يانجمٍ وهج في حلّة سهيل

« ١٧ »

-
بيعوضها عن كل شيء وهي وجودها بجانبه أكبر عوض له عن ما مضى ، نام بعد تعب السفر والليلة الطويلة هذي بس كانت أحن نومه وأجملها ..
« حلّة سهيل ، المزرعة »
تقدمت تمشي بهدوء لحّد ماوصلت عندهم ، رفعت نوير رأسها وشهقت تنطق : المزيونه !
ضحكت نجد من شافت صدمة وهج ونطقت : حَرم النجم !
صرخت نوير بصدمة وضحكوا البنات كلهم ، ألتفتت بصدمة على نجد تهمس لها بصوت مسموع : ما قلتوا إنها متزوجة !!
أبتسمت وهج تنطق : ماشاءالله طلعتوا تغتابوني ؟
ضحكت نجد بصدمة تنطق : لا يا بنت الحلال بس ذاك اللي كان معك دايم كنا نحسبه زوجك
توسعت عيونها بصدمة ومن أدركت إن المقصود هو عزيز زفرت بغضّب تشتمه داخلها ، ضحكت أسيل تنطق بربكة : بس خلاص سألناه وقال إنك خالته !
نوير : أمانه يا نجد تزوج نجم بها مثل ما قلتي ؟!
نجد : شفتي ؟
تمسكت نوير بكتفها تنطق : أجل طالبتك تدعين على عجلان اللي كتمني في ذا البيت
ضحكت نجد وزفرت نوير تصدّ عنها ، وقفت أسيل تنطق : طولت شمايل بروح أشوف..
قاطعتها وهج اللي شّدت على فروة نجم ونطقت : أرتاحي أنا واقفه قولي لي وينها وبجيبها معي لإني أبغى دورة المياه
زفرت أسيل براحة تنطق : يا عمري يا وهج شوفيها بمكتب جدي واسأليها عن محل الحمام
هزّت رأسها بالإيجاب ومشت راجعة ، زفرت من شّدة البرد تدخل كفوفها بجيوب الفروة ، وسعت عيونها بخفه من حسّت بشيء داخل الجيب ، سحبتها تخرجها وسرعان ما شهقت من شافت صورة فورية ليده والروج الأحمر اللي رمته سابقًا عليه يلطخها ، قلبّت الصورة وعضّت شفايفها بهدوء من قرأت المكتوب « سبيب الهوى حُمرة صويحبي الله يبيحه » ، ضحكت بخفه تنطق : غبي ! الحُمرة ترجع لأخته
رجعتها بمكانها ومشت تدخل من مدخل جديد بالنسبة لها ، تقدمت للباب المردود اللي يكون المدخل الوحيد بالمكان ، قربت منه تتأمل ما بداخله من فتحة الباب ، عضّت شفايفها تشوف سهيل جالس على كرسيه قدامها ورماح قدامه ويتحدثون عن موضوع يعتبر مبهم لمجرد إنها ما حضرت بدايته ، شهقت بصدمة ترجع بخطواتها من سحبت شمايل الباب ووقفت بصدمة تنطق : وهج ؟
وقف رماح وألتفت سهيل للأنثى الواقفه أمام شمايل ، حكّ دقنه من أستوعب إنها تحتضن فروة ولده تدفي نفسها بداخلها ، زفر يصدّ عنها وينطق : أبو هزاع بحاكيك بعدين
هزّ سهيل رأسه لبِكره اللي تقدم يخرج ونطق يستوقفه بمكانه : سلم على بنتك يا رماح
رفع حاجبة بدهشة للي أصبحت أمامه تمامًا والمقصودة بكلام سهيل ونطق بحدة صوته وعيونه عليها : ما عندي بنت غير نجد ، تمسى على خير !
خرج من المكان بغضّب شديد من حضور وهج ومن فروة نجم اللي تغطيها بالكامل ، ألتفتت على شمايل اللي نطقت بحدة : وش تسوين هنا أنتي ؟!
