LOLLIPOP

Chapter 19 - Unicode

စိုင်းမာန်သစ် ဖျားလိုက်တာဆိုတာ သုံးရက်ဆက်တိုက် အိပ်ယာထဲက မထွက်နိုင်အောင်ပင်ဖြစ်သည်။ အလုပ်ကိုသွားဖို့၀ေးစွ အခန်းထဲက အခန်းပြင်ပင်သူ့မှာမထွက်နိုင်။ ဘုန်းပြည့်အာဏာက သူ့ကိုခွင့်ပေးတာတစ်ရက် သူကတော့ ခွင့်တစ်ပတ်တိတိယူလိုက်ရသည်။

ဒီနေ့ စိုင်းမာန်သစ် အလုပ်ပြန်ဆင်းမှာဖြစ်သည်။ နည်းနည်းအချိန်ကြာသွားလို့ရယ်လားတော့ မသိ။ အဲဒီနေ့ကလောက် သိပ်နေရမခက်တော့သည်ကိုတွေ့ရသည်။ ကားပါကင်မှာ ကားကိုထိုးလိုက်ပြီး ဘုန်းပြည့်အာဏာမရောက်ခင် သူ့ထိုင်ခုံာထိုင်နိုင်ဖို့ ကြိုးစားရဦးမည်။

သို့သော် သူ့ဆုတောင်းသည်မပြည့်လိုက်။ ရုံးခန်းထဲမ၀င်ခင်မှာပင် အိပ်ခန်းထဲကထွက်လာသော ဘုန်းပြည့်အာဏာနှင့်တည့်တည့်တိုးသည်။ မေ့ထားတဲ့ အကြောင်းအရာတွေက သူ့ကိုတွေ့တော့ အကုန်အသစ်လိုပြန်ဖြစ်လာသည်။ ဘုန်းပြည့်အာဏာမျက်နှာကို မကြည့်ဘဲ ရုံးခန်းထဲကို တန်း၀င်သွားလိုက်ပြီး သူ့ထိုင်ခုံပေါ်ကို သေချာစွာထိုင်ချလိုက်သည်။ ဘုန်းပြည့်အာဏာကလည်း ထမင်းစားခန်းထဲကို တန်း၀င်သွားတာကိုမြင်မှ စိုင်းမာန်သစ် သက်ပြင်းချမိသည်။

သူထင်သလောက် ဘုန်းပြည့်အာဏာကို တစ်ဖန်ပြန်လည်တွေ့ရှိခြင်း အပိုင်းသစ်က သိပ်ပြီးတော့လည်း မခက်ခဲကြောင်းသိလိုက်ရသည်။ ဒီလိုလေး မျက်နှာလွှဲနိုင်ဖို့အတွက် ဘယ်လောက်တောင်စိတ်ကို ပြင်ဆင်ခဲ့ရလဲ။ သူ့မှာ ဘုန်းပြည့်အာဏာကို ပြောဖို့စကားတောင် စီခဲ့သေးတာဖြစ်သည်။ သို့သော် အမှန်တွေ့ဆုံခြင်းကတော့ တိတ်တိတ်ဆိတ်ဆိတ်ပင်

"ဘုန်းပြည့် ငါရောက်ပြီ"

ကြားလိုက်ရတဲ့ အသံကြောင့် စိုင်းမာန်သစ် တံခါးအ၀ကို လှမ်းကြည့်တော့ တစ်ခါမှမမြင်ဘူးသည့်သူဖြစ်သည်။ ဘုန်းပြည့်အာဏာနှင့် အနည်းငယ်ဆင်သလိုရှိသော်လည်း လုံး၀မတူ။ ဘုန်းပြည့်အာဏာကဲ့သို့ ဆံပင်တို့ကို လှန်သိမ်းထားတာမျိုးမဟုတ်ဘဲ ကပိုကရိုချထားတာမျိုး။ တီရှပ်နဲ့ ဘောင်းဘီအပွက ဘုန်းပြည့်အာဏာလို သပ်ရပ်မနေ။ ကိုယ့်ဘက်ကိုယ်ယက်တယ်ဟု ပြောချင်ပြောနိုင်သည်။ ထိုလူသည် ဘုန်းပြည့်အာဏာနဲ့ တူသော်လည်း ဘုန်းပြည့်အာဏာက အပုံကြီးသာသည်။