آسميتها جارية

البارت 17

البارت السابع عشر
&
•
•
•
شماله گلبي !
أسنين فحطان بدلال الخايفين

وچفي ليليه أيتشگگ لافتات
گبال عين التايهين

#جواد زغير
•
•
•

...........
(( علاء ))
رحت ركض على صرخت امي المسافه للغرفه خطوات بسيطه بس حسيتها دهر دفعت الباب حيل ..

عمي عصام مافات بقه واگف بباب الغرفه بس اني فتت بخطوات سريعه وطبگت الباب ورايه ..

شفتها حاضنتها وتنتفض بيدها بشكل غريب من راسها لرجليها بشكل هستيري كأن روحها تطلع من جسمها قابضه على ايدها وصاكه على اسنانها ..

امي حاضنتها وتحاول تفتح حلگها عرفت هاي نوبة صرع قويه انداريت عليها من الجهه الثانيه للچربايه وسحبتها من حضن امي ..

خليت جوه راسها مخده ناصيه ونومتها صفح طلبت من امي تهدأ حتى هيه هم تتطمن ..

مرت نص دقيقه ورجعت تهدأ ببطئ فتحت حلگها وتنفست بقوه اول شي سوته بعدت ايدي عنها بتعب ..

ماگدرت تحچي اشرت بيدها عود لازمه گلاص تشرب بمعنى اريد مي ..
امي سحبت البطل مال مي رادت تشربها واني رفضت تنطيها ..

باوعت عليه بحقد وهيه خازرتني عقدت حواجبي وصحت عليها :- باعي عدل لا افگسهن .

دارت وجهها عني بقهر وهيه مدمعه امي لزمت ايدها وگالت الها بعطف :- لأن چنتي ماره بنوبة انهيار عصبي مايصير تشربين مي هسه بس شويه ارتاحي وننطيچ .

هزت راسها بتفهم وباوعتلي بطرف عينها شافتني قريب منها رأسن لزگت نفسها بـ امي واني هم ابتعدت عنها حتى ماتفكر ميت عليها ..

اندارت عليه امي بتساؤل :- ها هسه انطيها مي ؟!
هزيت راسي بهدوء :- بس شويه .

رجعت امي سحبت البطل وشربتها شويه واني نزلت راسي وگمت من الچربايه بدون مااباوعلها حچيت ويه امي :- اني طالع يم عصام اذا صار شي صيحيني ولوانتي لو ايميليا ابقو يمها لتعوفوها وحدها .

گالت بهدوء :- ماشي ..
طلعت لعمي بعده واگف بمكانه ..

فتحت ايدي :- ها هسه شنو ماتسلم على ابن اخوك هم عيب تره .
ضحك ب استهزاء وهو يفتح ايده مثلي :- لا عمي شلون مااسلم عليك .

تحاضنه وهو قبض ايده وضربني على ظهري :- شنو لاهيك ماتسأل على عمك ..
ابتعدت عنه واني اضحك :- تعرف الشغل مايخلص .

حط ايده على خصره ودنگ وهو يهز راسه :- زين تمام وشصار على موضوعنه ؟!
عقدت حاجبتي بتساؤل :- ياموضوع ؟!

راح گعد ع القنفه اللي متوسطه الصاله الفوگ وحط رجل على رجل :- راح يصير الها سنه يمك شوكت ترجعها ؟
گلتله ب استهزاء :- صارت من ممتلكاتي ماترجع .