Unicode
“ရှောင်ချူး…..”
ချန်ကျစ်ချူး၏ နားထဲတွင် ရုတ်တရက် ဆွေးဆွေးမြည့်မြည့် မြည်တမ်းသံတစ်ခု ကြားလိုက်ရလေ၏။ အသံက အဝေးမှလာသလိုလို၊ သူနှင့် အလွန်တရာ နီးကပ်နေသလိုလို…
“ရှောင်ချူး… ဒီကိုလာခဲ့……..”
“ကိုယ့်ကို လှည့်ကြည့်ပါဦး……”
ထိုအသံက သူအရင်ကကြားခဲ့ဖူးသော အသံဖြစ်မှန်း ချန်ကျစ်ချူး အတပ်သိလိုက်သည်။ သူ၏ တစ်ကိုယ်လုံး တောင့်တင်းသွားပြီး ဓာတ်ပုံကို ကိုင်ထားသောလက်က ချွေးပြန်လာတော့သည်။
ဓာတ်ပုံထဲမှ လူငယ်လေးသည် ရုတ်တရက် အသက်ဝင်လာသယောင်။ မျက်လုံးများ ဖြည်းညင်းစွာ လှုပ်ရှားလာပြီး ဓာတ်ပုံအပြင်မှ ချန်ကျစ်ချူးကို ခေါင်းစောင်းကာ ပြုံးပြလာ၏။ သို့သော် သူ၏မျက်ဝန်းများက အသက်မဲ့နေပြီး ပြုံးနေသော်ငြား အပြုံးနှင့်မတူပေ။
သူက ဒေါက်တာလော့၏ လက်ထဲမှ ရုန်းထွက်လိုက်ကာ ဒေါက်တာလော့ကို တစ်ခဏမျှ စိုက်ကြည့်နေခဲ့သည်။ ထို့နောက် သူ၏ မျက်နှာထက်ဝယ် ရွံရှာစက်ဆုပ်ခြင်းများ စွန်းထင်းလာပြီး ဒေါက်တာလော့အား အေးတိအေးစက် တွန်းဖယ်ပစ်လိုက်သည်။ ထိုအခါ ဒေါက်တာလော့၏ လည်ပင်းမှ သွေးများ ပန်းထွက်လာပြီး မီးလောင်ပေါက်နေရာက ဦးခေါင်းသဖွယ် ပြတ်ထွက်သွားလေ၏။ ပြီးနောက် ဦးခေါင်းမဲ့ခန္ဓာကိုယ်ကြီးက ကြမ်းပြင်ပေါ်သို့ တဖြည်းဖြည်း ပုံကျသွားတော့သည်။
တစ်ဆက်တည်းမှာပင် ဓာတ်ပုံတစ်ခုလုံး အနီရင့်ရင့်သွေးများဖြင့် စွန်းထင်းလာသည်။ သွေးများ တစ်စထက်တစ်စ ပိုမိုများလာကာ လူငယ်လေး၏ ပုံရိပ်တစ်ခုလုံးကို ဖုံးလွှမ်းသွားခဲ့သည်။ ထို့နောက်တွင်မူ ဓာတ်ပုံအပြင်သို့ တကယ်ကြီး လျှံထွက်လာပြီး ချန်ကျစ်ချူး၏ လက်ပေါ် စီးကျလာတော့သည်။
“ရှောင်ချူး.. ဒီကိုလာခဲ့….”
“အား………..”
ချန်ကျစ်ချူးလည်း အသံကုန် အော်ဟစ်လိုက်၏။ အနည်းငယ် အကြောက်ပြေလာချိန်တွင် သူ၏တစ်ကိုယ်လုံး ချွေးစေးများဖြင့် ရွှဲနင့်နေချေပြီ။ ဓာတ်ပုံကို နောက်တစ်ကြိမ် ထပ်ပြီးလွှင့်ပစ်လိုက်မိသည်။
YOU ARE READING
အသက်ရှင်နိုင်ဖို့အရေး အနမ်းတွေကို မှီခိုနေရဦးမယ်!
HorrorI rely on kisses to clear survival games. 90 Chapters + 9 Extras This is not my own. Totally Credited to original Author.
