سمارا اليسار (انبلاج السوسن)

البارت 44

#بـــقـــلم
#ايـــزابــيــل
#الجـــزء الثــــالث
#البــــارت الرابـــع والاربعــون
#ســـــمـارا اليـــســار (انبــــلاج السوسن)
..
وحدهم الذين غرقوا بما يكفي، يتحدثون عن الأشياء بعمق واضح.
..
استبرق

مر اسبوع تقريبا واني يم هند انطتني غرفه فوك بصف غرفتهه هي والياس ومانزل لجوه ابد حتى من ينزلون هند وزوجهه اني مانزل لان استحي الناس عمري مامختلطه بيهم ولا اعرفهم ف مارتاح اذا اكعد يمهم ..

اليوم الساعه ب7 جنت كاعده بالغرفه مالتي امدده على الجربايه وصافنه ..

ندك الباب ونفتح دخلت هند وبيدهه موبايلهه
كالت :- استبرق امي تريد تحاجيج ،،

كمزت بفرح :- يي وينهه ،،

انطتني الموبايل وكعدت احجي وياها سألتني شلوني وشداسوي ومن هل كلام ..

هند جانت كاعده بصفي على الجربايه سديت الموبايل باوعتلي و..
كالت :- اني نازله جوا تنزلين وياي ..

عقدت حواجبي :- منو جوا ؟

هند :- ايهاب وياسين ورزان اختهم ،،

استبرق :- هند اني استحي اكعد يمهم

هند :- اعرف بس كلت اخاف تضوجين وحدج كاعده هنا ..

صفنت وكلت :- انزلي واني ابدل ملابسي بشيء أستر وانزل وراج ..

هند :- ماشي ..

طلعت هند واني كمت للكنتور طبعا هند انطتني قسم من ملابسهه البسهم رادت تشتريلي بس اني رفضت كلت الهه ماكو
داعي البس منج ..

فتحت الكنتور وسحبت تراك وردي وبي اصفر لبسته وكفت كدام المرايه المشكله ملابس هند شويه ضيكات عليه يعني مابيهن ولو شبر واسع عليه ..

باوعت لشعري بالمرايه شعري يصير لونه اسود لنهايه ضهري وبي كم خصله رمادي ..احب هيج موديل شعر ..

طفرت من غرفتي لغرفه هند فردت شعري وجريت جهاز التسريح سرحت شعري صار اطول من قبل ..

ضفرته ضفيره راخيه وجريت توربان لبسته على شعري بس طلعت من كذلتي خصله ..
شفت مكياج هند على الميز ماكدرت امنع نفسي واني احب هيج شغلات خليت شويه بس برز ملامح وجهي وطوخت الشامه الي صايره جوا شفتي بالضبط ..

فتحت الباب وطلعت واني امشي على الدرج جان اكو شباك يطل على الحديقه لفتت

انتباهي سياره عاليه بيضه دخلت للكراج ..
رفعت رجليه واني على اخر درجايه حتى اشوف زين ..

نفتح باب السياره ونزل منهه شخص جان مخلي ايده بجيبه ويمشي بس مدنك راسه يباوع بموبايلى ..

ماكو ثواني ورفع راسه عرفته سلام ..
صاح بصوت عالي :- احمد ..

اجا هذا الولد الي اتوقع يشتغل وي الياس
شمر علي سويج السياره لزمه الولد
وكله :- اخذهه للغسل ومن تكمل خابرني اني اجي اخذهه ..