This Mafia Fall In You [ ဒီမာဖီးယားကတော့ မင်းဆီမှာ ကျဆုံးသွားပြီ ]

အပိုင်း ၁၁

အပိုင်း ၁၁ [ Unicode Version ]

စက္ကန့် နာရီတွေ နေ့ရက်တွေ အနည်းငယ် ထပ်ကုန်ဆုံးသွားပြီးတဲ့ နောက်မှာ Baekhyun ရဲ့ ဆေးတက္ကသိုလ် ပထမနှစ် နှစ်ဆုံးစာမေးပွဲတွေ ပြီးဆုံးသွားခဲ့ပြီ ။ Undergraduate 2 နှစ်မှာ ပထမနှစ်ကို ဖြတ်ကျော်နိုင်ခဲ့ပြီမို့ Baekhyun စိတ်တွေ သက်သာရာ ရသွားတာအမှန်ပဲ ။

သူကြိုးစားခဲ့တာ သူသိတာမို့ ရလာဒ်တွေ ဘာတွေ အတွက်ကတော့ တွေးပူနေစရာမလို ။ စာမေးပွဲ ပြီးပြီဆိုတာနဲ့ Baekhyun စိတ်တွေ လွတ်လပ်ပေါ့ပါးသွားတော့တာပဲ ။

အိမ်ကိုပြန်ရောက်လို့ အဝတ်အစားတွေ လဲပြီး အအေးဘူး တစ်ဘူးနဲ့အတူ အိမ်ရှေ့ကြမ်းပြင်မှာ ထိုင်မိတော့ Baekhyun သတိတရ phone အဝင် call လေးတွေကို စစ်လိုက်တယ် ။

မျှော်လင့်နေတဲ့ miss call လေးမရှိတော့ အနည်းငယ်တောင် မျက်နှာလေး ညှိုးကျသွားရပါရဲ့ ။ ညက ဖုန်းခဏ ပြောထားတာမို့ သူ ဒီနေ့ နေ့လည် အလုပ်ကိစ္စဆွေးနွေးစရာတွေ ရှိကြောင်း ၊ ပြီးတာနဲ့ Baekhyun ဆီကို ဆက်သွယ်မှာဖြစ်ကြောင်း ပြောထားတာတောင် Baekhyun စိတ်ထဲ အနည်းငယ် ဝမ်းနည်းမိသွားသေးတယ် ။

Baekhyun သူနဲ့ မတွေ့ရတာ ရက်ပိုင်းလောက်တောင် ရှိသွားပြီ ။ စာမေးပွဲနီးနေပြီမို့ စာလုပ်တာကို မနှောင့်ယှက်ချင်လို့ အလိုက်တသိ ခဏခွာနေပေးမှန်း သိပေမယ့် Baekhyun နည်းနည်း လွမ်းတတ်လာတယ်လို့ ထင်တယ် ။ အသံပဲ ကြားနေရတဲ့ ဘဝကို မကျေနပ်နိုင်ဘူး ။

အတွေးလွန်နေတုန်းမှာပဲ တုန်ခါလာတဲ့ ဖုန်းကြောင့် Baekhyun လှိုက်ခနဲ ဝမ်းသာမိမလို ဖြစ်သွားပေမယ့် ဖုန်းက မျှော်နေသူဆီက မဟုတ်ခဲ့ ။ ဒါပေမယ့် ကိုယ့်ကို သတိတရ ဆက်လာတဲ့ အဒေါ်ဖြစ်သူဆီကမို့ Baekhyun ခပ်ဖွဖွလေး ပြန်ပြုံးလိုက်ရင်း ဖုန်းကိုကိုင်လိုက်တယ် ။

" ဟုတ် ဒေါ်လေး "

" အင်း.. Baekhyun လေးလား ၊
ဘယ်လိုလဲ ကလေး ? စာမေးပွဲ ဖြေနိုင်တယ်မလား "

ထွက်ပေါ်လာတဲ့ စကားသံ ဝဲဝဲကြောင့် Baekhyun ပြုံးပြုံးရွှင်ရွှင်နဲ့ပဲ တက်တက်ကြွကြွလေး ပြန်ဖြေပေးလိုက်တယ် ။

" ဟုတ် ဒေါ်လေး ၊ ဖြေနိုင်ခဲ့တယ် ။
မအောင်မှာကို စိုးရိမ်စရာ မလိုဘူး "