آسميتها جارية

البارت الرابع

البارت الرابع
&
•
•
•
المهم ماضل مهم بَآلروح مآ شب نآر بَس مَترُوس گلّبي رمآد♥️
•
•
•
......
چانت امرأه جميله شگره وملامحها هادئه بس واضح عليها كبر السن لابسه ملابس نفس اللي يلبسوها الخدامات بـ الافلام الاجنبيه ..
حچت ويايه بللغه غير مفهومه وسريعه
گلتلها (( ب الانگليزي )) :- عفواً لم افهم ماقلتيه هل يمكنك تحدث الانگليزيه ؟!
..... :- نعم قليلاً فقط
نور :- حسناً ماذا كنتي تقولين .
..... :- انا ايميليا اعمل هنا ويمكنك مناداتي بـ ايمي
نور :- حسناً اهلاً بك ايمي .. وانا نور
ايمي :- نعم انا اعلم فالسيد اخبرني بك وبقدومك لكن لم يسمح لي برؤيتك لأنكِ كنتِ متعبه والأن هو ارسلني .
نور :- ارسلكِ لماذا ؟!
ايمي :- السيد يريد رؤيتكِ الأن عزيزتي وارسلني لهذا السبب.
نور :- هل يمكن ان لا اذهب ؟!
ايمي :- لا اعتقد ان يمكنك ذلك فالسيد لا يحب ان لا تطاع اوامره .
خفت اروح واشوفه واضح عليه انسان شراني واني ويا بالغربه ومااعرف شنو يريد مني بس قويت نفسي وفكرت اكيد هاي الدوله الها قانونها ومستحيل يگدر يأذيني بس يفكر يسويلي شي اشتكي عليه بس لازم اعرف احنه اي دوله .
طلعت من الملحق الخاص بيه بعد مالفيت حجابي عدل ولبست عبايتي لأن ماچنت ماخذه ملابس ولا ادري بهذي السفره واصلاً ملابسي صيفيه لأن العراق صيف وهذي الدوله بارده .
نور :- ايمي مااسم هذه الدوله .
لاحظت عليه توترت وصارت تحچي بلغتها الغير مفهومه
نور :- ارجوكِ تحدثي الانگليزيه واخبريني مااسم الدوله.
سرعت خطواتها واني امشي وراها بهدوء اني متأكده هيه فهمتني بس ماتريد تگولي اسم الدوله مااعرف شنو السبب والغايه مايخلوني اعرف اسمها
...........
نرجع لقبل اسبوع وتحديداً العراق
ابو علي گاعد بالشارع وملابسه متروسه تراب مدنگ وايده ع راسه ويبچي
ابو رائد :- ياخويه صلي ع النبي فدوه اروحلك وگوم خلي نرجع ل اهلنه ظلمت الدنيا .
ابو علي :- مااگدر شلون اشوفهم وشنو اگوللهم وين وديت بنتي مالي عين اواجه احد بيهم.
ابو رائد :- گوم خلي نزور ونصلي ونوكل امرنه لرب العالمين وهو يحلها النه ان شاء الله.
لزم ايد اخو وساعده يگوم من الگاع نفض التراب عن ملابسه ورفع راسه للسماء
ابو علي :- يارب سامحني واغفرلي ع اللي سويته ببنتي يارب اجمعني بيها ياارحم الراحمين .
دخلو لضريح الامام علي صلو وبقه گاعد بمكانه يصلي ويدعي ويبچي ماگام من مكانه ابد ولا قبل ياكل شي من الاكل اللي يجيبه ابو رائد الا القليل بعد مايجبره اخو ابو رائد
ابو رائد :- خويه احنه لازم نلگه عذر نگوله الهم اذا سألونه وين ودينه البنيه !! شتگول نسوي مثل ماگالت ونگوللهم راحت تدرس ؟!
ابو علي :- وين اكو هيچ حچي وين اكو سفر بهالسرعه مستحيل يصدگون رتبنالها دراسه وسفره بهالسرعه.
ابو رائد :- لعد والحل شنو شنگول الهم هسه ؟؟
ابو علي :- مااااتت ..
