الوجه الآخر للذئب(الجزأين)

١٥- نيران الغيرة 🔥🔥

بعد مرور عدة أيام يحفهم الاستقرار و السلام النفسى و مجاكرة ريم لاخوتها و مشاكسة مروان و رقية المتبادلة فى المنزل و المشفى  .  استيقظت رقية فى الفجيرة نهضت و توضأت ثم ذهبت إلى المطبخ لتشرب و ما كادت تفتح النور حتى فزعت لوجود أحدهم و تبينت فيما بعد أنها تمارا  :

- سورى خضيتك  ؟
- صباح الخير يا تمارا  ، ايه اللى مصحيكى دلوقتى  ؟
- أقولك و ماتضحكيش عليا  .

عقدت رقية جبينها استفهاما ثم ابتسمت قائلة:

- أوك مش هضحك   .
- أصل أنا بصراحة جعت فقمت آكل و انام تانى  .
- ههه انتى بتجوعى و انتى نايمة  .
- أحيانا هه..  وانتى صاحية بدرى كده ليه  .
- بصحى أصلى الفجر و أجهز علشان الشغل  .
- اووك  ،  طيب  ..  أنا هطلع بقا  .
- اوكى يا حبيبتى.

تحركت تمارا نحو الباب بخطى مترددة حالما كنت تتجرع رقية المياه فالتفتت إليها تمارا ثانية قائلة بتردد  :

- هو أنا ممكن أصلى معاكى   .

لاحت البسمة على محيا رقية قائلة: 

- أكيد  ..  انتى بتعرفى تصلى  ؟
- آه طبعا  ،  عارفة طنط سناء و أنا صغيرة كانت جايبالى اسدال صلاة صغير.. بتاع الأطفال ده،  كانت كل ماتيجى تصلى أروح أقف جنبها و أقلدها بس ماكنتش أعرف هى بتقول ايه هه لحد ما آسر قفشنى فى مرة و علمنى الوضوء و الصلاة  ..  بس..

- بس ايه  ؟
- بس أنا ماعنديش اسدال دلوقتى  .
- و لا يهمك عندى أنا دى  ،  ياللا بينا  .
- بجد  ،  اوك ياللا  .

دلفتا إلى غرفة رقية حيث أخرجت لها من خزانتها إسدالا جديدا أنيقا التقطته منها تمارا هاتفة  :

- ميرسى أوى يا رقية  .
- العفو يا حبيبتى على ايه  ،  ياللا بقا اتوضى و البسيه علشان نصلى قبل ما صلاة الفجر تفوتنا  .
- تماام  .

أقامت رقية و تمارا صلاتيهما لتشعرا بالراحة و السكينة تغلفهما و من ثم أعطت رقية كتيبا صغيرا لتمارا فتساءلت  :

- ايه ده  ؟
- ده كتيب فيه أذكار الصباح و المساء تقوليها بعد الفجر و بعد العصر علشان ربنا ييسرلك أمورك و يبقى يومك حلو  .
- أوكى   ، حاضر  ،  تسلميلى بجد  .
- العفو ياقلبى  .