منقولة
#دنيتي_تغيرت💔✨
حلقه سابعه وستون🌸
"انا..امتى قالها
اخت منصف..نبدري بعد حكينا قالي تجيب وتوصلها ورقتها
انا كانه نكبت عليا ميه ساخنه قعدت نبحت فيها وحسيت دنيا تبرم بيا وعيوني تعبن دموع
اخت منصف..انتم متفقين ع طلاق يعني
انا بصوت واطي..انتم تحكوا من امتى
اخت منصف..من فتره شهر هكي انا قتله نخربش حوشك ومبيتش نحكي معاه بس هو قالي نحن متفقين ع طلاق
مع خشت لميس
لميس..رينو عدي لشقتك جيبي منها سفر نقصن علينا
انا برمت عليها وقعدت ساكته
لميس..هيا بسرعه كنك مستكه معاك المفتاح ولا لا
انا بصوت واطي..توا نعدي
طلعت من مطبخ وحاسه قلبي ينعصر عصر من جوا لفيت لوشاح وطلعت طبست تحت دواسه وخذيت لمفتاح وخشيت لشقه اول م خشيت لصاله قمعزت ع صالون وقعدت نبكي بعبرتي بصوت عالي ونفسي بدأ ينقطع طلع فارس من ممر منفجع
فارس..ريان كنك تبكي كنك شن في
قرب مني وكان مش لابس شي من فوق ولابس شورت
فارس..ردي عليا نحكي معاك كنك
قرب مني قعدت نبحت فيه ودفيته من صدره
انا..حووول حول صار بنطلقو صار م صدقتني حرجت عند هلي وعشت لحضتك تحكي معاها تي خليني نطلق منك قبل بس ليش ي فارس ليش حرام عليك كنت لعند أخرى لحظه حاطه فيك امل انك تردني
فارس منصدم..تي تي شن تحكي انتي م فهمتش انا
انا دموعي ينزلن..لا فاهم فاهم كويس ي فارس اسفه لاني حبيتك هكي
قعد ماسك ايدي وانا نكر فيها بقوه
فارس..تي احكي والله م فهمت شن واصلك من كلام انتي
صبيت وقعدت نمسح في دموعي والعبره خنقتني
فارس..باه اهدي ماتبكيش وبعدين نحكوا فهميني والله م حكيت مع حد متضلمنيش هكي
فكيت ايدي من بين ايده وخشيت لمطبخ اول م خشيت قعدن يخطرن عليا لحضاتنا ف مطبخ خذيت سفر وهو مصبي متكي ع رخام الباب
فارس..خلاص نحكوا بعدين
طلعت من تلاه مسك ايدي وبرمني
فارس..نحكيلك ازف
انا..فيش بينا كلام ي فارس خليني ف حالي لو سمحت
فارس تنهد..تي كيف نخليك ف حالك وانتي هكي ريان والله م حكيت مع حد انا فهميني
فكيت ايدي بقوه وطلعت مسحت دموعي ورديت خشيت لشقه نور خذيت نفس ومشيت لمطبخ
لميس..سنه وينك
انا بصوت واطي..اهو جيت
مروه..ريونه امسكي ستفي طواسي الميه ف السفر
انا..هاتي باه
قعدت نستف ويخطر عليا كلامها
مروه..كنك مستوها
انا..شي شي غير حسيت جسمي تالف
مروه..اها باه قمعزي تريحي خير
قمعزت وقعدت ندير وانا مقمعزه
الله اكبر الله اكبر
نسرين..هيا ي بنات المغرب
ايه..هيا هي
انا..نحن خلينا هنا خير من قريب
ايه..اها صاح
مروه..عدن توا نقعد انا وريان وايه والباقي امشن
لميس..انا توا نمشي معاهن
انا..باه عدي
فطرنا ف مطبخ وقعدنا نلمو ف الحوسه
نسرين..وحده منكن تمشي تشيل الفواكه واحد من شباب ع باب قاعد
ايه..هاتي هاتي
مسكت السفره وطلعت فتحت الباب لقت منصف بارم عطيها بضهر وحاط ايديه في جيوبه
ايه..هييييي منصف
منصف برم وابتسم..كنك منصدمه
ايه..اه لا عادي امسك مني السفره
منصف قرب منها وحط ايديه ع ايديها
منصف بصوت هادي..رايحه متسمحه ي فرخه
ايه ابتسمت ونزلت راسها
منصف..تي حي عليا وحي مزالتي تحشمي مني قصدك
ايه..منصف عدي حي عليا توا يجي واحد من شباب
منصف بصوت هادي..انحبك باهي شن اندير
ايه وجها قعد حمر..ي منصف خلاص
منصف...اممممممواه م نقدرش ناخذها من قريب شن اندير
ايه بصوت يدوب طالع..خلاص خلاص امشي
منصف..باه خشي انتي
ايه..لا انت امشي
منصف ابتسم وهز راسه وغمزلها
ايه ابتسمت..امشي
منصف..تقوليلي امشي وانتي قاعده
طبس عليها وباس خدها وهيا تحشمت وخشت تجري وصكرت لباب بقوه
منصف يضحك..غبيه
جاي بينزل مع ركبه كريم بحت فيه من فوق لوطه
كريم..بعد تقعد قاري فاتحتها وقتها شوفها بس من وراء خوتها الي حطين فيك ثقه مش مرجله
منصف..اوزن كلامك انت بتعلمني المرجله
مع ركبت فارس
فارس قرن حواجبه..شن في ي شباب
كريم..لا مافي شي جو تمام
فارس..باه تمام هيا انزلو شباب يراجو فيكم
نزلو شباب لوطه ونحن قعدنا نهدرزو وبدو يروحو واحد وراء واحد و قعدنا لعند قريب من الفجر نضمو
ماريا..هيا من بتروح معايا مهاب قال هيا
انا..راجيني نلبس بس
ماما..قصدك مش بايته
انا..لالا ي ماما تعبانه شويا وبنروح
ايه..كنك
انا..تعبانه شوي ي ويه
ايه..باه راجي خلي نحطلك من حاجات تسحري منهن
انا..باه هي
ليست عبايتي وشاحي وخذيت الحاجات وطلعنا انا وماريا
نزلنا لوطه وجيت بنركب ف سياره جاني فارس
فارس..بعدين ردي ع تلفون نبيك
ركبت وصكرت لباب
مهاب..كنه
انا..لا م كنه شي
مهاب..اها
