سمارا اليسار (انبلاج السوسن)

البــارت الخـامس عشــر

#بــقلم
#ايــزابيل
#البــارت الخــامس عشـر
(ســمارا اليــسار)
..
وغلاتك گلبي مو بيدي عنيد اگشـر...!!
لـهسه شما يذكرك عطش يتفطر ...!!
❤️...!!
..

جاوبني بصدمه :- ها تحجين صدك ،،

كلت بهمس :- ايي اذا بعدك تريدني ف اني موافقه ،

كال بفرح :- لك اروح فدوه واخيراً راح تصيرين الي الاسبوع الجاي اني والأهل ننزرع يمكم ..

بلعت ريكي وكلت :- تمام ..يله باي ،،

ياسر:- وين حبي بعد وكت ،،

غمضت عيوني بوجع غافي داخل كلبي
شكد أذاني من كال حبي تعودت اسمعهه منه
ماحسهه حلوه من غيره :- تعبانه اريد انام ..

ياسر :- اوكي روحي نامي وتغطي زين اخابرج غير وقت ،

غلقته منه ونفجرت بالبجي لزمت ركبتي مختنكه نفتح الباب ودخلت مريم شافتني هيج ركضت عليه حضنتني وتمسد على راسي ..

:- بسمله لا تبجين ولج والله مايستاهلج بعدج صغيره وحلوه تلكين اليسوه راسه ..

شهكت وكلت :- أذاني والله اذا ميحبني ليش سوه هيج ليش خلاني اتعلق بي وهسه كدامي كاعد بصف زوجته بعين صلفه ولا كأنو صاير شيء ،،

مسحت الدموع من خدي وكالت
:- اشش بسومه خلي يولي اصلا هو ميناسبج ولا يستاهلج بعدج صغيره والعمر كدامج ،،

مسحت الدموع الي على شفايفي وهمست بتعب :- بس اني احبه ،،

:- بعد كل الي سواه وتكولين احبه ،،

هزيت راسي ب لا :- لا لا ماحبه قبل جنت بس هسه لا ،

مسحت على كتفي وباستني بخدي
:- خلي يطير وكومي اركصي وغني وهوسي بعدج صغيره على هل بجي والألم وصدكيني راح يجيج ندمان يطلب الرضى لو جان بلصين ..

كلت الهه :- اريد اروح للبيت ،،

:- بس احنه راح نبات هنا ،،

كلت بتذمر :- اهووو اريد اروح ماريد اشوف وجهه هو وهاي ايناس مدري تمساح ..

:- خلي راسج على المخده ونامي هنا بغرفه سمارا ترا بعد شويه الهول ينترس ناس ترس متلكين مكان لان نصهم راح يباتون هنا ..

جريت نفس وزفرته مسحت وجهي وكلت :- بس اسبح لان المكياج والسبري الي بشعري موتني ..

طبطبت على ضهري وكالت :- ماشي اني جبتلج ملابس بجنطتي تلكيهه بكنتور سمارا ..

هزيت راسي ب اي وهي طلعت كمت للكنتور طلعت الملابس جانن بجامه سوده وتيشيرت

احمر وبي كتابه بالنص اسود  الردان نص ..
دخلت للحمام تسللت لداخل المي وتركته يزيل التعب الي اندثر بيه تمنيته يغسل كلبي مثل ماديغسل جسمي يمحي القهر والخذلام مثل هاي الألوان الي اختلطت بالمي ..