ﻓﻲ ﻣﺮﻛﺰ ﺍﻟﺘﺠﻤﻴﻞ ﺍﻟﻤﻠﺤﻖ ﺑﺎﻟﻘﺮﻳﺔ ،،،
ﺍﻧﺘﻬﺖ ﺯﻳﻨﺐ ﻣﻦ ﺣﺠﺰ ﻣﺎ ﻳﺴﻤﻰ ﺑـ ( Package ) ﻟﻴﻠﺔ ﺍﻟﺰﻓﺎﻑ ﺍﻟﺨﺎﺻﺔ ﺑﺎﻟﻌﺮﺍﺋﺲ ﻟﻨﻴﺮﺓ ، ﻭﺍﺗﻔﻘﺖ ﻣﻊ ﺍﻟﻤﺴﺌﻮﻻﺕ ﺑﺎﻟﻤﺮﻛﺰ ﻋﻠﻰ ﻛﻞ ﺷﻲﺀ .. ﻓﻨﻴﺮﺓ ﺳﺘﺘﻮﺍﺟﺪ ﻣﻌﻬﻢ ﻣﻨﺬ ﻓﺘﺮﺓ ﺍﻟﻈﻬﻴﺮﺓ ، ﻭﻗﺒﻠﻬﺎ ﺳﺘﻜﻮﻥ ﻓﻲ ﺍﻟـ SPA ﻟﺘﻨﺘﻬﻲ ﻣﻦ ﺍﻟﻤﺴﺎﺝ ﻭﺍﻟﺘﺪﻟﻴﻚ ﻭﺗﺠﻬﻴﺰ ﺍﻟﻌﺮﻭﺳﺔ ﻟﻠﻴﻠﺔ ﺯﻓﺎﻓﻬﺎ ﺍﻟﻤﻮﻋﻮﺩﺓ ..
ﺗﺄﺧﺮﺕ ﻧﺪﻯ ﻓﻲ ﺍﻻﻟﺘﻘﺎﺀ ﺑﻮﺍﻟﺪﺗﻬﺎ ، ﻣﻤﺎ ﺟﻌﻠﻬﺎ ﺗﺮﺳﻞ ﻓﺎﻃﻴﻤﺎ ﻭﺗﺘﻌﺠﻠﻬﺎ ﻭ ..
- ﺯﻳﻨﺐ : ﺭﻭﺣﻲ ﺷﻮﻓﻲ ﺍﺧﺘﻚ ﺍﺗﺄﺧﺮﺕ ﻟﻴﻪ
- ﻓﺎﻃﻴﻤﺎ : ﺣﺎﺿﺮ
- ﻧﻴﺮﺓ : ﺃﻫﻲ ﺃﺣﺴﻦ ﺣﺎﺟﺔ ﻋﻤﻠﺘﻬﺎ ﺍﻧﻬﺎ ﺧﻠﻌﺖ
- ﺯﻳﻨﺐ ﻭﻫﻲ ﺗﻨﻬﺮﻫﺎ : ﺍﺳﻜﺘﻲ ﻳﺎ ﺑﺖ ..
- ﻧﻴﺮﺓ : ﺃﻭﻭﻭﻑ
ﻛﺎﻧﺖ ﻓﺎﻃﻴﻤﺎ ﻋﻠﻰ ﻭﺷﻚ ﺍﻟﺨﺮﻭﺝ ﺣﻴﻨﻤﺎ ﻭﺟﺪﺕ ﻧﺪﻯ ﺗﺪﻟﻒ ﻟﻠﺪﺍﺧﻞ ﻭ ..
- ﻓﺎﻃﻴﻤﺎ : ﺃﻧﺎ ﻛﻨﺖ ﻟﺴﻪ ﻫﺎﺟﻴﻠﻚ
- ﻧﺪﻯ : ﺍﻫﺎ
- ﺯﻳﻨﺐ : ﺍﻳﻪ ﺍﻟﻠﻲ ﺃﺧﺮﻙ ﻛﻞ ﺩﻩ ﻳﺎ ﻧﺪﻯ
ﺣﺎﻭﻟﺖ ﻧﺪﻯ ﺃﻥ ﺗﺒﺪﻭ ﻃﺒﻴﻌﻴﺔ ﺃﻣﺎﻡ ﻭﺍﻟﺪﺗﻬﺎ ﺣﺘﻰ ﻻ ﺗﺜﻴﺮ ﺍﻟﻘﻠﻖ ﻓﻲ ﺃﻳﺎﻡ ﻛﻬﺬﺍ ﻭ ..
- ﻧﺪﻯ : ﻫــﻪ .. ﻣـ .. ﻣﺎﻓﻴﺶ
- ﺯﻳﻨﺐ : ﻣﺎﻝ ﻟﻮﻥ ﻭﺷﻚ ﻣﺨﻄﻮﻑ ﻛﺪﻩ ﻟﻴﻪ ؟
- ﻧﺪﻯ ﻭﻫﻲ ﺗﺘﺤﺲ ﻭﺟﻬﻬﺎ : ﻷ ﻋﺎﺩﻱ .. ﻣﺎﻓﻴﺶ ﺣﺎﺟﺔ
- ﺯﻳﻨﺐ : ﻃﺐ ﻳﺎﻻ ﻋﺸﺎﻥ ﻧﺸﻮﻑ ﺍﻳﻪ ﺍﻟﻠﻲ ﻧﺎﻗﺼﻨﺎ ، ﻷﺣﺴﻦ ﻣﺎﻓﻴﺶ ﺣﺎﺟﺔ ﺑﺘﺨﻠﺺ ﺃﺑﺪﺍﺍﺍﺍ
ﻇﻠﺖ ﺯﻳﻨﺐ ﺗﺘﺬﻣﺮ ﻓﻲ ﺿﻴﻖ ﻣﻦ ﻛﻞ ﺷﻲﺀ ، ﻓﻤﺎ ﺇﻥ ﺗﻨﺘﻬﻲ ﻣﻦ ﺷﻲﺀ ﺣﺘﻰ ﻳﻈﻬﺮ ﺃﻣﺎﻣﻬﺎ ﺷﻲﺀ ﺃﺧﺮ .. ﻭﻟﻢ ﻳﻌﺪ ﻫﻨﺎﻙ ﺃﻱ ﻭﻗﺖ ﻹﺿﺎﻋﺘﻪ ...
ﻛﺎﻧﺖ ﻧﻴﺮﺓ ﻫﻲ ﺍﻻﺧﺮﻯ ﻓﻲ ﺣﺎﻟﺔ ﻻ ﺗﺤﺴﺪ ﻋﻠﻴﻬﺎ ، ﻫﻲ ﻣﻀﻄﺮﺓ ﺃﻥ ﺗﻄﻴﻊ ﻭﺍﻟﺪﺗﻬﺎ ﻓﻘﻂ ﻟﻜﻲ ﺗﻨﺘﻘﻢ ﻣﻦ ﻣﺮﻭﺍﻥ ، ﻭﺗﺮﺩ ﻟﻪ ﺍﻟﺼﺎﻉ ﺻﺎﻋﻴﻦ ، ﻫﻲ ﺗﺨﻄﻂ ﻟﻜﻴﻔﻴﺔ ﺍﻓﺴﺎﺩ ﻳﻮﻣﻪ ﻭﺧﺎﺻﺔ ﻟﻴﻠﺔ ﺍﻟﻌﻤﺮ
ﺍﻟﻮﺣﻴﺪﺓ ﺍﻟﺘﻲ ﻛﺎﻧﺖ ﺗﺴﺘﻤﺘﻊ ﺑﺄﺟﻮﺍﺀ ﻛﻞ ﺷﻲﺀ ﻫﻲ ﻓﺎﻃﻴﻤﺎ ، ﻓﻬﻲ ﺗﺮﻯ ﺃﻥ ﺍﻟﺴﻌﺎﺩﺓ ﻋﻠﻰ ﻭﺷﻚ ﺍﻟﺪﺧﻮﻝ ﻟﻌﺎﺋﻠﺘﻬﺎ ﻣﻦ ﺃﻭﺳﻊ ﺍﻷﺑﻮﺍﺏ .. ﻓﻘﻂ ﻣﺎ ﻫﻲ ﺇﻻ ﻣﺴﺄﻟﺔ ﻭﻗﺖ
.......................
