📨 နေး ညနေကျောင်းဆင်းရင် ရှန်ခိုက်တို့အိမ်ကိုသွားနှင့်နော်... နေးကိုကြိုဖို့ ကားလွှတ်လိုက်မယ်... ကိုယ် အစည်းအဝေးရှိနေလို့ လာကြိုတာနောက်ကျရင် နေး စောင့်နေရမှာစိုးလို့... ရှန်ခိုက်တို့အိမ်ရောက်မှတွေ့ကြမယ်နော် 📨
စားပွဲပေါ်တင်ထားတဲ့ဖုန်းစခရင်က မီးလင်းလာသည်မို့ ဆရာစာသင်တာကို နားထောင်နေရင်းကနေ နေးမျက်လုံးတွေက ဖုန်းကိုအကြည့်ရောက်သွားသည်။ စာပို့လာသူက ကိုကိုဖြစ်နေတော့ မမြင်နိုင်မှန်းသိပေမယ့် အပြစ်မရှိတဲ့ဖုန်းလေးကို မျက်စောင်းထိုးလိုက်မိသည်။ မဖတ်ပဲနေဖို့စိတ်တင်းထားပေမယ့် မနေနိုင်စွာပဲ ခဲတံကိုင်ထားတဲ့လက်ကလေးက ဖုန်းဆီကိုလျင်လျင်မြန်မြန် ရောက်သွားသည်။ ဖုန်းထဲဝင်လာတဲ့ ကိုကို့ဆီကစာကို ဖတ်ပြီးတော့ နေး နှုတ်ခမ်းလေးကို စူလိုက်မိသည်။
" ဟွန့်... ဘာမှလာပြောမနေနဲ့... ကိုကို့စကားကို နားမထောင်ဘူးကွာ "
တစ်ယောက်တည်း ခပ်တိုးတိုးရေရွတ်ရင်း ကိုကို့ကို စိတ်ကောက်မပြေသေးကြောင်းပြသည့်အနေနဲ့ ပို့ထားတဲ့စာကို တမင်ပြန်မဖြေပဲ လျစ်လျူရှုထားလိုက်သည်။ ကျောင်းဆင်းချိန်ရောက်တာနဲ့ လာကြိုတဲ့ကားကိုမစောင့်ပဲ ဘူတာရုံရှိရာကို ဦးတည်လှမ်းလိုက်သည်။
နေး ဘယ်သွားသွား ကိုကိုကအမြဲလိုက်ပို့နေကြဆိုပေမယ့် ကျောင်းသင်ခန်းစာအတွက် outdoor ထွက်ရသည့်နေ့မျိုးဆိုရင်တော့ အတန်းဖော်တွေနဲ့အတူတူ မြေအောက်ရထားစီးပြီး လိုရာကိုသွားတတ်သည်မို့ ရထားလိုင်းတစ်ချို့နှင့် ဘူတာရုံတွေကိုတော့ နေး ကျွမ်းကျွမ်းကျင်ကျင်သွားလာတတ်နေပြီဖြစ်သည်။
" ဟေး.!! နေး ... "
နေးရဲ့နာမည်ကို အသံခပ်ဝဲဝဲနဲ့လှမ်းခေါ်လာပြီး ပခုံးကိုသိုင်းဖက်လာတဲ့လူက နေးတို့အတန်းခေါင်းဆောင်သောမတ်ဖြစ်သည်။
" အာ . သောမတ်စ် ... "
ပခုံးကိုလာဖက်တာကို မကြိုက်၍ နေးက ပခုံးကို အနည်းငယ်တွန့်ပြီးရုန်းလိုက်တော့ စပ်ဖြဲဖြဲမျက်နှာနဲ့ သောမတ်စ်ရဲ့လက်က နေး ပခုံးပေါ်ကနေ ဖယ်ခွာသွားသည်။ အနောက်တိုင်းသားတွေရဲ့ ရင်းနှီးတဲ့အမူအကျင့်တစ်ခုဆိုပေမယ့် နေးအတွက်တော့ အကျွမ်းတဝင်မရှိတာကြောင့် နေရခက်သည်။ နေးနဲ့အရင်းနှီးဆုံးလို့ဆိုနိုင်တဲ့ ကိုကိုတောင် နေး ကိုမလိုအပ်ပဲ ထိတွေ့တာမျိုးတွေ မလုပ်ဖူးပါ။
YOU ARE READING
My Beautiful SPOUSE
General Fictionဆက္ကဘုံလျှန် (Sakka Bxon Hlxan) နေးလက်ျာ (Nayy Lattyar) (own creation) Starting Date ••• 24/9/2021 Ending Date •••