#سنوات_من_العمر
للكاتبة ام مصطفى البارت السادس
جنات
ثاني يوم الصبح كعدت والولد جانوا بعدهم نايمين جانت استراحتهم
رحت لمي وكعت عليها وبستها سامحيني ماما والله غلطت وسبحان الميغلط ابوس ايدج سامحيني
-ليش هيج جنات هاي اني هيج ربيتجن يمة اصعدين نص الليل وتحجين وي واحد هيج تفحينا كدام الناس
كامت تبجي امي
حضنتها عفية ماما سامحيني اكولج غلطت والله واني بنتج
-مسامحتج شسوي مااكدر مااسامحكم بناتي وولدي ماعندي غيركم بالدنيا
بس روحي اوكعي ع بيبتج وصالحيها
-صار ماما هو اني جاي اروح اصالحها
رحت طبيت لغرفة بيي شافتني بيبي كالت شعدج جايه ولج امشي اطلعي من الغرفة
-بيبي فدوه اروحلج سامحيني ابوس ايدج ابوس رجلج بس سامحيني
غلطت ومنج السماح
ركضت دنكت ع اديها ورجليها بوستها وكمت ابجي بيبي فدوه اريدج تساميني
-ليش هيج بيبي تسوين باخوتج تنزلين روسهم ولج كدام اليسوه والمايسوه شلون كدرتي هيج تسوين
اسفة بيبي والله ندمانة والله
بيبي البت مثل الكاغد الابيض اذا الطخت تظل طول عمر بيها اللطخة
يجوز انت الله حبج وصارت من مصلحتج وخطبج وستروا عليج
بس لو واكعة بابن حرام وعافج وشرد وتصير فصل وكعدو مو جان انفضحتي هسه وتضلين هاي ضلتج
-اي صح بيبي والله كل الي دكولينه صح
بيبي شلون اصالح اخواني
-عوفيهم هسه يرضون وحدهم
روحي اسبحي وشوفيلج ثوب حلو
وجهج خل يحطلج هذا الصبغ بلكت يروح الزراك من وجهج هم عيب من السيد اليعقدلج شيكول هسه مزوركة
-ان شاء الله بيبي
طلعت كن غرفة بيبي
صار بوجهي مسلم كاشخ والريحة تعط من عندة
شافني وخزرني بسرعة رجعت ليوره وركضت للغرفة فتت
مدري شحجة وطلع وسد باب الحوش حييل
ميقات
حضرنا الغدة من وكت لان كالوا يجون بالثنتين يخطبون ويعقدون
واكفة ع السنك جنت وحدي احضر زلاطة
طب رعد للمطبخ طلع مي وشرب بقيت ع وكفتي اثرم
وكف بصفي
-خلصتج
التفتت عليه شنو
-خلصتج مني كتلهم اني مااريد ازوج كلت احسن ماانفرض عليج مرة ثانية جان يحجي ونظرته بيها عتاب تخردلت وثرمت سريع ضربت ايدي بالسجين
اخخخ
شنوو شبيج تعورتي
رفعت اصبعي كام ينكط دم
راسا لزمه حيل حتى يكطع الدم
شبيج غير تنتبهين
تعاي تعاي وياي اخذني ولازم اصبعي طلع تعقيم وشاش
كام يعقم بالجرح واني اكمز
اوكفي اتحملي خلصت
لف اصبعي بالشاش وشده حيل وبقى لازمة
طاب ماكو شي شبيج كمتي ترجفين شكد خوافة
والله يوجعني اصبعي حيل
-هسةة يطيب
-شكرا رعد
-ع شنوو ماسويت شي
ورفع عينه بعيني وضل صافن بوجهي
بعدين غمض عيونه وجر حسرة وطلع
-يربي ماافتهمة هالولد مرات احسة يحبني ومرات لا مفروضة عليه
عفت المطبخ وطلعت
البنات ملتمات ع جنات بغرفتها ويضحكن عليها عرس مزوركين يكللها
شافن اصبعي
هاي شنو شبيه
انظربت بالسجين
-اووف غير تنتبهين
والله ياسارة ماادري اخوج ذبله حجاية خلاني اكص اصبعي
-ميقات تره رعد يحبج والله العظيم وكايلي الف مرة احبها واريدها بس هو يستحي كافي تجافيه
-البارحة كال مااريدها
-اكيد يكول انت مرتين ترضيه ياعيني
هذا يسموه رد كرامة اله
-اني مو اكرهه بس مااريد ازوج واحد ميحبني
'منو كلج ميحبج هذا
-اني اعرف هو يريد بس يرضي بيبي
-لا علطانه والله يحبج يموت عليج بس انت تصديه دوم
جنات :صح ميقات انت دائما تتجاهليه وتصديه تره رعد مبين يحبج شبيج يجضي
-انت اسكتي ام البلاوي لاتحجين
-سكتنا
طبت حسنات ولجن كومن صبن الغده امي كامت تحجي دكول راح يجون الناس واحنه بعدنا مامتغدين
-اني انضرب اصبعي بعد مااكدر اشيل شي
-واني مزوركة واستحي اطلع
-اي عيني يعني وكع براسي مو
-سارة:- لاامشي اني وياج نصب
جنات
الساعة ب ٣ اجوي جنت خايفة حيل ومستحية شلون راح اطلع
فرحانه ومو فرحانه جنت اتمنى بغير ضروف نعقد
البنات يرحن ويجن علي
خطية سارة وكفتلي وكفة تعدل وتلبس بيه
جنت حتى مااكدر البس اديه ورجلي وجسمي كله يوجعني مكسرة تكسر