ﻓﻲ ﻭﻗﺖ ﻣﺘﺄﺧﺮ ﻣﻦ ﺍﻟﻠﻴﻞ ، ،
ﻭﺗﺤﺪﻳﺪﺍً ﻓﻲ ﺍﻟﺸﺎﻟﻴﻪ ﺍﻟﺨﺎﺹ ﺑﻌﺎﺋﻠﺔ ﺍﻟﻨﻘﻴﺐ ،،،
ﻃﻠﺐ ﻳﻮﺳﻒ ﻣﻘﺎﺑﻠﺔ ﻣﺮﻭﺍﻥ ﻷﻣﺮ ﻋﺎﺟﻞ ، ﺍﺳﺘﻐﺮﺏ ﻣﺮﻭﺍﻥ ﻣﻦ ﺫﻟﻚ ﺍﻟﻄﻠﺐ ﺧﺎﺻﺔ ﺃﻥ ﺍﻟﻮﻗﺖ ﺻﺎﺭ ﻣﺘﺄﺧﺮﺍً ﻟﻠﻐﺎﻳﺔ ، ﻭﻗﻒ ﻳﻮﺳﻒ ﺑﺎﻟﻘﺮﺏ ﻣﻦ ﺍﻟﺸﺎﻟﻴﻪ ﺛﻢ ﺍﻧﺘﻈﺮ ﻣﺮﻭﺍﻥ ﻓﻲ ﺍﻟﺨﺎﺭﺝ ..
- ﻣﺮﻭﺍﻥ ﻭﻗﺪ ﺧﺮﺝ ﻟﻤﻼﻗﺎﺗﻪ : ﺍﻳﻪ ﻳﺎ ﻋﻢ ، ﻣﺪﺧﻠﺘﺶ ﻟﻴﻪ
- ﻳﻮﺳﻒ : ﻣﺎﻳﺼﺤﺶ ﻳﺎ ﺑﻨﻲ
- ﻣﺮﻭﺍﻥ : ﻫﻮ ﺍﺣﻨﺎ ﻓﻲ ﺑﻴﻨﺎ ﺗﻜﻴﻒ
- ﻳﻮﺳﻒ : ﺃﻧﺎ ﻋﺎﺭﻑ ﺍﻥ ﻣﺎﻓﻴﺶ ﺑﻨﺎ ﺣﺎﺟﺔ ، ﺑﺲ ﺃﻧﺎ ﻋﺎﻭﺯ ﻣﻨﻚ ﺧﺪﻣﺔ ﻣﺴﺘﻌﺠﻠﺔ
- ﻣﺮﻭﺍﻥ ﺑﺪﻫﺸﺔ : ﺍﻟﺴﻌﺎﺩﻱ
- ﻳﻮﺳﻒ : ﺃﻩ
- ﻣﺮﻭﺍﻥ : ﺧﻴﺮ
- ﻳﻮﺳﻒ ﺑﺼﻮﺕ ﺧﺎﻓﺖ ﻭﺃﻗﺮﺏ ﻟﻠﻬﻤﺲ : ﺃﻧﺎ ﻋﺎﻭﺯ ﺑﻜﺮﺓ ﺍﻥ ﺷﺎﺀ ﺍﻟﻠﻪ ﻓﻲ ﻓﺮﺣﻚ ﺃﻋﻤﻞ ﺁﺁ .................................... !
ﺃﺧﺒﺮ ﻳﻮﺳﻒ ﺻﺪﻳﻘﻪ ﻣﺮﻭﺍﻥ ﺑﻤﺎ ﻳﻨﺘﻮﻱ ﻓﻌﻠﻪ ﻏﺪﺍً ﻓﻲ ﺃﺛﻨﺎﺀ ﺣﻔﻞ ﺍﻟﺰﻓﺎﻑ ، ﻭﻭﺍﻓﻖ ﻣﺮﻭﺍﻥ ﻋﻠﻰ ﻃﻠﺐ ﺻﺪﻳﻘﻪ ﺑﻜﻞ ﺳﻌﺎﺩﺓ ..
- ﻣﺮﻭﺍﻥ ﻭﺍﻻﺑﺘﺴﺎﻣﺔ ﺗﻌﻠﻮ ﺷﻔﺘﻴﻪ : ﺩﻩ ﺍﻧﺎ ﻓﻜﺮﺕ ﺍﻧﻚ ﻫﺎﺗﻄﻠﺐ ﺣﺎﺟﺔ ﺧﻄﻴﺮﺓ
- ﻳﻮﺳﻒ : ﻳﻌﻨﻲ ﻣﻮﺍﻓﻖ
- ﻣﺮﻭﺍﻥ : ﻳﺎ ﺟﻮﻭ ، ﺩﻩ ﺍﻟﻔﺮﺡ ﻓﺮﺣﻚ ﺍﻋﻤﻞ ﺍﻟﻠﻲ ﺍﻧﺖ ﻋﺎﻭﺯﻩ ﻓﻴﻪ
- ﻳﻮﺳﻒ : ﺣﺒﻴﺒﻲ ﻳﺎ ﻣﺎﺭﻭﻭ ، ﺷﺪ ﺣﻴﻠﻚ ﺑﻘﻰ ﺑﻜﺮﺓ
- ﻣﺮﻭﺍﻥ ﻭﻫﻮ ﻳﻔﺮﻙ ﻛﻔﻴﻪ : ﻳﺎﺍﺍ ﻣﺴﻬﻞ ﻳﺎ ﺭﺏ ، ﺩﻩ ﺍﺣﻨﺎ ﻭﺭﺍﻧﺎ ﻣﻌﺎﺭﻙ ﺑﻜﺮﺓ
...................................
ﺟﺎﺀ ﺍﻟﺼﺒﺎﺡ ﻣﺤﻤﻼً ﺑﺎﻟﻜﺜﻴﺮ ﻣﻦ ﺍﻟﻤﻔﺎﺟﺄﺕ ..
ﻛﺎﻧﺖ ﻧﺪﻯ ﺗﻔﻜﺮ ﻃﻮﺍﻝ ﺍﻟﻠﻴﻠﺔ ﺍﻟﻤﺎﺿﻴﺔ ﻓﻴﻤﺎ ﺣﺪﺙ ﺑﻴﻨﻬﺎ ﻭﺑﻴﻦ ﻳﻮﺳﻒ .. ﻓﻬﻮ ﺩﺍﺋﻤﺎً ﻭﺃﺑﺪﺍً ﻣﺘﻮﺍﺟﺪﺍً ﻣﻦ ﺃﺟﻠﻬﺎ .. ﻫﻮ ﻣﺎﺯﺍﻝ ﻳﺤﺘﻔﻆ ﺑﺘﻠﻚ ﺍﻟﺴﻤﺎﺕ ﺍﻟﺘﻲ ﻟﻄﺎﻟﻤﺎ ﻭﺟﺪﺗﻬﺎ ﻓﻴﻪ .. ﻭﻣﺎ ﺯﺍﺩ ﺍﻵﻥ ﻋﻠﻴﻬﺎ ﻫﻮ ﺗﻤﺴﻜﻪ ﺑﺎﻟﺘﻘﺮﺏ ﺃﻛﺜﺮ ﺇﻟﻴﻬﺎ ﻭﺟﻌﻠﻬﺎ ﺯﻭﺟﺘﻪ ..
