ဆေးရုံရှေ့ကိုရောက်တာနဲ့ လျှန် ကားပေါ်ကနေ ခပ်သွက်သွက်ဆင်းရင်း ခြေလှမ်းကျဲတွေနဲ့အတူ အထဲကို ပြေးဝင်သွားမိသည်။ စိုးရိမ်မှုကြောင့် အရှိန်ပြင်းပြင်း တောက်လောင်နေတဲ့ ရင်အစုံက လျှန့်နှလုံးသားကို အပိုင်စားရတဲ့ချစ်မိသူကို မတွေ့ရမချင်း ရတက်အေးအံ့မည်မထင်။
" ဦးနော်!! "
ဆေးရုံရဲ့ လောဘီကိုရောက်တော့ ကောင်တာကနေ တစ်ခုခုယူပြီး လှည့်ထွက်လာတဲ့ ဦးနော်ကို လှမ်းတွေ့လိုက်ရသည်။ လျှန့်ကို မမြင်တာကြောင့် အနောက်ကနေ လှမ်းခေါ်လိုက်တော့မှ ဦးနော်က လှည့်ကြည့်လာသည်။
" အော်... ဒုဥက္ကဌ အလုပ်ခရီးကပြန်ရောက်ပြီလား "
မျက်နှာအနည်းငယ်နွမ်းနေတဲ့ ဦးနော်က ရောက်နေရာမှာပဲ ရပ်နေသည်။ လျှန်က ဦးနော်အနားကို ခပ်သွက်သွက်လှမ်းလာရင်း
" နေး... နေးလက်ျာက ဘယ်လိုဖြစ်တာလဲ... ဦးနော် "
" အင်း... နောက်မှပြောကြတာပေါ့ ... အရင်ဆုံး နေးနေးဆီသွားရအောင် ... အခန်းထဲမှာ နေနေးတစ်ယောက်တည်း ကျန်နေခဲ့တာ "
" ဂရင်းကရော "
" ဂရင်းက နေးနေးကို မနေ့ညကတစ်ညလုံး စောင့်ပေးထားလို့ ခဏအိမ်ပြန်ခိုင်းထားတယ် "
နေးရဲ့အခန်းက လေးထပ်မြောက်မှာ ဖြစ်ပုံရသည်။ မြေညီထပ်ကနေ လေးဂဏန်းဆီ တဖြည်းဖြည်းရွေ့နေတဲ့ ဓာတ်လှေကားက ကိန်းဂဏန်းတွေကိုကြည့်ရင်း လျှန့်စိတ်ထဲမှာ အချိန်အရမ်းကြာတယ်လို့ ခံစားနေရသည်။
ဓာတ်လှေကားထဲမှာလည်း သူတို့နှစ်ယောက်လုံး စကားမဆိုဖြစ်။ ဓာတ်လှေကားက လေးထပ်မြောက်မှာ ရပ်သွားပြီး ဦးနော်က အရှေ့ကအရင်ထွက်သွားသည်။ အခန်းတစ်ခုရှေ့ကိုရောက်တော့ ဦးနော်ကရပ်လိုက်ပြီး လျှန့်ဘက်ကိုကြည့်လာသည်။ သက်မောတစ်ချက်ချရင်း
" အထဲဝင်သွားလို့ နေးနေးနဲ့တွေ့ရင် အလိုက်သင့်လေးနေပေးဖို့ ဒုဥက္ကဌကို ကျွန်တော်မေတ္တာရပ်ခံပါရစေ "
ဦးနော်ရဲ့စကားအဓိပ္ပါယ်ကဘာလဲဆိုတာ လျှန် နားမလည်။ ဒါပေမယ့် လျှန် ခေါင်းညိတ်ပြမိသည်။ ဒီတံခါးချပ်ရဲ့နောက်ကွယ်မှာ သူ့နှလုံးသားပိုင်ရှင်သည် ဘယ်လိုပုံစံနဲ့ စောင့်ကြိုနေမလဲဆိုတာ သူသိချင်လွန်းနေပြီဖြစ်သည်။
YOU ARE READING
My Beautiful SPOUSE
General Fictionဆက္ကဘုံလျှန် (Sakka Bxon Hlxan) နေးလက်ျာ (Nayy Lattyar) (own creation) Starting Date ••• 24/9/2021 Ending Date •••