#سنوات_من_العمر
للكاتبة ام مصطفى
الجزء الثاني
البارت الثامن
ميقات
اجونه بيت عمي مفاجأة
جنه مخبوصين بمسلم وكلنا مقهورين عليه وع بناته ولا توقعنا هالشي يصير ورود هجي تجازيه بعد كل ذاك التعب والدلال
حيدر فات كال بسرعة فوتن لبسن حجاباتجن ولد عمي اجوي وياهم نسوان
ركضت طبيت اني وحسنات
وكفت حسنات ع المراية وتكرص بخدودها وخلت كحلة
حلوه عليج الله هذا الحجاب يلوكلي
شنو جاي يخطبوج واني ماادري وج امشي اطلعي نتلكة النسوان
درووحي انت تلكي خل اعدل نفسي
عزه بعينج هاي انت صدك مخيله ع الولد جنج
اي شكوو بيها. مو ابن عمي مو غريب علي
هلو عيني بسم الله شعرفنا ولج عليهم هسه
اسمع حيدر يصيح تفضلن
امي تلكتهن كل الهلا اهلا وسهلا
طلعت اني
اشوف بنية سبحان الخالقها جمااااال مو طبيعي ولبس انيق والمرة الجبيرة هم تشبها
صفنت بوجها من كد جمالها وصفاء وجهه
حبيبتي اهلا وسهلا
اني اريج بنت عمج احمد حجت بهدوء وصوت ناعم
حبيبتي اتشرفت بيج واني ميقات بنت عمج جواد حبيبتي تشرفت بمعرفتج
كالت هاي امي
رحت سلمت عليها وامي ترحب بيها
طبت حسنات نفسي اشوفها تباوع ع اريج بتعجب وسلمت عليها
كتلها وهاي حسنات اختي
الله يحفظها انتو اثنين
لا احنه ٣ بنات بعد جنات مزوجة و٣ ولد
عقيل الله يرحمه اخوي توفة
وحيدر ومسلم
اها الله يحفظكم
وبيت عمي رضا وين
عمي رضا مخلف رعد الي هو زوجي ذبيت حصرة استشهد
ياعيني حبيبتي اسفة ماادري
لا حبي عادي وعنده سارة مرت اخوي عقيل الله يرحمه فوك عدها مشتمل خاص فوك هسه ادز عليها
زهراء عمة صيحي سارة كليلها اجونا خطار تصياج عمة ميقات
حسنات راحت تسوي جاي وماي
واخذتهن وطلعت
اباوع عليها من الشباك واكفة تباوع
كمت عليها وضربتها ولج شسوي
شبيج سم دباعي باعي يخبلون يماااي باعي مهيمن يجنننننن يجنننن انوب لابس وردي وجهه صاير بلون التشيرت
عزه بعينج هاي انت خفيفة هيج وماادري ميلام مسلم وياج امشي فوتي
جريتها كوه وفوتتها
دخل حيدر كال بنات تعالن كلجن فوتن هنا يله واني رايح اجيب بيبي خلي نتعرف ع بعض احنا مو غربة بعد ولد عم
حسنات الضحكه شكت حلكها وكيفت اصلا
وبسرعة كامت وصلت يمها كرصتها وحجيت ع كيف اثكلي شهرتينا وسدي حلكج
اي شبييج شعليج انتي
حيدر فات لبيبي
واحنا دخلنا كولنا امي وحسنات
نزلت سارة هم
اشرتلي منو رحت يمها تعاي فوتي ويانه بيت عمي جايين يتعرفون علينه
ها
اريج وامها فاتن قبلنا
حيدر اجه شايل بيبي فوتن شبيجن
طبينه وكعد بيبي ع التخم
سلمنا كولنا السلام عليكم
حيدر كال ذن خواتي حسنات وميقات وعندي اخت مزوجة جنات
ماشاء الله الله يخلهن جاوب مهيمن
ومااحجيلكم حسنات شلون تباوع شبعتها كرص اني
حيدر كال هذا عزيز وهذا عمر وهذا مهيمن
وهذا اسلام واكيد تعرفتوا ع اريج ومرت عمي
التفتت ع سارة
وهاي سارة بت عمي رضا زوجة اخوي عقيل الله يرحمه
مكال زوجتي ابد
كالوا اهلا وسهلا
طب مسلم كلنا وكفنا صار شكد مشايفيه حابس روحة
امي كامت عليه
هلة يمة كل الهلا بيك صلوات غ محمد من طلعت
كعد يسلم ويتعرف هم عليهم
بين ترخصنا نسوي عشة
واريج كالت اجي وياكم
طبينا كولنا للمطبخ
بسرعة طلعنا دجاج عدنا
احنا من نوع نسوك هواي ونذب بالمجمدة
طلعت دجاج اربعة كبار جانن مكصثات ومغسولات
خليتهن كلهن بجدر جبير
كلت لحسنات اسوي مركة دجاج حمرة
كالت اي احسن هم سريع وهم يكفي
انت نكعي تمن هواي وجيبي الشعرية يله
اريج بنات اشتغل وياكم
حبيبتي من تعبج
لا بالعكس احب اشارككم واتعرف عليكم
حبيبتي هلة بيج لعد سوي السلاطة
