سمارا اليسار (انبلاج السوسن)

البارت 49

#بـــقـلم
#ايـــزابــيـل
#الجــــزء الثــالــث
#البــــارت التاســع والاربــعـون
#سمـــارا اليــسـار (انبــلاج الســوسن)
..
‏الطِير العافني !
وحطَ إعله غير أَغصان 
لا يرجع بعد دلالّي مو شجرة
..
سمارا

جنت كاعده بالهول ومرتبكه حيل ماعرف اذا السويته صح او لا ؟! اليوم المشيه واجوا هواي ناس موجودين بالستقبال ..

اجت امي فرحانه وتضحك كعدت بصفي
وكالت :- سمعتهم قروا الفاتحه ..

ابتسمت رغم هذا كله بس احس فرحتي مكسوره اجت جوان كمزت ليمي وكعدت بحضني ..

كالت امي طلعوا جنت كاعده بصف الشباك الي يطل على الباب الخارجي بعدت البرده شويه وباوعت هواي زلم واكفه بالباب ومن ضمنهم اكو شيخ يمكن لان لابس ملابس شيخ ..

صدت عيني على رامي جان واكف بصف الباب وناس تباركله رفع عينه ونتبهلي سديت البرده فوراً وعدلت كعدتي ..

طلعوا ودخل مؤتمن ومرتضى يمدحون بي وبأهله ..

مرتضى :- خوش ولد حتى اهله دره مال الله ..

مؤتمن :- كلش عجبني ابو وجهه بشوش وطيب ..

جانت بسمله هم موجوده هنا اجت من المطبخ وكعدت بصفي همستلي :- مبروك نشاءلله حياتج الجايه كلهه سعاده ..

ابتسمت الهه كمت الغرفتي شكد حاولت امنع نفسي من البجي بس ماكدرت اجه ببالي يسار واليوم الي خطبني بي ..

ليش هيج سويت ليش ،، الدنيا والعالم والظروف كلهه صارت ضدنه ليش هيج القدر من يريد يوكف بوجهه احد يحطمه ويقتله على قيد الحياه ..

مسحت دموعي من اليوم احاول انسى وابدي حياتي وي رامي ابدي حياتي وي الي يستاهلني وي الي اشتراني ومافكر بالي باعني ..

لل9 بليل جنت كاعده اني وبسمله بالغرفه نحجي بموضوع الخطبه لان حددوهه على بدايه الشهر الجاي ..

سمعت صوت صياح عالي كمزت من الفراش الجوه امي بالصاله واكفه وتروح وتجي بخوف ..

سألتهه :- شكو يمه ؟

:- سمارا يسار هنا ،،

غمضت عيوني وتنهدت ياربي جنت متوقعه والله طرت الغرفتي لبست صايتي ولفيت شالي اخذت جوان بيدي ونزلت ردت اروح للستقبال حاولت امي تمنعني بس جنت مصره ..

دكيت الباب طلع الي مؤتمن
كتله :- مؤتمن خليني احجي ويا ..

مؤتمن :- سمارا لاتدخلين بهذا الموضوع معليج اني داحجي ويا ..

سمارا :- مؤتمن شنو مادخل هو جاي حتى ياخذ بنتي شلون تريدني مادخل ..

فتحلي الباب ودخلت اول ماشافني وكف على حيله .. حجيت من مكاني :- يسار شعندك جاي ؟