لفّت إنتباهها كيف قفلت شمايل باب المكتب وكأنها تخشى وجود وهج بهالمكان ، وبالفعل الورقة اللي بتنهي الحكاية كانت بداخل أحد الإدراج فالمكتب القابع أمام ناظريها ، كان كل شيء مشوش بالنسبة لها من غضّب رماح بدون أي سبب يذكر ومن حذر شمايل المشكوك بأمره لكنها قررت تخرج من الشوشرة وتردف بـ : ضيعت طريقي
أبتسمت شمايل تخفي ربكتها وتنطق : طيب المكان ذا محظور لا تجين صوبه أبد جدي ما يحب !
هزّت رأسها بالإيجاب تنطق : ما يهمني أبغى دورة المياه
ضحكت شمايل تخرج معها وتنطق : شوفيه أقصى اليمين الباب الحديد الأزرق اللي حوله أشجار
ألتفتت على الباب المقصود بآخر المزرعة ومشت تتخطى شمايل وتتوجه له ، زفرت شمايل تمسح جبينها وتعدّل جلالها ، ألتفتت على سهيل اللي خرج بمعكازه ونطق : أزلجي الباب يا بنت نايف !
هزّت رأسها بالإيجاب تتقدم لجدها وتنطق : أعاونك ؟
هزّ رأسه بالنفي ينطق : بالقفل لا تنسين وأربطي المفاتيح في جلالك
خرج من المكان وتقدمت تقفل الباب بالمزلاج وتثبت القفل عليه وتغلقه بإحكام ، عقّدت على المفاتيح ومشت للمزرعة علطول ..
« الحدود الشمالية ، طريف »
خرجت من الحمام تعدّل روبها ، توجهت للسرير تجلس على طرفه وتسحب جوالها ، فتحته على الموقع المباشر لـ نجم ، سحبت الشاشة للأسفل تحدث الموقع وشهقت من أختفى الموقع تمامًا وظهر إشعار مكتوب عليه « فُقد الهدف » ، رمت جوالها ووقفت بغضّب تنطق : كيف ألاقيه الحين ؟!
زفرت غضبّها تفتح الدولاب اللي رتبت أغراضها فيه ، سحبت منه بجامه لها ، رطبت جسدها ولبستها ، تقدمت للمرايه تمشط شعرها وتتركه براحته ، خرجت من الغرفة للصالة اللي يتواجد فيها شايع ، ألتفت لها ينطق : نعيمًا !
تقدمت تجلس بجانبه وزفرت بزعل تنطق : الله ينعم عليك
رفع حاجبة من نبرتها ينطق : افا زعلانه ؟
غرور : تلخبطت عندي شغلة ويمكن تطول قعدتنا هنيّا !
شايع : فدا فدا نطول ما هي مشكلة
أبتسمت غرور تنطق : لا خلا ولا عدم
أبتسم لها شايع ينطق : وش بتعشيني ؟ ترا ميت جوع
رفعت حاجبها تنطق بسخرية : أطلب كثر خير المطاعم
شايع : أما عاد من بدايتها كذا ؟
غرور : معليش عمو بس مشغولة وماني جوعانه صراحة
شايع : أجل دامك مشغولة أنا بطلع للعيال
ميّلت رأسها بعدم إهتمام تنطق : طيب
وقف شايع ينطق : تعرفين أخوياي فالديره ذي وبشوفهم
غرور : خلهم يعشونك لا ترجع تدور أكل
ضحك بكلافة يخرج من عندها ويقفل الباب وراه ، زفر بغضّب ينطق بهمس : مقصورة حبل وطويلة لسان !
ركب السيارة يشغلها ويرجع أنظاره على البيت اللي استأجرته غرور لهم وزفر ينطق : الله يصبرني عليها بس
مشى يغادر المكان ووقفت تتأكد من رحيله ، قفلت الستاير ترجع للكنب وتنطق : فوق المبلغ اللي دفعته عشان البيت ذا يبيني أعشيه سلامات صدق هذا كيف يتحملونه أهله !
سحبت الجوال تحاول بشتى الطرق تعرف موقع نجم اللي أنقطع بخط شبه نائي ..
« حلّة سهيل ، بيت رماح »
نزلت صحن المفطح ورفعت رأسها على سهام تنطق : نادي البنات يجون يأكلون ويدخلون من البرد !
