မိုးမြေခစား

42

💌 Part - 42 💌
---------------

သင်တန်းထဲကထွက်လာသည်နှင့် မိုးသက်လေကြောင့် ရေမှုန်တွေစင်လာသောကြောင့် မိုးမြေခြေဖျားမှာ ရေတွေစိုကုန်၏။
ဒီနှစ်အတွက် ပထမဆုံးရွာသော မိုးဦးဖြစ်ပေမယ့် ရေအတော်ပါပြီး မြေပြင်ကိုရွှဲရွှဲစိုအောင်ရွာချနေ၍ မီးရောင်အောက်မှာ မိုးသည်းနေပုံကလည်း ကြည့်ကောင်းနေသည်။

"စာအုပ်တွေ မိုးစိုကုန်တော့မှာပဲ"

သင်တန်းအဝင်ဝနှင့် ကားလမ်းမအကြားမှာ လှေကားတွေ ၇ထစ်လောက်ရှိနေကာ Romanticမဆန်တတ်သော မိုးမြေရဲ့ကောင်လေးကလည်း ထီးပါလာမှာမဟုတ်။
ဒီမိုးထဲသို့ ဒီအတိုင်းထွက်ပြေးလျှင်လည်း လူရော၊စာအုပ်တွေပါ ရွှဲရွှဲစိုသွားမှာ သေချာသလောက်ရှိသည်။
ထိုအချိန် ကားဘေးသို့ထိုးရပ်လာသော ခစားမောင်းလာသည့်ကားကို လှမ်းမြင်လိုက်ရကာ သူတစ်ယောက်တည်းမဟုတ်သည်ကိုလည်း သတိထားမိလိုက်သည်။

ကားအရှေ့ခန်း မိုးမြေထိုင်နေကျနေရာမှာ ကောင်မလေးတစ်ယောက်ရှိနေခဲ့ပြီး မှန်ကအကြည်ဖြစ်နေ၍ သူတို့နှစ်ယောက်ကို မြင်နေရသည်။
ခစားရဲ့ကားက မှန်အနက်တွေတပ်ထားပြီး အပြင်ကကြည့်လျှင် မမြင်ရသောမှန်တွေဖြစ်ကာ ဒီကားကတော့ ဘယ်သူ့ကားကို ယူလာမှန်းမသိ။
သူဟာ ထိုမိန်းကလေးနှင့် စကားတွေပြောနေခဲ့သည်မှာ မိုးမြေရပ်ကြည့်နေမှန်းတောင် ဂရုမစိုက်နိုင်လောက်သည်အထိ…

"အဟင်း!"

မျက်ရည်ဝဲလာမိ၍ မျက်နှာကိုမော့ပြီး အသက်မဲ့စွာတစ်ချက်ရယ်လိုက်ကာ ကားပေါ်မှာရှိနေသေးသောသူ့ကို တစ်ချက်ကြည့်မိပြန်သည်။
မိုးမြေကို အခုထက်ထိမမြင်သေးသောသူ့ကြောင့် မသိမသာနာကျင်သွားပြီး မိုးမြေသည် မိုးရေထဲကို ဒီအတိုင်းထွက်လာခဲ့၏။
အေးစက်သောမိုးပေါက်တို့က ဦးခေါင်းကို တခဏအတွင်းရွှဲနင့်သွားစေပြီး သူမတစ်ကိုယ်လုံးကို စိုစွတ်သွားစေသည်။

"မိုး​ရေထဲမှာငိုရတာ သဘောကျတယ် ကျွန်တော်ငိုနေတာကို ဘယ်သူမှမသိလို့"

ဆိုသည့် ချာလီချက်ပလင်၏စကားကို ပြန်ကြားယောင်လာရင်း ကားလမ်းမအတိုင်း သူမ ထွက်ပြေးလာခဲ့သည်။
သူ့အချစ်ကို အယုံအကြည်ရှိသလားဟုမေးလာလျှင် မိုးမြေခေါင်းညိတ်မိမည်ဖြစ်သလို ခေါင်းလည်းခါမိသွားနိုင်သည်။
တစ်ပါးသူတွေ၏အသည်းနှလုံးတွေကို ထင်သလိုကစားလာသည့်ထိုလူဟာ မိုးမြေအပေါ်မှာရော မကစားဘူးဟု ဘယ်သူမှအာမ မခံနိုင်။