سبحة و تراچي

الفصل السابع

مرحبا..

سبحة وتراجي

من كتابات زهراء العراقية

الفصل السابع

*عروبة

جية مختار  فتحت الباب من جديد بعد كم اسبوع زارنا مع اخوته ، على اساس مفاتحين ابوهم ماله علاقة بيهم سمح الهم يشوفون خالتهم ، الي ولا واحد دك بابها بعز ازماتها كأنهم ذبو اللوم همه هم عليها    ناسين هي بفترة من الفترات وبعز ازمتهم
سدت الهم حاجة بعد وفاة امهم  لخاطرهم بس والا بإمكانها كان تشتغل عند الغربة على الاقل ما كانت مضطرة تتحمل تكبر ابوهم الها واذلالها

ضجت من انفتح هذا الباب مرة لخ خاف هم امي تقبل منهم مساعدات ترجعنا للذلة مال ابوهم مرة لخ ، اووف ولا انسى محاولة ضربها من قبل ابوهم الي ما جربت الكره الا على ايده ، عرفني اشلون اكره هيج شخصية جاحده ، من طلعها كدام اعيونه ادفع وهي تحاول بس اشوف عوض ،اصلا احنه مالنا ذنب هو الخاطف يريد فدية يعني مراقب وعارف ابوه زنكيل بس من سوء حظ امي انخطف يمنا ،

بعدهم يمنا الولد و الدنيا عصر موعد روحتي للمشغل قربت و دا اتحضر البس بتنورتي ودخلت ايمان وهي اطلع العلج من حلكها بأيدها تسحلة وترجعه

ايمان
-امي وافقت من باجر ما اروح

التفتت عليها واني اسد بدكمة التنورة النفش كانها فستان من زمن الخمسينات بنفشتها (من مجايب عمي)بلونها الاسود
وطولها لحجل الرجل، مع قميص بني كريب 
سألتها
-شنو ولج 

- اشبيج نسيتي مو كوتلج اريد ابطل ،

انطرحت على الحصيرة طابكه المخده وايدها جوه راسها وهي مرتاحه كأنها خلصت من هم ثكيل  ،

- انجبي بكيفج عوبة الي بعمرج صف ثاني متوسط وانت توج بالاول

-انجبي انت معليج

-ز....ة مطية  ماكو تبطيل كسولة عاد خلصي  الثالث  وروحي معهد مو شهادة  سادس مخلصة وتردين تكعدين زركة

ضحكت ولا اهتمت الي وهي تكول
- امي وافقت بعد عيني خلصت من التحضيرات و رزايل المدرسات

دفرتها برجلي من يم راسها واني افوت من  يمها  و اريد اطلع
صاحت
-اي اذني يا مطية

كامت ومن خلفي ضربتني على علبتي

أنداريت عليها و ضربتها راشدي ، لزمت شعري ولزمت شعرها و اتمالخنا وكعت وهي فوكي اسمن مني هي ؛ بس اني اخشن منها سمطتها راشدي ثاني
صاحت و وخرت عنها ردت امشي، ورجعت جرتني من شعري حيل راح شعري  ابديها

صحت
-جلبه شعري

صار مصايحنا ما اله حد ناسين الولد برة
خضر ، وعبد الرحمن ،وزين ، ومختار