فى الصباح الباكر ، ارتدى آسر ملابسه الرسمية و خرج فى عجالة بعد أن أخفق فى محاولاته للنوم ، استقل سيارته و ذهب إلى الشركة قبل استيقاظ أى فرد فى العائلة ، لم يكن يرد أحدا يراه فى هذه الحالة .
دخل آسر الشركة تدب خطواته المكان بغضب عاصف حتى شرع الموظفون فى الهمهمة " ربنا يستر " ، " هو ماله النهاردة ؟ " ، " هو ايه اللى حصل ؟ "
فى ڤيلا الديهى :
ريم : صباح الخير يا ماما .. صباح الخير يا مروان .
سناء: صباح النور يا حبيبتى .. أومال فين كارين ، لسه ماصحيتش و لا ايه ؟
ريم : مش عارفة يا ماما أنا فكرتها نزلت .
سناء : مش عادتها يعنى تنام لحد دلوقتى .. ده الساعة داخلة على ١٠ ، و هى ف العادة بتصحى ٧ .
مروان : عادى يا جماعة يمكن راحت الجامعة .
ريم : انا هقوم أطمن عليها ماشوفنهاش من امبارح من ساعة ما اتخانقت مع آسر .
فى الشركة :
دلف السكرتير مكتب آسر هرعا :
- آسر بيه .
آسر بغضب : فى ايه يا حامد؟
- فيه مشكلة كبيرة ، الشركة اللى مسئول عن عقدها الباشمهندسة كارين بعتت اخطار بدفع الشرط الجزائى بعد ما المهلة اللى ادوهالنا انتهت .
- ازاى ده ؟ طب مش أنا قولت لابراهيم يكمل شغل كارين .
- ما هى دى مشكلة تانية ، رئيس القسم الهندسى باعت تقرير بيقول ان الرسم الهندسى اللى عمله المهندس ابراهيم فيه أخطاء كتيرة جدا ، و مش هينفع تتصلح غير لما يتعاد من الأول و ده فيها شهر كمان .
- أوووف ، ايه اللى بيحصل ده ، المهندسين خابوا و لا ايه .. اندهلى الزفت ده .
فى غضون دقائق كان ابراهيم ماثلا أمام آسر و القلق يجوب ملامحه .
- ايه ده يا بشمهندس .. دى عمرها ما حصلت معاك .
- يا آسر بيه أنا كان عليا ضغك شغلةكتير وقولت كده لحامد .
- و أنا بقا عيل أهبل علشان هيدخل عليا الكلام ده .. ضغط ايه اللى يخليك تعمل كل الأخطاء دى بالشكل ده ... حامد !!
- نعم يا آسر بيه .
- أستاذ محمد مدير ال HR يشوف شغله مع البيه علشان يحصل صاحبه .
- يا آسر بيه ، بس أنااا...
قطع الحديث صوت هاتف آسر يتمتم بسره " اتصال من البيت ؟!
- ألو .
- أيوا يا آسر .. تعالى بسرعة .
- فى ايه يا مروان ؟!
- كارين سابت البيت و مش عارفين راحت فين .
- يعنى ايه مش عارفين راحت فين ، ما يمكن راحت الجامعة.
- لا يا آسر .. هى خدت كل هدومها و حاجاتها.
- طب اقفل أنا جاى حالا .
خرج آسر من مكتبه مختلط المشاعر بين الغضب و الخوف دون أن يعير الواقفين اهتماما و لا لنداءاتهم .
خرج ابراهيم من مكتب آسر و طلب أحدهم تليفونيا :
- أيوا يا زفت .. الله يخرب بيتك .
- ايه يا ابنى اهدا .. حصل ايه ؟
- حصل انى هترفد بسبب غباءك.. لا غبائى.. أنا اللى غبى علشان سمعت كلامك .
- اهدا بس و كل حاجه هتتحل .
- اهدا !! يخرب بيت برودك يا شيخ .. صحيح أنا سمعت ان فيه حد ف البيت عنده مختفى .
- هههه .. آه دى كارين .
- خبر أسود .. اوعى تكون انت اللى ورا الحوار ده ؟
- اممم ، مش بالظبط يعنى .
_____________________
فى مكان آخر :
- ميرسى أوى يا مروة على كل اللى عملتيه معايا .. يعنى لولاكى انتى و سامح مش عارفة كنت هروح فين نص الليل .
- ماتقوليش كده يا كارين احنا اخوات بس بردو ماقولتيليش انتى ليه سبتى البيت و فى وقت زى ده .
- معلش يا مروة ، مش عايزة أتكلم فى الموضوع ده .
- اوك على راحتك .. اعتبرى البيت بيتك ، أنا لازم أنزل دلوقتى .. محتاجة حاجة ؟
- لا ميرسى .. آه لو سمحتى زى ماقولتلك بقا مش عايزة حد يعرف انى عندك .
- آه طبعا ، ماتقلقيش .. باى .
- باى .
____________________
أنت تقرأ
الوجه الآخر للذئب(الجزأين)
Romanceلأنّى أحبّك عاد الجنون يسكننى و الفرح يشتعل فى قارات روحى المنطفئة لأنّى أحبّك عادت الألوان إلى الدنيا بعد أن كانت سوداء و رمادية كالأفلام القديمة الصامتة و المهترئة عاد قلبى إلى الركض فى الغابات مغنيا و لاهثا كغزال صغير متمرد فى شخصيت...