هزّت سهام رأسها بالإيجاب ومشت تخرج للمزرعة من الباب الخلفي ، وقفت ريمان تدخل للصالة وأبتسمت لهنادي تنطق بهدوء : الله يحيكم للعشاء كرامة لك ولبنتنا وهج
أبتسمت هنادي توقف وتنطق : الله يكثر خيركم ويغنيكم
مشت تتبع ريمان للمقلط ورفعت عيونها على بنتها اللي دخلت وخلفها باقي البنات ، ضحكت ريمان تنطق : ماشاءالله تبارك الرحمن ما زانت الفروة إلا عليك !
أبتسمت بخجل تنطق : يا عمري
ريمان : اقلطوا يا صبايا
دخلت سهام ومعها تنوف ونطقت : بركات ما هو بفيه والمسيكينه لها ساعة تدق الباب
ضحكت ريمان بصدمة تنطق : طيب يا تنوف ورا ما دقيتي ؟
زفرت تنوف تنطق : ياختي ما عندي رصيد
كادت هنادي تنوقف لكن مسكتها تنوف تنطق : أرتاحي ملحوق على السلام
أبتسمت هنادي لها تنطق : الله يرفع قدرك
تنوف : يالله حييّهم عرفونا عليكم
أبتسمت ريمان تنطق : وهج زوجة ولدي وأمها هنادي
ألتفتت تنوف بصدمة تنطق : ولدك من ؟
ضحكت سهام تنطق : يعني على أساس عندها ذرية من البنين ؟ هو ما بلا نجم !
شهقت تنوف بصدمة تنطق : وش قلة الحيا طيب أعزمونا
هنادي : والله أبيك تعذرينهم كل شيء صار فجأة ولا أنتي تنحطين على الرأس من فوق وما فاتك شيء باقي الزواج ان شاءالله
أبتسمت تنوف تنطق : حبيتها يا بنات ماشاءالله ماشاءالله !
ضحكت هنادي تنزل خواتمها فالشنطة وتنطق : الله يحبك
تنوف : والقمر ذا كله لنجم ؟
رفعت وهج عيونها بصدمة وسرعان ما توهجت خجل ، ضحكوا البنات ونطقت نوير : شفتي يمه ؟
ضحكت تنوف تنطق : أستحت الله يطعني عنها !
أبتسمت شمايل تنطق : لا ضاعت خالتي تنوف دام العرق الجنوبي طق !!
ضحكوا كلهم وجلست ريمان تنطق : تعشوا تعشوا الله يحييكم
سمّوا بالله وتقدموا جميع يأكلون ، ألتفتت على أمها تهمس لها : ماما خذي خواتمي معك
فتحت هنادي شنطتها ونزلت وهج خواتمها وشمرت فروته تتقدم للصحن تأكل ..
« الحدود الشمالية »
طفى موتره ينزل منه ويتلفت على عُدي اللي تقدم له يضرب تحيته وينطق : حياك الله يا طويل العمر حليت أمر جهاز التعقب ؟
هزّ نجم رأسه بالإيجاب ينطق : أستريح يالجارح تقدر تجيب لي مالك الجهاز نفسه ؟
عُدي : طبعًا لكن بيأخذ مني وقت
نجم : لا تستعجل عليه ما هو مهم لكن لا تغفل عنه وأنجز
هزّ عُدي رأسه ينطق : آمرك سيدي ، شيء ثاني ؟
مشى نجم بدون ما بعطيه أي رد ثاني ورجع عُدي لموقعه ، دخل الخيمة وجلس على الكنب بمُنتصف المكتب ، فتح الجوال القديم ودخل شريحته فيه وشغله ، أدخل رقم شجاع وأتصل عليه وبعد ثواني وصله صوت شجاع العالي وهو يقول : أرحب أرحب يالله حيّه !
نجم : البقى يا مرحّب البقى يالرأس الطيب
جلس شجاع تحت النخل ينطق : شكلهم بيرجعون ؟
رفع حاجبة بدهشة ينطق : تحاكيني ؟
ضحك شجاع ينطق : مالك لوا نفداك أحاكي عجلان
نجم : وش حالكم عساكم طيبين ؟
شجاع : طيبين أبشرك نسلم عليك
أنسدح نجم وزفر بتعب ينطق : بخير سلم لي على الجماعة كلهم ولا تنسى أحد
شجاع : بتقفل ؟
نجم : ودي أريح شوي وراي أيام طويلة
زفر شجاع بضيق ينطق : والله مالك لزوم والمراح !