ﻇﻠﺖ ﻧﺪﻯ ﺟﺎﻟﺴﺔ ﻋﻠﻰ ﺍﻟﻤﻘﻌﺪ ﺍﻟﻮﻗﻴﺮ ﻓﻲ ﺍﻟﺘﺮﺍﺱ ﻭ ﺍﻻﺑﺘﺴﺎﻣﺔ ﻻ ﺗﻔﺎﺭﻕ ﺷﻔﺘﻴﻬﺎ .. ﻫﻲ ﺳﻌﻴﺪﺓ ﻣﻊ ﻳﻮﺳﻒ ﻭﻻ ﺗﺴﺘﻄﻴﻊ ﺃﻥ ﺗﻨﻜﺮ ﻫﺬﺍ ﻣﻬﻤﺎ ﺣﺎﻭﻟﺖ ﺃﻥ ﺗﻘﺎﻭﻣﻪ ، ﻫﻲ ﺗﺸﻌﺮ ﺃﻥ ﺭﺍﺣﺘﻬﺎ ﻭﺳُﻜﻨﻬﺎ ﺳﻴﻜﻮﻥ ﺑﻘﺮﺑﻪ ﻫﻮ ..
.....
ﻋﻠﻰ ﺍﻟﺠﺎﻧﺐ ﺍﻷﺧﺮ ، ﻟﻢ ﺗﻬﻨﺄ ﻧﻴﺮﺓ ﻓﻲ ﻧﻮﻣﻬﺎ ، ﺣﻴﺚ ﻇﻠﺖ ﻓﺎﻃﻴﻤﺎ ﺗﺜﺮﺛﺮ ﻭﺗﺜﺮﺛﺮ ﻃﻮﺍﻝ ﺍﻟﻠﻴﻞ ، ﻭﺣﻴﻨﻤﺎ ﺑﺪﺃﺕ ﺗﻐﻔﻞ ﺟﺎﺀﺕ ﺇﻟﻴﻬﺎ ﺯﻳﻨﺐ ﻭﺃﻳﻘﻈﺘﻬﺎ ﻟﺘﺒﺪﺃ ﻣﺮﺣﻠﺔ ﺗﺠﻬﻴﺰ ﺍﻟﻌﺮﻭﺳﺔ ﻟﻌﺮﺳﻬﺎ ﻭ ...
- ﺯﻳﻨﺐ ﺑﻠﻬﺠﺔ ﺁﻣﺮﺓ : ﻗﻮﻣﻲ ﻳﺎﻻ
- ﻧﻴﺮﺓ ﻭﻫﻲ ﺗﻀﻊ ﺍﻟﻐﻄﺎﺀ ﻋﻠﻰ ﺭﺃﺳﻬﺎ : ﻋﺎﻭﺯﺓ ﺃﻧﺎﻡ ، ﺗﻌﺒﺎﻧﺔ
- ﺯﻳﻨﺐ ﻭﻫﻲ ﺗﺴﺤﺐ ﺍﻟﻐﻄﺎﺀ : ﺍﺑﻘﻲ ﻧﺎﻣﻲ ﺑﻌﺪﻳﻦ ، ﻟﻜﻦ ﺍﻟﻨﻬﺎﺭﺩﺓ ﻋﻨﺪﻧﺎ ﻫﻢ ﻣﺎ ﻳﺘﻠﻢ .. ﻗﻮﻣﻲ ﻳﺎﻻ
- ﻧﻴﺮﺓ : ﺣﺮﺍﻡ ﻋﻠﻴﻜﻮ ، ﺣﺘﻰ ﺍﻟﻨﻮﻣﺔ ﻣﺶ ﻣﺘﻬﻨﻴﺔ ﻓﻴﻬﺎ
- ﺯﻳﻨﺐ ﻣﺘﺠﺎﻫﻠﺔ ﺍﻳﺎﻫﺎ : ﻳﺎ ﻧﺪﻯ ، ﻳﺎﻻ ﻳﺎ ﺑﻨﺘﻲ ﻋﺎﻭﺯﻳﻦ ﻧﻔﻄﺮ ﻗﺒﻞ ﻣﺎ ﻧﺮﻭﺡ ﺍﻟﺒﻴﻮﺗﻲ ﺳﻨﺘﺮ ﻭﺍﻟـ spa
ﻇﻠﺖ ﺯﻳﻨﺐ ﺗﻨﺎﺩﻱ ﻋﻠﻰ ﻧﺪﻯ ﻋﺪﺓ ﻣﺮﺍﺕ ، ﻭﻟﻜﻦ ﻧﺪﻯ ﻛﺎﻧﺖ ﺷﺎﺭﺩﺓ ﻓﻲ ﺃﺣﻼﻣﻬﺎ ﺍﻟﻮﺭﺩﻳﺔ ﻣﻊ ﻳﻮﺳﻒ ، ﺇﻟﻰ ﺃﻥ ﺻﺎﺣﺖ ﺯﻳﻨﺐ ﺑﺤﺪﺓ ﺑــ ...
- ﺯﻳﻨﺐ ﺑﺼﻮﺕ ﻣﺮﺗﻔﻊ : ﻧـــــــــــﺪﻱ ، ﺍﻧﺘﻲ ﻳﺎ ﺑﻨﺘﻲ
- ﻧﺪﻯ ﻭﻗﺪ ﻧﻬﻀﺖ ﻣﻦ ﻣﻜﺎﻧﻬﺎ : ﻫﻪ .. ﺁﺁ .. ﺍﻳﻮﻩ ﻳﺎ ﻣﺎﻣﺎ ﺑﺘﻘﻮﻟﻲ ﺣﺎﺟﺔ
- ﺯﻳﻨﺐ ﺑﺎﺳﺘﻐﺮﺍﺏ : ﺍﻳﻪ ﻳﺎ ﻧﺪﻯ ﻣﺶ ﺳﻤﻌﺎﻧﻲ ﻛﻞ ﺩﻩ
- ﻧﺪﻯ ﺑﺘﺮﺩﺩ : ﺁﺁﺁ ... ﻣﻌﻠﺶ ﻳﺎ ﻣﺎﻣﺎ ﻛﻨﺖ ﻏﻔﻠﺖ ﻭﻛﺪﻩ
- ﺯﻳﻨﺐ : ﺃﻫﺎ ... ﻃﻴﺐ ﻳﺎﻻ ﻋﺸﺎﻥ ﻧﻠﺤﻖ ﻧﻔﻄﺮ
- ﻧﺪﻯ : ﺣﺎﺿﺮ ..
- ﺯﻳﻨﺐ ﻣﻮﺟﻬﺔ ﺣﺪﻳﺜﻬﺎ ﻟﻨﻴﺮﺓ : ﻭﺍﻧﺘﻲ ﻳﺎ ﺳﺖ ﺍﻟﻌﺮﺍﻳﺲ ، ﻗﻮﻭﻭﻣﻲ ﺑﻘﻰ ﺑﻼﺵ ﺩﻟﻊ
- ﻧﻴﺮﺓ ﻭﻫﻲ ﺗﺰﻡ ﺷﻔﺘﻴﻬﺎ : ﻣﺎﺷﻲ ، ﺧﻼﺹ ﺳﻤﻌﺖ
- ﻧﺪﻯ ﻣﺘﺴﺎﺋﻠﺔ : ﺍﻭﻣﺎﻝ ﻓﻴﻦ ﺗﻮﺗﺎ ؟؟
- ﺯﻳﻨﺐ : ﻣﻊ ﺃﺑﻮﻛﻲ ﻣﻦ ﺍﻟﺼﺒﺢ ﺑﻴﺠﻬﺰﻭﺍ ﺍﻟﻠﻲ ﻧﺎﻗﺺ
- ﻧﺪﻯ : ﺃﻫــﺎ
ﺍﻧﺘﻬﺖ ﺯﻳﻨﺐ ﻭﺍﺑﻨﺘﻴﻬﺎ ﻣﻦ ﺍﻻﻓﻄﺎﺭ ، ﺛﻢ ﺍﺭﺗﺪﻳﺎ ﻣﻼﺑﺴﻬﻦ ﻭﺗﻮﺟﻬﻦ ﺇﻟﻰ ﻣﺮﻛﺰ ﺍﻟﺘﺠﻤﻴﻞ ﺍﻟﻤﻠﺤﻖ ﺑﺎﻟﻘﺮﻳﺔ ﻭﻣﻌﻬﻦ ﺣﻘﺎﺋﺐ ﺍﻟﻤﻼﺑﺲ ....
