ဖြစ်တော့ ငါက ကူပြီး ထိန်းပေးလိုက်တာ... နှင်းယမုံ က ငါ့ရင်ခွင်ထဲကို အရှိန်မထိန်းနိုင်ဘဲ ကျသွားတာကွာ... အဲ့တာကို အဲ့ ခွေးကောင် ထွန်းမောင် က သူ့ကင်မရာနဲ့ လက်တည့်စမ်းပြီး အမိအရ ရိုက်လိုက်တာကွာ... သူက တမင် နောက်ပြောင်ချင်လို့ ရိုက်လိုက်တာပါ... "
YOU ARE READING
အချိန်ခရီးသွားပြီး အဖေ့ကို လင်ပေးစားမယ်
Mystery / Thrillerဇာတ်လမ်း အကျဥ်းကတော့ ဝတ္ထုခေါင်းစဥ်အတိုင်းပါပဲ... လင်းမာန်ခက wormhole ကို ဖြတ်လာပြီး လွန်ခဲ့တဲ့ အနှစ် ၂၀ ကို ရောက်လာတယ် ။ သူ့အဖေက သူ ၂နှစ်သားထဲက ဆုံးသွားခဲ့ပြီဖြစ်တယ် ။ သူ့အဖေရဲ့ ဒိုင်ယာရီ အရ သူ့အဖေ ချစ်တဲ့သူက ယောကျ်ားလေးတစ်ယောက်ဆိုတာ သူ သိခဲ့တယ် ။ ...
