عندما تتغير الاقدار

البارت الثالث

                    ...عندما تتغير الاقدار...

بقلمي الكاتبة قمر

لاتنسون التصويت 👈🏻⭐❤

وبهداي
آحترگ بهداي
گضه عمره آلشمع من يحترگ سكته

سلف...روحي حضري غراضج حتى تجين ويانه للبصرة

معرفت شجاوبه اصلان اني بقيت بس جسد بدون روح روحي دفنوها ويه اهلي وبعد ميهمني لو يخلوني بنار حسيت روحي صرت مثل الورقه وين ميطيرها الهوه تروح

كارين احجي اني ومدنكه...الطير من كصو جناحة ما مات بس توقفت حياته واني حياتي توقفت

سلف بأستغراب عدل عكاله وكال...عمو كارين اني اعتبريني ابوج وهذوله ولد عمج وأشر عليهم

بقيت مدنكه ما اريد يشوفوني ضعيفه ويشوفون الدمعه بعيني حتى يعطفون عليه ما اريد عطف احد

رجع كمل كلامه...والحزن ميرجع العزاز اني فكت اخويه وحزام ضهري وانتي الوحيده بقيتي من ريحته وبيبتج تريدج يمها

كارين...بس اني متعوده ع بغداد وما اكدر اعوفها

سلف... مثل ما تعوتي هنا تتعودين هناك واذا... قبل ميكمل كلامه قاطعه خالي

رائد...مرخصت الشيخ بنيتي اذا ما ارتاحيتي هناك بيتي مفتوح الج بكل وقت

كارين..ماشي ان شاء الله

سلف...يله بنيتي حضري غراضج باجر من غبشه( الفجر ) نطلع

كارين أشرتله براسي وطلعت

مرت خالي جانت واكفه يم الباب اول ما طلعت تلكتني...بنيتي ليش ترحين ابقي هنا يمنه تدرين بيه ما عندي بنات اني بس هند ومزوجه واريدج يمي امانه مثل بنتي احسبج

كارين ابتسمت بوجع وكتلها... باجي متقصرين لا انتي ولا خالو بس راح اروح فتره اذا ما ارتاحيت ارجع

مرت خالي...الي يريحج بنيتي

رجعت للغرفة فتحت الباب لكيت هند جاي اتنيم بأبنها

هند...اطلع عنج حبيبتي خاف تردين تنامين

كارين... لا راح الم غراضي

هند حطت ابنها ع الجربايه وغطته واجتي يمي ...ليش كارين ابقي هنا يم بابا وماما شعندج رايحه هناك بيت عمج شيوخ وتفكيرهم يختلف عنه ما راح تتوالمين وياهم

كارين... ميهمني شي بعد

هند...ماشي بس بعدين اذكرج بكلامي من ترجعين ندمانه....وشالت ابنها وطلعت

اما اني رحت طلعت جنطه وحطيت بيها ملابسي السود بس احتاجيت بعد غراض وفلوس هم خاف اطول هناك رحت كلت الخالي يوديني للبيت اجيب كم شغله خطيه ما كال لا

رحنه للبيت طلعت ملابس اكثر وكم شغله وخذت وياي 300 الف جنت مجمعتهن خلال فترة السادس حتى اسافر بيهن جريت حسره وحطيتهن