......................
ﻓﻲ ﺗﻠﻚ ﺍﻷﺛﻨﺎﺀ ﺗﺄﻛﺪ ﻳﻮﺳﻒ ﻣﻦ ﺗﺮﻙ ﻋﻼﺀ ﻟﻠﻘﺮﻳﺔ ﻧﻬﺎﺋﻴﺎً ، ﺑﺎﻻﺿﺎﻓﺔ ﻟﺘﺠﻬﻴﺰ ﺍﻟﻤﻔﺎﺟﺄﺓ ﺍﻟﺘﻲ ﺃﻋﺪﻫﺎ ﺧﺼﻴﺼﺎً ﻟﻨﺪﻯ ﺣﺒﻴﺒﺔ ﺍﻟﺮﻭﺡ ..
ﻛﺎﻥ ﻣﺮﻭﺍﻥ ﻳﺤﺘﺴﺐ ﺍﻟﺪﻗﺎﺋﻖ ﺑﻞ ﺍﻟﺜﻮﺍﻧﻲ ﻟﻜﻲ ﻳﻜﻮﻥ ﻣﻊ ﻗﻄﺘﻪ ﺍﻟﺸﺮﺳﺔ ﻧﻴﺮﺓ ، ﺍﻟﺘﻲ ﻃﺎﻟﻤﺎ ﻋﺸﻖ ﺟﻨﻮﻧﻬﺎ ﻭﺗﻤﺮﺩﻫﺎ ﻭﻋﻨﺎﺩﻫﺎ ..
ﺗﻘﺎﺑﻞ ﺻﻼﺡ ﻣﻊ ﺳﻠﻴﻢ ﻭﻓﻬﻤﻲ ﻓﻲ ﺍﻻﺳﺘﻘﺒﺎﻝ ﺑﻌﺪ ﺃﻥ ﺃﻭﺻﻞ ﻓﺎﻃﻴﻤﺎ ﺇﻟﻰ ﻣﺮﻛﺰ ﺍﻟﺘﺠﻤﻴﻞ ، ﻭﺑﺪﺃﻭﺍ ﻳﺮﺗﺒﻮﻥ ﺳﻮﻳﺎً ﻟﻼﺳﺘﻌﺪﺍﺩﺍﺕ ﺍﻟﻨﻬﺎﺋﻴﺔ ﻟﺤﻔﻞ ﺯﻓﺎﻑ ﺍﻟﻠﻴﻠﺔ ، ﻭﻛﻴﻔﻴﺔ ﺍﺳﺘﻘﺒﺎﻝ ﺍﻟﻤﺪﻋﻮﻳﻦ ﻭﺍﻟﺘﺮﺣﻴﺐ ﺑﻬﻢ ﻋﻠﻰ ﺃﻋﻠﻰ ﻣﺴﺘﻮﻯ .. ﺗﻢ ﺍﻻﺗﻔﺎﻕ ﻣﻊ ﺍﻟﻤﺄﺫﻭﻥ ﻟﻠﺤﻀﻮﺭ ﺑﺎﻛﺮ ﻟﻠﻘﺮﻳﺔ ﻟﻌﻘﺪ ﺍﻟﻘﺮﺍﻥ ...
ﻛﺎﻥ ﺳﻠﻴﻢ ﻳﺮﻳﺪ ﺍﺑﻼﻍ ﺻﻼﺡ ﺑﺄﻣﺮ ﻫــﺎﻡ ، ﻟﻢ ﻳﺮﺩ ﺃﻥ ﻳﺆﺟﻠﻪ ، ﻭﻟﻜﻦ ﻛﺎﻥ ﻳﻨﺘﻈﺮ ﻓﻘﻂ ﺍﻟﻔﺮﺻﺔ ﺍﻟﻤﻨﺎﺳﺒﺔ ﻭﻫﺎ ﻗﺪ ﺃﺗﺖ
- ﺳﻠﻴﻢ : ﺍﻳﺘﺎﺫ ﺻﻼﺡ ﺃﻧﺎ ﻛﻨﺖ ﻋﺎﻭﺯﻙ ﻓﻲ ﻣﻮﺿﻮﻉ ﻣﻬﻢ
- ﺻﻼﺡ : ﺧﻴﺮ ﻳﺎ ﺳﻠﻴﻢ ﺑﻴﻪ
- ﺳﻠﻴﻢ : ﺍﻟﺤﻘﻴﻘﺔ ﺃﻧﺎ ﻛﻨﺖ ﻋﺎﻭﺯﻙ ﺗﺼﻔﻲ ﺷﻐﻠﻚ ﻓﻲ ﺩﺑﻲ ﻭﺗﺠﻲ ﺗﻌﻴﺶ ﻫﻨﺎ ﺗﺎﻧﻲ
- ﺻﻼﺡ ﺑﺎﺳﺘﻐﺮﺍﺏ : ﻫــﻪ
- ﻓﻬﻤﻲ ﻣﺆﻳﺪﺍً : ﺍﻳﻮﻩ ، ﻭﺍﻧﺎ ﻛﻤﺎﻥ ﻋﺎﻭﺯﻙ ﺗﻌﻤﻞ ﻛﺪﻩ
- ﺳﻠﻴﻢ ﻣﻜﻤﻼً : ﻣﺎﻓﻴﺶ ﺩﺍﻋﻲ ﻟﻠﻐﺮﺑﺔ ، ﻛﻔﺎﻳﺔ ﺍﻭﻱ ﺍﻟﺴﻨﻴﻦ ﺍﻟﻠﻲ ﻓﺎﺗﺖ، ﻟﻴﻪ ﻣﺘﺒﺪﺃﺵ ﻣﻌﺎﻧﺎ ﻫﻨﺎ ﻓﻲ ﺑﻠﺪﻙ
- ﺻﻼﺡ : ﻭﺍﻟﻠﻪ ﻫﻮ ﻫﻴﺒﻘﻰ ﺻﻌﺐ ﺣﺎﻟﻴﺎً ﻭﺧﺼﻮﺻﺎً ﺍﻥ ﻋﻨﺪﻱ ﺍﻟﺘﺰﺍﻣﺎﺕ ﻭﺷﻐﻞ ﺃﻧﺎ ﻣﺮﺑﻂ ﻋﻠﻴﻪ
- ﺳﻠﻴﻢ : ﻣﻌﻠﺶ ﺣﺎﻭﻝ
- ﺻﻼﺡ : ﺭﺑﻨﺎ ﻳﺴﻬﻞ ، ﺃﻧﺎ ﻫﺎﺷﻮﻑ ﻣﻊ ﻧﺪﻯ ﺑﻨﺘﻲ ﻫﻨﻌﻤﻞ ﺍﻳﻪ ﻭﺁﺁﺁ ...
