رحمة سند..
بقلمي رسل..
البارت الاخير.. القسم الثاني..
ضمني بينك
كافي اصفن بيه وسأل انت وينك
وحطني ضحكة عله الشفايف
ليش خايف
جرب واحجي حنينك
گودني ولتگلي وين
المهم تلزمني ادينك..
-شوي كعدنا وعفنا رحمه يم امي وصعدنا اول ما دخلنا
هي كالت.. رحمه طلعنه العمل من غرفتكم الله لا ينطيهن كون احركهن على هالسواية طلع كلام العلوية صح
ولو تشوفينه ولج..
-عقدت حواجبي شلون يعني..
-سند خابر على حيدر وكاله خلي تجي زهراء تدور وياي حيدر اخذني وامه جانت ما موجوده مدري هو موديها
يم اختها حتى يدور براحته ويتأكد لج رحمه كلبنا الغرفة مالكينه شيء تالي دا نشيل فراش الجربايه جان توكع خشبايه محروكه ومرسوم عليها ثنين واحد داير وجهه للثاني ومكتوب عليها زعل هلاك فراق ومن هالحجي الي
لا يرضى بي الله ولا دينه ولج لو تشوفين الي مكتوب
يكزبر جسمج..
-رجلج عيونه صارت بكصته واخذها وراح كبل لشيخ يعرفه يكول اشوف شيسويلها اني ما اريد اخسر رحمه ولا اريد يصير عليها شيء خطيه تخبل عليج وهاي جيتي من بيتكم لهنا..
-اني خليت ايدي على كلبي وحيلي باد من الي سمعته معقوله هيج تسوي وهالحجي مو بس الي حته لابنها الي هو ضناها ياعالم ضناها وين اكو ام هيج تسوي حتى البزونه هم
تنكلب وحشداذا احد تقرب يم صغارها شلون كلبها
انطاها تأذي ابنها لو صاير عليه شيء ما فكرت موقفها شنو..
-زهراء جانت تحجي وتهدي بيه واني كلبي اشتعل نار
من الي سمعته بعدها كالت كومي ننزل وربج يحلها ما دام
السحر وطلع الباقي سهل ان شاء الله..
-للعصر اجه سند علينا بس رجع وجهه اصفر كلش والتعب
واضح على ملامحه عيونه حمر ضليت اباوع عليه اريد افهم شنو الي وصله لهالحاله هو كال لابوي.. عمي من رخصتك شويه عندي حجي وياها واباوعلي.. تعالي وراي وطلع..
-فات للمطبخ ودخلت وسد الباب حضني و راسه على كتفي ونزلت دموعه نلجم الساني لاول مره اشوف سند يبجي
وبجيه كسرني الي سند اعتبره مثل الجبل وهسه اني دا اشوف هالجبل ينهار كدامي وهالشيء يأذيني اليا مرحله
واصل بحيث نزلت دمعته جنت استمد القوة منه بس
بهاي اللحظات احس قوتي انتهت لان سند مو بس رجلي
لا سندي وقوتي والي مشاركني همي وصعب كلش صعب
اشوف قوتي تنهار كدامي..
-شوي وابتعد من حضني التفت ومسح دموعه ورجع باوع عليه تنهد وحجه بصوت مليان قهر.. رحمه اني شنو الغلط الي سويته بشنو قصرت لو شنو كالتلي عليه وماسويته ليش تطلع مسويتلي سحر بي تهلكه الي اني الي طول عمري اباوع لحلكها اتمنى رضاها وتاليتها هيج تسوي بيه والله لو معاملها مثل اخوتي يمكن اكول حقها واني الي استاهل بس والله يا رحمه ما يوم رفعت صوتي عليها ما يوم قصرت وياها بشيء ليش هيج تسوي خلي تنطيني مبرر واحد
بس يريحني ويطفي النار الي مشتعله بيه..