أبتسم بخفه ينطق بسخرية : أوامر يا الشجاع ما بيديني حيله
شجاع : الله يوفقك ويسدد رميك ويرجعك بالسلامة
نجم : سلم لي على العرب كلهم وأخص السلام..
قاطعه شجاع اللي نطق بخبث : بنت الأمير ؟ أبشرك عندي بوصلها سلامك
فزّ من محله يوقف على رجوله ، كان يقصد سهيل لكن رد شجاع صدمه وما كان رد متوقع أبدًا ، عضّ شفايفه يبعثر شعره وينطق بهدوء نبرته : وش حاجتها عندك ؟
ضحك عجلان ينطق : أشوف النبره تغيرت !
رفع حاجبة بدهشة ينطق : وأنت تسمع سوالفي من ليل ولا طرى لك تسلم ؟
ضحك شجاع وأبتسم عجلان ينطق : عليك السلام يا النجم الساطع وش وقعك نفداك ؟
رجع يجلس بمكانه وارتخى للخلف ينطق : بخير جعلك بخير ، ايه علمني يا شجاع وش جاب الدكتورة عندكم ؟ لا يكون رجعت لسهيل
شجاع : مالك لوا يابن عمي دعتها حماتها للعشاء ولبّت حَرمك الداعي
سكن بمكانه هادىء يعكس تمامًا شرارة فضوله ، لأول مره يلاحظ إنه إنسان فضولي ، يبي يشوفها بين أهله وفي بيت أبوه ، استفاق من سمع منادى شجاع له وهمهم له ، ضحك عجلان ينطق : داخ الصبي أجل لو شفتها يوم دخلت بيتك وطلعت منه تتدفى داخل فروتك ؟
ألتفت شجاع بصدمة على عجلان ينطق : أحلف !!
عجلان : قسم بالله نوير علمتني قبل شوي يوم وصلتهم للبيت
زفر بغضّب ينطق بحدة : وبنت سعد ما تعرف إن سوالف الحريم تقعد بين الحريم ؟
شجاع : ما عندك مشكلة بأدبه أنا
ضحك عجلان ينطق : والله ما سألتها بس كانت تعلم أمي وسمعت حكيهم
دفعه شجاع ينطق بهمس : خلاص بتحرق الصبي ويقطع الخطوط عشانها !
رجع عجلان يهمس لشجاع : لو نركز محد خلاه يدري بوجودها فالحلّة إلا أنت !
رجع شجاع الجوال على أذنه ينطق : بتريح ؟
نجم : الله الله
شجاع : الله يحفظك وأمانتك نفسك يا بِكر رماح !
قفل نجم بدون ما يقول شيء ثاني ، دخل رقم أمه وأتصل عليها ، جلس ينتظر لحّد ما أنقطع الخط ، زفر بغضّب يدخل رقم نجد ويتصل عليها ، هو ما عهد بعمره إنه يتصل على القبيلة كلها عشان يسمع صوتها ويسلم عليها ، كان يقتصر الموضوع على شجاع بكل مره ، يتركهم وراه متشفقين على سلامه اللي يوصلهم من شجاع لكن هالمره أحرق جوالاتهم لأجل عذبة الأطباع ، رفع شعره عن وجهه يرجعه للخلف وينطق بحدة : أرفعي السماعة يا نجد !
أنقطع الإتصال وزفر بغضّب يكرر المحاولة للمره الثانية منتظر أي صوت من الجهة الثانية ..
« حلّة سهيل ، غرفة نجد »
دخلوا للغرفة وأبتسمت تنطق : وش ناوين عليه ؟
جلست شمايل ورفعت عيونها لوهج تنطق : بلوت تكسير روس !
توسعت عيونها بصدمة تنطق : أوف مالي فيها تعلميني ؟
شمايل : أعلمك ليه لا
جلست نجد تنطق : أول شيء بنلعب وبتشوفين كيف نلعب
شمايل : يا حماره لازم أحد يقابلك
ضحكت نجد بسخرية تنطق : أسيل تقابلني أنتي اللي دوري أحد يقابلك
جلست أسيل مقابلة لنجد وزفرت شمايل تنطق : من يعني أنادي جمان ؟!