- ﺳﻠﻴﻢ : ﺃﻫﻮﻭ ﻧﺪﻯ ﺑﻘﻰ ﺍﻟﻤﻮﺿﻮﻉ ﺍﻟﺘﺎﻧﻲ ﺍﻟﻠﻲ ﺃﻧﺎ ﻋﺎﻭﺯ ﺃﻓﺎﺗﺤﻚ ﻓﻴﻪ
- ﺻﻼﺡ : ﻣﺎﻟﻬﺎ ؟؟
- ﺳﻠﻴﻢ : ﻣﻦ ﻏﻴﺮ ﻣﻘﺪﻣﺎﺕ ﻭﻛﻼﻡ ﻛﺘﻴﺮ ﻳﻮﺳﻒ ﺍﺑﻨﻲ ﻋﺎﻭﺯ ﻳﺘﺠﻮﺯﻫﺎ
- ﺻﻼﺡ : ﻫــﺎﻩ
- ﺳﻠﻴﻢ : ﻭﻫﻮ ﻧﺎﻭﻱ ﻳﻄﻠﺐ ﺍﻳﺪﻫﺎ ﺍﻥ ﺷﺎﺀ ﺍﻟﻠﻪ ﺍﻟﻨﻬﺎﺭﺩﺓ ﻣﻨﻚ ﻭﻣﻨﻬﺎ
- ﺻﻼﺡ : ﺑﺲ ﺁﺁﺁﺁ ...
- ﻓﻬﻤﻲ : ﻣﻦ ﻏﻴﺮ ﺑﺲ ﻳﺎ ﺍﺳﺘﺎﺫ ﺻﻼﺡ ، ﻳﻮﺳﻒ ﺯﻱ ﻣﺮﻭﺍﻥ ﺑﺎﻟﻈﺒﻂ ﻣﺎﺑﺘﺨﻴﺮﺵ ﻋﻨﻪ ، ﺑﺎﻟﻌﻜﺲ ﻳﻤﻜﻦ ﻫﻮ ﻋﺎﻗﻞ ﻋﻦ ﻣﺮﻭﺍﻥ ﺍﻟﻤﺠﻨﻮﻥ
- ﺳﻠﻴﻢ : ﻫﻬﻬﻬﻬﻬﻬﻬﻬﻬﻪ ﻣﺘﻘﻮﻟﺶ ﻛﺪﻩ ﻳﺎ ﻓﻬﻤﻲ ، ﺍﺑﻨﻚ ﻋﺎﻗﻞ
- ﻓﻬﻤﻲ : ﻷ ﺃﻧﺎ ﻋﺎﺭﻓﻪ ﻛﻮﻳﺲ ، ﻭﺍﻧﺖ ﻣﺠﺮﺑﻪ ﻳﺎ ﺃﺳﺘﺎﺫ ﺻﻼﺡ
- ﺻﻼﺡ : ﺃﻩ ﻓﻌﻼ ..
- ﺳﻠﻴﻢ : ﻫﺎﻗﻮﻟﺖ ﺍﻳﻪ
- ﺻﻼﺡ : ﻭﺍﻟﻠﻪ ﻣﺶ ﻋﺎﺭﻑ ، ﺃﺻﻞ ﻧﺪﻯ ﺩﻱ ﺍﻳﺪﻱ ﻭﺭﺟﻠﻲ ﻓﻲ ﺍﻟﺸﻐﻞ
- ﺳﻠﻴﻢ : ﻭﻫﻲ ﻫﺘﻔﻀﻞ ﺑﺮﺿﻮﻩ ﻛﺪﻩ ، ﺑﺲ ﻫﻨﺎ ﻭﺳﻂ ﺃﻫﻠﻬﺎ ﻭﻣﻊ ﺟﻮﺯﻫﺎ ﺍﻥ ﺷﺎﺀ ﺍﻟﻠﻪ
- ﺻﻼﺡ : ﺭﺑﻨﺎ ﻳﻘﺪﻡ ﺍﻟﻠﻲ ﻓﻴﻪ ﺍﻟﺨﻴﺮ ، ﺧﻠﻮﻧﺎ ﺍﻷﻭﻝ ﻧﺸﻮﻑ ﺍﻟﻤﺠﻨﻮﻥ ﻭﺍﻟﻬﺒﻠﺔ
ﻋﻠﺖ ﻗﻬﻘﻬﺎﺕ ﺳﻠﻴﻢ ﻭﻓﻬﻤﻲ ﻋﻠﻰ ﺭﺩ ﺻﻼﺡ ، ﻭﺍﺳﺘﻤﺮﻭﺍ ﻓﻲ ﺍﻧﻬﺎﺀ ﺗﺮﺗﻴﺒﺎﺕ ﺍﻟﺰﻓﺎﻑ ..
....................
ﺣﻞ ﺍﻟﻤﺴﺎﺀ ﺑﻄﻴﺌﺎُ ﻋﻠﻰ ﻣﺮﻭﺍﻥ ﻭﺳﺮﻳﻌﺎً ﺟﺪﺍً ﻋﻠﻰ ﻧﻴﺮﺓ ..
ﺑﺪﺃ ﺍﻟﻤﺪﻋﻮﻳﻦ ﻳﺘﻮﺍﻓﺪﻭﻥ ﻋﻠﻰ ﺍﻟﻘﺮﻳﺔ ﺍﻟﺴﻴﺎﺣﻴﺔ ، ﻭﺭﺣﺐ ﺑﻬﻢ ﻛﻼً ﻣﻦ ﻓﻬﻤﻲ ﻭﺻﻼﺡ .. ﻭﻛﺎﻥ ﻳﻘﻒ ﺇﻟﻰ ﺟﻮﺍﺭﻫﻢ ﺳﻠﻴﻢ ..
ﺇﺯﺩﺍﻥ ﺣﻤﺎﻡ ﺍﻟﺴﺒﺎﺣﺔ ﺑﺎﻟﺒﺎﻟﻮﻧﺎﺕ ﺫﺍﺕ ﺍﻷﻟﻮﺍﻥ ﺍﻟﺒﻴﻀﺎﺀ ﻭﺍﻷﻭﻓﻮﺍﻳﺖ ﻭﺍﻟﻔﻀﻴﺔ ، ﺑﻴﻨﻤﺎ ﻋﻠﺖ ﺍﻟﺸﺮﺍﺋﻂ ﻭﺍﻷﻗﻤﺸﺔ ﺍﻟﺸﻔﺎﻓﺔ ﻭﺍﻟﻤﻌﻘﻮﺩﺓ ﺃﻋﻤﺪﺓ ﺍﻻﻧﺎﺭﺓ ﺣﻮﻝ ﺍﻟﺤﻤﺎﻡ .. ﻭﺿﻌﺖ ﺍﻟﻌﺪﻳﺪ ﻣﻦ ﺑﺎﻗﺎﺕ ﺍﻟﻮﺭﺩ ﺍﻟﺒﻴﻀﺎﺀ ﻭﺍﻟﻜﺒﻴﺮﺓ ﻋﻠﻰ ﺍﻷﺭﻛﺎﻥ ، ﻭﻛﺬﻟﻚ ﺍﻟﺼﻐﻴﺮﺓ ﻣﻨﻬﺎ ﻋﻠﻰ ﺍﻟﻄﺎﻭﻻﺕ .. ﻓﻲ ﺣﻴﻦ ﺍﺯﺩﺍﻧﺖ ﺍﻟﻤﻘﺎﻋﺪ ﺑﺎﻟﻔﻴﻮﻧﻜﺎﺕ ﺍﻟﺒﻴﻀﺎﺀ ﻭﺍﻟﺴﻮﺩﺍﺀ ..
ﺗﻨﺎﺛﺮﺕ ﺍﻻﺿﺎﺀﺓ ﺍﻟﺨﺎﻓﺘﺔ ﺑﺸﻜﻞ ﺭﻗﻴﻖ ﻭﻣﻼﺋﻜﻲ ﻋﻠﻰ ﻃﻮﻝ ﺍﻟﻤﻜﺎﻥ .. ﻭﻧُﺜﺮﺕ ﺍﻟﻮﺭﻭﺩ ﺍﻟﻤﻘﻄﻮﻓﺔ ﻋﻠﻰ ﺍﻟﺠﺎﻧﺒﻴﻦ ﻟﺘﺸﻜﻞ ﻣﻤﺮﺍً ﻟﻠﻌﺮﻭﺳﻴﻦ ..
