اليوووم
عرس رائد وفرح
ـــــــــــــــــــــــــــــــــــــــــــــــــــــــــــــــــــــــــــ
الصباح
ببيت العلي
كانت قاعده تتصل حق رزان اللي م ترد عليها: اوووف اووف رزاان تعبت شحقه م تردين الحين
طلعت الحديقه برا، وكانت حيل زحمه من الناس اللي قاعدين يرتبون المكان، اففف صج اليوم ماكو راحه
قعدت تدور رائد بعيونها، م شافته لمحت احد بالغرفة الزجاجية وراحت له، قبل لا تدش سمعت رائد يتكلم ف الفون وصوته حيل عالي: اسمعني قلت لك خلاص مابي منك شي سامع، ولا ابي اسمع ولا شي، خلني اخسر كل شي بس م اتفق معاك
......
رائد: قلتلك نجوم السما اقرب لك، خلاص مابي منك شي، ولا عاد تدق عليي سامع، وسد الفون
نهال شهقت يما مبين حيل معصب، وبعدين منو هذا اللي يكلمه الحين، ترددت وخافت تدخل، لانها شافته قعد ع الكرسي، واهو يقط كاس كان جدامه
حست انها لازم تخليه يهدأ الحين، وبعدها بتكلمه
ردت تدش البيت واهي تحاول تتصل حق رزان، واهي خايفه عليها حيل، وبنفس الوقت منقهره منها لانها قالت لها يمكن م تحضر العرس واهي تبيها تكون معااها
بالطرف الثاني
بييت الراشد
كانت ميته بجي، تحس قلبها يعورها، اليوم زواج حبيبها، لا ونهال تبيها تحضر، شلون تحضر عرس حبيبها شلووون
ريماس اللي كانت معاها اليوم، بعد م درت بزواج رائد، تنهدت واهي تمسح ع شعرها: خلاص رزون حبيبتي، لا تسوين بنفسج جذي راح تتعبين
رزان: يا ليت اتعب واموت وارتاح
ريماس شهقت: هئ شحقه تقولين هالكلام حرام عليج، ادعي له بالسعاده، م تدرين شالخير اللي الله كاتبه لج، يمكن كاتب لج حظ احسن واحلى من رائد
رزان تبجي واهي تسمع كلامها
ريماس: حبيبتي اهدي انتي الحين، ولا تحاتين شي
رزان طالعتها: ريماس مابي اروح، نهال حيل مصره عليي، م اقدر اروح ريماس ساعديني
ريماس: خلاص قلبي، انا بكلم نهال وبقولها رزان تعبانه وما راح تحضر، بس انتي هدي نفسج
رزان هزت راسها واهي تحاول تهدي نفسها بس ويين
قامت دشت دارها وتمددت ع السرير، رجعت لها ذكرياتها مع رائد، فجت فونها تشوف صورهم مع بعض
ردت دموعها تنزل، حضنت الفون وصورته واهي تبجي بضيج على ايامهم وحبهم اللي راح وانتهى
ببيت الجابر
بالصالة
كانت قاعده تحت وتهز ريلها منقهرة من اللي قاعد يصير، اليوم ملجة بنت اختها اللي كانت تتمناها حق سعود
اختها قطت عليها كلام حيل عصبت منه، قالت لها انها مالها سلطة على ولدها سعود، وأن سمر اهي اللي متحكمة فيه ومعتبره نفسها امه أكثر منها،
منقهرة من سعود اللي للحين عقله طاير مع ريماس، ومنقهرة من سمر اللي للحين ناشبه لها
تذكرت قبل اسبوع لما درت ان عمر ( بو سعود) كان يبي يخطب سمر بس اهي رفضت، ينت وتهاوشت مع بو سعود
بس حيل قهرها لما قالها لو وافقت راح احطها فوق راسج، وبالنهايه نجود اللي تزوجت السايق وراحت معاه،
تحس نفسها ع الهامش بهالبيت، ما لها رأي بأي شي
وريماس اللي صارت الحين فوق رأسهم، خصوصا مع دلال سعود وبو سعود لها
حست تبي تسوي شي، تبرد حرة قلبها، بس شلوون
شافت الخدامه رايحة المطبخ: تعالي
الخدامة راحت لها: يس ماما
ام سعود: لا تسوين غدا اليوم
الخدامة: ليش ماما، الحين يجي بابا من دوام
ام سعود بعصبيه: قلتلج لا تسوين، وسَوي نفسج مريضه، وروحي حق ريماس، وقولي لها كل اللي اقوله لج
الخدامه بخوف: زين ماماا