رفعت نجد كتوفها بعدم إهتمام تنطق : تصرفي يا حماره
دفعتها شمايل وضحكت نجد ، رفعوا عيونهم لوهج اللي نطقت : ودي ألف المكان وأتعرف عليه أكثر
ميّلت شمايل رأسها بعدم فهم ونطقت : ما فهمت
ضحكت أسيل تنطق : والله ولا أنا
أبتسمت وهج تنطق بربكة : أقصد دلوني عليها وبناديها
نجد : يالبى اللي تبغى تعرف الحلّة
أسيل : يا حظ الحلّة يا ليتني حلّة سهيل يا شيخ !
غطت وجهها بيدينها لأجل تخفي عنهم خجلها الزائف ، رفعت رأسها لهم تنطق : بنات خلاص مالكم داعي
شمايل : أخاف تضيعين أجي معك ؟
زفرت وهج من تبيّن لها إستقعاد شمايل وشكها المبالغ فيه ، أبتسمت بكلافة تنطق : اللي ودك
وقفت شمايل ومشت تتخطى وهج وتخرج من الغرفة ، صدّت وهج تمشي واستوقفها صوت نجد اللي نطقت : وهج بالله جيبي جوالي معك
هزّت رأسها لها ومشت تخرج من الغرفة ، نزلت لشمايل اللي تنتظرها بأسفل الدرج ، حاوطت أكتافها تنطق : ما كنت أبغاك تتعبين بس تحبين العنى يا ميلو !
ضحكت شمايل تنطق : افا عليك ليه أتعنى كلها كم خطوة جدراننا على بعضها ليت القلوب مثلها ، تعالي من هنا
وقفت وهج تنطق : ايه صح نجد تبي جوالها
آشرت شمايل جهة الجوال اللي يسكن على كنب الصالة وتقدمت وهج تأخذه ، مشوا سوا يخرجون من البيت ، نزلت أنظارها للجوال اللي يهتّز بيدها أثر وضعه على الصامت ، توسعت عيونها من قرأت الأسم على شاشة الجوال « نجم » ويتبعه قلب أسود وإيموجي ضابط ، وقفت شمايل بصدمة للي ظلت واقفة بمكانها ونطقت لها : هونتي ؟
رمت وهج الجوال على شمايل اللي مسكته بسرعة ونطقت بحدة : علامك أنتي !؟
رجعت شعرها للخلف تنطق بربكة : نجم يتصل !
توسعت عيونها بصدمة تنطق : إييش ؟!!
رفعت الجوال وبالفعل كان رقمه ظاهر على الشاشة ، مسكت رأسها تنطق بصدمة : الله يستر ما عمره دق وأخباره تجينا من صوب شجاع !
تقدمت وهج لها ونطقت بخوف : طيب أفتحي يمكن صاير شيء
رفعت شمايل حاجبها تنطق بسخرية : أحلفي ؟
فتحت الإتصال وسلمت الجوال لوهج تنطق بهمس : زوجك ما يحل لي كلميه أنتي والحقيني إذا خلصتي
مشت تغادر المكان وعيون وهج تتبعها لحّد ما أختفت داخل أحد البيوت ، زفرت بتوتر ترفع السماعة وتصلبت بمكانها من سمعته ينطق : يا بنت !
وعن غير المتوقع منها في مثل هالمواقف قدرت تنطق بهدوء نبرتها : ايوه ؟
توسعت عيونه ينطق : الظاهر العقل ودّع ، بنت رماح ؟
هزّت رأسها بالنفي تدعي إنه يشوفها ونطقت : لا
وقف بصدمة ينطق بحدة : حضرة الدكتورة ؟
وهج : ايوه
جلس وأبتسم ينطق : يالله حيّها علامك متوترة ؟
توسعت عيونها بصدمة وقالت : أنا
نجم : لا بالله أنا ، وش الردود المختصرة ذي ؟
مسحت طرف خشمها من البرد وسرعان ما فزّت تعطس ، أبتسم ينطق بعد سماعه لحمدلله : يرحمك الله
أبتسمت بخفه تنطق : يهدينا ويهديكم الله
نجم : ما نفعتك الفروة ؟
توسعت عيونها بصدمة تنطق : كيف عرفت !