ﻛﺎﻧﺖ ﺍﻟﻤﻮﺳﻴﻘﻰ ﺍﻟﻬﺎﺩﺋﺔ ﺗﻀﻔﻲ ﺟﻮﺍً ﻣﻦ ﺍﻟﺴﺤﺮ ﻋﻠﻰ ﺍﻟﻤﻜﺎﻥ ..
ﺍﺭﺗﺴﻤﺖ ﺍﻟﺴﻌﺎﺩﺓ ﻭﺍﻟﺴﺮﻭﺭ ﻋﻠﻰ ﻭﺟﻮﻩ ﺍﻟﺤﺎﺿﺮﻳﻦ، ﻓﻘﺪ ﻛﺎﻥ ﺍﻟﺪﻳﻜﻮﺭ ﺭﻗﻴﻘﺎً ﻭﻟﻜﻨﻪ ﻣﻤﻴﺰﺍً ..
.......................
ﺗﻮﺟﻪ ﻣﺮﻭﺍﻥ ﺑﺼﺤﺒﺔ ﻳﻮﺳﻒ ﺇﻟﻰ ﻣﺮﻛﺰ ﺍﻟﺘﺠﻤﻴﻞ ﻻﺻﻄﺤﺎﺏ ﺍﻟﻌﺮﻭﺱ ﺍﻟﺠﻤﻴﻠﺔ ﻧﻴﺮﺓ ﻭﺍﺧﺘﻬﺎ ﺍﻟﺮﻗﻴﻘﺔ ﻧﺪﻯ ..
ﺍﻃﻤﺄﻥ ﻳﻮﺳﻒ ﻣﻦ ﻣﺮﻭﺍﻥ ﻋﻠﻰ ﺗﺠﻬﻴﺰ ﻣﻔﺎﺟﺄﺓ ﺍﻟﻠﻴﻠﺔ ﻟﻨﺪﻯ ﻭﻭﺿﻌﻬﺎ ﺿﻤﻦ ﺗﺮﺗﻴﺒﺎﺕ ﺍﻟﺤﻔﻞ ..
- ﻣﺮﻭﺍﻥ ﻏﺎﻣﺰﺍ : ﻛﻠﻪ ﺗﻤﺎﻡ ، ﺍﻃﻤﻦ
- ﻳﻮﺳﻒ ﺑﻘﻠﻖ : ﺭﺑﻨﺎ ﻳﺴﺘﺮﺭﺭﺭ .. ﺑﺲ ﺃﻧﺎ ﻣﻼﺣﻆ ﺍﻧﻚ ﺑﺎﺭﺩ ﻳﻌﻨﻲ ﻭﻣﺶ ﻣﺘﻮﺗﺮ
- ﻣﺮﻭﺍﻥ : ﺃﺻﻞ ﺃﻧﺎ ﺩﺍﺧﻞ ﻋﻠﻰ ﺣﺮﺏ ﺯﻱ ﻣﺎ ﻗﻮﻟﺘﻠﻚ ﻓﻼﺯﻡ ﺍﻛﻮﻥ ﺑﺎﺭﺩ ﻷﻗﺼﻰ ﺩﺭﺟﺔ
- ﻳﻮﺳﻒ : ﺍﻫﻮﻭ ﺍﻧﺎ ﺧﺎﻳﻒ ﻣﻨﻜﻮ ﺍﻧﺘﻮ ﺍﻻﺗﻨﻴﻦ ، ﻣﺠﻨﻮﻥ ﺍﺗﻠﻢ ﻉ ﺷﻌﻨﻮﻧﺔ ، ﻫﺘﻜﻮﻥ ﺍﻳﻪ ﺍﻟﻨﺘﻴﺠﺔ
- ﻣﺮﻭﺍﻥ : ﻫﻬﻬﻬﻬﻬﻬﻬﻬﻬﻬﻬﻪ ﺩﻣــــﺎﺭ ﺷﺎﻣﻞ ﻳﺎ ﺑﺮﻧﺲ
- ﻳﻮﺳﻒ : ﻣﺶ ﺑﻘﻮﻟﻚ
- ﻣﺮﻭﺍﻥ ﻭﻫﻮ ﻳﻨﻈﺮ ﻓﻲ ﺳﺎﻋﺘﻪ : ﻫﻤﺎ ﺍﺗﺄﺧﺮﻭﺍ ﻭﻻ ﺍﺣﻨﺎ ﺍﻟﻠﻲ ﺟﻴﻨﺎ ﺑﺪﺭﻱ
- ﻳﻮﺳﻒ ﻣﺎﺯﺣﺎً : ﻣﻤﻢ .. ﻷ ﻳﺪﻭﺏ ﻋﻘﺒﺎﻝ ﻣﺎ ﻳﻠﺤﻘﻮﺍ ﻳﺼﻨﻔﺮﻭﺍ ﺍﻟﻌﺮﻭﺳﺔ ﻭﻳﻤﺤﺮﻭﺍ ﻭﺗﺎﺧﺪ ﻭﺵ ﻣﻌﺠﻮﻥ
- ﻣﺮﻭﺍﻥ ﺳﺎﺧﺮﺍً : ﺧـــﻔﺔ ﻳﺎ ﺟﻮﻭ .. ﻟﻴﻚ ﻳﻮﻡ ، ﻣﺎﺗﺨﻠﻨﻴﺶ ﺃﻋﻤﻞ ﻣﻌﺎﻙ ﺍﻟﺴﻠﻴﻤﺔ
- ﻳﻮﺳﻒ ﻭﻫﻮ ﻳﺸﻴﺮ ﺑﻴﺪﻩ : ﻭﻋﻠﻰ ﺍﻳﻪ ، ﺃﻧﺎ ﺑﻘﻮﻝ ﺍﻟﻄﻴﺐ ﺃﺣﺴﻦ ..
ﺑﻌﺪ ﻟﺤﻈﺎﺕ ﻗﻠﻴﻠﺔ ﺧﺮﺟﺖ ﻓﺎﻃﻴﻤﺎ ﻭﻫﻲ ﺗﺮﺗﺪﻱ ﻓﺴﺘﺎﻧﻬﺎ ﺫﻭ ﺍﻟﻠﻮﻧﻴﻦ ﺍﻷﺳﻮﺩ ﻭﺍﻟﻔﻀﻲ ﻭ ..
- ﻓﺎﻃﻴﻤﺎ : ﺍﻟﻌﺮﻭﺳﺔ ﺧﻠﺼﺖ
- ﻣﺮﻭﺍﻥ : ﻫﺎﺯﻏﺮﻁ ﻳﺎ ﻧﺎﺱ ، ﺍﻭﻣﺎﻝ ﻣﺎﺧﺮﺟﺘﺸﻠﻴﻪ ؟؟؟
- ﻓﺎﻃﻴﻤﺎ : ﺑﺘﺤﻄﻠﻬﺎ ﺍﻟﺴﺖ ﺍﻟﻄﺮﺣﺔ ﺟﻮﺍ ﻭﺑﺘﺸﺒﻜﻬﺎ ﺑﺎﻟﺪﺑﺎﺑﻴﺲ
- ﻣﺮﻭﺍﻥ ﻣﺘﻌﺠﺒﺎً : ﺍﻟﺴﺖ .. ﻣﻤﻢ .. ﻃﻴﺐ !
ﺗﻌﺎﻟﺖ ﺍﻟﺰﻏﺎﺭﻳﻂ ﻓﻲ ﺍﻟﺪﺍﺧﻞ ، ﺛﻢ ﺧﺮﺟﺖ ﺑﻌﺪﻫﺎ ﻋﺒﻴﺮ ﻭﺃﺣﻼﻡ ﻭﻟﺤﻘﺖ ﺑﻬﻢ ﺯﻳﻨﺐ ﻭﺍﻟﺴﻌﺎﺩﺓ ﺟﻠﻴﺔ ﻋﻠﻰ ﻭﺟﻮﻫﻬﻦ ﺟﻤﻴﻌﺎً ...
