[UNICODE]
အချိန်ကသူ၏တာဝန်အရ ပုံမှန်လည်ပတ်ဆဲဖြစ်သည်။ ခုနစ်စင်ကြယ်အမြီးထောင်ချိန်ဖြစ်သော သန်းခေါင်ယံသို့ ရောက်ပြီဖြစ်ရာ အားလုံးလည်း အိပ်မောကျနေပြီဖြစ်သည်။ သို့သော် တစ်စုံတစ်ယောက်ကမူထိုအချိန်ကို မျှော်နေ
သည့်အလား နိုးထလာသည်။ ထိုသူက တစ်ဖက်ကုတင်ရှိ အိပ်မောကျနေသော အခန်းဖော်အား အကဲခတ်ရင်း ခြေသံကို ခပ်ဖွဖွနင်းရင်း မတ်တပ်ရပ်လိုက်သည်။ ထို့နောက် အခန်းတံခါးကို အသံမထွက်စေရန် ဂရုတစိုက်ဖွင့်ကာ အခန်းပြင်ကိုထွက်သည်။ အခန်းဖော်ဖြစ်သူကား အိပ်မောကျနေဆဲပင်။
ထိုသူက အခန်းပြင်ရောက်သည်နှင့် တစ်နေရာသို့ ဦးတည်ကာ ခြေသံလုံလုံဖြင့် ချဥ်းကပ်လေ
သည်။ ထိုသူမှာ ကျွမ်းကျင်သူပမာ လှုပ်ရှားမှုများက လျှင်မြန်ကာ သွက်လက်သည်။
ထို့နောက် အခန်းတစ်ခုအရှေ့တွင် ရပ်လိုက်ကာ တံခါးပေါ်တွင် နားကပ်၍ အခန်းတွင်းမှ အသံတစ်စုံတစ်ရာကို နားထောင်နေသည်။
အပ်ကျသံပင် ကြားနိုင်သည်အထိ တိတ်ဆိတ်နေပါမှ အလွန်ကျွမ်းကျင်စွာ အခန်းတံခါးကို
အသံစိုးစဉ်းမျှ မထွက်စေပဲ ဖွင့်လိုက်သည်။
အခန်းတွင်းမှ ချက်မချထားသောကြောင့် တံခါးက လွယ်လွယ်ကူကူ ပွင့်သွားပြီး ထိုလူက အခန်းတွင်းအခြေအနေကို အကဲခတ်သည်။
အပြင်ဘက်တွင် လျှပ်စီးများက မိုးရွာရန် အသင့်ပြင်နေကြသည့်အလား တစ်လက်လက်ဖြစ်နေသောကြောင့် ပြတင်းများကို ဖွင့်ထားသည့်
ထိုအခန်းက အလွန်မမှောင်လှပေ။ အေးစိမ့်စိမ့်ရာသီဥတုကြောင့် ကုတင်နှစ်လုံးပေါ်တွင် လူနှစ်ယောက်က စောင်ကိုယ်စီခြုံကာ အိပ်မောကျနေကြသည်။
တစ်ဖက်ကုတင်တစ်လုံးပေါ်တွင် အိပ်စက်နေသည့်လူ၏ ခြေထောက်က အိပ်ယာထက် ရှည်နေသဖြင့် သူ၏ခြေကျင်းဝတ်က ကုတင်စွန်းတွင် ထွက်နေသည်။ အခြားကုတင်ပေါ်မှ လူကမူ ပုဇွန်ကွေးနှယ် စောင်အောက်တွင် ခေါင်းမြီးခြုံလျက် အိပ်ပျော်နေသည်။
ကျူးကျော်ဝင်ရောက်လာသူက ကုတင်တစ်လုံး
စီကို တစ်လှည့်စီကြည့်သည်။ ထို့နောက် ပုဇွန်ကွေးကဲ့သို့ အိပ်နေသည့်လူ၏ ကုတင်အနီးသို့ တိုးကပ်သွားပြီး ခေါင်းအုံးအောက်သို့ လက်နှိုက်လိုက်သည်။
