سبحة و تراچي

الفصل الخامس عشر

مساء الخير
..مابيه احيل اصحح النص اعذروني عندي صداع نصفي مثل مختار..
سبحة وتراچي

من كتابات زهراء العراقية

الفصل الخامس عشر

ربما رحيلي يزهر بأنفسكم ما لم تزهره الايام السابقة!
عوض!

*مختار

طلعت   للحديقة مدخل زين  لا يفضحنا بأغنية بنص الليل

سحلته من جوة ابطاته  ظهرة على صدري ،مدخلة للهول وكع و كام كعد على القنفة و هو يكمل غناه

-كافي لا يكعد ابوك اسكت..

زين
- ليه يا زمن مسبتناش ابرياء

دمغته على راسه
-كوم وياي لغرفتك انطمر

زين
-بالهدواة بالهدواة يا حبيبي بالهداوة
مو عداوة احنه تجمعنا المحبة مو عداوة

يغني واني اسحل بيه للحمام ناوية اصحيه الا ينام لا يفضحنا

زين
- والله ما اقصد اذيتك
بيه صب نارك وفرغ عصبية
انت ابو گلب الحنين امنين الك هالقساوة!

باسني اني حاطة اديه فوك متني واسحل وهو يعيد بمقطع - انت ابو گلب الحنين امنين الك هالقساوة

بس وصلنا الممر الي يطل على غرفتهم وغرفة ابوي

رايح للحمام

طلع ابوي من غرفته لابس كلبيته
و بوجه النعاس وهو يباوع  على زين ويستغفر

ابوية
-انتظر

-اغسلة بوية حتى يصحى

اصر ابوية
-انتظر
اشمرة بالحديقة ما اريده

-بوية ترى باردة وين اشمرة

جرة مني وكع زين

-كووم
صاح عليه وكومه جارة من ايده طلعه للحديقة واني وراه

-بوية مو بوعيه هذا ينام اهنا بالبرد
وما يتحرك
عوفه  هسة وباجر حسابك وياه

دخلني ادفع وقفل البيبان تارك زين مخمور بالحديقة يغني
طلعت من المطبخ خلف ابوي الي سد باب ممر المطبخ لت يدخل منه زين..

لكينا عوض كاعد على الدرج ويفرك بعيونه
- بوية وين جنت

ابوية
- تعال كمل نومك
اخذ عوض وسد باب غرفته بوجهي  واني احاول اقنعه يدخل زين ..

كعدت بالهول ما كدرت اروح بغرفتي وانام وهذا بالحديقة واسمع دكه بباب الكليدور..
ماعندي مفاتيح افتحه ،هدأ الدك واني غفيت على القنفة من غير ما احس على روحي كعدت على صوت مؤذن الجامع قريب علينا وبالهول يصير اقرب عليه..

لكيت عليه لحاف مشمور وانه دافي شوكت اني نمت ؟

حيل اشلون اخذتني النومه و هذا الزين!