....
بعد مرور اسبوع
اجه اخو من جهه المقبره وملابسه مليانه تراب وتعبان
ابو رائد :- تمت خويه اتفقت ويه الدفان وانطيته فلوس وسوينه قبر وهمي مثل ماگلت بس بقه شي واحد !!
ابو علي :- شنو ؟!
ابو رائد :- شلون ماتت وليش ماگلنالهم ؟!
ابو علي :- نگوللهم چنه نازلين نجيب غده وهيه بقت بالسياره سمعنه هوسه واصوات رجعنه لگينه سيارتنه محترگه وهيه بيها ماگادره تطلع ومن قوة الصدمه ماگدرنه نتصل او نوصل ل احد الناس الخيره ساعدتنه ودفنوها بسرعه بسرعه
ابو رائد :- الله يسامحنه الله يغفر النه بعنه البنيه وهسه موتناها شنگول لرب العالمين فرطنه بروحها علمود نرجع ولدنه المجرمين الله اكبر علينه .
ابو علي صار ينحب بصوت :- فدوه اروحلك ياخويه لا تزيدها عليه كافي نار گلبي كافي اني كاره نفسي الله لا يسامحني ولا يغفرلي عساني احترگ وانشوي بنار جهنم يارب لا ترحمني مثل ما مارحمت بنتي .
شال عگاله ورما ع الگاع ابو رائد دنگ ورفعه من الگاع حاول يرجعه ع راس اخو
ابو علي بعد ايده :- لا والله مااستاهل يكون ع راسي بنتي هيه عگالي ورفعة راسي واني فرطت بيها والله مايرجع ع راسي الا ارجع بنتي لحضن امها .
ابو رائد :- لا حول ولا قوة الا بالله امشينه خويه امشينه نرد ل اهلنه بس المشكله بالسياره شلون نگوللهم احترگت واحنه نرد بيها ؟!
ابو علي :- فدوه لبنيتي السياره وابوها بعت بنتي ورخصتها تريدني اهتم لسياره هسه ناخذه ونحرگها بمكان هيمه .
سوو اللي اتفقو عليه الاخوان عقدو اتفاقية موت بحق بنتهم اللي ضحت بنفسها حتى يعيشون اخوها وابن عمها
رجعو ل اهلهم وچان ب انتظارهم اولادهم وعمامهم والعشيره كلها والدنيا مگلوبه عليهم لأن اسبوع همه مختفين وماكو خبر عنهم
شافهم واحد من گرايبهم :- يمعودين هذولي ابو علي وابو رائد رجعو .
صارت هوسه والكل اتجمع عليهم وفرحانين ويحمدون الهم ع السلامه
علي :- الحمد لله ع سلامتك بويه الف الحمد لله وين چنتو مختفين وشصار وياكم واختي وين شو مااشوفها ؟!
الكل سكت ينتظر رد ابو علي لأن استغربو اختفاء الاخت
ابو علي :- صارت النه سالفه بس امشونه نگعد بالمضيف ونحچيلكم .
الكل لاحظ انكسار الاخوان والحزن المرسوم ب وجوههم وخاصه اولادهم بس كان اكو خوف من السؤال
دخلو للمضيف ومحمد راح حتى يبشر اهله برجوع ابوهم بالسلامة
...
داخل المضيف
احد اعمام ابو علي الكبار :- اي ياابو علي قلقتنه شنو اللي صار وياكم وبنيتك وين
ابو علي بصوت مخنوگ بالعبره :- مااعرف منين ابدي بس كسرتي چبيره واخاف اصدمكم باللي اگوله ؟
الكل استغرب بكاء ابو علي المرير وحسو اكو شي چبير صاير
علي :- بويه فدوه اروحلك عمري كله ماشايفك هيچ خبصت گلوبنه احچولنه شصاير اختي وين ؟!