نجم : علمني الطير
سمع ضحكتها الساخرة وأبتسم ينطق : أدخلي من البرد ماني بحولك أدفيك ولا له داعي أجيك وأنتي مريضه ونبلش معك
مسكت طرف خدها اللي أصبح يشتعل خجل من أولى الدقايق معه ، زفرت خجلها تنطق : أنا دكتورة ما يجيني شيء
نجم : وش جنون العظمة ! أدخلي الله يرحم والديك
ضحكت بخفه تنطق بهدوء نبرتها : أنت كيفك ؟
نجم : الحين بخير
رفعت عيونها للسماء تنطق : ان شاءالله دايم
نجم : دقي دايم
عضّت شفايفها بهدوء يملأها شعور وخوف بالوقت نفسه ، تخاف تُجبر على إنها تكسر قلبه وتخليه يتحسف على إندفاعه لها ، مسحت طرف خشمها تنطق : نجم
نجم : مرحبا ؟
زفرت تنطق بحدة : أنتبه لنفسك كويس أبيك ترجع للرياض قطعة وحدة
ضحك بصوت عالي ودوّت ضحكته بمسامعها ، أبتسمت بدون شعور تنطق : دايمه يارب
غطى وجهه ينطق بهدوء نبرته : بأسبابها يارب
عضّت شفايفها خجلاً تستمع له ينطق : ليه تبيني أجي الرياض بقطعة وحدة ما فهمت ؟
وهج : عشان أنت بحرب الحين صح ؟
هزّ رأسه بالنفي يدعي إنها تشوفه ينطق : لا أحرس الحدود مهمة لي وتدريب للعساكر المستجدين
رفعت حاجبينها تنطق : اوكيه كون بخير لأني بعاتبك !
رفع حاجبة بدهشة ينطق : عاتبيني يا عذبة الأطباع
ضحكت بخفه ونطقت تغيير الموضوع : ماهيب عوايدك تدق
فتّل شاربه ينطق بسخرية : من علمك ؟
نطقت بضحكه ساخرة : الطير نفسه !
بلل شفايفه ينطق بجدية : من رفعت سلاحي على جبينك الصافي وأنا ما عدت أعرف نفسي ولا هي طبايع نجم المعهوده لكن الله يبيح صويحبي
أبتسمت من تذكرت الصورة ونطقت : سبيب الهوى ؟
توسعت عيونه بخفه ينطق : لا حلو جوي نسيتها فالجيب
ضحكت بعلّو صوتها تنطق : للأسف
نجم : ما عليه تشوفينها أنتي ولا يشوفها غيرك يا عذبة الأطباع
أبعدت الجوال من لمحت جمان وشمايل ، دخلته بجيب فروته وصدّت عنهم تتجه للمزرعة ، من حسّت إنها أبعدت رفعت الجوال تنطق بهدوء : نجم
نجم : معك معك
جلست تحت النخل وبنفس المكان مع البنات سابقًا ، عضّت شفايفها بهدوء وزفرت تنطق : بتكلم معك عن شيء
عدّل جلسته ينطق : لبيه ؟
أبتسمت بخفه تنطق : لبيت حاج ، أنا ما أضمن وش بصبح عليه بكره وأكيد إن الأوادم كلهم كذا
غمض نجم عيونه ينصّت لها وينطق بهدوء نبرته : الله الله
سكتت لثواني معدودة تتأمل النخيل فوقها والسحاب المتشتت بالسماء والنجوم الساطعة في ظلام الليل ، زفرت بتوتر تنطق : بقولك وش القصة الحقيقة خلف ستار زواجي منك !
سكنت بمكانها تنتظر ردة الفعل منه والإجابة على كلامها لكن ماوصلها صوت ، أبعدت الجوال بتوتر ظن منها إن الخط أنقطع لكن سرعان ما زفرت براحة من شافته باقي على الإتصال ، رجعت الجوال على أذنها تنطق : نجم معي ؟
ما وصلها صوته وأبتسمت بضيق تنطق : أخذت إجابتي ودعتك الله
أبعدت الجوال عنها تغلق الإتصال ، تمسكت بسعف النخل على الساق توقف نفسها وتستند عليه ، رفعت ناظريها تشوف النخيل اللي على مدّ نظرها ، ماله نهاية أبدًا والظلام داخله مهيب ، ألتفتت لأجل تعود بأدراجها لكن سرعان ما صرخت تفزّ من مسعود اللي صرخ وراها وطاح يضحك ، عضّت إبهامها تسمي بالله وتهدي نفسها ، ألتفتت بصدمة للي طايح عند رجولها وبيده صخله صغيرة ، وقف يشيلها بين يدينه وينطق : الحلوه وش تسوين هنيّا ؟
جلست وهج القرفصاء تنطق : خوفتني يا مسعود
عضّ شفايفه يتأملها وينطق : جعلني الوجع قولي آمين !
