سبحة و تراچي

الفصل الثاني والعشرون

مساء الخير
اعتذر بناتي ما كدرت انشر بالفترة السابقة
خطار بهذي الثلاث ايام مع صداع بسبب أنفلونزا أخرني عنكم..

سبحة وتراچي

الفصل ٢٢

*ايمان

واكفة كدام مراية الكنتور وباوع لروحي بصدرية الحوامل الي لبستها توني لأول مرة ،كانت عبارة عن صدرية بحملات تنربط بحباسية حديدية  من يم الصدر وعلى البطن كسرات وعريضة حيل بفماش شيفون مبطن بلون الزيتوني  اوكف ع الجانب اليمين و ع جانب اليسار واني و حاطة ايدي جوة بطني حتى اظهرها اكثر مبتسمة وفرحانة بتكويرتهابعد ما دخلت بشهر الخامس من حملي ،
نزعتها هو البارحه جبتها بس لان رجعت تعبانه وتلكاني  تحضير عشا  فنمت تعبانه ما قستها ،
علكتها و نزلت تاركة خضر نايم الساعة ٨
اسوي ريوك واكعده هو ما يفتح المحل مالته من صباحيات الله ،  طلعت بيض من الثلاجة وسديتها انتبهت ع تقويم جان معلك على الثلاجة بصورة بنية صغيره لابسة تاج ، تيهت اليوم ٨ لو ٩ بالشهر الاول
من سنة ٢٠٠٣ ، طلع ٩
كملت قلي بيض و سلكت قسم ،
سمعت صوت عمي يصلي على النبي ويستغفر عرفته كعد وطلع للمغسلة ، رحت مسرعة فرشت مفرش بالهول و حطيت صينية بيها طاسة بيها ستكاين وصحونها وخواشيك ومشخالة  اخذتها
منعكتهن ماي حار حتى الجاي ما يبرد
هاي عادة امي ماخذتها منها

رحت للمطبخ ورجعت لكيته كاعد ينتظرني حطيت  بالصينية البيض بطماطة  بالطاوة  وجبت السلك هم لكيت عمي يحمي خبزة على الصوبة ام الكلن  ، شهر الواحد بارد نعلك بيه صوبات ،جان مصادف شهر ذو القعدة ،دكيت الباب على مختار و رحت للمطبخ ، اغسل مواعين العشا البارحة تعبت وعفتهن ما اشتهي اتريك بعدين اكل على رواق ،

سمعت صوته وراية
مختار
-عوفيهن هسة الماعين لاحكة عليهن
تعالي اكلي
من غير ما التفت كلت اله واني اجلف بالجدر
- ما اشتهي  هسة من اتحرك اجوع واكل

راح مختار يتريك

خضر
-عايفتني نايم غير اكعديني

التفتت مخترعة من زمخ بيه بصوته النعسان

-عفتك على راحتك تكعد

-كعديني بعد

- مدري احتاريت وياك اصحيك اتكول عوفيني
ما اكعد....

سكتني
- اريد بيضة عين مو تخليها صفح الصفار اريده بالوسط وانتبهي مو متروسة دهن

التفتت عليه متخصرة

-ترا اخر مرة  صرت اسويها تخبل  وانت تكول طيبه من اسألك ليش تذكر المرات القديمات وتنسى الطيب

طلع نص كلامي ما سمعة شارد من الساني،
راحو كلمن لشغلة او دوامة ..

واني اخلص شغل البيت  وحدي مرتاحة من الزلم ،   بعد ما الماس راحت لزوجها الي استقر بعمان بالاردن ،ابوه شكد راده يرجع بس هو ما قبل!