- ﺃﺣﻼﻡ ﻣﺒﺘﺴﻤﺔ : ﺍﻟﻒ ﻣﺒﺮﻭﻙ ﻳﺎ ﺑﻨﻲ ، ﻋﺮﻭﺳﺘﻚ ﺯﻱ ﺍﻟﻘﻤﺮ
- ﻣﺮﻭﺍﻥ : ﺍﻟﻠﻪ ﻳﺒﺎﺭﻙ ﻓﻴﻜﻲ ﻳﺎ ﻣﺎﻣﺎ ، ﺑﺲ ﻫﻲ ﻓﻴﻦ ؟
- ﻋﺒﻴﺮ : ﻣﺴﺘﻌﺠﻞ ﻋﻠﻰ ﺍﻳﻪ ، ﻫﻲ ﻃﺎﻟﻌﺔ ﻭﺭﺍﻧﺎ
- ﻣﺮﻭﺍﻥ : ﺃﻧﺎ ﻣﺶ ﻣﺴﺘﻌﺠﻞ ، ﺃﻧﺎ ﺑﺲ ﻋﺎﻭﺯ ﺃﻃﻤﻦ ﻓﻠﻮﺳﻲ ﻣﺎﺭﺣﺘﺶ ﻫﺪﺭ
- ﺃﺣﻼﻡ ﻭﻫﻲ ﺗﺨﺒﻄﻪ ﻓﻲ ﻛﺘﻔﻪ : ﻭﻟـــﺪ
- ﻣﺮﻭﺍﻥ : ﺑﻬﺰﺭ ﻭﺍﻟﻠﻪ ﻳﺎ ﻣﺎﻣﺎ
- ﺯﻳﻨﺐ : ﺍﻟﻠﻬﻢ ﺻﻠﻲ ﻋﻠﻰ ﺍﻟﻨﺒﻲ ، ﺣﺼﻮﺓ ﻓﻲ ﻋﻴﻦ ﺍﻟﻠﻲ ﺷﺎﻓﻚ ﻳﺎ ﻧﻴﺮﺓ ﻭﻣﺼﻼﺵ ﻉ ﺍﻟﻨﺒﻲ .. ﻋﻴﻦ ﺍﻟﺤﺴﻮﺩ ﻓﻴﻬﺎ ﻋﻮﺩ
- ﻣﺮﻭﺍﻥ : ﻋﻠﻴﻪ ﺍﻟﺼﻼﺓ ﻭﺍﻟﺴﻼﻡ ، ﺍﻳﻮﻩ ﻋﺮﻓﻨﺎ ﻋﻮﺩ ﻭﻛﻤﺎﻧﺠﺔ ﻭﺗﺨﺖ ﺷﺮﻗﻲ ﺑﺤﺎﻟﻪ ، ﻓﻴﻦ ﺑﻘﻰ ﺍﻟﻌﺮﻭﺳﺔ
- ﺯﻳﻨﺐ : ﻃﺎﻟﻌﺔ ﻭﺭﺍﻳﺎ ﻳﺎ ﺑﻨﻲ
- ﻣﺮﻭﺍﻥ ﺳﺎﺧﺮﺍً : ﻫﻲ ﺑﺘﻄﻊ ﻣﻨﻴﻦ ﺑﺎﻟﻈﺒﻂ ، ﻣﻦ ﺗﺤﺖ ﺍﻷﺭﺽ ..
- ﻳﻮﺳﻒ ﺑﺼﻮﺕ ﺧﺎﻓﺖ : ﺍﺗﻠﻢ ﺑﺪﻝ ﻣﺎ ﺣﻤﺎﺗﻚ ﺗﺴﺒﺨﻠﻚ
- ﻣﺮﻭﺍﻥ ﺑﺜﻘﺔ : ﺗﺴﺒﺦ ﻟﻤﻴﻦ ﻳﺎ ﻋﻢ ، ﺩﻩ ﺃﻧﺎ ﺭﺍﺟﻞ ﺣﻤﺶ ، ﻫـــﻊ ، ﺍﻧﺖ ﻣﺶ ﻋﺎﺭﻓﻨﻲ ﻭﻻ ﺍﻳﻪ
- ﺯﻳﻨﺐ ﻣﻘﺎﻃﻌﺔ : ﻣـــﺮﻭﺍﻥ !
- ﻣﺮﻭﺍﻥ ﺑﺼﻮﺕ ﺭﻗﻴﻖ : ﺍﻳﻮﻩ ﻳﺎ ﻃﻨﻂ
- ﻳﻮﺳﻒ ﻣﺎﺯﺣﺎً : ﻷ ﻭﺍﺿﺢ ﻓﻌﻼً ﺍﻧﻚ ﺣﻤــﺶ
ﺩﻟﻔﺖ ﻧﺪﻯ ﺃﻭﻻً ﻭﻫﻲ ﺗﺮﺗﺪﻱ ﻓﺴﺘﺎﻧﻬﺎ ﺫﻭ ﺍﻟﻠﻮﻥ ﺍﻟﺰﻳﺘﻲ ، ﻛﺎﻧﺖ ﺭﺍﺋﻌﺔ ﺍﻟﺠﻤﺎﻝ ﻓﻴﻪ ﺣﻘﺎً ، ﺧﻄﻔﺖ ﺃﻋﻴﻦ ﻳﻮﺳﻒ ﻭﺟﻌﻠﺘﻬﺎ ﻣﺴﻠﻄﺔ ﻓﻘﻂ ﻋﻠﻴﻬﺎ .. ﻟﻢ ﻳﺮﻓﻊ ﻧﻈﺮﻩ ﻋﻨﻬﺎ ، ﻇﻞ ﻳﺘﺎﺑﻌﻬﺎ ﻭﻫﻲ ﺗﺘﻤﺎﻳﻞ ﻓﻲ ﻣﺸﻴﺘﻬﺎ ﺇﻟﻰ ﺃﻥ ﻭﻗﻔﺖ ﺃﻣﺎﻣﻪ ﻭﺃﻃﺮﻗﺖ ﺭﺃﺳﻬﺎ ﻭ ..
- ﻧﺪﻯ ﺑﺼﻮﺕ ﻋﺬﺏ : ﻧﻴﺮﺓ ﺟﺎﻳﺔ
- ﻣﺮﻭﺍﻥ : ﺃﻧﺎ ﻋﻤﺎﻝ ﺃﺳﻤﻊ ﺍﻧﻬﺎ ﺟﺎﻳﺔ ﻭﻃﺎﻟﻌﺔ ﺑﻘﺎﻟﻲ ﺯﻣﻦ ﻟﻜﻦ ﻣﺸﻮﻓﺘﺶ ﺣﺎﺟﺔ
ﻭﻣﺎ ﻫﻲ ﺇﻻ ﺛﻮﺍﻧﻲ ﻣﻌﺪﻭﺩﺓ ﺣﺘﻰ ﺧﺮﺟﺖ ﻧﻴﺮﺓ ﻣﻦ ﺍﻟﺪﺍﺧﻞ ،ﻭﺍﻧﻄﻠﻘﺖ ﺍﻟﺰﻏﺎﺭﻳﻂ ﻋﺎﻟﻴﺎً ﻓﻲ ﺍﻟﻤﻜﺎﻥ ..
ﺗﺄﻣﻞ ﻣﺮﻭﺍﻥ ﻧﻴﺮﺓ ﻭﺗﻔﺤﺺ ﻛﻞ ﺟﺰﺀ ﻣﻨﻬﺎ ﺑﺘﻤﻌﻦ ﺷﺪﻳﺪ ...