ابو علي من بين بكائه :- اختك ماتت
الكل انصدم مستحيل الأخت الصغيره الدلوعه اللي ابتسامتها ماتفارقها ولا عمرها زعلت احد شلون وليش وشوكت ماتت وليش همه مايدرون ؟! الف سؤال وسؤال بداخلهم ووضح بعيون اخوانها
ابو علي حچه الكلام اللي چانو متفقين عليه هو واخو وگاللهم طريقة موتها او الطريقه اللي همه رسموها لموتها
محمد :- ليش احنه ماندري ليش ماحاولتو تتصلون بينه ؟!
ابو رائد :- دخلنه بصدمه وماحسينه ع نفسنه الله ينطي الناس الخيره همه اللي مشو ب اجرائات الدفنه وساعدونه
علي :- حتى لو هذا مو عذر احنه اخوانها وامي چان لازم ندري اختنه تموت وتندفن واحنه مشايفيها ولا عدنه علم شي مايدخل العقل !!
ابو علي گام على حيله وصاح بي :- كاافي انت مو احن عليه من بنتي گلتلك اختك احترگت وماتت وچنه قريبين من المقبره والناس همه اللي دفنوها خلاص سدو الموضوع لا تحرگون گلبي كافي اللي بيه لا تزيدوها عليه ،
الكل سكت احتراماً لقرار ابو علي وبهذا الوقت خبر موتها انتشر وارتفعت اصواتهم بالصراخ والبكاء ع بنتهم اللي كان موتها صدمه ولغز مايعرفوله تفسير
بالنسبه لغدير اختها الوحيده وسندها تطلع من البيت وماترجع بس يرجع خبر موتها چانت صدمه چبيره ل اهلها وصديقاتها
مرت ايام الفاتحه ببكاء والم الفاتحه اللي نصبوها لبنتهم العايشه بالغربه واللي ضحت من اجل عيونهم
.......
نرجع لـ نور چانت تفتر بداخل البيت او مفروض نسمي قصر بناء فلكلوري فخم كأنه قصر مثل اللي نشوفه ب الافلام الأجنبيه القديمه افلام الأميرات
چانت منبهره ببناء القصر اللي اول ماندخله صاله واسعه وبنصها درجين كل واحد من جهه يتوسط الصاله قنفات فخمه متوزعه بطريقة جميله والوان غامقه ولوحات متفرقه ومتوزعه ع حيطان القصر من كل اتجاه بطريقه فنيه لفتت انتباهه لوحه لبنت وحيده لابسه فستان اسود جالسه بشكل مكسور وماسكه بيدها ورده ذابله ودمعه يتيمه نازله من عينها بقت تتأمل اللوحه حست هذي اللوحه تمثلها ماحست بالعيون اللي چانت تتأملها مثل ماعيونها تتأمل اللوحه فزت ع صوته من گاللها ..
علاء :- لحگيني للمكتب
مشت ورا بهدوء ودخلو للمكتب چان مايقل فخامه عن الصاله مكتب طويل وبي ع اليسره واليمنه شباك چبير ع طول الحايط بالنص المكتب الخاص بعلاء ومن اليمنى واليسره قنفات اربعه ممتدات من المكتب وخلف المكتب رفوف ع طول الحايط مليانه كتب بصفهه باب مقفول مااهتمت للباب بس سحرهه منظر الكتب اللي مرتب بطريقه متناسقه حسب الاحرف والوان الكتب
علاء :- راح تبقين واگفه هناك تعاي اتقدمي .
اتقربت من عند المكتب چان يرتب كتب ع المكتب ويحچي بدون مايباوع الها وهيه اصلاً ماچانت موجهه نظرها عليه لأن تكره تشوف وجهه ..
علاء :- شغلچ راح يكون ب الاوقات اللي اني احددها الچ واذا شفت اي نقص او تقصير بشغلچ راح يكون حسابج الحبس ويه البقره بدون اكل يومين واي شغل اكلفچ بي تسوي بدون اعتراض ومن اليوم ماراح يكون اسمچ هذا راح يتغير ل ملاك يعني ملاك وبس لا اهل ولا عشيره ملاك الجاريه
... وافقته ع كل كلمه گالها وچانت مستعده تمشي وياه ع الحرف وماتعوف شغله يطلبها منها ناقصه بس استوقفها اخر كلام منه شنو يعني يغير اسمها شنو يعني ينكر حياتها ويمسح اهلها لا مو بكيفه جمعت كل قوه بداخلها وقررت تعوف خوفها وتوقفه عد حده
علاء :- يلا گوليلي شنو اسمچ ؟!
