سبحة و تراچي

الفصل الثامن عشر 2

اعتذار :- بنات البارحة كتبت بارتين دمج
واحد منهم ما صححته ولا حتة راجعته
وسحكت سحكة لا تغتفر اليوم من راجعته  شفتها واستحيت منكم
شجاع قبل ايام من زواجه شردت هديل
مو قبل يوم واحد مثل ما اني ساحكة
هاي ثغرة جبيرة صارت بسبب السحكة لأن ما راجعت البارت ❤

سبحة وتراچي2

من كتابات زهراء العراقية

الفصل 18

الصندوق الممتلئ بالجواهر لا يتسع للحصي
والقلب الممتلئ بالحكمة لا يتسع للصغائر
،
انطرحت على چرباية والدي ذاب تعب السفر على سرير من خشب...

كعد يمي وما انطرح..

- عبد الرحمن

- أمر

التفتت عليه بعد ما جان نظرة مستقيم للامام

واخذ جفي الي جنت حاطه على صدري

وحط بيه سبحة من طين...

رفعت السبحة كدام نظري واني اشوف بيها ذكريات قديمة حيل ومذكرها وين جانت

- هاي ظلت سنين بمقدمة بيتنا...

-وكعت!!
جانت عند ايمان

عرفتها
سبحة امك..

- ما ناسي تفاصيل
ذكرياتي ويه امي

بس جانن سبعة
يا والدي ليش مخليهن خمسة،!

- خرزة نكسرت ووكعت
والثانيه طلعتها ايمان

- ياريتها خلتها
ملضومة على شدة امي
جانت ضابة مو راهية

-خيطها انكطع
من زمان ومختار حط الها خيط!!

كح بثگل وكال
-عبد انه
جبتك حتى تلم اخوتك
وتحفظهم  من شر نفسهم
انه اعرف انت اقوى من شجاع
كسر ظهرة الحمل بالايام الفاتت وما كدر يسد
مكان مختار وخضر الله يرحمة

-الله يرحمة

- افتح بيتنا و شغلنا وارفع راسي بين
اخواني

شد أزر أخوتك وانهض بيهم
لأن نومتهم طولت

- يبا انت متأكد انه اكدر؟
انه مو مرتاح مثلهم
انه شارد سنين من هذا البيت

كعدت  من كلت هاي العبارة

ابوي
-المشكلة انت ما تعرف نفسك
ذكرتني بحكمة قديمة
من لا يعرف ولا يعرف انه لا يعرف فهذا الأحمق فأجتنبه
ومن لا يعرف ويعرف أنه لا يعرف فهذا الجاهل فعلمه
ومن يعرف ولا يعرف أنه يعرف فهذا النائم فأيقظه
ومن يعرف ويعرف أنه يعرف فهذا الحكيم فأتبعه.
وانت النائم!

تأملت كلماته  ورجعت انطرحت  حاط اديه جوة راسي واباوع للسكف

سألته
- وانت شوكت  يلا صرت حكيم؟