ﻟﻘﺪ ﺧﺮﺟﺖ ﺇﻟﻴﻪ ﻧﺪﻯ ﻭﻫﻲ ﺗﺮﺗﺪﻱ ﻓﺴﺘﺎﻥ ﺯﻓﺎﻓﻬﺎ ﺍﻷﻭﻓﻮﺍﻳﺖ ﺫﻭ ﺍﻟﺼﺪﺭ ﺷﺒﻪ ﺍﻟﻌﺎﺭﻱ ﻭﺍﻟﻜﺘﻔﻴﻦ ﺍﻟﻤﻜﺸﻮﻓﻴﻦ ، ﻛﺎﻧﺖ ﺗﻀﻊ ﻃﺮﺣﺔ ﻃﻮﻳﻠﺔ ﻭﺷﻔﺎﻓﺔ ﻣﻦ ﺍﻟﺸﻴﻔﻮﻥ ﺍﻟﻤﺮﺻﻊ ﺑﺎﻟﻸﻟﻲﺀ ﺍﻟﺮﻗﻴﻘﺔ ﻋﻠﻰ ﺷﻌﺮﻫﺎ ﺍﻟﻤﻌﻘﻮﺹ ﻟﻠﺨﻠﻒ .. ﺗﺮﻛﺖ ﺑﻌﺾ ﺍﻟﺨﺼﻼﺕ ﺍﻟﻨﺎﻋﻤﺔ ﺗﻨﺴﺎﺏ ﻋﻠﻰ ﻭﺟﻨﺘﻴﻬﺎ ، ﻭﺿﻌﺖ ﻗﻠﻴﻼً ﻣﻦ ﻣﺴﺎﺣﻴﻖ ﺍﻟﺘﺠﻤﻴﻞ ﺍﻟﺘﻲ ﺃﺿﻔﺖ ﻟﻤﺤﺔ ﻣﺜﻴﺮﺓ ﻭ ﺟﻤﻴﻠﺔ ﻋﻠﻰ ﻭﺟﻬﻬﺎ ﺍﻟﻐﺎﺿﺐ .. ﻧﻈﺮﺕ ﺇﻟﻴﻪ ﻧﻴﺮﺓ ﺑﻨﻈﺮﺍﺕ ﻣﻠﻴﺌﺔ ﺑﺎﻟﺘﺤﺪﻱ ﻭﺍﻟﻌﻨﺎﺩ .
ﺍﻣﺘﻌﺾ ﻭﺟﻪ ﻣﺮﻭﺍﻥ ﻟﺮﺅﻳﺔ ﻧﻴﺮﺓ ﻭﻫﻲ ﺗﺘﺤﺪﺍﻩ ﺑﺬﻟﻚ ﺍﻟﺸﻜﻞ ﺍﻟﺼﺎﺭﺥ ، ﻭﻟﻜﻨﻪ ﻛﺎﻥ ﻣﺘﻴﻘﻨﺎً ﺍﻧﻬﺎ ﺗﻌﻤﺪﺕ ﻓﻌﻞ ﻫﺬﺍ ﻓﻘﻂ ﻟﺘﺜﻴﺮ ﻏﻀﺒﻪ ، ﻟﺬﺍ ﺗﺤﺎﻣﻞ ﻋﻠﻰ ﻧﻔﺴﻪ ﻭﺍﺑﺘﺴﻢ ﻟﻬﺎ ﻭﻛﺄﻧﻪ ﺃﻋﻠﻦ ﺑﻬﺬﺍ ﻗﺒﻮﻟﻪ ﻟﻠﺘﺤﺪﻱ
- ﺯﻳﻨﺐ ﻭﺍﻻﺑﺘﺴﺎﻣﺔ ﺗﻌﻠﻮ ﺛﻐﺮﻫﺎ : ﺍﻳﻪ ﺭﺃﻳﻚ ﻓﻲ ﻋﺮﻭﺳﺘﻨﺎ ﺍﻟﺤﻠﻮﺓ ﻳﺎ ﻋﺮﻳﺲ
- ﻣﺮﻭﺍﻥ : ﻗﻤـــﺮ ﻳﺎ ﻃﻨﻂ ، ﻭﻫﻲ ﺩﻱ ﻣﺤﺘﺎﺟﺔ ﻛﻼﻡ
- ﺯﻳﻨﺐ : ﻋﺸﺎﻥ ﺗﻌﺮﻑ ﺑﺲ
- ﻣﺮﻭﺍﻥ : ﺍﻟﺤﻤﺪﻟﻠﻪ ﺃﻧﺎ ﻛﺪﻩ ﺍﻃﻤﻨﺖ ﺍﻥ ﻓﻠﻮﺳﻲ ﺑﻘﺖ ﻓﻲ ﺍﻟﺤﻔﻆ ﻭﺍﻟﺼﻮﻥ
ﺍﻗﺘﺮﺏ ﻣﺮﻭﺍﻥ ﻣﻦ ﻧﻴﺮﺓ ﺛﻢ ﺃﻣﺴﻚ ﻛﻒ ﻳﺪﻫﺎ ﻭﺍﻧﺤﻨﻰ ﻟﻬﺎ ﻭﻗﺒﻠﻬﺎ ﺑﺮﻗﺔ ﻭ ..
- ﻣﺮﻭﺍﻥ ﺑﺼﻮﺕ ﻫﺎﻣﺲ : ﻋﺎﻭﺯﻙ ﺗﻜﻮﻧﻲ ﺟﺎﻣﺪﺓ ﻛﺪﻩ ﻟﻸﺧﺮ
- ﻧﻴﺮﺓ ﻭﻫﺐ ﺗﺒﺘﺴﻢ ﺍﺑﺘﺴﺎﻣﺔ ﻣﺼﻄﻨﻌﺔ ﻭﺑﺼﻮﺕ ﻫﺎﻣﺲ : ﺩﻩ ﺃﻧﺎ ﻫﺎﻃﻠﻊ ﺍﻟﺒﻠﻰ ﺍﻷﺯﺭﻕ ﻋﻠﻰ ﺟﺘﺘﻚ
- ﻣﺮﻭﺍﻥ ﻣﺤﻮﻻً ﺍﻏﺎﻇﺘﻬﺎ : ﻳﺎ ﺭﻳﺖ ﻛﻞ ﺍﻷﻟﻮﺍﻥ ﻣﺶ ﺑﺲ ﺍﻷﺯﺭﻕ
- ﻳﻮﺳﻒ ﻣﻦ ﺍﻟﺨﻠﻒ : ﻣﺶ ﻭﻗﺖ ﺣﺐ ﻭﺭﻭﻣﺎﻧﺴﻴﺔ ، ﻳﺎﻻ ﻭﺭﺍﻧﺎ ﻓﺮﺡ ﻭﻣﻌﺎﺯﻳﻢ ﻣﺴﺘﻨﻴﻦ
- ﻣﺮﻭﺍﻥ : ﺍﻳﻮﻩ ﺻﺢ .. ﻳﺎﻻ ﻳﺎ ﻋﺮﻭﺳﺔ
ﺃﻣﺴﻚ ﻣﺮﻭﺍﻥ ﺑﺬﺭﺍﻉ ﻧﻴﺮﺓ ﺛﻢ ﺗﺄﺑﻂ ﺑﻬﺎ ﻭﻫﻮ ﻳﻀﻐﻂ ﻋﻠﻰ ﻛﻔﻬﺎ ﺑﻘﺒﻀﺔ ﻳﺪﻩ ..
- ﻣﺮﻭﺍﻥ ﺑﺼﻮﺕ ﺧﺎﻓﺖ : ﻟﻴﻠﺘﻚ ﻫﺘﺒﻘﻰ ﻧﺎﺭ ﻣﻌﺎﻳﺎ
- ﻧﻴﺮﺓ ﺑﺼﻮﺕ ﻫﺎﻣﺲ : ﻧﺎﺭ ﻫﺘﺤﺮﻗﻚ ﺍﻥ ﺷﺎﺀ ﺍﻟﻠﻪ
- ﻣﺮﻭﺍﻥ : ﻣﺶ ﻟﻮﺣﺪﻱ ﻳﺎ .. ﻳﺎ ﻣﺪﺍﻡ ﻣﺮﻭﺍﻥ ﺍﻟﻨﻘﻴﺐ