نور :- اسمي نور حسين ال..... عندي اب وعندي اهل وعشيره وعزوه وسند غصباً ع اللي ماعاجبه.
رفع راسه وباوعلها بنظره قويه جمدت اطرافها بس بعد مشت بالطريق وموحلوه بحقها تنكر اصلها وتتراجع عن كلامها
علاء :- تعاي اوگفي هنا وعيدي اللي گلتي !!
اتقربت ووگفت گباله من جهة المكتب اللي گاعد بي
علاء شگلتي اسمچ ؟!
نور :- اسمي نور حسين ال ... عندي ...
قبل لا تكمل كلامها رفع رجله وضربها بكل قوه على بطنها ومنعها تكمل كلامها من قوة الضربه اندفعت وانضرب ظهرها بالجام اللي وراها ماگدرت تتحرك الالم شل جسمها شل حست بي اتقرب من عدها ودنگ عليها وهمس ب اذنها
علاء :- لا تتحديني امسحچ من الجود هالمره اجتي ع الضربه المره الثانيه اذبحچ وادفنچ اشتري سلامتچ ولا تعادنيني اكثر شي بحياتي اكرهه العناد .
ابتعد عنها وعافها تتلوه من الالم وطلع من المكتب
ماتعرف الوقت اللي مر وهيه ع وضعها ماتگدر تتحرك ولا حركه لأن جسمها كله متشنچ من الم الضربه حست ب ايد انمدت تگومها رغم الالم انتفضت وابتعدت رفعت راسها شافتها ..
ايميليا :- انها انا ايمي دعيني اساعدك لأخرجك من هنا انظري الى حالكِ يااللهي ماذا فعل بكِ ؟!
نور :- ايمي ارجوكِ اخرجيني من هنا سوف يعود ليقتلني ارجوكِ
ساعدتها تگوم بس الالم محاوط جسمها اي حركه تزيد الالم لعنت نفسها ليش اجتي لهذا القصر الكئيب لو معاندته وباقيه بفراشها ولا شافته ابد بصعوبه وصلت للملحق ساعدتها تدخل لفراشها ولحفتها ب اكثر من غطاء لأن چان الجو شتاء ودرجات الحراره تحت الصفر ..
ايميليا :- يااللهي الجو شديد البروده هنا والمدفئه لا تعمل سوف اذهب ل اخبر السيد
نور تكلمت بصعوبه :- لا لا ارجوكِ لا تخبريه بشيء ارجوكِ فقط اغلقي الابواب وانا سوف ابقى نائمه هنا .
ايميليا :- حسناً كما تريدين عزيزتي اذا احتجتي اي شيء فـ انا في مطبخ القصر اعد الطعام وسوف احظر طعامكِ عندما انتهي منه .
نور :- شكراً لكِ
طلعت ايميليا وبقت نور وحدها وتبچي بحرگه من اللي يصير وياها بس رغم المها گالت خليني اتحمل الأهاين والضرب المهم اخويه بخير ويرجع سالم ل اهلي وترجع ضحكة ابويه وامي وحتى بيبي بعد ماتسميني البومه والفگر ترجع الراحه الهم فدوه الهم اني ميخالف اتحمل لابد فديوم انجمع بيهم بس اخاف يزعلون مني اذا ابقه مااخابرهم مستحيل الدراسه تبعدني عنهم هيچ
سمعت باب الملحق يندگ فكرتها ايميليا جابتلها الأكل بصعوبه گامت من فراشها اول مافتحت الباب
شافت .......

•••••&&•••••
تتوقعون منو شافت ؟!
طبعاً اعتذر ع الاختفاء بس احتاج تفاعلكم حتى انزل باقي البارتات اذا يبقه هيج اضطر احذف الرواية وماانزلها شجعوني انزل البقيه ❤️😩🙏🏻
اللي يريد انزل البارتات الباقيه يكتبلي بالتعليقات ؟!