ضحكت بصدمة تنطق : بعيد الشر !
رفع الصخله لها ينطق : شوفي عنزتي سميتها غرور
توسعت عيونها بصدمة تنطق : إيش ؟
مسعود : الصدق ما ألومك يوم أنفجعتي بس مشاعر العنزه وين !
ضحكت مصدومة من الطفل اللي قدامها ، زفر يرفع الصخله وينطق : بوديها لأمها جويعه المسيكينه
هزّت رأسها له ومشى مسعود ينطق : لا تروحين للبنات أنتظري هنا عشان شمايل تضربني وأنا ما بجي عشان سواد عيونها أبغى اسولف معك أنتي
ضحكت وقالت بصوت مرتفع : ما عليك منهم بدخلك غصب
ضحك يركض للشبك وأبتسمت تصدّ عنه ، زفرت بضيق من الحمول الثقيلة على صدرها ، كان ودها تعلمه ويدري بالموضوع لأجل يعذرها لو جبرتها الظروف تنفذ كلام مترك ، كان ودها تشاركه الهموم وتدري إن صدره وسيع لها ، هي ما زالت مصدومة من إندفاعه وعذب كلامه لها لكن تدري إنه الحب وأفعاله ، كيف حبها ومتى حبها أسئلة تطرحها على نفسها من لحظة معرفتها بإنه جاء يخطبها ، ما تدري وش حصل عنده فالجهة الثانية وليه فجأة أنقطع حسّه لكنها أعطت نفسها سبب لأجل ما تقلق عليه وهو إن النوم غلبه ، والسبب جاء بعد ما لاحظت الهدوء عنده وصوته الهادىء نوعًا ما ، فتحت الباب ووقفت مندهشة من أمها اللي سبقتها ولبست عبايتها ، ألتفتت على الواقفة عند الباب تنطق : خلصيني ألبسي السواق برا
هزّت رأسها بالإيجاب تتقدم لعبايتها وتسحبها من المعلاقه ، رفعت عيونها لهنادي اللي همست لها تنطق : والفروة ذي أبعديها مني هناك !
عضّت شفايفها تسحب الصورة وتحطها بجيب بنطلونها ، نزلت الفروة تعلقها بدال عبايتها على دخول نجد اللي نطقت بضحكه : شدعوة خذيها معك
أبتسمت هنادي تنطق : ما يحتاج نخليها لصاحبها
ألتفتت على وهج تنطق بحدة : أمشي !
أبتسمت بخفه لنجد تتقدم لها ، سحبت جوال نجد من جيبها وتمدّه لها وتنطق : سلمي عليك وعلى البنات وحماتي بعد
رفعت حاجبها بدهشة تنطق : وش جاب جوالي معك ؟
وهج : أنتي طلبتيني أجيبه
ضحكت تنطق بسخرية : الله يرحمني قد نسيت يا جوجو
أبتسمت وهج تنطق : معليش والله
فتحت نجد جوالها وشهقت بصدمة تنطق : كلمتي نجم !!
صرخت ريمان من الصالة تنطق : اسألك بالله ؟
ضربتها بخفه تنطق : شاطره ما تعرفين تتكلمين بهدوء ؟!
نجد : مستحيل ما عمره دق علي لو يغيب بالشهور !
رفعت أكتافها بعدم معرفة وتقدمت ريمان تنطق : والحين ما كمل يومين إلا وهو داق أنتي جيتك خير علينا يا بنتي خير !
زفرت نجد بغضّب تنطق : وتقولين لا تعصبين من أخوك وأعذريه شوفي وش سوا دق عليها ومهملنا !
