LOLLIPOP

Chapter 26 - Unicode

စိုင်းမာန်သစ် ဓာတ်လှေကားကိုပင် နှေးနေသည် ထင်နေမိသည်။ အရေးပေါ်လှေကားကနေပြေးတက်လိုကဖို့ပင်တွေးမိသည်။ ဓာတ်လှေကားကတော့ အပေါ်ဆုံးထပ်ကို တဖြည်းဖြည်းတက်သွားနေပြီဖြစ်သော်လည်း သူအားမရ။ သူဘုန်းပြည့်အာဏာကို တွေ့ရင်ဘာပြောရမယ်ဆိုတာ အခုထိသေချာမသိသေးပေ။

ရုံးခန်းဆီကိုသွားတဲ့ ခြေလှမ်းတွေက အတော်လေးသွက်နေခဲ့သည်။ စိုင်းမာန်သစ် တွေ့ချင်လွန်းလို့ ရူးတော့မတတ်ဖြစ်နေရသည်။ မှောင်မဲနေတဲ့ ရုံးခန်းက သူ့ရင်ကို ဆောင့်ကန်လိုက်သလိုပင်။ ထိုလူဟာ သူအပြေးလာတဲ့အချိန်မှာ ရှိမနေခဲ့။

စိုင်းမာန်သစ် ငိုချတော့မလိုပင်ဖြစ်သွားရသည်။ မနက်ဖြန် အိမ့်မှူးသော် မင်္ဂလာဆောင်ရှိတာကို အခုမှသတိရသွားသည်။ ထိုလူ ဒီမှာမရှိတာက အဆန်းမဟုတ်။ စိုင်းမာန်သစ်ကသာ ဇွတ်တရွတ်တွေလုပ်မိနေတော့တာဖြစ်သည်။

အပြေးကြီးပြေးလာခဲ့ပြီးမှ တွေ့ချင်တဲ့သူကိုမတွေ့ရတော့ ခံစားချက်က ရူးသွားတော့မလို။ ၀မ်းနည်းလာတဲ့အပြင် ဘာလို့ပြေးလာခဲ့မိပါလိမ့်ဆိုတဲ့ အတွေးက ခေါင်းထဲရောက်လာသည်။ စိုင်းမာန်သစ် တကယ်စိတ်တွေညစ်လာရသည်။ ပုံမှန်ဆို စိုင်းမာန်သစ်က တော်ရုံနဲ့ ငိုတတ်သူမဟုတ်။ ဘုန်းပြည့်အာဏာနှင့်တွေ့မှာပဲ သူလည်း မျက်ရည်လွယ်တဲ့ ကလေးလေးဖြစ်နေရတော့သည်။

"ဒီအချိန်ကြီးမှ ဘာလာလုပ်တာလဲ?"

နောက်ကနေကြားလိုက်ရတဲ့ အသံခပ်သြသြကြောင့် စိုင်းမာန်သစ်တကယ် မျက်ရည်တွေကျရပါတော့သည်။ လှည့်ကြည့်လိုက်တော့ ဘုန်းပြည့်အာဏာက ခုမှရေချိုးပြီးခါစထင်။ ရေစိုနေတဲ့ ဆံပင်တွေကို တဘတ်နဲ့ သုတ်ရင်းသူ့ကို အံ့သြတကြီးကြည့်နေသည်။

Bathrobe အဖြူနဲ့မို့ လစ်လစ်နေသည့် ရင်ခွင်ကျယ်ကိုလည်း သူမငေးအား။ စိုင်းမာန်သစ်တစ်ယောက် ဘုန်းပြည့်အာဏာဆီကို ပြေးသွားပြီး လွတ်ထွက်သွားတော့မတတ်ဖက်ထားမိသည်။ ရင်ခွင်ထဲကို မျက်နှာအပ်ကာ တရှုံ့ရှုံ့ငိုမိသည်ကိုတော့ ထည့်မပြောတော့။

ဘုန်းပြည့်အာဏာ သူ့ဆီကို ပြေးလာပြီး အတင်းဖက်နေတဲ့ ကောင်လေးကြောင့် လက်ထဲက ခေါင်းသုတ်နေတဲ့ တဘတ်ပင် ပြုတ်ကျသွားရသည်။ သူ မနက်ဖြန် ငယ်လေး မင်္ဂလာဆောင်ရှိတာတောင်မှ စိုင်းမာန်သစ်အလုပ်တွေကို သိမ်းကြုံးလုပ်ပေးနေရတာကြောင့် အိမ်မပြန်ဖြစ်ခြင်းဖြစ်သည်။