سبحة و تراچي

الفصل الثامن والعشرون2

سبحة و تراچي2

من كتابات زهراء العراقية

الفصل 28

الإطمئنان هو المنشود الأول قبل الحب، لذلك يبقى من تطمئن معه عالقًا بك حتى الفناء.

*صفاء

أني جان عندي بيج شريكة بيه ويه اهل الخير نجمع بيه تبرعات و نوزعها وناشطة بأكثر من مؤسسة من خلال فقط جمع التبرعات ، بس بعد ما تعرفت على  أم علي ناشطة و تشتغل معاونة مدير مؤسسة خيرية تابعة لجهة أهلية .

اشتغلت وياها وصرت كل يوم اروح ساعتين لتجميع و فرز  المساعدات الي نطلعها لخارج المؤسسة...
وكل جمعة نروح حملة على مكان ، ان كان دار عجزة او ايتام او لذوي الاحتياجات الخاصة ..
خارج وداخل المحافظة نقدم مع مبلغ مالي مساعدات بدنية و سلات تغذية والبسة ..
اخذت  وقتي بالتدريج هالمؤسسة  وتركت البيج ..
هذا الحجي  قبل راس السنة ..

وراها بدأت رحلتي ويه معاند عون ومشاكل وياه على العزال وما يقبل يخليني اقسم البيت ،

ومرته بدات تخبث تذكرني بحمواتي..
ما تدري اكدر ابهذلهم اذا اطلب قسام شرعي وكلمن ياخذ خيرة ويبعد شره عن الثاني ، بس ما اريد  ادخل بطرق تنهي علاقتي ويه اخوية ..

بيوم فاجئتني ام علي.. من كالت شفت الج دار نشر تنشر كتابج

أستغربت اهتمامها  وعبالي مجرد كلام مجاملة ، لكن من اخذتني وعرفتني على مدير الدار والشغلة جدية امتنيت لام علي لأنها محاجية الاستاذ احمد مدير المؤسسة الي نشتغل بيها
وهو الي تبرع بتكلفة طباعة الكتاب
وكال كلها مساعدات لنهضة الشباب
واهواي غيرج طبعت الهم هاي الدار
واحنه الي نسندهم.. انطيتهم اوراق كتابي الي ألفته قبل خمس سنوات!
عن عن تكوين الذات كتابي عبارة عن بحوث وتجارب عملية واجهتني  خلال مسيرتي التربوية جمعتها خلال السنوات الماضية ..
لكن ما كنت اكدر اطبع وانشر على حسابي لأن راتبي بفترة زواجي جان الي ولأطفالي.. وهم عباس ما شجع و تفه من الفكرة ..
فكرت بعد الطلاق انشره لكن خفت من الفشل وأن أخسر مبالغ مادية أطفالي اولى بيها..
بعد ما سلمتهم الكتاب وافقوا على طباعته .. ووقعت وياهم العقد..

هاي قبل شهر من راس السنة ،

جنت توني راجعة من الدوام وجهالي وراية جايبتهم من الروضة والحضانه.

اتلكتني رهف بالهول..

-اليوم اجاج ابلاغ..

وكفت ما كملت طريقي

- الي؟

- رجلج رافع عليج دعوة
لأن ما تخليه يشوف بزره