دقت نجد بخفه وصدّت تنطق : بشري كيف حاله ؟
ألتفتت وهج على صوت السيارة برا الأسوار ، رجعت أنظارها عليهم تنطق : بخير يسلم عليكم وترا دق عشانك يا نجد لو بيدق علي رقمي عنده بس صادف إن جوالك معي وبس أنا ماشيه وما ودي تشيلين على أخوك وهو ماله نيه بهذا كله
خرجت من الباب وألتفتت ريمان على بنتها تنطق بحدة : غبية أنتي ؟؟ كيف تقولين كذا قدامها أنا أسعى عشان أكسبها بصفي وأنتي كذا تسوين !
زفرت نجد بضيق تنطق : يا ليت ما تركت جوالي بالصالة كنت أبغى أسمع صوته ولو مره كنت أبغى صوته يهون علي غيابه يا أمي !
أبتسمت ريمان بضيق تحتضّن بنتها وتنطق : أخوك بخير وأكيد دام جاته فرصة بيستغلها ويدق عليك مره ثانية بس المره الجايه خلي جوالك حولك ما تدرين متى يدق
أبتسمت تحاوط أمها وتنطق : أبشري وان شاءالله يكون دايم بخير
أبعدت ريمان تنطق : ان شاءالله ، تعالي ساعديني فالبيت
دخلت للداخل ومشت نجد للباب تقفله ، مشت تتبع أمها وبدأوا يرتبون البيت والمطبخ بعد العشاء ، زفرت بتعب تخرج من المطبخ وتتجه للدرج ، ألتفتت لدخول أبوها للبيت وأبتسمت تكمل طريقها وهي تسمعه ينطق : أرقدي يا نجد أرقدي
ضحكت بخفه ونطقت قبل تقفل باب غرفتها : أبشر
قفلت الباب وشهقت من البرد اللي تسلل لغرفتها من الشباك وتقدمت لأجل تقفله ، وقفت بصدمة من شمّت ريحة سيجارته وانحنت للأسفل تشوفه جالس بنفس مكانه ، زفرت بغضّب تنطق : ها وش جديدك من المنتدى ؟
رفع عيونه لها ينطق بسخرية : دخان وشتاء ولياليك يا نجد عوايد أحبها مابه شيءٍ جديد ، أنتي وش جديدك ؟
أبتسمت بسخرية تنطق : شجاع بسألك
شجاع : اسألي عن أحوالي أو أحوال القلب كان ودك
نجد : نجم دق عليك ؟
هزّ رأسه بالإيجاب ينطق : على أساس أعلمكم بكره بس شكله وصلكم خبر
عضّت شفايفها بحسرة تنطق بهمس : لعبت علي وملأت عقلي بالأوهام وآخر شيء ؟ دق علي عشانها !
نزلت عيونها على شجاع اللي نطق بفضول : علامك يا بنت ؟
قطرت دمعة القهر من محاجرها وزفرت تقفل الشباك والستاير ، نزل عيونه على قطرة الملح اللي أستقرت على كتفه ، رجع يناظر للشباك بصدمة وزفر بضيق ينطق : ما لاق الدمع على خدك الغض يا نجد الله حسيبه سبيب الدمعة !
مشى يغادر وقلبه ينقبض داخل صدره ، يخاف من فكرة وجود شخص ثاني بحياتها ، تكون جاهدة بحبها له ويكون جاهز لأجل يكسرها ، هو لاحظ بالوقت نفسه من كل لبلة دموعها وغضبّها وحزنها وهالأشياء ما تتوافق مع شخصيتها فالنهار ، شّد على قبضته ينطق وهو يصّر على أسنانه : ان شاءالله إنها دموع شوق لأخوها وتكفير لذنوبها !
قرر يقفل الموضوع عند هالنقطة ومشى راجع للبيت أبوه ..
« مطار ميلبورن ، أستراليا »
أبتسمت من نظراته عليها ، ضحكت ترميه بالجواز حقها وتنطق : وشفيك تناظر ؟
نيار : مصدوم منك
رفعت حاجبها بعدم فهم ونطقت : وش تقصد ؟
ضحك نيار ينطق : حتى بصالة الانتظار حاطه بيني وبينك كرسي تحسبيني بأعضك ؟
ضحكت بصدمة تنطق : أنت ايه تعض ليه مصدوم ؟
...
انتهى البارت ادعموني بنجمة وكومنت عشان اتحفز اكملكم 🤎
- والله وحشتوني ، فترة إختبارات طويلة غثيثة لكن حمدلله عدت على خير ، أحبكم 🫂 -